ኀበ ሰብአ ቆሮንቶስ 1 8
8
ምዕራፍ 8
በእንተ አእምሮተ እግዚአብሔር
1 #
ግብረ ሐዋ. 15፥20። ወበእንተኒ እለ ይዘብሑ ለአማልክት ነአምር ከመ ኵልነ ብነ ልብ ወአእምሮሰ ያስተዔቢ ወተፋቅሮ የሐንጽ። 2#ገላ. 6፥3፤ 1ጢሞ. 6፥4። ወእመ ቦ ዘይብል አእመርኩ ዓዲ ኢያእመረ ዘይደልዎ ያእምር። 3#ገላ. 4፥9። ወዘሰ ያፈቅሮ ለእግዚአብሔር ውእቱኬ ዘበአማን አእመረ። 4#10፥19። ወበእንተሰ መባልዕት ዘይዘብሑ ለአማልክት ነአምር ከመ ከንቱ እሙንቱ በውስተ ዓለም ወአልቦ አምላክ ዘእንበለ አሐዱ እግዚአብሔር። 5#ኤር. 19፥13። እስመ ቦ እለ ይብልዎሙ አማልክተ እመኒ ዘውስተ ሰማይ ወእመኒ ዘውስተ ምድር ወእለሰ ብዙኃን አማልክቲሆሙ ብዙኃን አጋንንቲሆሙ። 6#ሚል. 2፥10፤ ቈላ. 1፥16፤ ዮሐ. 10፥30። ወለነሰኬ አሐዱ እግዚአብሔር አብ ዘኵሉ እምኔሁ ወንሕነኒ ቦቱ ወአሐዱ እግዚእነ ኢየሱስ ክርስቶስ ዘኵሉ በእንቲኣሁ ወንሕነኒ ቦቱ። 7#10፥27። ወባሕቱ አኮ ኵሉ ዘየአምሮ ሀለዉ እለ በልማደ አማልክት እስከ ዮም ይበልዑ ዘይዘብሑ ለአማልክት ወይረኵሱ በኢያጥብዖቶሙ። 8#ሮሜ 14፥17። ወመብልዕሰ ኢያሰልጠነ በኀበ እግዚአብሔር በሊዕኒ ኢያረብሐነ ወኢያነክየነ። 9#1ጴጥ. 2፥12፤ 2ቆሮ. 6፥3። ወባሕቱ ዑቁ ባዕድ ኢይስሐት በርእየ ዚኣክሙ። 10ለእመቦ ዘርእየከ አንተ ዘተአምን እንዘ ትረፍቅ ውስተ ቤተ አማልክት ያጠብዕ ሶቤሃ ዝኩ ዘቀዳሚ ንፉቅ ልቡ ወይበልዕ ዝቡሐ ለአማልክት። 11#ሮሜ 14፥15። ወይመውት ዝኩ ድኩመ ልብ በርእየ ዚኣከ እኁነ ዘበእንቲኣሁ ሞተ ክርስቶስ። 12ወለእመ ከመዝ ትኤብሱ ላዕለ ቢጽክሙ ወታወድቁ ልቦሙ ለድኩማን ለክርስቶስኬ አበስክሙ። 13#ሮሜ 14፥21። ወእመሰ እንበይነ መብልዕ ይስሕት ቢጽየ ኢይበልዕ ሥጋ ለዝሉፉ ከመ ኢያስሕት ቢጽየ።
