3. Mose 13
13
Djungelo nasslepen ap o mass
1O baro Devel penas ap o Mose oun ap o Aron: 2Te vell pash i mensheste i kotar hauta pesso oder nasselo oder parno, yaake te darenn le, kay kova i djoungelo nasslepen hi, palle vell ko mensho pash o rashayeste anlo, pash o Aroneste oder pash yekeste leskre morsh čavendar. 3Oun ko rashay hounte dikell peske koy nasseli kotar hauta an. Te van i balla kote parno, oun koy nasseli kotar hauta hi doureder tele an o mass har koy vavar hauta trouyel, palle hi kova i djoungelo nasslepen. Kova te dikell o rashay ap koleste, palle hounte rakrell lo vin, te hi ko mensho pale-čiddo.
4Te hi ko parno kotar ap leskri hauta gar doureder tele an leskro mass har koy vavar hauta, oun i balla van gar parno, palle pandell ko rashay ko menshes efta divessa an i kheer dren. 5Ap o eftato dives dikell lo les pale an. Te patsell lo, te djas ko parno kotar gar doureder, oun ačas yaake har glan kova, palle pandell ko rashay les i douyto kopo efta divessa dren. 6Pal kol efta divessa dikell o rashay pale koy kotar hauta an. Te hi kova bouder gar yaake parno oun vas gar bareder, palle hounte rakrell lo vin, te hi ko mensho erligo. Kava hi i nasslepen ap i hauta, hoy gar djoungelo hi. Ko mensho hounte thovell peskre koola oun hi erligo. 7Te vell ko nasselo kotar bareder pal kova, kay o rashay pre dikas, palle hounte sikrell lo pes o rashayeste i douyto kopo. 8Te dikell o rashay palle, kay vas ko nasselo kotar bareder, palle hi kova i djoungelo nasslepen, oun o rashay hounte rakrell vin, te hi ko mensho pale-čiddo.
9Te hi yekes i doukepen ap peskri hauta, hoy vi dikell har i djoungelo nasslepen, palle anenn le saves pash o rashayeste. 10Te dikell ko rashay palle, te hi ko doukepen parno oun pesso, oun i balla an ko doukepen van parno, oun ko doukepen hi pre oun lolo, 11palle hi kova ap leskri hauta i phouro djoungelo doukepen. O rashay hounte rakrell vin, te hi ko mensho pale-čiddo. Yob hounte pandell les gar an o kheer dren, pale-čiddo hi lo.
12-13Te phagell i nasslepen ap i tseli hauta vin, foun leskro shero bis pash leskre pire, oun halauter hi parno, hoy o rashay nay dikell, palle hi ko nasslepen čomone, hoy ko menshes gar pale-čiddo krell. Oun o rashay rakrell vin, te hi kova erligo.
14-15Hatsell o rashay, kay les an-dikell, i doukepen, hoy hi pre oun lolo, hi kova i djoungelo nasslepen. Oun o rashay, kay kova dikell, hounte rakrell vin, te hi ko mensho pale-čiddo. Ko lolo mass, hoy pre hi, hi pale-čiddo, oun hi i sikepen, kay kova i djoungelo nasslepen hi. 16Te djal ko lolo mass palpale oun vell parno, palle vell ko mensho pale pash o rashayeste. 17Te dikell o rashay, te vas ko lolo mass parno, hi ko mensho bouder gar pale-čiddo. Oun o rashay hounte rakrell vin, te hi lo erligo.
18Te phagell pash yekeste i doukepen pre ap leskri hauta, oun vell pale sasto, 19oun pal kova vell i hauta ap ko emligo kotar pale pesso oun parno oder parno-te-lolo, palle sikrell lo kova o rashayeste. 20Te dikell o rashay koy kotar hauta, oun kova hi doureder tele an o mass har i vavar hauta trouyel, oun i balla ap ko doukepen van parno, palle hi kova i djoungelo nasslepen, hoy an o doukepen vin phagas. Palle rakrell ko rashay vin, te hi ko mensho pale-čiddo.
21Te dikell o rashay koy kotar hauta oun dikell kek parne balla, oun koy kotar hauta hi gar doureder tele an o mass har i tseli vavar hauta, oun hi bouder gar yaake parno oder lolo-te-parno, palle pandell o rashay ko menshes efta divessa dren. 22Te vell ko kotar bareder, palle hi kova i djoungelo nasslepen. Oun o rashay hounte rakrell vin, te hi ko mensho pale-čiddo. 23Te vell ko kotar gar bareder, palle hi i doukepen, hoy sasto vas, oun mass hoy kote pale khetne djas. O rashay hounte rakrell vin, te hi ko mensho erligo.
24Te hatsell pes ap yekeste i kotar hauta, hoy rhačedo vas, oun ko doukepen vell lolo-te-parno oder parno, 25hounte sikrell lo kova o rashayeste. Te dikell o rashay, te van i balla kote dren parno, oun ko kotar hauta hi doureder tele har i vavar hauta trouyel, palle hi kova i djoungelo nasslepen, hoy an ko kotar hauta, hoy rhačedo vas, vin phagas. O rashay hounte rakrell vin, te hi ko mensho pale-čiddo.
26Te dikell o rashay kek parne balla ap ko doukepen, oun koy hauta hi gar doureder tele har i tseli vavar hauta, oun hi bouder gar yaake parno, palle pandell o rashay ko menshes efta divessa dren. 27Ap o eftato dives dikell o rashay ko doukepen pale an. Te vas ko parno kotar bareder, hi kova i djoungelo nasslepen. Oun o rashay hounte rakrell vin, te hi ko mensho pale-čiddo. 28Te ačas ko doukepen yaake har lo his, oun vas gar bareder, oun hi bouder gar yaake parno, palle hi kova mass, hoy khetne djas pal ko rhačepen. O rashay hounte rakrell vin, te hi ko mensho erligo.
29Te hi i morshes oder i djouvyat i nasslepen ap o shereskri hauta oder ap i čor, 30hounte dikell o rashay les peske an. Te hi i hauta kote doureder tele har i vavar hauta trouyel, oun van i balla kote djelto oun sano, palle hi kova i djoungelo nasslepen ap o shero oder ap i čor. O rashay hounte rakrell vin, te hi ko mensho pale-čiddo.
31Te dikell o rashay, kay i balla kote bouder gar kalo hi, ninna te hi i nasseli hauta gar doureder tele har koy vavar hauta trouyel, palle pandell o rashay ko menshes efta divessa dren. 32Te dikell lo pal kol efta divessa palla, oun koy nasseli kotar hauta vas gar bareder, oun hi gar doureder tele har i vavar hauta, oun kek djelto bal hi koy, 33palle hounte činell ko mensho peskre balla troul ko doukepen tele. Oun o rashay pandell les pale efta divessa dren. 34Te dikell o rashay ap o eftato dives palla, oun ko doukepen vas gar bareder, oun hi gar doureder tele an o mass har i vavar hauta, palle hounte rakrell o rashay vin, te hi ko mensho erligo. Ko mensho hounte thovell peskre koola oun hi erligo. 35Te vell ko doukepen bareder, pal kova yob erligo kerdo vas, 36hounte dikell ko rashay les pale. Te dikell o rashay, te vas ko doukepen bareder, hounte rodell o rashay bouder gar pal i balla, hoy djelto van. Pale-čiddo hi lo. 37Te dikell an i rashayeskre yaka vin, har te vas ko doukepen gar bareder, oun te van kote kale balla vin, palle vas ko mensho sasto. O rashay hounte rakrell vin, te hi lo erligo.
38Te hi i morshes oder i djouvyat parne kotya ap pengri hauta, 39hounte dikell o rashay palla, hoy kova hi. Te hi kal kotya gar yaake parno, palle hi kova kek djoungelo nasslepen, hoy an i hauta vin phagas. Pale-čiddo hi ko mensho gar.
40-41Te perenn yekeske i balla ap o shero vin, palla oder glan, hi lo doleske gar pale-čiddo. 42-43Te hi kote, kay i balla vin peran, palla oder glan, i kotar hauta, hoy parno-te-lolo hi, hounte dikell o rashay pal, hoy kova hi. Hatsell o rashay i pessepen ap koy hauta, kay i balla vin peran, oun ko pessepen hi lolo-te-parno, oun dikell vin har i djoungelo nasslepen, 44palle hi les čačepah kava djoungelo nasslepen ap peskro shero. Pale-čiddo hi lo. Oun o rashay rakrell vin, te hi lo pale-čiddo.
45Ko morsh ap koleste ko djoungelo nasslepen hi, hounte rivell koola, hoy paash hi, oun hounte moukell leskri balla divyes, oun hounte čivell i diklo troul peskri čor, oun dell vin gole: pale-čiddo, pale-čiddo! 46Oun yaake rah, har ko djoungelo nasslepen ap leste hi, hi lo pale-čiddo. Yob djivell kokres, oun krell peskro kheer vin glan koy platsa, kay i vavar menshe djivenn.
Djunglepen ap ripya oun ledertikre koola
47-49Te sikrell pes i djoungelo kotar ap i ripen oder ap koola, hoy hi dran bakrengre balla, layna oder ledera, oun ko djoungelo kotar hi zenelo oder lolo, hounte dikell pes kova o rashay an. 50Yob dikell les peske an oun pandell les efta divessa dren. 51Ap ko eftato dives dikell lo les pale an. Te vas ko djoungelo kotar bareder, hi kova i djounglepen, hoy hi pale-čiddo. 52Ko ripen oder kol koola, ap kolende ko djounglepen hi, hounte venn pre rhačedo an i yag.
53Hi vavarčandes, te dikell o rashay ko koova an, oun ko djoungelo kotar vas gar bareder, 54palle penell o rashay, te lenn le ko koova oun thovenn les. Palle pandell lo les o douyto kopo efta divessa dren. 55Pal kol efta divessa dikell les o rashay pale an. Te ačas ko djoungelo kotar koy, hi kava ripen pale-čiddo, ninna te vas ko djoungelo kotar gar bareder. Kava djounglepen rhas pes dren glan oder palla. Doleske hounte vell kava ripen oder kal koola rhačedo. 56Te dikell o rashay, te vas ko kotar, hoy zenelo oder lolo his, bouder gar yaake zenelo oder lolo pal o thopen, palle činell lo les tele dran o ripen oder dran i koola dran bakrengre balla oder layna oder ledera. 57Te sikrell pes ko djounglepen pal kova pale, vell diklo, te hi čomone, hoy doureder djal. Palle hounte vell kava koova rhačedo, kay sikrell pes kava djounglepen ap leste. 58Te hi ko djounglepen bouder gar koy pal o thopen, hounte vell kava koova thodo i douyto kopo. Pal kova hi lo gar pale-čiddo.
59Yaake hounte vell kerdo, te sikrell pes i djoungelo kotar ap i ripen oder ap koola, hoy hi dran bakrengre balla, layna oder ledera, te vell siklo, hi le pale-čiddo oder gar.
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
3. Mose 13
13
Djungelo nasslepen ap o mass
1O baro Devel penas ap o Mose oun ap o Aron: 2Te vell pash i mensheste i kotar hauta pesso oder nasselo oder parno, yaake te darenn le, kay kova i djoungelo nasslepen hi, palle vell ko mensho pash o rashayeste anlo, pash o Aroneste oder pash yekeste leskre morsh čavendar. 3Oun ko rashay hounte dikell peske koy nasseli kotar hauta an. Te van i balla kote parno, oun koy nasseli kotar hauta hi doureder tele an o mass har koy vavar hauta trouyel, palle hi kova i djoungelo nasslepen. Kova te dikell o rashay ap koleste, palle hounte rakrell lo vin, te hi ko mensho pale-čiddo.
4Te hi ko parno kotar ap leskri hauta gar doureder tele an leskro mass har koy vavar hauta, oun i balla van gar parno, palle pandell ko rashay ko menshes efta divessa an i kheer dren. 5Ap o eftato dives dikell lo les pale an. Te patsell lo, te djas ko parno kotar gar doureder, oun ačas yaake har glan kova, palle pandell ko rashay les i douyto kopo efta divessa dren. 6Pal kol efta divessa dikell o rashay pale koy kotar hauta an. Te hi kova bouder gar yaake parno oun vas gar bareder, palle hounte rakrell lo vin, te hi ko mensho erligo. Kava hi i nasslepen ap i hauta, hoy gar djoungelo hi. Ko mensho hounte thovell peskre koola oun hi erligo. 7Te vell ko nasselo kotar bareder pal kova, kay o rashay pre dikas, palle hounte sikrell lo pes o rashayeste i douyto kopo. 8Te dikell o rashay palle, kay vas ko nasselo kotar bareder, palle hi kova i djoungelo nasslepen, oun o rashay hounte rakrell vin, te hi ko mensho pale-čiddo.
9Te hi yekes i doukepen ap peskri hauta, hoy vi dikell har i djoungelo nasslepen, palle anenn le saves pash o rashayeste. 10Te dikell ko rashay palle, te hi ko doukepen parno oun pesso, oun i balla an ko doukepen van parno, oun ko doukepen hi pre oun lolo, 11palle hi kova ap leskri hauta i phouro djoungelo doukepen. O rashay hounte rakrell vin, te hi ko mensho pale-čiddo. Yob hounte pandell les gar an o kheer dren, pale-čiddo hi lo.
12-13Te phagell i nasslepen ap i tseli hauta vin, foun leskro shero bis pash leskre pire, oun halauter hi parno, hoy o rashay nay dikell, palle hi ko nasslepen čomone, hoy ko menshes gar pale-čiddo krell. Oun o rashay rakrell vin, te hi kova erligo.
14-15Hatsell o rashay, kay les an-dikell, i doukepen, hoy hi pre oun lolo, hi kova i djoungelo nasslepen. Oun o rashay, kay kova dikell, hounte rakrell vin, te hi ko mensho pale-čiddo. Ko lolo mass, hoy pre hi, hi pale-čiddo, oun hi i sikepen, kay kova i djoungelo nasslepen hi. 16Te djal ko lolo mass palpale oun vell parno, palle vell ko mensho pale pash o rashayeste. 17Te dikell o rashay, te vas ko lolo mass parno, hi ko mensho bouder gar pale-čiddo. Oun o rashay hounte rakrell vin, te hi lo erligo.
18Te phagell pash yekeste i doukepen pre ap leskri hauta, oun vell pale sasto, 19oun pal kova vell i hauta ap ko emligo kotar pale pesso oun parno oder parno-te-lolo, palle sikrell lo kova o rashayeste. 20Te dikell o rashay koy kotar hauta, oun kova hi doureder tele an o mass har i vavar hauta trouyel, oun i balla ap ko doukepen van parno, palle hi kova i djoungelo nasslepen, hoy an o doukepen vin phagas. Palle rakrell ko rashay vin, te hi ko mensho pale-čiddo.
21Te dikell o rashay koy kotar hauta oun dikell kek parne balla, oun koy kotar hauta hi gar doureder tele an o mass har i tseli vavar hauta, oun hi bouder gar yaake parno oder lolo-te-parno, palle pandell o rashay ko menshes efta divessa dren. 22Te vell ko kotar bareder, palle hi kova i djoungelo nasslepen. Oun o rashay hounte rakrell vin, te hi ko mensho pale-čiddo. 23Te vell ko kotar gar bareder, palle hi i doukepen, hoy sasto vas, oun mass hoy kote pale khetne djas. O rashay hounte rakrell vin, te hi ko mensho erligo.
24Te hatsell pes ap yekeste i kotar hauta, hoy rhačedo vas, oun ko doukepen vell lolo-te-parno oder parno, 25hounte sikrell lo kova o rashayeste. Te dikell o rashay, te van i balla kote dren parno, oun ko kotar hauta hi doureder tele har i vavar hauta trouyel, palle hi kova i djoungelo nasslepen, hoy an ko kotar hauta, hoy rhačedo vas, vin phagas. O rashay hounte rakrell vin, te hi ko mensho pale-čiddo.
26Te dikell o rashay kek parne balla ap ko doukepen, oun koy hauta hi gar doureder tele har i tseli vavar hauta, oun hi bouder gar yaake parno, palle pandell o rashay ko menshes efta divessa dren. 27Ap o eftato dives dikell o rashay ko doukepen pale an. Te vas ko parno kotar bareder, hi kova i djoungelo nasslepen. Oun o rashay hounte rakrell vin, te hi ko mensho pale-čiddo. 28Te ačas ko doukepen yaake har lo his, oun vas gar bareder, oun hi bouder gar yaake parno, palle hi kova mass, hoy khetne djas pal ko rhačepen. O rashay hounte rakrell vin, te hi ko mensho erligo.
29Te hi i morshes oder i djouvyat i nasslepen ap o shereskri hauta oder ap i čor, 30hounte dikell o rashay les peske an. Te hi i hauta kote doureder tele har i vavar hauta trouyel, oun van i balla kote djelto oun sano, palle hi kova i djoungelo nasslepen ap o shero oder ap i čor. O rashay hounte rakrell vin, te hi ko mensho pale-čiddo.
31Te dikell o rashay, kay i balla kote bouder gar kalo hi, ninna te hi i nasseli hauta gar doureder tele har koy vavar hauta trouyel, palle pandell o rashay ko menshes efta divessa dren. 32Te dikell lo pal kol efta divessa palla, oun koy nasseli kotar hauta vas gar bareder, oun hi gar doureder tele har i vavar hauta, oun kek djelto bal hi koy, 33palle hounte činell ko mensho peskre balla troul ko doukepen tele. Oun o rashay pandell les pale efta divessa dren. 34Te dikell o rashay ap o eftato dives palla, oun ko doukepen vas gar bareder, oun hi gar doureder tele an o mass har i vavar hauta, palle hounte rakrell o rashay vin, te hi ko mensho erligo. Ko mensho hounte thovell peskre koola oun hi erligo. 35Te vell ko doukepen bareder, pal kova yob erligo kerdo vas, 36hounte dikell ko rashay les pale. Te dikell o rashay, te vas ko doukepen bareder, hounte rodell o rashay bouder gar pal i balla, hoy djelto van. Pale-čiddo hi lo. 37Te dikell an i rashayeskre yaka vin, har te vas ko doukepen gar bareder, oun te van kote kale balla vin, palle vas ko mensho sasto. O rashay hounte rakrell vin, te hi lo erligo.
38Te hi i morshes oder i djouvyat parne kotya ap pengri hauta, 39hounte dikell o rashay palla, hoy kova hi. Te hi kal kotya gar yaake parno, palle hi kova kek djoungelo nasslepen, hoy an i hauta vin phagas. Pale-čiddo hi ko mensho gar.
40-41Te perenn yekeske i balla ap o shero vin, palla oder glan, hi lo doleske gar pale-čiddo. 42-43Te hi kote, kay i balla vin peran, palla oder glan, i kotar hauta, hoy parno-te-lolo hi, hounte dikell o rashay pal, hoy kova hi. Hatsell o rashay i pessepen ap koy hauta, kay i balla vin peran, oun ko pessepen hi lolo-te-parno, oun dikell vin har i djoungelo nasslepen, 44palle hi les čačepah kava djoungelo nasslepen ap peskro shero. Pale-čiddo hi lo. Oun o rashay rakrell vin, te hi lo pale-čiddo.
45Ko morsh ap koleste ko djoungelo nasslepen hi, hounte rivell koola, hoy paash hi, oun hounte moukell leskri balla divyes, oun hounte čivell i diklo troul peskri čor, oun dell vin gole: pale-čiddo, pale-čiddo! 46Oun yaake rah, har ko djoungelo nasslepen ap leste hi, hi lo pale-čiddo. Yob djivell kokres, oun krell peskro kheer vin glan koy platsa, kay i vavar menshe djivenn.
Djunglepen ap ripya oun ledertikre koola
47-49Te sikrell pes i djoungelo kotar ap i ripen oder ap koola, hoy hi dran bakrengre balla, layna oder ledera, oun ko djoungelo kotar hi zenelo oder lolo, hounte dikell pes kova o rashay an. 50Yob dikell les peske an oun pandell les efta divessa dren. 51Ap ko eftato dives dikell lo les pale an. Te vas ko djoungelo kotar bareder, hi kova i djounglepen, hoy hi pale-čiddo. 52Ko ripen oder kol koola, ap kolende ko djounglepen hi, hounte venn pre rhačedo an i yag.
53Hi vavarčandes, te dikell o rashay ko koova an, oun ko djoungelo kotar vas gar bareder, 54palle penell o rashay, te lenn le ko koova oun thovenn les. Palle pandell lo les o douyto kopo efta divessa dren. 55Pal kol efta divessa dikell les o rashay pale an. Te ačas ko djoungelo kotar koy, hi kava ripen pale-čiddo, ninna te vas ko djoungelo kotar gar bareder. Kava djounglepen rhas pes dren glan oder palla. Doleske hounte vell kava ripen oder kal koola rhačedo. 56Te dikell o rashay, te vas ko kotar, hoy zenelo oder lolo his, bouder gar yaake zenelo oder lolo pal o thopen, palle činell lo les tele dran o ripen oder dran i koola dran bakrengre balla oder layna oder ledera. 57Te sikrell pes ko djounglepen pal kova pale, vell diklo, te hi čomone, hoy doureder djal. Palle hounte vell kava koova rhačedo, kay sikrell pes kava djounglepen ap leste. 58Te hi ko djounglepen bouder gar koy pal o thopen, hounte vell kava koova thodo i douyto kopo. Pal kova hi lo gar pale-čiddo.
59Yaake hounte vell kerdo, te sikrell pes i djoungelo kotar ap i ripen oder ap koola, hoy hi dran bakrengre balla, layna oder ledera, te vell siklo, hi le pale-čiddo oder gar.
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.