2 Co 7
7
1Ex chamc'ojlb'il wu'uj, atn jun tzo'n̈ tic yaljnac can Dios, yic ya'n can sti 'ayn̈ec. Yuj cha, caw qui wach' 'actquec can jantcn̈ej tas tz'i'n 'at qui niwnal yet' qui nab'enec 'a maysch'olnil. Yowlal tzqui wach' tojlb'tzejc qui nab'en si'mb'il, yuj qui xiwc'ojlalec 'a 'a.
'Ochnc scusc'ojlal eb' 'aj Corinto
2Caw tzeya'ch e nab'en 'ayn̈ on̈, 'in may junc ex 'aj x'och qui mul on̈. May junc ex xjuw 'el e nab'en cuj on̈, may pax junc ex, ex quixtj paxti on̈. 3Man̈ yujoc wa'n 'och junc tas 'a eyib'an̈, tzwaln 'at jun tzo'n̈ tic 'ayex. Yujto tox xwalb't 'ayex, caw 'ayx 'och 'a qui c'ojl on̈, yuj cha, wach'xam pitzn on̈ec, wach'xam tzon̈ chamec, palta junn̈j tzcutjec qui chamc'ojlan qui b'a. 4Caw tzex wa'ch yipc in c'ojol, tzex waln wach'il. Wach'xam niwn tas tz'ajx 'och 'a quib'n̈ on̈, palta caw tz'ajx sniwnal in c'ojol. Caw tzin tzalj si'mb'il.
5Yic on̈ jaw 'a Macedonia tic on̈, ma'ix 'ilj xon jac qui niwnal tic on̈, yujto caw oynn̈ej 'och yailal 'ayn̈ on̈, owln̈ej x'ajx 'och 'a quib'n̈ on̈. 'ay pax qui xiwc'ojlal on̈. 6Palta a Dios, a tz'a'n sniwnal sc'ojl jantcn̈ej mach 'aych 'a scusc'ojlal. A x'a'n sniwnal qui c'ojl on̈, yujto xjaw Tito 'a tic. 7Man̈ yujocn̈ej xjaw Tito, x'ajx qui niwnc'ojlal on̈, palta caw tzon̈ tzalj pax on̈, yujto xeyac' sniwnal sc'ojl Tito tic, yic yec' 'ayex. A xaln 'ayn̈ on̈, chajtlto caw tze nib'j tzin eyila. 'Ix yaln paxi, to caw tzex cus yuj jun e b'ojnac cha, 'ix yalni, to caw tzin e na'a. Yuj cha, 'ix wach' jaw in tzaljc'ojlal eyu'uj.
8Wach'xam caw x'och e cusc'ojlal yuj jun carta wa'jnac 'at 'ayex, palta matz in cus yu'uj. Cusnc in ton yuj 'a jun 'el, yujto xwab'i, to 'ochnc e cusc'ojlal jun tiempoal yu'uj. 9Ax ticnec, wach'xam x'och e cusc'ojlal yu'uj, palta tzin tzalji, yujto yuj e cusc'ojlal cha, e nan e b'a. Cusnc ex 'icha tznib'j Dios, yuj cha, may jac x'aj sjuw 'el e nab'en cuj on̈. 10Toto tzon̈ cusc 'icha tznib'j Dios, yuj jun cusc'ojlal cha, tzqui nanec qui b'a, ax qui colchjec. Toto 'ixta', matz on̈ caw cusc yu'uj, palta 'ay junc'aj xo cusc'ojlal. A jun cha, yic yolyib'n̈q'uinl tic. A eb' tzcus 'ixta', ton̈j tz'atcn eb' 'a chaml 'a jun 'ejmn̈ej yu'uj. 11Palta ax xo, caw 'ochnc e cusc'ojlal 'icha tznib'j Dios. Yuj cha, nac coti, tas 'ajnc ex yu'uj. Caw yelc'ojlal 'ochnc ex 'il, caw e coljnac e b'a, cotnc eyowl yuj jun maysch'olnil xb'o 'a e cal cha. Xiwnc ex paxi, caw e nib'jnac in e c'umoc, 'elnc 'a e c'ojl eya'n 'och 'a yib'n̈ jun 'ochnc smul cha. 'Ixta eyutjnac e ch'oxni, to man̈ex locnoc 'a jun maysch'olnil cha. 12A jun in carta cha, man̈ yujoc jun 'ochnc smul cha, in tz'ib'n 'ati, man̈ yujoc pax jun 'aj 'ochnc smul. Palta in tz'ib'jnac 'ati, sec tznachj 'el eyu'uj, to a 'a sat Dios, caw 'ay e chamc'ojlal 'ayn̈ on̈. 13Yuj cha, caw x'ajx sniwnal qui c'ojl on̈.
Man̈ cojnoc x'ajx sniwnal qui c'ojl on̈. Caw xwach' jaw pax qui tzaljc'ojlal on̈, yic xyaln Tito, to caw tzalj eyet'oc, yujto 'ix wach' jaw sniwnc'ojlal eyuj e masnil. 14A 'a jun 'el, ex wal wach'l 'a Tito tic, al ticnec, matz in q'uixw yuj tas waljnac cha. Jantcn̈ej tas caljnac 'ayx on̈, caw yel. An̈jtona', yic caln e wach'l 'a Tito on̈, caw yel xcal on̈. 15A Tito tic, caw niwn schamc'ojlal 'ayx ticnec, yujto tzna coti, chajtl eyutjnac eyiclni tas xyal 'ayex. Tznan cot paxi, to caw 'emmquilal eyutj e b'a yic e chan sc'och ta', xiwc'ojlal eyutjnac e b'a. 16Caw tzin tzalj ticnec, yujto tztac' ex wa'n 'och yipc in c'ojol.
Biblia Chuj San Sebastian © Sociedades Bíblicas Unidas, 1999.