ኀበ ሰብአ ቆሮንቶስ 1 6
6
ምዕራፍ 6
በእንተ ዘኢይደሉ ተዋቅሦ በኀበ ጸኣልያን
1ወኢትትኀበሉ እንከ ትትዋቀሡ በኀበ ጸኣልያን ቦኑ ዘይክል ይትዋቀሥ ምስለ ካልኡ በኀበ ዐማፅያን አኮኑ በኀበ ኄራን ወለእመቦ ዘቦ ተስናን ምስለ ቢጹ ለይትዋቀሥ በኀበ ቅዱሳን ወአኮ በኀበ ጸኣልያን ወዐማፅያን። 2#ራእ. 3፥21፤ ዳን. 7፥22። ወኢተአምሩኑ ከመ ቅዱሳን ይኴንንዎሙ ለዓለም ወእመሰኬ አንትሙ ትኴንንዎሙ ለዓለም ኢይደልወክሙኑ ትኰንኑ ዘንተ ትሑተ ምኵናነ። 3ወኢተአምሩኑ ከመ መላእክተ ጥቀ ንኴንን ኅድጉሰ ዘዝ ዓለም። 4ወባሕቱ ለእመቦ ዘቦ ተስናነ ዝ ዓለም ቢጽ ትሑታን ዘቤተ ክርስቲያን ዘአንበሩ ሎሙ ይስምዕዎሙ። 5ወዘኒ ዘእብለክሙ እንዘ እዛለፈክሙ ከመዝኑ አልቦ ጠቢብ እምውስቴትክሙ ወዘይክል ዐሪቀ አኀው ምስለ ቢጾሙ። 6ወዓዲ እኅወ ምስለ እኍሁ እስከ ታስተሳንኑ ወትትጋዓዙ በኀበ አረሚ። 7ወአእምሩ እንከ ከመ እምጥንቱ ኀሣረ ይከውነክሙ እምከመ ጋዕዝ ወተስናን ብክሙ ኀጢአተ ወጌጋየ ይከውነክሙ እፎ እንከ ኢየሀይዱክሙ ወኢይገፍዑክሙ። 8ወዓዲ አንትሙ ዐማፅያን ወሀያድያን ወከመዝኑ ትኤብሱ ላዕለ ቢጽክሙ።
በእንተ እለ ኢይሬእይዋ ለመንግሥተ ሰማያት
9ኢተአምሩኑ ከመ ዐማፅያን ወሀያድያን ኢይሬእይዋ ለመንግሥተ እግዚአብሔር ኢያስሕቱክሙ ኢዘማውያን ወኢ እለ ያጣዕዉ ወኢ እለ ይኤብሱ በነፍስቶሙ ወኢ እለ የሐውሩ ወኢእለ የሐውርዎሙ። 10#ገላ. 5፥19-22። ወኢሰራቅያን ወኢተዐጋልያን ወኢሰካርያን ወኢጸኣልያን ወኢሀያድያን ኢይወርስዋ ለመንግሥተ እግዚአብሔር። 11#ቲቶ 3፥3-4፤ ዕብ. 9፥10። አንትሙ እንከ መኑ አንትሙ እንዘ ከማሁ አንትሙ ወባሕቱ ኀፀቡክሙ ወቀደሱክሙ ወአጽደቁክሙ በስሙ ለእግዚእነ ኢየሱስ ክርስቶስ ወበመንፈሱ ለአምላክነ። 12#10፥23፤ 1ተሰ. 4፥3-5። ብየ ሥልጣን ላዕለ ኵሉ ዘኮነ ወአኮ ኵሉ ዘይበቍዐኒ ወኵሉ ይትከሀለኒ ወአልቦ ዘእሬሲ ይሠለጥ በላዕሌየ መኑሂ። 13መብልዕ ለከርሥ ወከርሥኒ ለመብልዕ ወእግዚአብሔር ይስዕሮሙ ለክልኤሆሙ ወሥጋክሙሰ ኢኮነ ለዝሙት አላ ለእግዚአብሔር ወእግዚአብሔር ለሥጋክሙ። 14ወእግዚአብሔር ዘአንሥኦ ለኢየሱስ ክርስቶስ እግዚእነ እሙታን ያንሥአነ ኪያነሂ በኀይሉ። 15#12፥27። ኢተአምሩኑ ከመ አባሉ ለክርስቶስ ሥጋክሙ ትነሥኡኑ አባሎ ለክርስቶስ ወትሬስይዎ አባለ ዘማ ሐሰ። 16#ዘፍ. 2፥24። ኢተአምሩኑ ከመ ዘተደመረ ምስለ ዘማ አሐደ ሥጋ ይከውን ምስሌሃ እስመ ከማሁ ይቤ መጽሐፍ «ለይኩኑ ክልኤሆሙ አሐደ ሥጋ።» 17#ዮሐ. 17፥21-22፤ ኤፌ. 5፥32። ወዘሰ ተደመረ ምስለ እግዚአብሔር አሐደ መንፈሰ ይከውን ምስሌሁ። 18ጕዩ እምዝሙት እስመ ኵሉ ዘኀጢአተ ይገብር ሰብእ አፍኣ እምሥጋሁ ይገብር ወዘሰ ይዜሙ ለሊሁ በሥጋሁ ይኤብስ። 19#3፥17። ኢተአምሩኑ ከመ ማኅደሩ ለመንፈስ ቅዱስ አንትሙ ዘኅዱር ላዕሌክሙ ዘነሣእክሙ እምኀበ እግዚአብሔር ወኢኮንክሙ ለርእስክሙ። 20#7፥23፤ 1ጴጥ. 1፥18-19፤ ፊልጵ. 1፥20። በሤጥ ተሣየጠክሙ ሰብሕዎ ለእግዚአብሔር በሥጋክሙ።
