Mak 15
15
Ara taha diaa ia Jisas vania ia Paelat
(Matiu 27:1-2; Matiu 27:11-14; Luk 23:1-5; Jon 18:28-38)
1Mi tana mohomoho putiputi, mi nidira lehona nira ira na tinoni ni kere mi ira na tinoni sau manasa tana nina keja ia Mosis, mi ira kesana na tinoni leholeho mi ira kode na tinoni tana Saikolu, ara sai mara valagu kolukolu ma kara agosia chikai na papada. Mara soria na limana ia Jisas mara udungia mara sau diaa tatana ia Paelat.
2Ma ia Paelat e gesuaa ia Jisas me kori vahai vania de, “?E vahai vei, ihoe nomu na nidira king ira na Jiu?”
Ma ia Jisas e tuhu visua me kori vahai vania de, “Ihoe tovosi to kori vahania nia.”
3Mi nidira lehona ira na tinoni ni kere ara koria dangana na omea levo mara keli vania ia Jisas. 4Ma ia Paelat e gesu lakaa ia Jisas me kori vahai vania de, “?E vahai vei hoe o vu teha na tuhu visua nidira gesu ira? !Ko haea ba, dangana na omea tara koria mara keli vaniho.” 5Ma ia Jisas e teha na kori lakaa siki omea. Me makai ia Paelat tana omea vahai nira de.
Ia Paelat e pedea ia Jisas
(Matiu 27:15-26; Luk 23:13-25; Jon 18:39–19:16)
6Me visa tahuna na kabu ni Liu Salihi, ia Paelat ke talasangaa chikai na tinoni ke chulu choni tana vale peresini tahuna tara nongia ia ira na tinoni. 7Mi tana tahu nia, kesana na tinoni ara toha tana vale peresini matengana tara agosia chikai na vailabuhi leho kolura na gaumane, mara labu mate tinoni. Me chikai na vidadira ira, ia Barabas na asana. 8Mi tana tahu tara sai kode ira na tinoni, mara nongia ia Paelat siki tinoni ke chulu sivo mai tana vale peresini. 9Ma ia Paelat e gesuara me kori vahai vanira de, “?E vahai vei, ihamu ngangavina ku sau sivoa nau na nimiu king hamu na Jiu?” 10Me kori vahai nia matengana te hana nohaa ia nidira lehona nira ira na tinoni ni kere ara taha maia ia Jisas tatana ia matengana ara pitu vani solehanaa ia.
11Mi nidira lehona ira na tinoni ni kere ara toto matengana na kori vanira na tinoni nira kara ni nongia ia Paelat, me ke ni chulu sivo mai ia Barabas tana vale peresini.
12Ma ia Paelat e gesu lakara me kori vahai vanira de, “?Me tina ke vahai ia, ma na hua ba ku goni vania nau na tinoni tamu koria hamu ia nimiu king hamu na Jiu?”
13Mara huu visu mara kori vahai vania de, “Pohaa tana kros!”
14Ma ia Paelat e gesu lakara me kori vahai vanira de, “?Na hua te goni savia na tinoni de?”
Mara huu leho laka baa mara kori vahai de, “Pohaa tana kros!”
15Ma ia Paelat e ngangavina ke vahani mamahelara na tinoni nira, me sau sivoa ia Barabas me chulu sivo tana vale peresini nia. Me kori vanira na malahai nira kara ni ramichia#15:15 Tana nidira naunau ira na Rom, ara hanaa agosia na halo ni raramichi tana kevu ni buluka. Mara livua tana busuna na halo nia kesana na pala ni aean teha ma na suli. Me vajangi savi solehana na tinoni tahuna tara ramichia ia. ia Jisas, mi bukena me talasangara ira kara pohaa ia tana kros.
Ira na malahai ara choni hiluna ia Jisas
(Matiu 27:27-31; Jon 19:2-3)
16Mi ira na malahai ara tahaa ia Jisas mara sahe dia levu kulina mai na valena leho ia Paelat. Mara solo saira na malahai nira tara totoha tana vera nia. 17Mara vavahania ia mara chuaa na kalekona, mara saheli vania chikai na kaleko chichi#15:17 Na kaleko chichi daho na nidira kaleko ira na king. daho. Mara virihia na halo kakaruha vahai na kraon, mara saheli vani lakaa tana vungana. 18Mara tuturiha na chiri sekolia mara kori vahai vania de, “Ko mauri oka hoe, na nidira king ira na Jiu!” 19E danga na tahu, mara labua na vungana kolu na hai mara chuvehaa laka, mara sivo tuturu mara chuporu vania. 20Mi tana tahu tara kode ira na choni hiluna ia Jisas, mara taha chonia na kaleko chichi daho tatana ia, mara saheli vania na kalekona tovosi ia. Mi bukena ia, mara taha diaa ma kara ni pohaa tana kros.
Ara poha vuruna ia Jisas tana kros
(Matiu 27:32-44; Luk 23:26-43; Jon 19:17-27)
21Mi tahuna tara taoni sala ira mara diadia, mara vaituhuhi chikai na tinoni, na asana ia Saemon, na vangana i Saerin. Ia Saemon na tohakodira ia Aleksanda ma ia Rufas. Ia e vota mai tabana me diadia i Jerusalem. Mara tu ira na malahai nira mara kejalia me ke kasoa nina kros ia Jisas. 22Mara udungia ia Jisas mara dia tatana chikai na malengana tara solo vahania i Golgota, na papadana na asa nia Na Sulivunga. 23Mara sau vania na vuaeni tara valoa na meresin tara solo vahania na “mir”, ma ia Jisas e teha ngalo na inuviana. 24-25Mi tana mohomoho tana siu kiloko, mara poha vuruna ia Jisas tana kros. Mara vaivatasahi bamu ira na kalekona ia Jisas, mara choni daes ma kara ni chaulia sei ba ke tahaa na omea nira nia.
26Mara marea chikai na mamare, me ke ni tihisi lengaa tara para vania na hua te goni savia ia. Mara mare vahania de, NIDIRA KING IRA NA JIU. 27-28Me ruka na tinoni vailabu ara poha vurukodira lakamu tana kros, chikai tana madoana ia Jisas me chikai tana maulina ia. #15:27-28 Kesana na kopi tuali ara tamani lakamu na mamare vahai de tana ves 28: Ia tana naunau vahai de tara marea tana Mamare Tabu te mai mana te kori vahai de, “Ira ara koria ia na tinoni vailabu.”
29Mi ira na tinoni tara liu mai ba ara vivirua na vungadira, mara choni hiluna, mara kori vahai vania de, “!Ia nomu nia! Ihoe to koria kovahai ko vuti sivoa na Vale Tabu Leho ia God, mo ko loho visua lalona e tolu bamu na dani, 30ko sivo mai choni hoe tana kros nia, mo ko taha maurisiho!”
31Mi nidira lehona nira ira na tinoni ni kere mi ira na tinoni sau manasa tana keja, ara choni hiluna ia Jisas vahai lakamu na tinoni nira. Mara vaikorihi mara kori vahai de, “Na tinoni tovosi bamu te hanaa ia na sangara, me teha ia na hanana na sanga tovosia ia. 32?E vahai vei, ia nomu ide na Mesaea, na king i Israel? Me tina vahai ke sivo mai choni ia tana kros nia, ma ka haea hita, ma ka ni donua ia.” Mi koera tara pohakoera kolua ia Jisas ara ko valagu sekoli lakamua ia.
E mate ia Jisas
(Matiu 27:45-56; Luk 23:44-49; Jon 19:28-30)
33Mi tana levuhana na dani, me mate na aso me puti roiroi na vera matadu nia po e chau tana tolu kiloko. 34Mi tana tolu kiloko sungata auau, me huu leho ia Jisas me kori vahai de, “!Eloi! Eloi! ?Lama sabaktani?” Ma na papadana na valagu vahai nia, “Nigu God, Nigu God, e vahai vei o vu basiau nau?” 35Mi kesana vidadira na tinoni tara tuu hana tuhu nia, ara valingea nina valagu vahai ia Jisas, mara kori vahai de, “Valingea ba, na tinoni de e huvia ia propet Elaeja.” 36Me rahe chikai na tinoni me ba tahaa chikai na omea malopo te hanaa na tari kolo ngea, me lupi sivoa tana vuaeni toga. Mi bukena me livu diaa tatana chikai na hai daho, me sau dato vania ia Jisas me ke ni inuvia, me kori vahai ia de, “!Pitu, ma ka momoro uluhi hita, ke vu mai ia Elaeja na taha chonia ia tana kros nia!”
37Ma ia Jisas e huu leho me mate.
38Mi tana tahu nia, me tarochi sivo levuhana ia na kaleko daho te lelelu lalona Vale Tabu Leho nia, tuturiha i tohu me chau sivo i borona. 39Me chikai na nidira tinoni leholeho ira na malahai e tuu levu nahona ia na kros nia. Mi tana tahu te haea ia Jisas te mate vahai nia, me kori vahai ia de, “Na tinoni de, na Dalena kalavata ia God!”
40Mara toha lakamu kesana na daki tara tuu haru dia kalikali, mara hahae diaa na omea vahai nira nia. Mi lalodira na daki loera, koi Meri na vangana ni Magdala, mi koi Salome, mi koi Meri na tinana ia Jemes na mane borau, ma ia Josep. 41Loera nomu tolu daki tara bubukea ia Jisas tahuna te toha i Galili, mara sangaa ia. Mara danga lakamu na daki tara mai i Jerusalem kolua ia Jisas, ara toha lakamu tana tahu nia.
Ia Josep e kokua ia Jisas tana baba ni koku tinoni
(Matiu 27:57-61; Luk 23:50-56; Jon 19:38-42)
42-43Me varangia ke puti tana tahu vahai te chau mai ia Josep na vangana i Arimetia. Ia Josep e chikai na tinoni leholeho tana Saikolu ira na Jiu tara kukunia ira na tinoni. Me toha pitua me ke morosia na mamaiana nina baravata ia God. Ma na dani nia, ia nomu na dani uluhi vania na Sabat. Ma ia Josep e liangaa na matahu me dia tatana ia Paelat, me nongia ia na kokorana ia Jisas.
44Me taora ia Paelat tahuna te valingea te mate noha ia Jisas. Me solora ia nidira tinoni leholeho ira na malahai, me gesuara me kori vahai vanira de, “?E vahai vei, e mana nomu te mate noha ia Jisas?”
45Mi tana tahu te valingea ia na hua te koria na tinoni leholeho ira na malahai nia, me talasanga vania ia Josep ke tahaa ia na kokorana ia Jisas.
46Ma ia Josep e dia me volia chikai na kaleko talana te leho na matena, me taha sivoa ia na kokorana ia Jisas tana kros, me pulua tana kaleko nia. Me livu sahea ia na kokorana ia Jisas lalona na baba tara helia ira me ova sahe tana marahova. Mi bukena, me kelu maia ia chikai na makara leho me ke ni vongotia na matana baba nia. 47Mi tana tahu nia koi Meri na vangana ni Magdala, mi koi Meri na tinana ia Josep, koera ara ko morosia na malengana ta kara livua na kokorana ia Jisas.
© 2024 (active), Wycliffe Bible Translators, Inc. All rights reserved