Хосталыышкын 6
6
1Дээрги-Чаяакчы Моисейге: «Фараонну ам канчаарымны көөр сен: улуг күжүмнү ажыглаптарымга, ол израиль чонну салып чорудуптар; харын-даа ону бодунуң черинден үндүр сывырыптар» – деп чугаалаан.
Бурганның Бодунуң даалгазын Моисейге катаптааны
2Бурган Моисейге улаштыр мынча дээн: «Мен – Дээрги-Чаяакчы-дыр мен. 3# Э. д. 17:1Мен Авраамга, Исаакка болгаш Иаковка Күчүлүг Бурган деп ат-биле көстүп кээп турган мен, а Дээрги-Чаяакчы деп адымны оларга угаатпаан мен. 4Мен олар-биле чагыг-керээ чарган мен – оларның ынчан чурттап, көжүп чорааны ханаан черни оларга бээрин аазаан мен. 5Израиль чоннуң египетчилерге кулдаттыргаш, хомудаанын дыңнап кааш, ол чагыг-керээни бодап келдим. 6Ынчангаш израиль чонга мону чугаала: „Мен – Дээрги-Чаяакчы-дыр мен. Силерни египет дарлалдан хостап үндүрер мен, египетчилерге кулдар болбас силер. Өндүр улуг күчү-күжүм-биле база коргунчуг кеземчелерим-биле силерни камгалаар мен. 7# Иез. 20:5Мен силерни Бодумнуң чонум кылдыр хүлээп алыр мен, силерге Бурган болур мен. Силерни египет дарлалдан хостап үндүрген Дээрги-Чаяакчы Бурганыңар – Мен-дир дээрзин билип аар силер. 8# Э. д. 15:18; 26:3; 35:12Авраамга, Исаакка болгаш Иаковка бээр бооп даңгыраглааным черже силерни чедире бээр мен. Ол черни силерге салгал дамчыыр өнчү кылдыр бээр мен. Мен – Дээрги-Чаяакчы-дыр мен!“» 9Моисей ол сөстерни израиль чонга дамчыдып чугаалаан, ынчалза-даа олар сорук чогундан база аар-берге ажылдарга чилчии үзүлгенинден ону дыңнавайн барганнар.
10Дээрги-Чаяакчы ынчан Моисейге: 11«Египеттиң хааны фараонга баргаш, ооң израиль чонну бодунуң чуртундан салып чорудар ужурлуун чугаала» – дээн.
12Моисей Дээрги-Чаяакчыга: «Израиль чон безин мени тооп дыңнавайн турда, фараон мени тооп дыңнаар деп бе? Мен дылым чечен эвес кижи болгай мен» – деп харыылаан. 13Дээрги-Чаяакчы Моисей болгаш Аарон-биле ынчалдыр чугаалажып, оларны израиль чонче база Египеттиң хааны фараонче чорудупкаш, израильчилерни ооң черинден үндүрер айтыышкынны берген.
Моисей биле Аароннуң ада-өгбе даңзызы
14 # Э. д. 46:8-11Моисей биле Аароннуң ада-өгбелериниң өг-бүле баштыңнары бо-дур.
Иаковтуң улуг оглу Рувимниң оолдары – Энох биле Фаллу, Хецрон биле Харми олар Рувимден укталган төрел бөлүктер баштыңнары-дыр.
15 # Э. д. 46:10; Сан. 26:12-13Симеоннуң оолдары – Иемуил, Ямин, Огад, Яхин, Цохар биле хананей авалыг Саул олар Симеондан укталган төрел бөлүктер баштыңнары-дыр.
16 # Сан. 3:17; 1 Чыл. 6:16А Левий 137 чыл чурттаан, ооң соон салгаан оолдарын Гирсон, Кохат болгаш Мерари дээр турган. 17Гирсоннуң оолдары Ливни болгаш Шимей болур, олардан база төрел бөлүктер укталган. 18Кохат 133 чыл чурттаан. Ооң оолдары Амрам биле Ицгар, Хеврон биле Узиил олар болур. 19# Сан. 26:57-58Мерариниң оолдары Махли болгаш Муши болур. Левийден укталган төрел бөлүктерниң баштыңнары ол-дур.
20 # Сан. 26:59Амрам 137 чыл чурттаан. Ол ачазының дуңмазы Иохаведаны кадай кылып алган. Иохаведа Амрамга Аарон биле Моисейни божуп берген. 21# Сан. 16:1-35Ицгарның оолдары Корах, Нефег болгаш Зихрий болур. 22# Лев. 10:4Узиилдиң оолдары Мисаил, Элицафан болгаш Сифри болур.
23 # Сан. 1:7; 2:3 || Сан. 26:60-61Аарон бодунга кадай кылдыр Аминадавтың уруу, Наассоннуң дуңмазы Елисаветаны ап алган. Елисавета Ааронга Надав биле Авиудту, Элеазар биле Ифамарны божуп берген. 24# Сан. 26:11; 1 Чыл. 6:22-23Корахтың оолдары Асир, Элкана болгаш Авиасаф олар Корахтан укталган төрел бөлүктерниң баштыңнары-дыр. 25# Сан. 25:7Аароннуң оглу Элеазар Футиилдиң бир уруун кадай кылдыр ап алган. Кадайы Элеазарга Финеести божуп берген. Левийден укталган төрел бөлүктерниң улуг баштыңнары ол-дур.
26Аарон биле Моисей дээрге Дээрги-Чаяакчының: «Израиль чонну египет черден чурум-чыскаалдыг бөлүктерге үскеш, үндүре бериңер» – деп турганы улус ол-дур. 27Египеттиң хааны фараон-биле чугаалажып, ооң израиль чонну Египеттен салып чорударын негеп турган улус – Моисей биле Аарон ол-дур.
Бурганның Моисей биле Ааронну томуйлааны
28Ол үеде Дээрги-Чаяакчы Египетке Моисей-биле чугаалашкан. 29Дээрги-Чаяакчы Моисейге: «Мен – Дээрги-Чаяакчы-дыр мен! Египеттиң хааны фараонга Мээң сеңээ чугаалаан бүгү чүвемни дамчыт» – дээн.
30А Моисей Дээрги-Чаяакчыга: «Мен чечен эвес кижи болгай мен, фараон мени тооп дыңнаар бе?» – деп харыылаан.
© Институт перевода Библии, 2025