ኀበ ሰብአ ሮሜ 5
5
ምዕራፍ 5
በእንተ ጽድቀ ሃይማኖት
1 #
ኢሳ. 53፥5፤ ዮሐ. 16፥33። ጽደቁ እንከ በአሚን ወንርከብ ሰላመ በኀበ እግዚአብሔር በእግዚእነ ኢየሱስ ክርስቶስ። 2#ኤፌ. 3፥12። ዘበእንቲኣሁ ተመራሕነ በሃይማኖት ውስተ ዛቲ ጸጋሁ እንተ ባቲ ቆምነ ወውእቱ ምክሕነ ወባቲ ንሴፎ ስብሐተ እግዚአብሔር። 3#ያዕ. 1፥3። ወአኮ በባሕቲታ ዓዲ ንትሜካሕ በሕማምነሂ እስመ ነአምር ከመ ሕማም ይፌጽም ትዕግሥተ ላዕሌነ። 4ወትዕግሥትሰ መከራ ወበመከራ ይትረከብ ተስፋ። 5#ዕብ. 6፥18-19። ወተስፋኒ ኢያስተኀፍር እስመ ፍቅረ እግዚአብሔር መልአ ውስተ ልብነ በመንፈስ ቅዱስ ዘወሀበነ። 6ክርስቶስኒ መጽአ በዕድሜሁ ይሙት በእንተ ኀጢአትነ እንዘ ኃጥኣን ንሕነ። 7#ዮሐ. 15፥13። እንበይነ እኩያንሰ እምዕፁብኒ ጥቀ ኢይትረከብ ዘይትሀበል ይሙት ወእንበይነ ኄራንሰ እንዳዒ እንጋ ለእመ ቦ ዘይትረከብ ዘያጠብዕ ይሙት። 8#ዮሐ. 3፥16-21። ናሁ ርእዩ መጠነ አፍቀረነ እግዚአብሔር እንዘ ኃጥኣን ንሕነ ክርስቶስ ሞተ በእንቲኣነ። 9እፎ እንከ ፈድፋደ ለእመ ጸደቅነ ያነጽሐነ በደሙ ወያድኅነነ እመንሱት ዘይመጽእ። 10#8፥7። ወሶበ እንዘ ፀሩ ንሕነ ለእግዚአብሔር ተሣሀለነ በሞተ ወልዱ እፎ እንከ ይሣሀለነ ፈድፋደ እምከመ ተዐረቀነ ወተሣሀለነ ያሐይወነ በሕይወተ ወልዱ። 11አኮ በእንተ ዝንቱ ባሕቲቱ ዓዲ ንትሜካሕ በኀበ እግዚአብሔር በእንተ እግዚእነ ኢየሱስ ክርስቶስ ዘበእንቲኣሁ ረከብነ ሣህሎ።
ዘከመ ቦአት ኀጢአት ውስተ ዓለም
12 #
6፥23፤ ዘፍ. 2፥17። ወበእንተዝ በከመ በጌጋየ አሐዱ ብእሲ ቦአት ኀጢአት ውስተ ዓለም ወበእንተ ይእቲ ኀጢአት መጽአ ሞት ላዕለ ኵሉ ሰብእ ወተኈለቈት ኀጢአት ላዕለ ኵሉ። 13#4፥15። እስከ አመ መጽአት ኦሪት ሀለወት ኀጢአት ውስተ ዓለም እንዘ ኢትትዐወቅ ምንት ይእቲ እስመ ኢትትኌለቍ ኀጢአት እስመ ዓዲሁ ኢመጽአ ውእተ አሚረ ሕገገ ኦሪት። 14#1ቆሮ. 15፥21-22፤45-55። ወባሕቱ ኰነኖሙ ዳእሙ ሞት እምአዳም እስከ ሙሴ ለእለሂ አበሱ ወለእለሂ ኢአበሱ በእንተ ይእቲ ኀጢአቱ ለአዳም እስመ ኵሉ በአምሳለ አዳም ተፈጥረ እስመ አዳም አምሳሉ ውእቱ ለዘሀለዎ ይምጻእ። 15#1ቆሮ. 15፥22፤ ዮሐ. 1፥16-17። ወባሕቱ አኮ በአምጣነ ጌጋይነ ዘኮነነ ሐሳበ ጸጋሁ ለእግዚአብሔር ወሶበ በጌጋየ አሐዱ ብእሲ ሞቱ ብዙኃን እፎ እንከ ፈድፋደ በጸጋሁ ለእግዚአብሔር ወበሀብቱ ዘጸገወነ በእንተ አሐዱ ብእሲ ዘውእቱ ኢየሱስ ክርስቶስ ይፈደፍድ ሕይወት ላዕለ ብዙኃን። 16ወአኮ በአምጣነ ኀጢአቱ ለአሐዱ ብእሲ ዘኮነነ ሐሳበ ጸጋሁ ለእግዚአብሔር ወሶበ ኵነኔ ኀጢአት እምላዕለ አሐዱ ብእሲ ወፂኣ ኵሉ ተቀሥፈ ባቲ እፎ እንከ ፈድፋደ ያነጽሐነ ጸጋሁ እምጌጋይነ ወይሁበነ ሕይወተ ዘለዓለም።
በእንተ ሕይወት ዘኮነት በክርስቶስ
17ወሶበ ኀጢአቱ ለአሐዱ ብእሲ አንገሠቶ ለሞት ወበአበሳ አሐዱ ብእሲ ቀነየነ ሞት እፎ እንከ ጸጋሁ ለአሐዱ ብእሲ ኢየሱስ ክርስቶስ ወሀብቱ ያጸድቀነ ወያነግሦ ለነ ለሕይወት ዘለዓለም። 18#1ቆሮ. 15፥22። ወበከመ በጌጋየ አሐዱ ብእሲ ተኰነነ ኵሉ ዓለም ከማሁ ካዕበ በጽድቀ አሐዱ ብእሲ ይጸድቅ ኵሉ ዕጓለ እመሕያው። 19#ኢሳ. 53፥11፤ ፊልጵ. 2፥8። ወበከመ በእንተ ዐሊወ አሐዱ ብእሲ ብዙኃን ኮኑ ኃጥኣነ ከማሁ ካዕበ በተአዝዞቱ ለአሐዱ ብእሲ ብዙኃን ኮኑ ጻድቃነ። 20#4፥15፤ 6፥14፤ 7፥8፤ ገላ. 3፥19። ኦሪትሰኬ ለምክንያት መጽአት ወተባውአት ከመ ታብዝኃ ለኀጢአት ወኀበ በዝኀት ኀጢአት ህየ ፈድፈደት ጸጋሁ ለእግዚአብሔር። 21#6፥23። ወበከመ አንገሠቶ ኀጢአት ለሞት ከማሁ ታነግሦ ለጽድቅ ጸጋሁ ለእግዚአብሔር ውስተ ሕይወት ዘለዓለም በእግዚእነ ኢየሱስ ክርስቶስ።
