پیدأیش ۳۹
۳۹
یوسف و فوطیفأرٚ زنأی
1 ولی یوسف ایسمأعیلی تأجیرأنٚ دٚسٚ اَمرأ بٚبرده بوبوسته مصرٚ میأن. فوطیفار کی ایتأ جٚه فرعونٚ افسرأن و دربأرٚ نیگهبأنأنٚ رییس بو، اونَ جٚه اَشأن بیهه. 2 خوداوند یوسفٚ اَمرأ بو و اونَ خو اَربأبٚ خأنه دورون خٚیلی برکت بٚدأ، اوطؤ کی هرچی یوسف کودی موفقیتٚ اَمرأ بو. 3 فوطیفار اَ موضویَ بٚفأمسته بو و دأنستی کی خوداوند یوسفٚ اَمرأ ایسٚه و هرتأ کأرٚ دورون کی کونِه، خوداوند اونَ بأش چأکونِه. 4 هنٚ وأسی یوسف خو اَربأبٚ لوطفٚ جیر ایسأ بو پور زمأت نوبوسته کی فوطیفار اونَ بٚنأ خو خأنه و تومأمٚ تیجأرتٚ کأرأنٚ رو فأندر چأکوده. 5 خوداوند فوطیفارَ یوسفٚ وأسی برکت بٚدأ اوجور کی تومأمٚ اونٚ خأنه کأرأن خُب پیش شؤیی و اونٚ مأصولأن فرأوأن و اونی گلّه‌یأن زیأدَ بوستی. 6 پٚس فوطیفار تومأمٚ خو مأل و مینألٚ فأرٚس فوروس کودنَ یوسفٚ دٚس بیسپأرده و دِه اون هیچی رِه فیکر نوکودی جغرز اَنکی غذأ چی بوخوره. یوسف ایتأ یک شوشه و قشنگٚ جوأن بو.
7 ایتأ مودتٚ پٚسی، فوطیفارٚ زنٚ چوم یوسفَ بیگیفته و اونٚ جَا بٚخأسته کی اونی اَمرأ بوخوسه. 8 ولی یوسف قوبیل نوکوده و بوگفته: «می اربأب اوندر مٚرَه ایعتمأد دأره کی هرچی اَ خأنه دورون نٚهایَ مٚرَه بیسپأرده 9 و تومأمٚ اَ خأنه ایختیأرَ مٚرَه فأدأ. اون هیچی‌یَ می جَا دریغ نوکوده جغرز تو کی اونٚ زنأی ایسی. پٚس چوطؤ اَ نأجورٚ کأرَ بوکونٚم؟ اَ کردٚکأر، ایتأ پیله گونأ می خودا رِه ایسٚه.» 10 ولی اون دٚس اونسأدی و هر روج یوسفٚ جَا خأستی کی اونٚ اَمرأ بوخوسه. ولی یوسف اونٚ گول زٚنِه گبأنَ گوش نٚدأیی و تأ اویَه کی ایمکأن دأشتی اونٚ جَا دوری کودی.
11 ایتأ روج یوسف همیشٚکٚ مأنستَن خأنه کأرأنَ فأرٚس فوروس کودأندوبو. او روج دِه هیکس نئیسأبو خأنه میأن. 12 پٚس او زنأی اونٚ رختَ چنگ تأوٚدأ، بوگفته: «می اَمرأ بوخوس!» ولی یوسف جٚه اونٚ چنگ بوگروخته و خأنه جَا بوشؤ بیرون ولی اونٚ رخت او زنأکٚ دٚسٚ دورون بٚمأنسته.
13 او زنأی چونکی بیدِه اَطؤ بوبوسته، 14 بولندٚ صدا اَمرأ فریأد بٚزِه، خیدمتکأرأنٚ جَا یاور بٚخأسته و اوشأنَ بوگفته: «می مردأی اَ عبرانی غولأمَ بأوٚرده بٚخأنه، هسأ اون اَمٚرَه روسوأ کونِه! اون بأمؤ می اوتأق کی مٚرَه تجأوز بوکونٚه، ولی دأد بٚزِم. 15 او وخت کی بٚشتأوٚسته کی دأد زِئندرم، خو رختَ اَیٚه بٚنأ و جیویشته!»
16 پٚس او زنأی اونٚ رختَ خو ورجأ بٚدأشته و او وخت کی اونٚ مردأی بأمؤ بٚخأنه 17 او مأجیرأیَ کی چأکوده بو اونٚ رِه وأگویا بوکوده: «او عبرانی غولأم کی بأوٚردی بٚخأنه خأستی مٚرَه تجأوز بوکونٚه، 18 ولی من دأدٚ فریأدٚ اَمرأ، مٚرَه جٚه اونٚ دٚس نیجأت بٚدأم. اون بوگروخته، ولی خو رختَ جأ بٚنأ.»
19 فوطیفار چونکی خو زنأکٚ گبأنَ بٚشتأوٚسته، اونٚ خٚیلی غیظَ گیفته 20 و یوسفَ تأوٚدأ او زندأنٚ دورون کی پأدیشأ البأقی زندأنیأنم اونٚ دورون زینجیلٚ میأن دوبود. 21 ولی ایوأردِه اویَه خوداوند یوسفٚ اَمرأ بو و اونَ برکت دٚیی و اونَ زندأنٚ رییسٚ لوطفٚ جیر بدأشته. 22 پور زمأت نوبوسته کی زندأنٚ رییس، یوسفَ زٚندأنٚ فأرٚس فوروس کودنٚ مسئول چأکوده، اوطؤ کی همٚتأ زندأنیأن اونٚ پأستٚنٚ جیر ایسأبود و اون همٚتأ کأرأنٚ رو وأرسی کودی. 23 زندأنٚ رییس او کأرأنٚ رِه دیلوأپس نوبو کی یوسفَ بیسپأرده بو، چونکی خوداوند یوسفٚ اَمرأ بو و اونَ خو کأرأنٚ انجأم دٚئنٚ دورون بأش چأکودی.
The Gilaki Contemporary Bible is a Product of Transform Iran © 2024. All rights reserved. www.kelisayejame.org
پیدأیش ۳۹
۳۹
یوسف و فوطیفأرٚ زنأی
1 ولی یوسف ایسمأعیلی تأجیرأنٚ دٚسٚ اَمرأ بٚبرده بوبوسته مصرٚ میأن. فوطیفار کی ایتأ جٚه فرعونٚ افسرأن و دربأرٚ نیگهبأنأنٚ رییس بو، اونَ جٚه اَشأن بیهه. 2 خوداوند یوسفٚ اَمرأ بو و اونَ خو اَربأبٚ خأنه دورون خٚیلی برکت بٚدأ، اوطؤ کی هرچی یوسف کودی موفقیتٚ اَمرأ بو. 3 فوطیفار اَ موضویَ بٚفأمسته بو و دأنستی کی خوداوند یوسفٚ اَمرأ ایسٚه و هرتأ کأرٚ دورون کی کونِه، خوداوند اونَ بأش چأکونِه. 4 هنٚ وأسی یوسف خو اَربأبٚ لوطفٚ جیر ایسأ بو پور زمأت نوبوسته کی فوطیفار اونَ بٚنأ خو خأنه و تومأمٚ تیجأرتٚ کأرأنٚ رو فأندر چأکوده. 5 خوداوند فوطیفارَ یوسفٚ وأسی برکت بٚدأ اوجور کی تومأمٚ اونٚ خأنه کأرأن خُب پیش شؤیی و اونٚ مأصولأن فرأوأن و اونی گلّه‌یأن زیأدَ بوستی. 6 پٚس فوطیفار تومأمٚ خو مأل و مینألٚ فأرٚس فوروس کودنَ یوسفٚ دٚس بیسپأرده و دِه اون هیچی رِه فیکر نوکودی جغرز اَنکی غذأ چی بوخوره. یوسف ایتأ یک شوشه و قشنگٚ جوأن بو.
7 ایتأ مودتٚ پٚسی، فوطیفارٚ زنٚ چوم یوسفَ بیگیفته و اونٚ جَا بٚخأسته کی اونی اَمرأ بوخوسه. 8 ولی یوسف قوبیل نوکوده و بوگفته: «می اربأب اوندر مٚرَه ایعتمأد دأره کی هرچی اَ خأنه دورون نٚهایَ مٚرَه بیسپأرده 9 و تومأمٚ اَ خأنه ایختیأرَ مٚرَه فأدأ. اون هیچی‌یَ می جَا دریغ نوکوده جغرز تو کی اونٚ زنأی ایسی. پٚس چوطؤ اَ نأجورٚ کأرَ بوکونٚم؟ اَ کردٚکأر، ایتأ پیله گونأ می خودا رِه ایسٚه.» 10 ولی اون دٚس اونسأدی و هر روج یوسفٚ جَا خأستی کی اونٚ اَمرأ بوخوسه. ولی یوسف اونٚ گول زٚنِه گبأنَ گوش نٚدأیی و تأ اویَه کی ایمکأن دأشتی اونٚ جَا دوری کودی.
11 ایتأ روج یوسف همیشٚکٚ مأنستَن خأنه کأرأنَ فأرٚس فوروس کودأندوبو. او روج دِه هیکس نئیسأبو خأنه میأن. 12 پٚس او زنأی اونٚ رختَ چنگ تأوٚدأ، بوگفته: «می اَمرأ بوخوس!» ولی یوسف جٚه اونٚ چنگ بوگروخته و خأنه جَا بوشؤ بیرون ولی اونٚ رخت او زنأکٚ دٚسٚ دورون بٚمأنسته.
13 او زنأی چونکی بیدِه اَطؤ بوبوسته، 14 بولندٚ صدا اَمرأ فریأد بٚزِه، خیدمتکأرأنٚ جَا یاور بٚخأسته و اوشأنَ بوگفته: «می مردأی اَ عبرانی غولأمَ بأوٚرده بٚخأنه، هسأ اون اَمٚرَه روسوأ کونِه! اون بأمؤ می اوتأق کی مٚرَه تجأوز بوکونٚه، ولی دأد بٚزِم. 15 او وخت کی بٚشتأوٚسته کی دأد زِئندرم، خو رختَ اَیٚه بٚنأ و جیویشته!»
16 پٚس او زنأی اونٚ رختَ خو ورجأ بٚدأشته و او وخت کی اونٚ مردأی بأمؤ بٚخأنه 17 او مأجیرأیَ کی چأکوده بو اونٚ رِه وأگویا بوکوده: «او عبرانی غولأم کی بأوٚردی بٚخأنه خأستی مٚرَه تجأوز بوکونٚه، 18 ولی من دأدٚ فریأدٚ اَمرأ، مٚرَه جٚه اونٚ دٚس نیجأت بٚدأم. اون بوگروخته، ولی خو رختَ جأ بٚنأ.»
19 فوطیفار چونکی خو زنأکٚ گبأنَ بٚشتأوٚسته، اونٚ خٚیلی غیظَ گیفته 20 و یوسفَ تأوٚدأ او زندأنٚ دورون کی پأدیشأ البأقی زندأنیأنم اونٚ دورون زینجیلٚ میأن دوبود. 21 ولی ایوأردِه اویَه خوداوند یوسفٚ اَمرأ بو و اونَ برکت دٚیی و اونَ زندأنٚ رییسٚ لوطفٚ جیر بدأشته. 22 پور زمأت نوبوسته کی زندأنٚ رییس، یوسفَ زٚندأنٚ فأرٚس فوروس کودنٚ مسئول چأکوده، اوطؤ کی همٚتأ زندأنیأن اونٚ پأستٚنٚ جیر ایسأبود و اون همٚتأ کأرأنٚ رو وأرسی کودی. 23 زندأنٚ رییس او کأرأنٚ رِه دیلوأپس نوبو کی یوسفَ بیسپأرده بو، چونکی خوداوند یوسفٚ اَمرأ بو و اونَ خو کأرأنٚ انجأم دٚئنٚ دورون بأش چأکودی.
The Gilaki Contemporary Bible is a Product of Transform Iran © 2024. All rights reserved. www.kelisayejame.org