माथ 12
12
जिरा़उक् माँहाँरेन प्रोभु
(मा़र २:२३-२८; ३:१-६; लु ६:१-११)
1ओनाको दिनरे जिसु दो जिरा़उक् माँहाँ हिलोक्रे फोसोल तालातेये चालाक्कान ताहेंकाना, आर उनिरेन चेला रेङगेच्केत्कोते गेले होहोत् आर जोजोमको एहोप् एना। 2खान फा़रिसिको दो ओना ञेलकेत्तेको मेतादेया, “ञेलमे आमरेन चेलाको दो जिरा़उक् माँहाँरे आ़न बिरुदको का़मियेत् काना।”
3उनि दोए मेतात्कोवा, “बापे पाड़हाव आकादा दा़उद चेत् ए चेका लाक्आ आच् साँवरेनको तुलुच् रेङगेच्लेदेरे?#१ सामुएल २१:१-६ 4चेत्लेका इसोराक् ओड़ाक्रे बोलोकाते सामाङाक् पिठा़इ जोमलेत्, ओने ओकाटाक् जोजोम दो आ़न बिरुदाक् ताहेंकान आर उनि सोङगेतेनको हों बाङ मेनखान एकेन नायकेको मोतोगे जोम लेक कान।#लेबितिकुस ६:१-११ 5से आ़नरे बापे पाड़हाव आकादा जिरा़उक् माँहाँरे नायकेको कोयजोङ ओड़ाक्रे जिरा़उक् माँहाँको भोंडेत् रेहोंको मिरिदोसको टारहावक् काना? 6मेनखान इञ मेतापेकाना नोंडे दो कोयजोङ ओड़ाक् खोन हों माराङिच् मेनाया। 7मेनखानपे बाडायले खान नोवा दो चेत् काना बाङमा माँयाँगेञ बा़सुताक् काना दाँड़ें दो बाङ, बिन दोसको दो ओहोपे दोस लेकोवा। 8एनते मानवा होपोन दो जिरा़उक् माँहाँरेन प्रोभु कानाय।”
बोरोच् ति होड़े बोगेकेदे
(मा़र ३:१-६; लु ६:६-११)
9आर जिसु दो ओंडे खोन सेनकाते ओनकोवाक् सुना़गोगकोरेये बोलोयेना। 10आर ञेलपे ओंडे दो मित्टेन ति बोरोच् होड़े ताहेंकाना। आदोको कुलिकेदेया, “जिरा़उक् माँहाँरे बोक्गे दो गानोक्आ से बाङा?” जेमोनको दारावआय।
11आदो जिसुइ मेतात्कोवा, “आपे मोदरे जाहाँय होड़ मेनाया ओने उनिरेन मित्टेन भिडिये ताहेनताय, आर उनि दो जिरा़उक् माँहाँरे खा़युँक्रेये ञुरलेन खान बाय तुल ओडोके?#लुक 14:5 12भिडि खोन मानवा दो तिना़क् आरतेत्ए सोरोसा? ओना इया़ते जिरा़उक् माँहाँरे बोगे का़मि दो गानोक्गेया।” 13खान उनि होड़े मेतादेया, “मासे ति तिया़रताम।” आदोए तिया़रकेदा, आर दोसाराक् ति लेकागे बोगे रुवा़ड़ेनताया। 14मेनखान फा़रिसिको दो ओडोक सेनकाते उनि उपा़रतेको चेपेत् मित् एना चेत्लेकातेको गोजेया मेनते।
इसोर बाछाव गुति
15आदो जिसु ओनाय बाडायकेत् खान ओंडे खोने सेन फाराक एना, आर आ़डि उता़र होड़को पाँजा इदिकेदेया, आर ओनको जोतो रुगिकोय बोगेकेत्कोवा, 16आरे का़जिया़ँउकेत्कोवा जेमोन आलोको सोदोरे, 17जेमोन जेसाया ना़बि होतेते रोड़लेन काथा पुरा़उक्;
18“ञेलपे इञरेन गुति ओने उनिञ बाछाव आकादे,
इञरेन दुला़ड़िया़ ओने उनिरे इञाक् जिवि कुसियाकान;
इञरेन जिउ उनिरेञ थामगा़डियेआ,
आर उनि दो सानाम होड़को बिचा़र रेयाक्ए ला़इ साडेयाकोवा।#जेसाया 42:1-4
19उनि दो बाङ दोए झोगड़ाक्आ आर बाङ दोए का़उमा़उआ
आर ओकोय हों कुलहिकोरे उनियाक् आड़ाङ बाको आँजोमताया।
20तालगा तुवा़क् आकान चुछि दो बाय रा़पुदा,
आर ञुड़ुङ ञुड़ुङोक् कान बा़ति दो बाय इड़िँजा।
होक बिचा़र आ़उरिये जित ओचोय हा़बिच्,
21आर सानाम होड़को उनियाक् ञुतुमरेको भोरसाक्आ।”
जिसु आर बेलसेबुल
(मा़र ३:२०-३०; लु ६:४३-४५; ११:१४-२३)
22उनरे बा़ड़िच् जिउ चापाड़ आकावादे मित्टेन काँड़ाँ आर गुङगा़ होड़ जिसु ठेनको आ़गुकेदेया, आरे बोगेकेदेया, ओनाते गुङगा़ होड़ दो रोरोड़ आर ञेञेल दाड़ेये ञामकेदा। 23आर जोतो गादेल होड़ भाड़ोयेनतेको मेनकेदा, “नुयगे बाङ दा़उद होपोन दो?”
24मेनखान फा़रिसिको दो ओना आँजोमकातेको मेनकेदा, “नुय दो बा़ड़िच् जिउको बाय ओडोक एत्कोवा बा़ड़िच् जिउकोरेन मुखिया़ बेलसेबुलाक् गोक्ड़ो बेगोरते दो।”#माथाय ९:३४; १०:२५
25आदो ओनकोवाक् मोनेजोङ बाडायकातेये मेतात्कोवा, “आपनार उपा़रते भिना़भिनिक् मित्के मित् राजोसटि दो उजा़ड़ोक्आ, आर आपनार उपा़रते भिना़भिनि आकान मित्के मित् नागराहा से घारोंज दो बाङ टिका़उक्आ। 26आर सायतानगे सायताने ओडोक गिडिये खान, आच् उपा़रते चोय भिना़भिनि आकान, आदो चेकाते उनियाक् राजोसटि दो टिका़उक्आ? 27इञ दो बेलसेबुल होतेते बा़ड़िच् जिउकोञ ओडोक गिडियेत्को खान, आपेरेन होपोनको दो ओकोय होतेतेको ओडोक गिडियेत्कोवा? ओनाते ओनकोगे आपेरेन बिक्चा़रकोको होयोक्आ। 28मेनखान इसोररेन जिउ होतेते बा़ड़िच् जिउकोञ ओडोक गिडियेत्को खान एनडेखान इसोराक् राजगे हेच्आकावात्पे चोङ।”
29“से चेकाते दाड़े होड़ाक् ओड़ाक्रे बोलोकाते उनियाक् धोन दा़उला़ते लुट दाड़ेकेया, उनि दाड़े होड़ बाय तोल माड़ाङले खान? एनखानते उनियाक् ओड़ाक् ए लुटताया।”
30“इञ सेच्रेन बाङकानिच् दो इञ बिरुदरेन कानाय, आर इञ साँवते बाङ सासामटाविच् दोए छिटिया़वा।#मा़रकुस ९:४० 31ओना इया़तेञ मेतापेकाना, मानवाको दो सानाम का़इ आर हेनोसता इका़क्ताकोवा, मेनखान सोनोत जिउ रेयाक् हेनोसता दो बाङ इका़क्ताकोवा। 32आर जाहाँय मानवा होपोन बिरुदरे काथाय रोड़, इका़क्ताया, मेनखान जाहाँयगे सोनोत जिउ बिरुदरेये रोड़, उनियाक् दो बाङगे इका़क्ताया। नोवा जुगरे हों बाङ आर दाराकान जुग रेहों बाङ।”
दारे आर जो
(लु ६:४३-४५)
33“जुदि दारे बोगेपे मेताक् कान खान जो तेत् हों बोगे मेताक्पे, आर बाङ खान दारे हों बा़ड़िच् आर जो तेत् हों बा़ड़िच् मेताक्पे, एनते जो रेगे दारे दो ओरोमोक्आ।#माथाय ७:२० 34ए का़रिना़ङगिन होपोनको चेकाते भागेयाक्पे रोड़ दाड़ेयाक्आ बा़ड़िच्पे ताहेनते दो? एनते मोनरे ओका सारेड़ोक् कान ओनागे मोचा दोए रोड़ा।#माथाय ३:७; २३:३३; १५:१८; लुक ३:७ 35भागे होड़ दो आयाक् भागे बाबायाक् खोन भागे भागेयाक्ए ओडोका, आर बा़ड़िच् होड़ दो आयाक् बा़ड़िच् बाबायाक् खोन बा़ड़िच् बा़ड़िच्आक्ए ओडोका।” 36“आर इञिञ मेतापेकाना, मिमित् आ़उड़ि काथा ओका होड़को रोड़ बिचा़र दिनरे ओना रेयाक् लेखा जोखा एमोक् होयोक्ताकोवा। 37एनते आमाक् काथाते बिन दोसेम टारहावक्आ, आर आमाक् काथातेगेम दोस ओचोक्आ।”
जिसु खोन फा़रिसिको चिनहा़को खोजकान
(मा़र ८:११-१२; लु ११:२९-३२)
38खान आदोम आदोम सोसतोर बाडायको आर फा़रिसिको दो जिसुको मेतादेया, “ए गुरु आम ठेन मित्टेन चिनहा़ ञेञेल सानायेत्लेया।” 39मेनखान जिसु दोए रोड़ रुवा़ड़ात्कोवा, “मित्टेन बा़ड़िच् आर लाटघा़टि पिड़हिरेनको दो चिनहा़को ञामकाना, आर चेत् चिनहा़ हों बाङ एम आकाना, जोना ना़बि रेयाक् चिनहा़ छाडा दो। 40एनते चेत्लेका जोना दो पे सिञ पे ञिंदा़ माराङ ला़टु हाकोवाक् लाच्रेये ताहेंकाना, ओनकागे मानवा होपोन हों पे सिञ पे ञिंदा़ ओत भितरिरेये ताहेना। 41निनवेरेन होड़ दो बिचा़ररे नोवा पिड़हिरेनको तुलुच् तेङगोकाते दुसिको टारहावकोवा, एनते ओनको दो जोनावाक् पोरचारते मोनको आ़चुरकेदा, आर ञेलपे नोंडे दो जोना खोन हों माराङिच् मेनाया। 42दा़खिन दिसा़मरेन रा़नि दो बिचा़ररे नोवा पिड़हिरेनको तुलुच् बेरेत्काते दुसिये टारहावकोवा एनते उनि दो धा़रति मुचा़त् खोन सुलेमान रेयाक् आकेल आँजोमे हेच्लेना, आर ञेलपे नोंडे दो सुलेमान खोन हों माराङिच् मेनाया।”
बेसाफा जिउ
43बेसाफा जिउ दो होड़ खोने ओडोकलेनरे खाङगोट जायगाकोरेये दाड़ाना जिरा़उ ञाम ञामते, आर बाय ञामा। 44उनरेये मेना, ओका खोन इञ ओडोक हेच्लेन इना़ इञाक् ओड़ाक्तेगेञ रुवा़ड़ा, खान उनि दो रुवा़ड़काते आ़जा़उड़ि, जोक् चिका़ँड़ आर साजावाकात्ए हेच् ञामा। 45खानगे सेनकाते आच् खोन आरतेत् बा़ड़ति बा़ड़िच् एयाय गोटेच् एटाक् जिवे सोङगेतोरा जोङा, आर बोलोकाते ओंडेको मा़न्डिया़उक्आ, आर उनि होड़ाक् मुचा़त् दोसा दो पा़हिलाक् खोन आरतेत् बा़ड़िच् होयोक्आ।
जिसुरेन एङगात आर बोयहाको
(मा़र ३:३१-३५; लु ८:१९-२१)
46जिसु दो ओनको गादेल होड़े गालमारावाकोकान ताहेंकानरेगे, ञेलपे एङगात आर बोयहातायको बाहरेरे तेङगोवाकान उनि तुलुच् गालमारावको ञामकान ताहेंकाना। 47आदो मित् होड़ उनिये मेतादेया, “ञेलमे एङगाम आर बोयहामताको बाहरेरे तेङगोवाकान, आम तुलुच् गालमारावको ञामकाना।” 48मेनखन उनि दो ला़ला़इयिच् ए रोड़ रुवा़ड़ादेया, “ओकोय कानाय एङगाञ आर ओकोय कानाको बोयहाञको दो?” 49आदो आच्रेन चेलाको सेच् ति तिया़रकातेये मेनकेदा, “नोकोआनेच् एङगाञ आर बोयहाञको दो। 50एनते जाहाँयगे सेरमारे मेनाय आ़पुञाक् मोने लेकाय सेनोक्, उनि कानगेयाय बोयहाञ आर मिसराञ आर एङगाञ दो।”
The New Testament Books in Santhali Language © The Word for the World International and Santhali Translation Project, Nepal, 2025