Mateo 18
18
Wamrano kanansipaq Jesús tantiyasishqan
Marcos 9.33-37; Lucas 9.46-48
1Juk kutimi discïpulunkuna Jesústa tapur niyarqan: <<Tayta Dios mandaykashqancho ¿pitaq mas ali rikash kanqa, taytay?>>#Luc. 22.24.
2Saymi juk wamrata nawpanman Jesús qayaykur 3nirqan: <<Rasunpami nï: Wamrano mana karqa manami imaypis Tayta Dios mandaykashqanman yaykuyankipaqsu.#Mar. 10.15; Luc. 18.17. 4Pipis kay wamrano humildi kaqmi Tayta Dios mandaykashqancho mas ali rikash kanqa. 5Saynölami kay wamrano kaqkunata noqapa jutïcho pipis chaskirqa noqatapis chaskiykäman.
Jusaman mana ishkisinansipaq Jesús tantiyasishqan
Marcos 9.42-48; Lucas 17.1-2
6<<Pipis noqaman yärakamaq juk wamralatapis jusalikasiptinqa mas alimi kanman mulinu rumita kunkanman shequparkur lamarman qarpuriyaptinpis. 7¡Wawalaw, imanöraq kayanqa pitapis jusalikasiq runakuna! Sayno runakuna kay pasacho imaypis kayanqami. Paykuna fiyupa castigashqami kayanqa.
8<<Sayno kaptinqa makiki o chakiki jusalikasiyäshuptiki kusurir jitariykuyay. Imaypis mana upiq ninaman ishkay chakiyuq o ishkay makiyuq qaykush kayänaykipa trukanqa mas alimi kanman juk chakiyuqlapis o juk makiyuqlapis Tayta Diospa nawpanman chäyaptiki.#Mat. 5.30. 9Saynöla nawikipis jusalikasiyäshuptikiqa oqtirir jitariykuyay. Infiernuman ishkay nawiyuq qaykush kayänaykipa trukanqa mas alimi kanman wisku nawilapis Tayta Diospa nawpanman chäyaptiki.#Mat. 5.29.
10<<Noqa kaynömi nï: Kay wamrakunapa angilninkunami jana pasacho Taytäpa nawpancho imaypis kaykäyan. Sayno kaykaptinqa kay wamrakunata manakaqman ama churayaysu. 11[Runapa Surin shamush oqrakashkunata salvananpaqmi.]#Luc. 19.10.
Oqrakash uyshaman tinkusiypa Jesús yachasishqan
Lucas 15.3-7
12<<Pipis pachak (100) uyshanpita jukta oqraykurqa ¿manaku wakin kaqta aylluykur jukla ashiq aywan? 13Tariykurqa esqun chunka esqun (99) uyshankunapaq kushikushqanpitapis masraqmi kushikun. 14Saynölami jana pasacho kaykaq Taytäpis munansu juk wamralapis oqrakänanta.
Yärakuq mayinsita tantiyasinansipaq Jesús tantiyasishqan
Lucas 17.3
15<<Yärakuq mayiki rabyanäsiyäshuptikiqa tantiyasiyänaykipaq japalanwan parlayanki. Chaskikuptinqa perdonar amistayanki.#Luc. 17.3. 16Mana chaskikuptinqa yapay tantiyasiyänaykipaq juk ishkay yärakuq mayikita pushayanki. Saynöpami imata nishqaykitapis mana ñëgananpaq ishkay o kimsa testïgu kayanqa.#Deut. 19.15. 17Paykuna tantiyasiyaptinpis mana chaskikuptinqa yärakuq mayikikuna shuntakäyashqancho tantiyasiyänanpaq wilayanki. Paykuna niyashqantapis mana chaskikuptinqa amana say runawan shuntakäyankinasu. Saypa trukanqa mana Israel runatano y impuestu cobraq runatano rikayanki.
18<<Rasunpami nï: Kay pasacho watayashqaykiqa jana pasachöpis watashqami kanqa. Kay pasacho paskayashqaykiqa jana pasachöpis paskashqami kanqa.#18.18 Apostolkuna watayashqanpaq parlarqa mana cäsukuqkunata corrigiyänanpaqmi Jesucristo parlarqan. Apostolkuna paskayashqanpaq parlarqa say mana cäsukuq runa tantiyakuptin payta perdonayänanpaqmi parlarqan. Saymi Jesucristo nishqanqa kayno ninan: Mana cäsukuqkunata corrigiyänaykipaq munayyuqmi qamkuna kaykäyanki.#Mat. 16.19; Juan 20.23. 19Yapaypis qamkunata nï: Ishkaqlapis say yarpayla manakuyaptikiqa jana pasacho kaykaq Taytä yanapäshunkimi. 20Juk ishkaqlapis jutïcho shuntakäyaptikiqa qamkunawanmi kaykäshaq>>.
Perdonanakur kawanansipaq Jesús nishqan
21Sayno yachasiptinmi Jesúsman witiykur Pedro tapurqan: <<Taytay, yärakuq mayï lutanta rurar rabyanäsimaptin ¿ayka kutitaq perdonäman? ¿Qanchis kutisuraq?>>
22Saymi Jesús nirqan: <<Manami qanchis kutilasu perdonankiman, sinöqa qanchis chunka (70) kuti qanchispis perdonanki>>.#Luc. 17.3-4.
23Saypitanami Jesús nirqan: <<Tayta Dios mandaykashqan imano kashqantapis wilapäshayki. Juk reyshi ashmayninkunata ninaq jaqan kayashqanpita cuentata qoyänanpaq. 24Jaqanta pägayänanpaqshi juk ashmayninta reyman pushayänaq. Say ashmayqa chunka waranqa (10,000) talentushi#18.24 Juk talentu karqan juk runa ishkay chunka (20) wata arur gänashqannömi. jaqan kanaq. 25Jaqanta pägayta mana kamäpakuptinshi yanapaqninkunata say rey ninaq: <Qellaynïta mana perdinäpaq kay runata, warminta, surinkunata y imaykankunatapis rantikuyay>.
26<<Sayno niptinshi ashmayninqa nawpanman qonqurpakuykur ruwakunaq: <Shuyaykalämay, tayta. Jaqaykita lapantachir pägaykuläshayki> nir.
27<<Sayno ruwakuptinshi say rey kuyapashpan lapan jaqanta perdonar manana rantikunänasu.
28<<Perdonaskiptin aywaykashqanchöshi tinkunaq jaqan kaq ashmay mayinwan. Say ashmay mayinqa pachak (100) denariulashi#18.28 Juk denariuqa juk junaq aruypa chaninmi karqan. jaqan kanaq. Sayno kaykaptinpis kunkapita aptakurkurshi ninaq: <¡Jaqäta pägamay!>
29<<Sayno ruraptinshi qonqurpakuykur ruwakunaq: <Shuyaykalämay, tayta. Jaqaykita lapantachir pägaykuläshayki> nir. 30Sayno ruwakuptinpis manashi perdonayta munanaqsu. Saypa trukanqa jaqanta pägashqanyaqshi carcilman wichqasinaq.
31<<Sayno rurashqanta rikaykurshi wakin ashmaykuna carcilcho kaq runata kuyapashpan reyman aywaykur ima päsashqantapis wilayänaq. 32Sayshi say runata qayaykasir rey ninaq: <¡Mana kuyapäkuq runa! Sayjinanpa jaqä kaykaptikipis ruwakamaptikimi lapanta perdonashkä. 33¿Imanirtaq qamta kuyapashqäno ashmay mayikita kuyapashkankisu?> 34Sayno nir fiyupa rabyakurshi kikintapis carcilman wichqasinaq. Saychöshi wardiakuna castigayänaq reypa lapan jaqanta pägashqanyaq>>.
35Sayno wilaparkurmi Jesús nirqan: <<Yärakuq mayikita lapan shonquykiwan mana perdonayaptikiqa saynölami qamkunatapis jana pasacho kaykaq Taytä rurashunki>>.
© 2003, Wycliffe Bible Translators, Inc. All rights reserved.