Luk 23
23
Paelat ne ghuhnaza Jisas
(Matiu 27:1-2; 27:11-14; Mak 15:1-5; Jon 18:28-38)
1Ke leghugna igne, thotoghei mae fatere ne kahe gaoghatho ne udiza Jisas tei ka mae Paelat. 2Kate dufu ka teuwae ie, hatimare ne funu vuavuha lepo neigna Jisas. Hatimare ne lepo eu'ani ka mae Paelat, “Gheati laseza hui puhigna ma'igne, magne batu fadi'ara ni lepora nanonire mala tovi foli lao takisi ka mae Sisa, mae Nafano bi'o gna Rom ie. Magne eulanauwa kiloza thaigna ‘Kraes’, kahe mae Nafano bi'o.”
3Mae Paelat ne ghuhna eu'ani ka Jisas, “Ba naghe, ghoe nodi Nafano mae Jiure?”
Jisas ne lepo eu'ani ka magne, “Uve, te lepoza te au la ghoe ae.”
4Agnoni, mae Paelat ne lepo eu'ani ka mae thotoghei pirisi ulu ni ka nanoni te krapu te au ka teuwae re, “Rei theome kofiza kahe nasapla ka ma'igne.”
5Euwateuwe nanonire ne lepo faheta eu'ani ka mae Paelat, “Ni magne ka noa fagriu re ei haghe chuku puhi bi'o ni famamagra ra eu nanoni hia te hia ani ka provens Judia re. Fufunu ka provens Galili ghile dufu ani Jerusalem.”
Paelat fateiza Jisas ka mae Nafano Herod Antipas
6Kate rogiza igne Paelat ne ghuhna eu'ani, “Ma'igne maegna Galili gnea?” 7Kate laseza magne te Jisas gne mae gna ka hnimoto Herod te funei fruniza ie, magne ne kuri teiza Jisas ka mae Herod. Eigna ka teuwae mae Herod neke au lanauwa neke au Jerusalem.
8Kate kofiza Jisas ie mae Herod ne hneahnegha lui. Eigna magne rogira chuku thuturigna Jisas eume magne fua ngaguza te kofiza Jisas ie. Ni mae Herod rouronu noa lui lana te mala kofiza Jisas ei kofunaboboi ie. 9Eume, mae Herod ne ghuhnaza Jisas chuku ghuaghuhna. Ni Jisas theome ke ho'ilepo lana ka mae Herod. 10Hatimare mae pirisi ulu ni mae velepuhigna vetula noa Moses teure ne kegra lanauwa ne au ka teuwae. Hatimare lepo lao chuku nafnata goeghoze fathoro ka Jisas. 11Eume, mae Herod baludi noa mae soldiare ne funu ma'eza Jisas ni eulanauwa lepo fapariza magne. Hatimare ne fapoko lao kahe phoko te khuakuda ka magne, mala jateula mae Nafano eu magne. Agnoni, magne neke kuri fapulozani Jisas ka mae Paelat. 12Tifa ie mae Paelat ni mae Herod teure neke au maamagra koba. Ni ka naga'e teugne phalumare neke fafaudu.
Paelat ne fateza Jisas
(Matiu 27:15-26; Mak 15:6-15; Jon 18:38–19:16)
13Agnoni, mae Paelat ne kilomei ra mae pirisi ulu ni keha mae baubatudi nanonidi Jiu ni keha nanoni teure. 14Euwateuwe, magne ne lepo eu'ani ka hatimare, “Ghotolu udi meiza ma'igne ka rei ani. Ni te lepoza ghotolu ie, magne ne baubatu fadi'ara nanonire mala tovi leghuza mae Nafano bi'o gna Rom ie. Ni rei neke ghuhnaza magne ke ulumi ghotolu fate'o. Agnoni, rei theome kofiza kahe nasapla te lepora ghotolure ka magne. 15Eulanauwa, mae Herod neke theome kofiza kahe nasapla ka magne. Eigna teuwae magne neke kuri fapulo meiza ka rei. Fakofu sonighotolu. Magne theome eiza kahe nasapla te thokagna te mala leme ie. 16Eume, rei kaina lepora mae soldiare mala aniza lana magne, agnoni sakreza magne mala tei noa.”
Paelat ngaguza te fasagliza Jisas
17-18Ni nanonire ne kafua aku eu'ani fabi'o, “Falemeza! Gheati ngagughamigho ghoe te sakre fajiflaza mae Barabas!” (Eigna tifa te mei ie leuleghu Ngahngamu Pasova ie mae Paelat sakre fajiflaza koba kahe mae te au ka sosolo ie.) 19Mae Barabas gne kahe mae sosolo, eigna magne neke fufunu kahe magra ka nau bi'o ie. Ni magne eulanauwa khale ka faleme noni.
20Ni mae Paelat ngaguza lui te fajiflaza Jisas, eume magne neke lepo laoni ka nanonire. 21Ni hatimare ne kafua aku eu'ani fabi'o lao ka magne, “Tupijuruza! Tupijuruza ka gazu fafata ie!”
22Fatolufata mae Paelat neke lepo eu'anini ka hatimare, “Ne fahneuwa? Hna nasapla teke eiza magne ie? Rei theome kofiza ki puhi di'a te mala falemeza magne. Eume, rei kaina lepora hatimare mala aniza lana ni sakre fajiflaza euwa.”
23Ni hatimare heta gedi lui ne aku fabi'o, “Tupijuruza ka gazu fafata ie.” Agnoni, leghu lahugna ie hatimare ne tangomana ra. 24Euwateuwe, mae Paelat ne kahe gaoghatho lana ne leghuza hna teke lepora nanonire. 25Eume, magne ne sakre fajiflaza mae Barabas, mae te ruma ka suga sosolo gna puhi magra ni faleme nanoni teuwe. Euwateuwe, magne ne sakre laoza Jisas ka hatimare mala faleleme.
Hatimare tupijuruza Jisas ka gazu fafata ie
(Matiu 27:32-44; Mak 15:21-32; Jon 19:17-27)
26Agnoni, mae soldiare ne atha famaghaniza Jisas mala falemeza. Ka naga'e teugne kahe maegna ka gruru te kiloza Saerin ne mei Jerusalem nahngagna ie Saemon. Agnoni, mae soldiare ne huhuruza magne mala pala noa gazu fafata Jisas ie tei leghuza magne. 27Chuku nanoni ne tei balugna Jisas. Keha nani naufa'a te tei baludi hatimare re di'agnagnafa ne tahngiza magne. 28Ni Jisas figri lao tadi ne lepo eu'ani, “Ghotolu thotoghei nani naufa'ami Jerusalem ra tovi tahngighau rei, ni tahngighamu thaimi ni thumire euwa. 29Eigna kahe naga'e kaina dufu mei au nate lepo eu'ani nanonire, ‘Kelitami lui ghotolu thotoghei nani te the'oki thumi are, ba nani te theome fachu'u sua valuna te aura.’ 30Agnoni, nanonire kaina aku eu'ani fabi'o lao ka gukhu ie,
“ ‘Keli au lana me uthu soru mei ghoe ke kliami gheati ie’,
ba lepo eu'ani ka gukhu ie, ‘Keli au lana me tooku frunighami gheati ghoe ie!’#23:30 Hosea 10:8.
31Tutu'ani lui, rei jateula gazu te kahra euwa eigna rei theome ei ki nakhibo ni neubanauwa hatimare tufuni choghaghau lui rei. Euwateuwe, kaina fahneuwa ghotolu nanoni te nakhibore eigna ghotolu jateula gazu tela leme hui ra teugnea?”
32Mae soldiare eulanauwa udira ne tei phalumae te di'a puhidi re mala faleleme balugna Jisas. 33Agnoni, kate dufu hatimare ka hnimoto te kiloza “Hnubra pha'u” ie mae soldiare ne tupijuruza Jisas ka gazu fafata ie. Hatimare eulanauwa ne tupijuru ra phalumae te di'a puhidi re ka gazu fafata, kaheni ka phile matugna Jisas ni keha ie phile merigna. 34Jisas ne lepo eu'ani, “Maghe! Atha koko nakhibo te eiza maire ka rei gne, eigna hatimare theome laseza hna te eiza ie.” Euwateuwe, mae soldiare ne nanaeru khale mala laseza mae ihei nate atha noa pohe Jisas re.
35Nanonire kegra ka teuwae tatadei ne au. Ni nodi mae baubatu hatimare mae Jiure ne ma'eza Jisas ne lepo eu'ani, “Tholumae! Mae igne fakahrira keha nanonire. Eume, ne tutu'ani nate magne mae Kraes teke fafate God teuweni, lisa laoza mala fakahriza magne thaigna.”
36Hatimare mae soldiare eulanauwa ne tufuni lepo fadi'aza ni ma'eza eu Jisas. Hatimare mei ka Jisas ne tusu haghe u waen te paza lui ie mala ko'u magne. 37Agnoni, hatimare ne lepo eu'ani ka magne, “Ne tufuni nodi mae Nafano mae Jiure na ghoeni, fakahrigho thaimu euwa!”
38Ire u goeghoze teke i'ini hatimare ka gazu fafata ie:
“IGNE NODI NAFANO MAE JIU RE.”
39Kahe mae ka phalumae te di'a puhidi re ne lepo fadi'a eu'ani ka Jisas. “Ihna, ghoe mae Kraes ie? Fakahrigho thaimu ni fakahrighami lanauwa ghepa euwa!”
40Ni keha mae te di'a puhigna ie ne lepo eu'ani balu di'atagna, “Mae, ghoe theome hmau nouza God gnea? Tatolu te hui kahe nafnata paapara lana! 41Ni tapa thokada au te mala leme hno'ira hna puhi te di'a teke eira thaida tifa ra euwa. Ni magne theome eiza kahe puhi te sapla.”
42Agnoni, magne ne lepo eu'ani, “Jisas, kate mei ghoe balu nou noilaghi te mala Nafano ie, ghathoghau rei.”
43Agnoni, Jisas ne lepo eu'ani ka magne, “Tutu'ani lui te lepoza rei ka ghoe ie, ka naga'e gignoa igne lana ghoe na au balugu rei klia.”
Glemegna Jisas
(Matiu 27:45-56; Mak 15:33-41; Jon 19:28-30)
44-45Agnoni, ka tahngi saleiphaluni aublathagna naga'e teugne, nauthoglu gne ne romo ne ghile tahngi tholuni. Euwateuwe, pohe bi'o te sei ka Suga Blahi ie megona ne breku palu. 46Ka teugne, Jisas ne aku eu'ani fabi'o, “Maghe, rei sakre ariza ka ghoe tharungagu ie.”#23:46 Sam 31:5. Ke leghugna igne magne ne leme.
47Kate kofiza igne kahe mae funeidi mae soldiadi Rom teke kegra ka teuwae ie, ne kilo uluza God, ne lepo eu'ani, “Tutu'ani lui ma'igne kahe mae fua kohlo lui!” 48Chuku nanoni teke tatadeiza teke au puhi igne. Kate kofiza hatimare igne, hatimare ne au'anu nabaobangodire eigna hatimare di'agnagnafadi lui neke figri ka sugadi re. 49Agnoni, nanoni te laseza Jisas re ni keha ga'ase teke leghuza magne funu Galili re kegra tatadei ne au maghani.
Josep ne atha thonogna Jisas ie mala giugilu
(Matiu 27:57-61; Mak 15:42-47; Jon 19:38-42)
50-51Ka naga'e teugne kahe mae nahngagna ie Josep, maegna ka kahe gruru gna Judia te kiloza Arimatea. Magne kahe mae kohlo ni keli euwa, euwateuwe magne kahe mae te tukiza fatheve te au naga'e te mala funei frunira God noa nanonire. Magne kahe mae ka hatimare mae thotoghei fatere, ni magne theome kahe gaoghatho baludi hatimare ka te mala falemeza Jisas ie. 52Agnoni, mae Josep ne tei ka mae Paelat ne toreza thonogna Jisas ie. 53Euwateuwe, Paelat ne sakreza thonogna Jisas ie ka magne. Josep ne atha soru thonogna Jisas ka gazu fafata ie ne fifiri ka pohe vegha. Agnoni, magne tei ne nana'a ka gluma teke jokhi hatimare ka thina mala nana'a nanoni te leme re. Gluma teugne hatimare theome nana'a na kahe nanoni tagna neke au. 54Agnoni, naga'e teugne mala tarabanagna naga'e Sabat. Euwateuwe, naga'e Sabat gne fufunu lana ka plulugna nadafi ie.
55Goro ga'ase teke mei balugna Jisas funu Galili re ne tei balugna Josep ka gluma ie ne kofiza ahia hatimare teke nana'aza thonogna Jisas ie. 56Ke leghugna igne, re'e neke pulo ka suga ie mala tarabana insens ni oela te sisiri keligna mala nana'a ka thonogna Jisas ie. Agnoni, ka u naga'e Sabat ie hatimare te hui ne gnafa jateula te lepoza ka noa vetula mae Moses ie.
© 2025 SIL Solomon Islands