Mataayo Obhukangati
Obhukangati
Eghitabhu kino ꞉nkyaandëkuru na Mataayo uno are omutöbhi o righööti, uno Yesu ꞉amobherekiire akamuköra kubha omoonamwegha waache. Mataayo uyo ꞉naabherekiiru eriina erende Raawi (Mataayo 9:9–13; Maariko 2:14–17; Ruuka 5:27–32). Amangʼana maaru ghano Mataayo andëkiri mo‑ghitabhu kino, n‑ghano arooche kwo miisho ghaache. Mataayo ahanene ꞉naabhaandëkiire Abhayahuuti bhano ꞉bhaakumiri Angʼana Anchömu ighoro e Yesu. Amare Angʼana Anchömu iyo taanyi gho ghiri e Bhayahuuti abheene, amare ꞉naayaandëkiri kwo bhaato bhoose bha mo‑se. Mataayo naghotwërëki kubha Yesu niwe Kirisito no Omotoori o bhaato. N‑gho kohetera kwo Yesu, Eryobha reghaghahikeerani ghaare ghoose reere riraghiire abhaato ghuköra.
Eghitabhu ke Mataayo ngichöchuru bhoheene. Ngeghosiikërëra amangʼana maaru ighoro e riimanya re Yesu hano are mo‑se. Ngeghosiikërëra korwera kwibhoru kooche, no obhutamishi bhooche bho kuraghani Angʼana Anchömu e bhutëmi bho Ryobha, na kinya bhuure ꞉aköriri ebhiraghe, na kobhahöri abhaato. Wiiki ngeghosiikërëra ighoro e roko ro Yesu na koryoka kooche, mbagha ghugharuka kooche Mwishaaro.
© 2022 Wycliffe Bible Translators, Inc. All rights reserved