Mateo 6
6
Pitapis mana wilapaypa muchuqkunata yanapänansipaq Jesús yachasishqan
1<<Paqtäraq runakuna rikayäshunalaykipaq alikunata rurayanki.#Mat. 23.5. Sayno rurayaptikiqa jana pasacho kaykaq Taytayki manami ima premiutapis qoyäshunkisu.
2<<Muchuqkunata yanapäyashpayki ama orgullösu runakunanöqa sumäsiyankisu. Paykunaqa cornëtata tukaqnöraqmi sinagögakunacho y cällikunachöpis yanapashqanta wilakuyan. Rasunpami nï: Paykunapaqa runakuna alabayashlannami premiunkuna kanqa. 3Pitapis yanapäyashpayki ama wilakuyankisu. 4Mana wilakuylapa yanapäyaptikiqa Taytaykimi [lapanpa nawpancho] premiuta qoyäshunki.
Tayta Diosta manakunansipaq Jesús yachasishqan
Lucas 11.2-4
5<<Tayta Diosta manakur ama orgullösu runakunanöqa manakuyankisu.#Luc. 18.10-14. Paykunaqa runakuna rikayänalanpaqmi sinagögakunacho y cälli esquïnakunachöpis ichiykur Tayta Diosta manakuyan. Rasunpami nï: Paykunapaqa runakuna alabayashlannami premiunkuna kanqa. 6Tayta Diosta manakurqa wayikiman yaykuykur punkuykita wichqakurkur manakuyanki. Saycho kikilayki manakuyashqaykita rikarmi Taytaykiqa [lapanpa nawpancho] premiuta qoyäshunki.
7<<Mana Israel runakunaqa say palabralawanmi yaparir yaparir manakuyan. Sayno manakuyan Tayta Dios wiyananpaq kashqanta yarparmi. Qamkunaqa ama sayno manakuyankisu. 8Manaraq manakuyaptikipis Taytaykiqa imata nistaykäyashqaykitapis maynami musyaykan. 9Qamkunaqa Tayta Diosta kayno manakuyanki:
<< <Jana pasacho kaykaq Papä, qampa jutiki respitash kaykuläsun.
10Kay pasacho mandaq kanaykipaq shamuykulay.
Jana pasacho cäsukuyäshushqaykino kay pasachöpis cäsukuykuyäläshunki.
11Waran waran mikuyänäpaq mikuyta kamaripaykayälämay.#Prov. 30.8-9.
12Chikimaqnïkunata perdonayashqäno noqakunatapis perdonaykayälämay.
13Jusalikuyman ama kachaykayälämaysu.
Saypa trukanqa mana alikunapita sapaykayälämay.
[Qampa makikichömi imaykapis kaykan.
Lapanpaq munayyuqmi kaykanki.
Imayyaqpis alabash kaykulay. Amén.]> >>
14<<Runa mayikita perdonayaptikiqa qamkunatapis jana pasacho kaykaq Taytayki perdonayäshunkimi. 15Runa mayikita mana perdonayaptikimi isanqa qamkunatapis perdonayäshunkisu.#Mar. 11.25-26.
Ayünupita Jesús yachasishqan
16<<Ayunayashpayki ama orgullösu runakunano kayankisu. Paykunaqa runakuna rikayänalanpaqmi almatakash puriyan. Rasunpami nï: Paykunapaqa runakuna alabayashlannami premiunkuna kanqa. 17Qamkuna ayunayashpaykiqa shumaq paqakuyanki y naqsakuyanki. 18Sayno rurayaptiki runakuna manami musyayanqasu ayunaykäyashqaykita. Runakuna mana rikayäshuptikipis lapantapis rikaq Taytaykimi rikaykäyäshunki. Paymi [lapanpa nawpancho] premiuta qoyäshunki.
Gloriaman riquëzata churakunansipaq Jesús yachasishqan
Lucas 12.33-34
19<<Kay pasacho riquëzata ama shuntayaysu. Kay pasacho riquëzataqa puyumi ushan, runami apakun y ismurmi ushakan.#Stg. 5.2-3. 20Saypa trukanqa gloriaman riquëzata churakuyay.#6.20 Gloriaman riquëzata churakunsi imansikunatapis rantikuykur say qellaywan muchuqkunata yanaparmi. Saypita tantiyanaykipaq liyinki Luc. 12.33-34. Gloriachöqa manami puyupis ushanqasu, runapis apakunqasu ni ismunqasu. 21Maymanmi riquëzaykita churayanki saylamanmi shonquyki yarparaykanqa.
Nawinsi aksino kashqan
Lucas 11.34-36
22<<Nawikikunami shonquykipaq aksino kaykan. Saymi nawikikuna ali kaptinqa shonquykipis aksicho kaykan. 23Nawikikuna mana ali kaptinmi isanqa sakaycho kaykäyanki. Shonquykicho aksi mana kaptinqa pasaypa sakäpakushqami kaykäyanki.#6.22-23 Sayno parlarqa Jesucristo kaynömi nirqan: Tayta Dios japalanta sirvirqa aksichönömi ali kawayan. Sayno mana sirvirmi isanqa sakäpakushno kawayan.
Rïcu kaylapaq mana yarpachakunansipaq Jesús yachasishqan
Lucas 16.13
24<<Manami pipis ishkay patronta sirvinmansu. Ishkay patronyuq karqa jukninta chikir juknintami kuyanqa. Jukninta cäsukur juknintaqa manami cäsukunqasu. Saynölami rïcu kaylapaq yarpachakurqa Tayta Diosta sirviyta kamäpakuyankisu.
Tayta Diosman yärakunansipaq Jesús yachasishqan
Lucas 12.22-31
25<<Sayno kaykaptinqa ama yarpachakuyaysu: <¿Imanöraq kawaykushaq? ¿Imataraq mikuykushaq? ¿Imataraq upushaq? ¿Imataraq jatikuykushaq?> nir. Manami mikuylapaq ni mödanalapaq yarpachakunansipaqsu kaykansi. 26Pishqukuna imano kawayashqantapis tantiyakuyay. Paykuna manami murukuyansu ni cosechayansu ni pirwakuyansu. Sayno kayaptinpis jana pasacho kaykaq Taytaykimi mikuyta puestupan. Tayta Diospaqqa pishqukunapitapis masmi väliyanki.
27<<Mayjina yarpachakurpis ¿piraq juk kukush maslatapis shaksharkunman? 28Sayno kaykaptinqa ¿imanirtaq yarpachakuyanki ali mödanayuq kayänaykipaq? Waytakuna imano winayashqantapis tantiyakuyay. Waytakuna manami arukuyansu ni puskakuyansu. 29Noqa kaynömi nï: Waytakuna kuyaylapaq kayashqannöqa manami rey Salomónpa mödanankunapis karqansu.#1Rey. 10.4-7; 2Crón. 9.3-6. 30Janan shonqula yärakuq runakuna, waray warantin rupasish kananpaq kaykaptinpis qewakunata kuyaylapaqta winaykäsirqa ¿manasuraq qamkunatapis nistäyashqaykita Tayta Dios kamaripäyäshunki?
31<<Sayno kaykaptinqa ama lakikuyaysu: <¿Imataraq mikushaq? ¿Imataraq upushaq? ¿Imataraq jatikushaq?> niyashpayki. 32Saynöqa lakikuyan Tayta Diosman mana yärakuq runakunalami. Jana pasacho kaykaq Taytayki imata munayashqaykitapis musyaykanmi. 33Imaykapitapis mas puntataqa Tayta Dios mandaykashqancho kawayänaykipaq y pay munashqanno kawayänaykipaq yarpachakuyay. Sayno kawayaptikiqa imata munayashqaykitapis kamaripäyäshunkimi. 34Cada junaq imalapis yarpachakuyänaykipaq kaykaptinqa waray junaqpaq ama yarpachakuyaysu.#Sal. 55.22; 1Ped. 5.7.
© 2003, Wycliffe Bible Translators, Inc. All rights reserved.