Mateo 22
22
Majasakay fiestaman tinkusiypa Jesús yachasishqan
Lucas 14.15-24
1Mastapis tinkusiypa yachasirmi Jesús nirqan: 2<<Tayta Dios mandaykashqanqa majasakay fiestanömi kaykan. Juk reyshi olqu surin majasakaptin fiestata ruranaq. 3Sayshi ashmayninkunata kachanaq invitashqan runakunata qayayämunanpaq. Qayasiptinpis manashi aywayta munayänaqsu. 4Saypitashi wakin ashmayninkunatana kachar ninaq: <Törükunata y werannin turïtukunatapis pishtarkasir mikuyta maynami yanukasishkäna. Lapanpis kamarishnami kaykan. Invitashqä runakuna shayämusunna>. 5Sayno nir qayasiptinpis manashi mayqanpis fiestaman aywayänaqsu. Wakinshi chakran aruq aywakuyänaq. Wakinshi negociun rantikuq aywakuyänaq. 6Wakinnashi reypa ashmayninkunata maqar wanusiyänaq.
7<<Sayshi reyqa fiyupa rabyakur soldädunkunata kachanaq. Chaykurshi ashmaynin wanusiq runakunata wanurkasir markantapis rupasiyänaq. 8Saypitanashi ashmayninkunata ninaq: <Surï majasakänanpaq lapanpis kamarishnami kaykan. Sayno kaptinpis invitashqä runakuna manakaqman churamarmi shayämushsu. 9Kanan nänikunapa aywar tariyashqayki kaqtaqa qayayämuy majasakay fiestaman shayämunanpaq>.
10<<Sayno niptinshi ashmayninkuna nänikunapa yarqur lapan tariyashqan runakunata wilayänaq. Sayshi ali runapis fiyu runapis wayiman juntaqpaq fiestaman chäyänaq. 11Invitashqan runakunata rikaq yaykurshi say rey rikanaq juk runa trukaküni kaykaqta. 12Sayshi say runata tapunaq: <Amïgu, majasakay fiestaman invitaykaptïqa ¿imanirtaq mana trukakuylapa shamushkanki?> Sayno tapuptinshi say runa ima niytapis kamäpakunaqsu. 13Sayshi ashmayninkunata rey ninaq: <Kay runata chakipita makipita pankarkur yanawyaykaq sakayman jitarpuyay. Saychömi fiyupa waqar kiruntapis uchunqa> >>.#Mat. 8.12; 25.30; Luc. 13.28.
14Sayno wilaparkurmi Jesús nirqan: <<Askaqtami Tayta Dios qayash. Isanqa walkaqlatami akrash>>.
Impuestuta pägayänanpaq Jesústa tapuyashqan
Marcos 12.13-17; Lucas 20.20-26
15Saypitanami fariseukuna templupita yarquskir wilanakuyarqan Jesústa imanöpapis lutanta parlasiyänanpaq. 16Saymi shumaq yacharkasir fariseukuna kachayarqan discïpulunkunata y Herodespa favornin sharkuq runakunata. Paykunami Jesústa niyarqan: <<Rabí, noqakuna musyayämi rasun kaqlata yachasishqaykita. Manami runakuna alabashunaykita munarsu yachasinki, saypa trukanqa Tayta Dios munashqannölami. 17Kanan mä niyämay. Romacho mandaq Césarpaq ¿impuestuta pägashwanku o manaku?>>#22.17 Israel runakuna niyarqan Romapaq impuestuta pägar Tayta Diospa contran kaykäyashqantami. Saymi: <<Impuestuta pägashun>> niptin Diospa contran Jesús parlashqanta niyanman karqan. <<Ama pägashunsu>> niptinqa Roma autoridäkuna rabyanäyanman karqan.
18Lutanta parlasinanpaq tapuyashqanta tantiyarmi Jesús nirqan: <<¡Ishkay cära runakuna! ¿Imanirtaq lutanta parlasimayta munayanki? 19Mä impuestu pägana qellayta rikasiyämay>>.
Sayno niptinmi sararäyashqan qellayta Jesústa aptaparkuyarqan. 20Sayta rikaykurmi Jesús tapurqan: <<Kay qellaycho ¿pipa reträtuntaq kaykan? Saynöpis ¿pipa jutintaq qelqaraykan?>>
21Sayno tapuptinmi niyarqan: <<Mandaq Césarpami>>.
Saymi Jesús nirqan: <<Césarpa kaqta Césarta qoykuyay. Tayta Diospa kaqtaqa Tayta Diosta qoykuyay>>.#22.21 Tayta Diospa kaqqa vïdansimi kaykan.
22Sayno niptinmi say runakuna espantash aywakuyarqan.
Wanushkuna kawariyämunanpaq kashqanta Jesústa tapuyashqan
Marcos 12.18-27; Lucas 20.27-40
23Say junaqlami saduceukuna Jesústa tapuq aywayarqan. Paykuna manami criyiyansu wanuqkuna kawariyämunanpaq kashqanta.#Hech. 23.8. 24Saymi Jesústa tapur niyarqan: <<Rabí, Moisés qelqashqancho nikan: <Warmiyuq runa suriynaq wanuptin wawqinmi cuñädan viüdawan tanqa. Saynöpami wamrankuna kaptin say wanuq wawqinpa surinkunano kayanqa>.#Deut. 25.5. 25Kanan niyäshayki. Juk kutishi qanchis wawqikuna kayänaq. Qechpa kaqshi juk warmita ashinaq. Payshi manaraq surin kaptin wanunaq. Sayshi shulka kaq wawqinna say viüdawan tänaq. 26Paypis surin manaraq kaptinshi wanunaq. Saypita mas shulkan kaqnashi say viüdawan tänaq. Paypis surin manaraq kaptinshi wanunaq. Saynölashi lapan wawqinkuna say viüdawan täyänaq. Surin manaraq kaptinshi lapanpis wanuyänaq. 27Saypitanashi say viüdapis wanukunaq. 28Wanushkuna kawariyämunan junaqqa ¿mayqanpa warminraq kanqa, qanchis wawqiwan tash kaykaptinqa?>>
29Sayno niyaptinmi Jesús nirqan: <<Qamkuna lutantami yarpäyanki. Manami Tayta Diospa palabrantapis ni Tayta Dios munayyuq kashqantapis tantiyayankisu. 30Kawarimurqa mananami pipis majasakanqanasu, saypa trukanqa jana pasacho [Tayta Diospa] angilninkunanölanami kayanqa. 31Wanushkuna kawariyämunanpaq kashqanta ¿manaku Tayta Dios niyäshushqaykita liyiyashkanki? Palabranchömi nin: 32<Abrahampa, Isaacpa y Jacobpa Diosninmi kaykä>.#Éxo. 3.6. Tayta Diosqa manami wanushkunapa Diosninsu, saypa trukanqa kawaykaqkunapa Diosninmi>>.
33Sayno yachasishqanta wiyaykurmi runakuna seqaypa kushikuyarqan.
Mas cäsukunansipaq kaq mandamientu
Marcos 12.28-34; Lucas 10.25-28
34 Saduceukunata upälasishqanta musyaykurmi fariseukuna shuntakaykur Jesús kaqman aywayarqan. 35Saychömi ley yachasiq juk fariseo runa Jesús yachashqanta o mana yachashqantapis musyayta munar tapurqan: 36<<Rabí, ¿mayqan mandamientutataq mas cäsukushwan?>>
37Sayno tapuptinmi Jesús nirqan: << <Tayta Diosta kuyayanki lapan shonquykikunawan, lapan voluntänikikunawan y lapan yarpaynikikunawan>.#Deut. 6.5. 38Kay mandamientumi lapan mandamientupitapis mas cäsukunansipaq kaykan. 39Saynölami juk mandamientupis nikan: <Kikiki kuyakushqaykino runa mayikita kuyanki>.#Lev. 19.18. 40Say ishkan mandamientuta cumplirqa Moisés qelqashqan lapan mandamientukunata y profëtakuna wilakuyashqantapis cumpliykäyankimi>>.#Luc. 10.25-28.
Davidpitapis Cristo mas mandaq kashqan
Marcos 12.35-37; Lucas 20.41-44
41 Fariseukuna saycho shuntakash kaykäyaptinmi Jesús tapurqan: 42<<Cristo ¿pï kashqantataq yarpäyanki? ¿Pipa Surintaq kaykan?>>
Sayno tapuptinmi niyarqan: <<Davidpa Surinmi, taytay>>.#22.42 Cristupaqqa David ayllu kaptinmi runakuna niyarqan Davidpa Surin kashqanta. Sayno niyarqan rey Davidpita miraq imayyaqpis mandananpaq Tayta Dios promitish kaptinmi. Saypita masta musyanaykipaq liyinki 2Sam. 7.10-16; Sal. 89.1-4, 19-37; 132.11-12.
43Saymi Jesús nirqan: <<Davidpa Surin kaptinqa ¿imanirtaq Espíritu Santu tantiyasiptin kikin Davidpis nirqan mandaqnin rey kashqanta? Pay nishqanqa kayno nirmi qelqaraykan:
44<< <Mandamaqnïtami Tayta Dios nirqan:
<<Aluq kaq nawpäman jamakamuy lapan chikishuqnikikunata munaynikiman churashqäyaq>> >.#Sal. 110.1.
45Kikin Davidpis mandaqnin rey kashqanta nikaptinqa ¿imanöpataq Cristuqa Davidpa Surin kanman?>>#22.45 Jesucristuqa manami David ayllu kashqanta ñëgarqansu, sinöqa Davidpita mas munayyuq kashqantami nirqan.
46Sayno niptin manami pipis ima niytapis kamäpakurqansu. Say junaqpita pasa manami pipis Jesústa tapupayta almitirqannasu.
© 2003, Wycliffe Bible Translators, Inc. All rights reserved.