Mak 8
8
Jiso yúʼ ŋkɔŋ-bʉə-hə kwi
(Matia 15:32-39)
1Kʉ̂ʉ bɛ mu bəchî-ghɔ̄ ndʉʉ ndə nuɔ-bʉə-buŋmbi bìʼ chə̀ŋtə, təmə kie fɔkə ndə məyú fɛ, Jiso tíi vâafɔʼɔ-bi ghɔ̀ŋ tʉ bɔŋ mbɔ, 2“Tʉkə-ɔŋ nɔ tʉʼ vyíi ndəŋ nuɔ bʉə-bɔ̄ŋ, bʉʼka bɔ̂ŋ nɔʼ bɛ baʼa bɔŋ ndə chîbə itia təmə kie fɔkə ndə məyú fɛ. 3Kaʼ mɔ téʼ mbɔ b̈ɔ̂ŋ bʉ̀nə chu-təlɔʼ-bɔŋ nə jyʉʉ, bɔ̂ŋ fyú gwùtə sêfia. Bɔŋ bəbɛʼbə mu bɔŋ nɔ lɔ̀ hə dɔdɔ.” 4Vâafɔʼɔ-bi bə̀ŋhə tʉ ɔŋ mbɔ, “Bəkɔ wo kie fɔyubə fa muŋkɔ fɛ̄ŋ ndə məyúʼ ntyʉʉ bʉə-bɔ̄ŋ?” 5Ɔ bíʼtə tʉ bɔŋ mbɔ, “Bii kie mbyu-bele-hə isɛʼɛ?”
Bɔ̂ŋ bə̀ŋhə mbɔ, “Təkwiitia.”
6Ɔ téʼ tʉ mbʉ nuɔ-bʉə mbɔ b̈ɔ̂ŋ dùʼtə sê. Ɔ kʉ̂ʉ lʉ̀ mbʉ mbyu-bele-hə təkwiitia, kɔ́ ndɔ chɔ, bə́ʼtə mbʉ bele kɔ́ tʉ vâafɔʼɔ-bi mbɔ bɔ̂ŋ gɛ̀ gyʉ̀ətə tʉ mbʉ bʉə, bɔ̂ŋ gɛ̀ gyʉətə tʉ bɔŋ. 7Bɔ̂ŋ kie mbyu-mbɔʼ-hə məniʼ, ɔ kʉ̂ʉ kɔ́ ndɔ chɔ tʉ Nyii, téʼ tʉ bɔŋ mbɔ b̈ɔ̂ŋ gɛ̀ tʉ́ʼtə bəshʉ bɔŋ. 8Bɔ̂ŋ yú tə yúotə, mbʉ vâafɔʼɔ bʉ̀nə byíi kwuʼkwuʼ-i, i lə́ŋ shyiibə təkwiitia. 9Bʉə nɔ nə bɛ chɔ tə kə́ gɛ̀ nə ŋkɔŋ-bʉə-hə kwi. Ɔ téʼ mbɔ b̈ɔ̂ŋ gɛ̀ nə wʉə. 10Haʼ ndʉʉmɛ, ɔ kóʼ mu kəbuu ghɔŋbə vâafɔʼɔ-bi gɛ̀ mu bie Damanuta.
Bʉə-Falasi kə́ kʉ́ʉ ndə mənyíɛ nukəcheʼkə
(Matia 16:1-4)
11Bʉə-Falasi gwè chʉ́ʉhə mətúŋ bəŋʉʉ ghɔŋbə Jiso, kə́ bíʼtə tʉ ɔŋ mbɔ ɔ̈ chìi nukəcheʼkə ndə i lɔ̀ hə kəghɔ-Nyii. Bɔ̂ŋ nɔ kə chìi yɔ̄ŋ-yə ndə məmùutə ɔŋ, 12Ɔ sɔ́ŋ shʉ́əshʉ́ə mu fyii-ɔ ghɔ̀ŋ mbɔ, “Chìi ka ŋgwie-wo-ɔ̄ kə́ kʉ́ʉ cheʼkə? Ndə shʉəŋ nɔʼ m̈ɔ shyíi bii mbɔ bə kʉʉ dʉ̀ʼ cheʼkə tʉ ŋgwie-wo-ɔ̄ fɛ.” 13Ndʉʉmɛ, ɔ mɛ̀ʼtə bɔŋ bìʼ kóʼ mu kəbuu dàa gɛ̀ ndəŋ ibɛʼ-yə via-muu-kə.
Yî-bʉə-Falasi ghɔŋbə Hɛlo
(Matia 16:5-12)
14Ndʉʉmɛ, tʉ vâafɔʼɔ-bi nɔʼ kə lèʼnə ndə məlʉ̀ bele, kie haʼ mbyu bele imɔʼ mu kəbuu. 15Ɔ shyùu tyunəkə-ʉə ghɔ̀ŋ mbɔ, “B̈ii láa, kə́ lɛ́nə jyujyu te yî-bʉə-Falasi ghɔŋbə yî Hɛlo.”
16Bɔ̂ŋ chʉ́ʉhə kə́ kwə́ʼ mu bɔŋ kə́ ghɔ̀ŋ mbɔ ɔ la tʉʼ ghɔ̀ŋ yɔ̄ŋ-yə bʉʼka mbɔ bɔ̂ŋ la kə lʉ̀ bele fɛ. 17Jiso kə́ kínə nukə ndə bɔ̂ŋ kə́ gìe, ɔ ghɔ̀ŋ tʉ bɔŋ mbɔ, “Chìi ka bii kə́ kwə́ʼ mbɔ bii kie bele fɛ? Bii chʉʼ nyíɛ chèʼnə fe? Bii bíe shʉ́əhə haʼ fyiihə-ii mɛ? 18‘Bii kie shʉ təmə kə́ nyíɛ fɛ mɛ? Bii kie tyunəbə təmə kə́ yʉ́ fɛ mɛ? Bii kyi kwɛ́nə nukə fe?’ 19Ndʉʉ ndə mɔ kə bə́ʼtə mbyu-bele-hə itaa yúʼ ŋkɔŋ-bʉə-hə chɔ itaa le, bii kə byíi kwuʼkwuʼ-i, i lə́ŋ shyiibə isɛʼɛ?” Bɔ̂ŋ bə̀ŋhə mbɔ, “Shyiibə njuɔ bûu nə wuŋ.”
20 “Mɔ kə bə́ʼtə mbyu-bele-hə təkwiitia tʉ ŋkɔŋ-bʉə-hə kwi le, bii byíi kwuʼkwuʼ-i, i lə́ŋ shyiibə isɛʼɛ?” Bɔ̂ŋ bə̀ŋhə mbɔ, “Təkwiitia.” 21Ndʉʉmɛ, ɔ bə̀ŋhə tʉ bɔŋ mbɔ, “I bìʼ shʉ́ə tʉ bii ndə məkínə mɛ?”
Jiso chʉ́ʼ fʉ̀əŋtəshʉ
22Ndʉʉ ndə Jiso kə gwè dàa Bɛsieda, bʉəbɛʼbə gwè nə wobɛʼ ndə shʉ-i nɔʼ fʉ̀əŋtə tʉ Jiso, fʉ̀ʉtə ɔŋ mbɔ ɔ̈ kə̀ŋ wo-ghɔ̄. 23Ɔ yá kwii mbʉ wo ndə shʉ-i nɔʼ fʉ̀əŋtə le fyú nə nɔŋ mu mbʉ lɔʼɔ, tyù ntɛmə shʉ mbʉ wo-ghɔ̄, mɔ̀ʼ ghɔkə-i ndəŋ ɔŋ bíʼtə mbɔ, “A nyíɛ fɔkə mɛ?” 24Ɔ chɔ̀ʼhə shʉ-i lɛ́nə ghɔʼ ghɔ̀ŋ mbɔ, “Mɔ nɔ nyíɛ bʉə bɔ̂ŋ kə́ tòʼ nə tyʉbə.” 25Ndʉʉmɛ, Jiso bìʼ mɔ̀ʼ ghɔkə-i shʉ-ɔ, ɔ ŋɔ́ʼhə shʉ-i, shʉ-i tʉ́ʉnə, ɔ kə́ nyíɛ yəŋkə jyujyu, nyíɛ fɔbə inchəŋ jyujyu. 26Ɔ téʼ tʉ ɔŋ ɔ gɛ̀ nə wi chunjaa-ɔ, ghɔ̀ŋ mbɔ, “Kə a mə buŋ tíŋ hə mu lɔʼɔ fɛ.”
Bita ghɔ̀ŋ mbɔ Jiso la bɛ mbʉ Wo ndə Nyii Kùŋ Tə́ŋ
(Matia 16:13-20; Luk 9:18-21)
27Jiso lɔ̀ ghɔŋbə vâafɔʼɔ-bi gɛ̀ mu lɔʼ-bətə̂ŋ-tə ndə i bɛ mbʉə Kasalia Filibai. Ndə bɔ̂ŋ kə́ gɛ̀, ɔ bíʼtə tʉ vâafɔʼɔ-bi mbɔ, “Bʉə tʉʼ ghɔ̀ŋ mbɔ mɔ bɛ nda?” 28Bɔ̂ŋ gìe tʉ ɔŋ mbɔ, “Jɔŋ ndə ɔ̃ kɔ́ muu, bəbɛʼbə kə́ ghɔ̀ŋ mbɔ a la bɛ Ɛlaja, bəbɛʼbə kə́ ghɔ̀ŋ mbɔ a la bɛ mbyu yʉkəŋgieNyiibɛʼ.” 29Ɔ bíʼtə tʉ bɔŋ mbɔ, “Bɔŋ bii tʉʼ ghɔ̀ŋ mbɔ mɔ bɛ nda?” Bita bə̀ŋhə mbɔ, “A nɔ bɛ Wo ndə Nyii Kùŋ Tə́ŋ.” 30Ɔ shyùu tyunəkə-ʉə jyujyu mbɔ bɔ̂ŋ mə yi shyíi wo nə yɔŋ fɛ.
Jiso kwə́ʼ te kwu-i
(Matia 16:21-28; Luk 9:22-27)
31Jiso chʉ́ʉhə mədàhə vâafɔʼɔ-bi mbɔ Vaa-Woməsʉʉ bu yaʼ nyíɛ ŋgʉəʼ ndə nubə buŋmbi, bəntəŋbəshʉ, mbʉ bətiefɛ̀ʼndɛŋNyii leʼnə mbʉ bʉə dàhə nuʼ-Mushi bu tɛ́ŋ ɔŋ, bɔŋleʼ yí ɔ, chîbə kʉ̂ʉ tíŋ itia nɔ ɔ bʉ̀nə kóʼ. 32Ndə ɔ kə kə́ kwə́ʼ yɔ̄ŋ-yə, ɔ yɔ̀ʼ tiɛŋ-ɛŋ tʉ bɔŋ, Bita lʉ̀ ɔ ghɔ́ŋ ɔŋ fí ŋwɔŋ-yʉə ɔ bɔ̌ŋ, ɔ chʉ́ʉhə kə́ sɔ́ʼ ɔ. 33Jiso kʉ̂ʉ kíahə ŋwɔŋ-ɛŋ lɛ́nə vâafɔʼɔ-bi, sɔ́ʼ Bita ghɔ̀ŋ mbɔ, “Bʉ̀nə bɔ̌ŋ mɔ, Sata! Bʉʼka a tʉ́ʼ ndaahə-a ndəŋ nu-Nyii-bə fɛ, a nɔ tʉ́ʼ bə ndəŋ nu-bʉəməsʉʉ-bə.”
34Ndʉʉmɛ, ɔ tíi nuɔ-bʉə ghɔŋbə vâafɔʼɔ-bi mbʉə ɔ ghɔ̀ŋ tʉ bɔŋ mbɔ, “Kaʼ wo mu bii kʉ̀ʉ ndə məgwè hə bɔ̌ŋ mɔ, ɔ nɔ kie ndə mətɛ́ŋ ŋwɔŋ-ɛŋ, bɛ̀ʼ tyʉntɔɔnəkə-i, gwè hə bɔ̌ŋ mɔ. 35Bʉʼka wo ndə ɔ kʉ̀ʉ ndə məkwáa ŋkwiitʉ-e bu bɛ́, bɔŋ wo ndə ɔ kɔ́ ŋkwiitʉ-e bʉʼka mɔ ghɔŋbə mbʉ ntəŋjyujyu, bu kie ŋkwiitʉ-e. 36Bəkɔ wo síi ka, kaʼ ɔ kie wʉʉnəmbikə inchəŋ bɔŋ bɛ́ ŋkwiitʉ-e. 37Bɛ ka ndə bəkɔ wo kɔ́ ndə mənyúɔ ŋkwiitʉ-e? 38Bɔŋ wotəmiyɔŋ ndə tʉkə-i tʉʼ vyíi bʉʼka mɔ ghɔŋbə ŋgiekə-ɔŋ mu ŋgwie-bəsəŋ-ɔ̄ŋ ghɔŋbə ŋgwie-bʉ̂ʼʉ-ɔ̄, tʉ-Vaa-Woməsʉʉ-kə bu vyíi te ɔ, ndʉʉ ndə ɔ bu gwè mu məŋwɔʼ Tie-e ghɔŋbə bʉəntəŋNyii ndə bɔ̂ŋ bɛ ŋkʉʉ.”
© 2025 Wycliffe Bible Translators, Inc.
Mak 8
8
Jiso yúʼ ŋkɔŋ-bʉə-hə kwi
(Matia 15:32-39)
1Kʉ̂ʉ bɛ mu bəchî-ghɔ̄ ndʉʉ ndə nuɔ-bʉə-buŋmbi bìʼ chə̀ŋtə, təmə kie fɔkə ndə məyú fɛ, Jiso tíi vâafɔʼɔ-bi ghɔ̀ŋ tʉ bɔŋ mbɔ, 2“Tʉkə-ɔŋ nɔ tʉʼ vyíi ndəŋ nuɔ bʉə-bɔ̄ŋ, bʉʼka bɔ̂ŋ nɔʼ bɛ baʼa bɔŋ ndə chîbə itia təmə kie fɔkə ndə məyú fɛ. 3Kaʼ mɔ téʼ mbɔ b̈ɔ̂ŋ bʉ̀nə chu-təlɔʼ-bɔŋ nə jyʉʉ, bɔ̂ŋ fyú gwùtə sêfia. Bɔŋ bəbɛʼbə mu bɔŋ nɔ lɔ̀ hə dɔdɔ.” 4Vâafɔʼɔ-bi bə̀ŋhə tʉ ɔŋ mbɔ, “Bəkɔ wo kie fɔyubə fa muŋkɔ fɛ̄ŋ ndə məyúʼ ntyʉʉ bʉə-bɔ̄ŋ?” 5Ɔ bíʼtə tʉ bɔŋ mbɔ, “Bii kie mbyu-bele-hə isɛʼɛ?”
Bɔ̂ŋ bə̀ŋhə mbɔ, “Təkwiitia.”
6Ɔ téʼ tʉ mbʉ nuɔ-bʉə mbɔ b̈ɔ̂ŋ dùʼtə sê. Ɔ kʉ̂ʉ lʉ̀ mbʉ mbyu-bele-hə təkwiitia, kɔ́ ndɔ chɔ, bə́ʼtə mbʉ bele kɔ́ tʉ vâafɔʼɔ-bi mbɔ bɔ̂ŋ gɛ̀ gyʉ̀ətə tʉ mbʉ bʉə, bɔ̂ŋ gɛ̀ gyʉətə tʉ bɔŋ. 7Bɔ̂ŋ kie mbyu-mbɔʼ-hə məniʼ, ɔ kʉ̂ʉ kɔ́ ndɔ chɔ tʉ Nyii, téʼ tʉ bɔŋ mbɔ b̈ɔ̂ŋ gɛ̀ tʉ́ʼtə bəshʉ bɔŋ. 8Bɔ̂ŋ yú tə yúotə, mbʉ vâafɔʼɔ bʉ̀nə byíi kwuʼkwuʼ-i, i lə́ŋ shyiibə təkwiitia. 9Bʉə nɔ nə bɛ chɔ tə kə́ gɛ̀ nə ŋkɔŋ-bʉə-hə kwi. Ɔ téʼ mbɔ b̈ɔ̂ŋ gɛ̀ nə wʉə. 10Haʼ ndʉʉmɛ, ɔ kóʼ mu kəbuu ghɔŋbə vâafɔʼɔ-bi gɛ̀ mu bie Damanuta.
Bʉə-Falasi kə́ kʉ́ʉ ndə mənyíɛ nukəcheʼkə
(Matia 16:1-4)
11Bʉə-Falasi gwè chʉ́ʉhə mətúŋ bəŋʉʉ ghɔŋbə Jiso, kə́ bíʼtə tʉ ɔŋ mbɔ ɔ̈ chìi nukəcheʼkə ndə i lɔ̀ hə kəghɔ-Nyii. Bɔ̂ŋ nɔ kə chìi yɔ̄ŋ-yə ndə məmùutə ɔŋ, 12Ɔ sɔ́ŋ shʉ́əshʉ́ə mu fyii-ɔ ghɔ̀ŋ mbɔ, “Chìi ka ŋgwie-wo-ɔ̄ kə́ kʉ́ʉ cheʼkə? Ndə shʉəŋ nɔʼ m̈ɔ shyíi bii mbɔ bə kʉʉ dʉ̀ʼ cheʼkə tʉ ŋgwie-wo-ɔ̄ fɛ.” 13Ndʉʉmɛ, ɔ mɛ̀ʼtə bɔŋ bìʼ kóʼ mu kəbuu dàa gɛ̀ ndəŋ ibɛʼ-yə via-muu-kə.
Yî-bʉə-Falasi ghɔŋbə Hɛlo
(Matia 16:5-12)
14Ndʉʉmɛ, tʉ vâafɔʼɔ-bi nɔʼ kə lèʼnə ndə məlʉ̀ bele, kie haʼ mbyu bele imɔʼ mu kəbuu. 15Ɔ shyùu tyunəkə-ʉə ghɔ̀ŋ mbɔ, “B̈ii láa, kə́ lɛ́nə jyujyu te yî-bʉə-Falasi ghɔŋbə yî Hɛlo.”
16Bɔ̂ŋ chʉ́ʉhə kə́ kwə́ʼ mu bɔŋ kə́ ghɔ̀ŋ mbɔ ɔ la tʉʼ ghɔ̀ŋ yɔ̄ŋ-yə bʉʼka mbɔ bɔ̂ŋ la kə lʉ̀ bele fɛ. 17Jiso kə́ kínə nukə ndə bɔ̂ŋ kə́ gìe, ɔ ghɔ̀ŋ tʉ bɔŋ mbɔ, “Chìi ka bii kə́ kwə́ʼ mbɔ bii kie bele fɛ? Bii chʉʼ nyíɛ chèʼnə fe? Bii bíe shʉ́əhə haʼ fyiihə-ii mɛ? 18‘Bii kie shʉ təmə kə́ nyíɛ fɛ mɛ? Bii kie tyunəbə təmə kə́ yʉ́ fɛ mɛ? Bii kyi kwɛ́nə nukə fe?’ 19Ndʉʉ ndə mɔ kə bə́ʼtə mbyu-bele-hə itaa yúʼ ŋkɔŋ-bʉə-hə chɔ itaa le, bii kə byíi kwuʼkwuʼ-i, i lə́ŋ shyiibə isɛʼɛ?” Bɔ̂ŋ bə̀ŋhə mbɔ, “Shyiibə njuɔ bûu nə wuŋ.”
20 “Mɔ kə bə́ʼtə mbyu-bele-hə təkwiitia tʉ ŋkɔŋ-bʉə-hə kwi le, bii byíi kwuʼkwuʼ-i, i lə́ŋ shyiibə isɛʼɛ?” Bɔ̂ŋ bə̀ŋhə mbɔ, “Təkwiitia.” 21Ndʉʉmɛ, ɔ bə̀ŋhə tʉ bɔŋ mbɔ, “I bìʼ shʉ́ə tʉ bii ndə məkínə mɛ?”
Jiso chʉ́ʼ fʉ̀əŋtəshʉ
22Ndʉʉ ndə Jiso kə gwè dàa Bɛsieda, bʉəbɛʼbə gwè nə wobɛʼ ndə shʉ-i nɔʼ fʉ̀əŋtə tʉ Jiso, fʉ̀ʉtə ɔŋ mbɔ ɔ̈ kə̀ŋ wo-ghɔ̄. 23Ɔ yá kwii mbʉ wo ndə shʉ-i nɔʼ fʉ̀əŋtə le fyú nə nɔŋ mu mbʉ lɔʼɔ, tyù ntɛmə shʉ mbʉ wo-ghɔ̄, mɔ̀ʼ ghɔkə-i ndəŋ ɔŋ bíʼtə mbɔ, “A nyíɛ fɔkə mɛ?” 24Ɔ chɔ̀ʼhə shʉ-i lɛ́nə ghɔʼ ghɔ̀ŋ mbɔ, “Mɔ nɔ nyíɛ bʉə bɔ̂ŋ kə́ tòʼ nə tyʉbə.” 25Ndʉʉmɛ, Jiso bìʼ mɔ̀ʼ ghɔkə-i shʉ-ɔ, ɔ ŋɔ́ʼhə shʉ-i, shʉ-i tʉ́ʉnə, ɔ kə́ nyíɛ yəŋkə jyujyu, nyíɛ fɔbə inchəŋ jyujyu. 26Ɔ téʼ tʉ ɔŋ ɔ gɛ̀ nə wi chunjaa-ɔ, ghɔ̀ŋ mbɔ, “Kə a mə buŋ tíŋ hə mu lɔʼɔ fɛ.”
Bita ghɔ̀ŋ mbɔ Jiso la bɛ mbʉ Wo ndə Nyii Kùŋ Tə́ŋ
(Matia 16:13-20; Luk 9:18-21)
27Jiso lɔ̀ ghɔŋbə vâafɔʼɔ-bi gɛ̀ mu lɔʼ-bətə̂ŋ-tə ndə i bɛ mbʉə Kasalia Filibai. Ndə bɔ̂ŋ kə́ gɛ̀, ɔ bíʼtə tʉ vâafɔʼɔ-bi mbɔ, “Bʉə tʉʼ ghɔ̀ŋ mbɔ mɔ bɛ nda?” 28Bɔ̂ŋ gìe tʉ ɔŋ mbɔ, “Jɔŋ ndə ɔ̃ kɔ́ muu, bəbɛʼbə kə́ ghɔ̀ŋ mbɔ a la bɛ Ɛlaja, bəbɛʼbə kə́ ghɔ̀ŋ mbɔ a la bɛ mbyu yʉkəŋgieNyiibɛʼ.” 29Ɔ bíʼtə tʉ bɔŋ mbɔ, “Bɔŋ bii tʉʼ ghɔ̀ŋ mbɔ mɔ bɛ nda?” Bita bə̀ŋhə mbɔ, “A nɔ bɛ Wo ndə Nyii Kùŋ Tə́ŋ.” 30Ɔ shyùu tyunəkə-ʉə jyujyu mbɔ bɔ̂ŋ mə yi shyíi wo nə yɔŋ fɛ.
Jiso kwə́ʼ te kwu-i
(Matia 16:21-28; Luk 9:22-27)
31Jiso chʉ́ʉhə mədàhə vâafɔʼɔ-bi mbɔ Vaa-Woməsʉʉ bu yaʼ nyíɛ ŋgʉəʼ ndə nubə buŋmbi, bəntəŋbəshʉ, mbʉ bətiefɛ̀ʼndɛŋNyii leʼnə mbʉ bʉə dàhə nuʼ-Mushi bu tɛ́ŋ ɔŋ, bɔŋleʼ yí ɔ, chîbə kʉ̂ʉ tíŋ itia nɔ ɔ bʉ̀nə kóʼ. 32Ndə ɔ kə kə́ kwə́ʼ yɔ̄ŋ-yə, ɔ yɔ̀ʼ tiɛŋ-ɛŋ tʉ bɔŋ, Bita lʉ̀ ɔ ghɔ́ŋ ɔŋ fí ŋwɔŋ-yʉə ɔ bɔ̌ŋ, ɔ chʉ́ʉhə kə́ sɔ́ʼ ɔ. 33Jiso kʉ̂ʉ kíahə ŋwɔŋ-ɛŋ lɛ́nə vâafɔʼɔ-bi, sɔ́ʼ Bita ghɔ̀ŋ mbɔ, “Bʉ̀nə bɔ̌ŋ mɔ, Sata! Bʉʼka a tʉ́ʼ ndaahə-a ndəŋ nu-Nyii-bə fɛ, a nɔ tʉ́ʼ bə ndəŋ nu-bʉəməsʉʉ-bə.”
34Ndʉʉmɛ, ɔ tíi nuɔ-bʉə ghɔŋbə vâafɔʼɔ-bi mbʉə ɔ ghɔ̀ŋ tʉ bɔŋ mbɔ, “Kaʼ wo mu bii kʉ̀ʉ ndə məgwè hə bɔ̌ŋ mɔ, ɔ nɔ kie ndə mətɛ́ŋ ŋwɔŋ-ɛŋ, bɛ̀ʼ tyʉntɔɔnəkə-i, gwè hə bɔ̌ŋ mɔ. 35Bʉʼka wo ndə ɔ kʉ̀ʉ ndə məkwáa ŋkwiitʉ-e bu bɛ́, bɔŋ wo ndə ɔ kɔ́ ŋkwiitʉ-e bʉʼka mɔ ghɔŋbə mbʉ ntəŋjyujyu, bu kie ŋkwiitʉ-e. 36Bəkɔ wo síi ka, kaʼ ɔ kie wʉʉnəmbikə inchəŋ bɔŋ bɛ́ ŋkwiitʉ-e. 37Bɛ ka ndə bəkɔ wo kɔ́ ndə mənyúɔ ŋkwiitʉ-e? 38Bɔŋ wotəmiyɔŋ ndə tʉkə-i tʉʼ vyíi bʉʼka mɔ ghɔŋbə ŋgiekə-ɔŋ mu ŋgwie-bəsəŋ-ɔ̄ŋ ghɔŋbə ŋgwie-bʉ̂ʼʉ-ɔ̄, tʉ-Vaa-Woməsʉʉ-kə bu vyíi te ɔ, ndʉʉ ndə ɔ bu gwè mu məŋwɔʼ Tie-e ghɔŋbə bʉəntəŋNyii ndə bɔ̂ŋ bɛ ŋkʉʉ.”
© 2025 Wycliffe Bible Translators, Inc.