Rɔm 13
13
Kila kuji dɔ njeko̰ɓeje gə
1Pi 2.13-17
1May kar dəw gə ɗa-ɗa kara oso kul no njeko̰ ɓeje gə d-unda-je dɔ lo gə; mba ko̰ɓe gə ngira-a ḭ rɔ Luba gə ang le godo, ɗaa nje gə d-ɔ̰ ɓe nee le, Luba ja unda-je. 2Gəl-e gə nee ɓa dəw gə ɗa dɔ ngangə gə njeko̰ ɓe nama to njekal dɔ ndu Luba tɔ, ngaɓa nje dɔ ngangəje nee le tar a kuwa ne dɔ darɔ-je ja. 3Mba dəw gə ɗa ne gə may nama njil-e a ce dɔ mbayje gə ang, ngaa dəw gə ɗa ne gə may ang ɓa njil-e a ce. ꞌNjigi kar njil-i ce kərəng-kərəng dɔ njeko̰ ɓe gə ang nama ꞌɗa ne gə may ɗaa n-a pidi-i, 4mba n-to njekula lə Luba mba kar ꞌɗa ne ne gə may. Ngaa to gə ɓo ꞌɗa ne gə kṵra̰y nama, ar kar-i gəd-i gədə; mba n-uwa miya̰ ko̰ mbay baa ang, mba Luba ja unda-a mba kun-e d-al ne ba̰a̰ lə-a ngaɓa mba tɔji ne wungu lə-a dɔ dəw gə nje ɗa ne gə may ang gə. 5To kəm koso kul ja, mba wungu gə nee baa ang ngaa gə mba kəji gə mə gə.
6Gəl-e gə nee ɓa, uga-je ne lar gədə ɓe. Mba nje gə ꞌmbo̰ lar gədə ɓe nee le Luba ja unda-je ɔji dɔ kula gə nee le. 7Na-na ja nama ar-ɛje ne gə ɔji dɔ-ɛ: Dəw gə kəm kar uga-je lar dɔ ne no-ɛ gə nama uga-aje, dəw gə kəm kar uga-je sə-a lar gədə ɓe nama uga-je, dəw gə kəm kar-si ꞌɓəəl-eje nama ꞌɓəəl-eje, dəw gə kəm kar-si ꞌɗɔy-ɛje nama ꞌɗɔy-ɛje.
Njigi naa gə yo gə nee
Mat 22.35-40; 1Ja̰ 3.11-23
8Ar-je ɓangə lə dəw to dɔ-si gə ang, njigi ja baa ꞌnjigi-je naa gə yo gə nee; mba dəw gə njigi ngan mar-ɛje nama tɔl ta torondu. 9Mba torondu gə na: ꞌI a ɓogo lo to ang, ꞌi a tɔl dəw ang, ꞌi a ɓogo ang, ꞌi a gangə tar kunda ta dəw gə ang, ꞌi a ɗa kəm kə̰y ang, ngaɓa torondu gə to ngaw ur toronduje ja na: ꞌI a njigi njemar-i to to gə darɔ-i ꞌi ja be.#13.9 OjeCgɗ 20.13-17; Ttt 5.17-21; Nll 19.18. 10Sangə may lə njemar-i ja ɓa to njigi, mba njigi le to tɔl ta torondu.
11May kar ꞌgərəje dɔ ndɔ gə j-isije kəne nee gə maj-ɛ: To dɔ kar gə asə mba kar ꞌndol-je ne dɔ ɓi gə, mba logə j-un kudu ta kagə ja ɓa kaji to gə si dəb. 12Londul aw nday ngaa, ɗaa lo aw arə tɔ. May kar j-a tɔrje neje gə londul gə rɔ-si gə gə gugu ɗaa j-odoje ne ɗɔje gə kar ɗɔ ne dan kara j-um-je rɔ-si gə. 13Ar-je si j-a njaje gə njekəm karəje, to to gə dəw gə nja dan kara be, j-ɔsəje ne neje gə to nee rəw: Mbula nekusa, mbə kodo, ɓogo lo to gə bula njagəda, ma̰y tar gə nər mə. 14Ngaa, Mbayɓe Jeju Kirisi ɓa may kar-si ula-aje gə kubu rɔ-si gə, ɓo ar-je ɓo gə darɔ gə o̰ dɔ-si ar-si ꞌɗa-je mə njigi lə-a ang.
© 2020, ATALTRAB. All rights reserved