ኀበ ሰብአ ሮሜ 12
12
ምዕራፍ 12
ዘከመ ይደሉ ንረሲ ነፍስተነ መሥዋዕተ ቅዱሰ
1 #
6፥13፤ 1ጴጥ. 2፥5። አስተበቍዐክሙ አኀዊነ በሣህሉ ለእግዚአብሔር ረስዩ ነፍስተክሙ መሥዋዕተ ቅዱሰ ለእግዚአብሔር ወሕያወ ወሥሙረ ወኅሩየ ይኩን ቍርባንክሙ ወቅኔክሙ ነባቢ። 2#ኤፌ. 4፥23፤ 5፥10-17። ኢታፍቅርዎ ለዝ ዓለም ወሐድሱ ልበክሙ ወአመክሩ ዘይፈቅድ እግዚአብሔር ዘሠናይ ወዘጽድቅ ወዘፍጹም። 3#1ቆሮ. 12፥11፤ ኤፌ. 4፥7። ወእነግረክሙ ለኵልክሙ በጸጋ እግዚአብሔር ዘተውህበ ሊተ ከመ ኢትትዐበዩ ወኢተኀልዩ ትዝኅርተ አላ ኀልዩ በዘታነጽሑ ርእሰክሙ እምዝሙት ወኵሉ በከመ ከፈሎ እግዚአብሔር በመስፈርተ ሃይማኖቱ። 4በከመ በውስተ አሐዱ ነፍስትነ ብዙኅ መለያልይ ብነ ወዘዘዚኣሁ ምግባሩ። 5#1ቆሮ. 12፥27። ከማሁ ኵልነ እንዘ ብዙኃን አሐዱ ሥጋ ንሕነ በክርስቶስ። 6#1ቆሮ. 12፥4። ወብክሙ ጸጋ እግዚአብሔር ወዘዘ ዚኣሁ ጸጋሁ ዘሂ ይትኔበይ በሐሳበ ሃይማኖቱ። 7#1ጴጥ. 4፥10-11። ወዘሂ ይትለአክ በመልእክቱ ወዘሂ ይሜህር በትምህርቱ። 8#ማቴ. 6፥3፤ 2ቆሮ. 8፥2፤ 9፥7። ወዘሂ ይትፌሣሕ በፍሥሓሁ ወዘሂ ይሠየም ከመ ያሥልጥ መልእክቶ ወዘሂ ይምሕር በምሒሮቱ።
በእንተ ምግባረ ሠናይ ዘዘዚኣሁ
9 #
1ጢሞ. 1፥5፤ አሞ. 5፥15፤ መዝ. 96፥10። ተፋቀሩ ዘእንበለ ኑፋቄ ተገኀሡ እምኩይ ወትልዉ ሠናየ። 10#ፊልጵ. 2፥3። ወአድልዉ ለጽድቅ አፍቅሩ ቢጸክሙ ወኩኑ መሓርያነ ተካበሩ በበይናቲክሙ ወአክብሩ መኳንንቲክሙ። 11#ዕብ. 13፥7፤ ፊልጵ. 2፥3። ወለጻሕቅ ኢትትሀከዩ ለመንፈስ ተሐይዉ ለእግዚአብሔር ተቀነዩ። 12#1ተሰ. 5፥17። ለተስፋክሙ ተፈሥሑ ለሕማምክሙ ተዐገሡ ለጸሎትክሙ ተፀመዱ። 13#ዕብ. 13፥2-16። ለግብረ ቅዱሳን ተሳተፉ አፍቅሮ ነግድ አትልዉ። 14#ማቴ. 5፥44፤ 1ቆሮ. 4፥12። ደኀርዎሙ ለእለ ይሰድዱክሙ ደኀሩ ወኢትርግሙ። 15#መዝ. 34፥13-14። ምስለ ዘይትፌሣሕ ተፈሥሑ ወምስለ ዘይበኪ ብክዩ።
በእንተ ኅሊና ሠናይ
16 #
15፥5። ወከመዝ ኀልዩ ምስለ ቢጽክሙ ወትዕቢተሰ ኢተኀልዩ ወከመ ዘያቴሕት ርእሶ ተመሰሉ። 17#ኢሳ. 5፥21፤ 1ተሰ. 5፥15-24። ወኢትበሉ ጠቢባን ንሕነ ወኢትፍድይዎ እኩየ ለዘአሕሠመ ለክሙ ሠናየ ተናገሩ ምስለ ቢጽክሙ። 18#ማር. 9፥50፤ ዕብ. 12፥14። ወእመሰ ይትከሀለክሙ ምስለ ኵሉ ሰብእ ተኣኀዉ። 19#ዘሌ. 19፥18፤ ማቴ. 5፥39፤ ዘዳ. 32፥35። ወኢትትበቀሉ ለሊክሙ አኀዊነ አኅልፍዋ ለመዓት እስመ ከመዝ ይቤ «አነ እትቤቀል ወአነ እትፈደይ ይቤ እግዚአብሔር።» 20#ማቴ. 5፥44።ወእመኒ ርኅበ ጸላኢከ አብልዖ ወለእመኒ ጸምአ አስትዮ ወዘንተ ለእመ ገበርከ አፍሐመ እሳት ታስተጋብእ ዲበ ርእሱ። 21ወኢትማኦ ለእኩይ በእኩይ አላ ማኦ ለእኩይ በገቢረ ሠናይ።
