Эге дөс 28
28
1Исаак Иаковту келдирип алгаш, ону алгап-йөрээп кааш, мону чагаан: «Хананей чондан кадай албас сен. 2# Э. д. 22:23; 24:29-30Паддан-Арамче чорувут. Аваңның ачазы Батуилдиң аал-оранынга баргаш, даайың Лаванның уругларының аразындан кадайдан тып ал. 3Күчүлүг Бурган сеңээ ачы-буян хайырлап, сээң үре-салгалыңның санын хөй кылып каар, сенден хөй-хөй чоннар тыптып тараар. 4# Иис. 21:43Сеңээ болгаш сээң үре-салгалыңга Авраамга бергени дег ачы-буянны Ол дамчыдып берзин. Ынчан сен даштыкы кижи бооп чурттап турган чериңни, Бурганның Авраамга берген черин, өнчү кылдыр алыр сен». 5Исаак Иаковту салып чорудуптарга, ол Паддан-Арам чурттуг арамей Батуилдиң оглу, Иаков биле Исавтың авазы Ревекканың акызы Лаванче чорупкан.
Исавтың Измаилдиң уруун кадай кылдыр ап алганы
6Исаак Иаковту алгап-йөрээгеш, хананей чоннуң уругларындан кадай албазын чагааш, кадай тып алзын дээш, Паддан-Арамче чорудупканын Исав билип каан. 7Иаков бодунуң ада-иезиниң сөзүн дыңнааш, Паддан-Арамче чорупканын база билген. 8Хананей чоннуң уругларын кадайланып алганы ачазынга таарышпас-тыр деп чүвени Исав база билип каан. 9# Э. д. 25:13; 36:3Ынчангаш өске кадайларынга немештир Исав Измаил сугга баргаш, Авраамның оглу Измаилдиң уруу, Навайоттуң дуңмазы Махалатты база кадай кылдыр ап алган.
Иаковтуң дүжү
10Иаков Беэр-Шевадан Харранче чорупкан. 11Ол бир-ле черге чедип келгенде, караңгылап каарга, аңаа хонар апарган. Ында даштарның бирээзин алгаш, сыртангаш, чыдып алган. 12Дүжүнде ол чер биле дээрни тудуштуруп турар чада көрген. Бурганның төлээлери ол чадалап үнүп, дүжүп турар бооп-тур#28:12 Мында зиккуратты, храм-суурганы, бодап турар болгу дег. Месопотамияның чурттакчыларының бүзүреп турганы дег, зиккураттың калбак даш чадазы кижилер оранын бурганнарның чурттаан чери-биле тудуштуруп турган.. 13# Иис. 21:43Ол чадада Дээрги-Чаяакчы туруп алган чугаалап турган: «Мен Дээрги-Чаяакчы, сээң өгбең Авраамның база ачаң Исаактың Бурганы-дыр мен. Сээң чыдар чериңни Мен сеңээ болгаш сээң үре-салгалыңга өнчү кылдыр берип тур мен. 14# Э. д. 12:3; 13:16; 22:18; 26:4Сээң үре-салгалың черниң элезин-довураа дег хөй болур, олар чөөн чүктен барыын чүкке чедир, соңгу чүктен мурнуу чүкке чедир нептереп чурттаарлар; чер кырында бүгү аймактар сени дамчыштыр болгаш сээң үре-салгалың дамчыштыр ачы-буян алырлар. 15Каяа-даа чорзуңза, Мен сээң-биле кады мен. Сени Мен камгалаар мен – бо чуртче сени дедир эгидиптер мен. Сени Мен кагбас мен: аазаан чүвемни шуптузун күүседир мен».
16Иаков уйгузундан оттуп келгеш: «Дээрги-Чаяакчы ылап-ла бо черде бар-дыр, а мен ону билбейн чораан-дыр мен!» – дээн. 17Ооң соонда ол коргуп: «Бо черниң коргунчуун аа! Бо дээрге дээрлерже эжик, Бурганның бажыңы-дыр!» – деп чугаалаан.
18 # Э. д. 35:14; Иис. 4:1-10; 1 Хаан. 7:12Иаков эртен эрте тургаш, сыртанып хонган дажын тураскаал кылдыр тургускаш, ону ыдыктап, кырынче олива үзү кудуп каан#28:18 Бурунгу Чоокку чөөн чүкте ыдыктыг даштарны, көжээ даштарны дег, тургуза салып турган. Ындыг даштарны, бир-ле бурганның чурттап турар черин дег, хүндүткээр. Оон орай еврей дүрүм-хоойлу ыдыктыг даштар тургузарын хоруп каан (Ы. х. к. 16:22).. 19# Э. д. 35:6, 15; 48:3Ол черни Вефил деп адап каан#28:19 «Вефил» деп ат «Бурганның бажыңы» дээн уткалыг. Вефилде ыдыктыг чер хөй чүс чылдар дургузунда Израильдиң эң чугула шажынчы төптериниң бирээзи бооп келген (3 Хаан. 12:26-33)., а хоорайның эрги ады Луз чүве-дир. 20# Сан. 21:2; Башт. 11:30; 1 Хаан. 1:11; 2 Хаан. 15:8Ынчан Иаков мындыг даңгыракты берген: «Бир эвес Бурган мээң-биле кады болза, каяа-даа чорумда, мени камгалап, аъш-чем база хеп хайырлап чоруур болза, 21база мен адамның аалынче тайбың ээп кээр болзумза, ынчан Дээрги-Чаяакчы мээң база Бурганым болур. 22# Э. д. 14:20; Лев. 27:30Тураскаал кылдыр салып каан мээң бо дажым Бурганның ыдыктыг чери болур. Меңээ хайырлааның өнчүнүң онгу кезээн Сеңээ берип өргүүр мен, Бурган».
© Институт перевода Библии, 2025