Jon 4
4
Jisas ni kahe ga'ase gna Samaria
1Mae Farisire rogiza Jisas te fasiublahi chuku nanoni ke tulaognani mae Jon Siublahi te mala leghuza magne ie. 2Ni Jisas thaigna neke theome fasiublahi nanoni, hatimare noa mae farogo magne re na teke fasiublahi nanonire. 3Kate laseza Jisas te mae Farisire la rogiza hui noa gloku magne ie, magne jifla ka provens Judia neke funu pulo ka provens Galili.
4Agnoni, magne ne liu ka nabrau phile provens Samaria. 5Ka teuwae, magne ne mei dufu ka nau te kiloza Saeka. Nau teugne au kehreagna hnimoto glose teke gulao mae Jekop ka Josep mae thugna ie, tifa ia. 6Kahe seuseu teke dokha mae Jekop ie au lanauwa ka teuwae. Agnoni, Jisas lao ne hokro kehreagna seuseu teugne, eigna magne ne baba'o lui ka thei ie. Ka hnimoto teuwae jame tahngi salei phaluni aublatha.
7-8Ka hnimoto teuwae, hatimare mae farogore neke tei kokoza magne mala foli gano. Agnoni, kahe nani gna Samaria ne mei ka seuseu ie mala toho kho'u. Jisas ne lepo eu'ani ka gne'e, “Ihna, ghoe tangomana te famei ka gegu kho'u rei ie?”
9Nani teugne ne lepo eu'ani ka magne, “Sei, rei vere nogu ka ghoe te tore kho'u ka rei ie. Ghoe mae Jiu, ni rei nanigu Samaria. Nefahneuwa te tore kho'u ghoe ka rei gnea?” (Mae Jiure theome fafaudu ka mae Samaria re).
10Agnoni, Jisas ne lepo eu'ani ka gne'e, “Nakrupe, ghoe theome laseza noa kokofakasa God hariza nanoni ie, ni ghoe theome laseza mae ihei te tore kho'u te au ka ghoe gne. Jame laseza ghoe ie, ghoe tangomana tore ka rei, euwateuwe rei tangomana te gu'ari u kho'u kahra ie.”
11Nani teugne ne lepo eu'ani ka magne, “Mae funei, kho'u ie fua au lui pari, ghoe the'o kahe goifata te mala krisu kho'u ie. Na tei atha hia ghoe u kho'u kahra te lepoza teuwae ia? 12Ba! Ghoe ne mae ke ulugnani mae ku'eda Jekop mae teke gumei harighita u seuseu igne fugnea? Magne baludi thara thugnare ni nodi na'ohoire eu teke ko'u la ka kho'u igne tifa ie.”
13Jisas ne lepo eu'ani ka gne'e, “Tutu'ani lui, ihei te ko'u ka seuseu igne ie, kaina ke pochanga au lana. 14Ni ihei te ko'u ka kho'u nate gulao hariza rei ie, kaina ie theome ke pochanga. U kho'u nate gulao rei igne ie jateula u glokha kho'u eu fura mei koba ke hnuagna magne. U kho'u igne kaina ie gulao hariza magne u kahra te the'o ka huigna ie.”
15Nani teugne ne lepo eu'ani ka magne, “Mae velepuhi, gumei ka rei u nafnata kho'u teugne malani theome ke pochangani rei euwa. Euwateuwe, rei kaina theome ke pulo meini ani mala toho kho'u koba.”
16Agnoni, Jisas ne lepo eu'ani ka gne'e, “Ghoe tei lepoza khetomu ie mala kafua mei ghopa ani.”
17Gne'e neke lepo eu'ani ka magne, “Rei the'o khetogu.”
Jisas ne lepo eu'ani ka gne'e, “Tufuni kohlo lui te lepoza ghoe ne the'o khetomu teuwe. 18Eigna ghoe neke toilaghi hui ka glima ma'ane. Ni mae te au balumu te au ghoe gignoa igne theome tufuni khetomu lana ghoe, eume hna te lepoza ghoe ie tutu'ani lui.”
19Nani teugne ne lepo eu'ani ka magne, “Mae funei, rei agnola kofu laseghona ghoe, ghoe kahe mae profet! 20Tifa ie mae ku'emi gheati maedi Samaria re neke tufru soruza God ka gukhu igne. Ni ghotolu mae Jiure te lepoza ie Jerusalem lana tufuni hnimoto te mala tei tati te tufru soruza God ie.”
21Jisas ne lepo eu'ani ka gne'e, “Fatutu'ani ra sonighoe hna te lepora rei ire. Eigna kaina ie dufu mei au naga'e nate theome ke pulo nanonire Jerusalem ba haghe ka gukhu igne te mala tufru soruza mae Mada ie. 22Ghotolu nanonimi Samaria re theome tufuni laseza mae ihei te mala tufru soru lao tagna ie. Ni gheati mae Jiure laseza mae ihei te mala tufru soru lao tagna ie. Eigna u noa puhi God te mala fakahri ra nanonire mei funu ka gheati mae Jiure na. 23Ni naga'e ie la mei hui, u naga'e teugne ani hui gignoa igne. Nanoni te tarai ka fatutu'ani ka mae Mada ie, u Tharunga te Blahi ie kaina toghora hatimare mala falalase puhigna magne ka nanonire. Nafnata nanoni ire te ngaguza mae Mada te mala tarai lao ka magne ie. 24God gne u Thurugna, eume ihei te tarai ie, tarai ka Tharunga ni ka tutu'ani.”
25Nani teugne gne ne lepo eu'ani ka Jisas, “Rei laseza mae Fakahra te kiloza Kraes ie kaina mei au. Kate mei magne ie, magne kaina tufuni ruarutha harighita tati gobigna puhire.”
26Agnoni, Jisas ne lepo eu'ani ka gne'e, “Rei mae te vevese te au balumu ghoe igne lana mae Kraes ie.”
27Ka hnimoto teuwae, noa mae farogo Jisas re neke pulo mei teke tei foli gano re. Hatimare ne vere nodi lui, eigna hatimare ne kofiza Jisas te thuturi te au balugna nani teugne. Ni the'o kahe mae ka hatimare te lepo eu'ani ka gne'e ie, “Ngagugho hna ghoe gnea?” Ba, te lepo eu'ani ka magne, “Ne ihna ghoe te thuturi balugna nani teuwae ia?”
28Agnoni, nani teugne ne na'a soru noa goifata mala toho kho'u ie neke pulo ka nau ie. Gne'e ne lepo eu'ani ka nanonire, 29“Ghotore, kahe mae ne lepo mei ka rei gobigna puhi teke eira rei tifa re. Mei ba ghotolu kofiza magne. Meula me mae teugne lana mae Kraes ie!” 30Agnoni, nanonire ghae ka nau ie ne tei mala kofiza Jisas.
31Ke leghugna teke pulo gne'e ka nau Saeka ie, mae farogore ne lepo eu'ani ka magne, “Velepuhi, ngamu geu!”
32Ni Jisas ne lepo eu'ani ka hatimare, “Rei au gegu gano te mala ngamu ie, ni ghotolu theome laseza.”
33Kate rogiza hatimare te lepo eu'ani magne ie, mae farogore ne funu lepo eu'ani farithaidi, “Keha nanoni jau neke atha gano neke mei ka magneuwa!”
34Agnoni, Jisas ne lepo eu'ani ka hatimare, “Gegu gano rei ie, te mala leghuza lana hna te ngaguza mae teke kuri meighau rei ie, ni mala loku fahuira gloku mala mei eira rei tekeu magne re. 35Nomi goeghoze ghotolu ia eu'ani, ‘Fati hnigra au te mala tuku ie ame ghano na sinabo ie euwa.’ Ni te lepoza rei ka ghotolu ie, ‘Fakofu fakeli sonighotolu ka sinabo ie, sinabo ie la ghano hui!’ 36Mae ihei te fnei ganogna ie magne atha noa tabagna noa gloku ie, ni u gano te fnei nanoni ire nate athiza hatimare u nakahra te te the'o ka huigna ie. Eume, mae ihei te hnuma ie, ni mae ihei te fnei ie phalumare na kafua hneahnegha. 37Kahe goeghoze ie eu'ani, ‘Kahe mae mala hnuma, keha mae ie mala fnei gano’ teu igne la tutu'ani lui gignoa igne. 38Na jateula teuwae eu rei na kuri fajiflaghamu ghotolu mala tei fnei ka sinabo ahia teke theome baba'o ghotolu ka hnumagna ie. Keha nanoni maghani teke baba'o ka hnumagna ie, ni u nodi baba'o hatimare re mala toghoghamu ghotolu.”
39Chuku nanonidi Samaria teke au ka nau teuwae re ne fatutu'aniza Jisas eigna ka goeghoze te lepoza ga'ase ie ire, “Jisas gne ne lepora gobi puhi teke eira rei tifa te ghile dufu ka naga'e gignoa igne ie.” 40Nanonidi Samaria re mei ka Jisas ne toreza magne mala au baludi. Eume, magne ne au ka teuwae phalu naga'e. 41Chuku nanoni lanauwa neke fatutu'aniza Jisas gna ka hna te lepora magne re.
42Agnoni, nanonire ne lepo eu'ani ka ga'ase gne, “Ululahu ie gheati neke fatutu'aniza Jisas ka hna teke lepora ghoe ka gheati ra. Ni gignoa igne ie gheati fatutu'ani eigna gheati la rogiza thaimi. Tutu'ani lui, gheati laseza ma'igne lana tufuni mae te mala fakahri ra nanoni te hui ka nauthoglu gne.”
Jisas ne fakekeliza thugna ma'ane kahe mae funei
43Jisas ne au phalu naga'e Samaria, ke leghugna igne magne ghae baludi noa mae farogore ne tei ka provens Galili. 44Ni Jisas neke kulu lepo eu'ani, “Mae ihei te profet ie, kheragna magne re na theome ghatho boheza magne.” 45Kate dufu lao Jisas Galili ie, nanonire ne hneahnegha lui te kofiza magne ie. Eigna hatimare neke tei ka Ngahngamu te kiloza Pasova ie Jerusalem neke kofira gobigna puhi teke eira magne ka naga'e teuwae re.
46Ka teuwae Jisas ne pulo ka nau Kena i Galili, ka nau teke fablahi magne kho'u ie teke fifigri ka u waen ia. Kahe mae funei te loku hariza mae Nafano gna Rom ie au lanauwa Kapanam. Thugna mae funei teugne ie ne fogra lui. 47Magne rogiza Jisas te funugna ka nohi Judia ne mei ka provens Galili teuwe. Agnoni, magne mei ka Jisas ne toreza mala tei Kapanam mala fakekeliza thugna tela thatai leme ie.
48Jisas ne lepo eu'ani ka mae funei gne, “Ghotolu ngagughamu te kulu kofira kofunaboboi ni falalase eu te eira rei re ame fatutu'anighau na rei euwa.”
49Mae funei gne ne lepo eu'ani ka Jisas, “Jisas, faghose mei balugu rei ame leme na mae thugu rei ie euwa.”
50Jisas ne lepo eu'ani ka magne, “Ke pulo sonighoe. Mae thumu ghoe ie kela keli fapulo hui.”
Mae teugne ne fatutu'aniza goeghozegna Jisas ie, eume magne neke pulo ka nau ie. 51Kate pulo magne ka nabrau ie, noa mae gloku magne re ne mei ne fari fadeidei ka magne ka nabrau ie, ne lepo eu'ani, “Mae thumu ghoe ie kela keli hui!” 52Magne ne ghuhna eu'ani ka hatimare, “Jame tahngi ngihani teke ghaotagna mae thugu rei ie?” Hatimare ne lepo eu'ani ka magne, “Tahngi kaheni aublatha gnora ia lana ke ghaotagna magne ka fogra ie.”
53Magna maseni ie neke ghatho fapuloza ka tahngi kaheni lanauwa teke lepo eu'ani Jisas ie, “Mae thumu ghoe ie kela keli hui.” Agnoni, ke leghugna igne magne ni thabutua fate'o ka sugagna ie ne kafua fatutu'aniza Jisas.
54Igne fapalu kofunaboboi teke eiza Jisas Galili ke leghugna teke pulo mei funugna Judia ie.
© 2025 SIL Solomon Islands