2 कुरन्थीयो 12
12
पोलुस प परमेसर की दया
1जदकी गुमान करबा को कोई फाईदो कोनी बिकै बावजुद बी म गुमान करूं हूँ, इ ताँई म परबुऊँ मिलेड़ा दरसाव अर परकासन की चरचा करस्युं। 2बरसा पेली एक मिनखनै जखो मसी म ह, बिनै ईस्बर नगरी म तीसरी उची झघा#12:2 तीसरी उची झघा यहूदि मिनखा को मानबो ह क, ईस्बर नगरी म सात उची झघा ह, जिमै सातवी सऊँ उची ह। सातवी मई परमेसर को बास ह। म उठा लिओ गयो हो। म कोनी जाणू बिनै काया म नहिस बिना काया क, आतो परमेसरई जाणै।#12:2 उरै पोलुस खुद क बारां म बतावै ह। 3बिकी काया बठै ही नहिस बिकी आत्मा बठै ही आ म कोनी जाणू पण बस परमेसरई जाणै ह। 4म जाणू हूँ इ मिनखनै ईस्बर नगरी म उठायो गयो बठै बो अनोरी बाता सुणी जानै कोनी बोल्यो जा सकै बे अंय्यां की बाता ही जानै बोलबो मिनख क बस म कोनी। 5अंय्यां का मिनख की बजेऊँ म गुमान कर सकूँ हूँ। पण खुदकी कमजोर्यानै छोडर कोईबी बात प खुद प गुमान कोनी करस्युं। 6अर ज म गुमान करबा की सोची बी ह जणा बी म बावळो कोनी हूँ। क्युं क म सच बोलुँ हूँ क; ज कोई मनै अंय्यां करता देखै नहिस सुणै ह जणा बो मनै बिऊँ बढर नइ मानबो चाए।
7म बोळी ताजूबभरी बाता देखबा की बजेऊँ गुमान नइ करूं इ ताँई मेरी काया म रोग की एक दरदनाक पिड़ा दिनी गई ह, जखी सेतान का एक दुत की जंय्यां मनै मारबा को काम करै ह। पण आ मनै खुद प गुमान करबाऊँ बचावै ह। 8म तीन बर परमेसरऊँ अरदास कर बोल्यो क, इ पिड़ानै मेरूँ दूर कर दे, 9पण बो मनै बोल्यो, “तेरी कमजोरी म मेरी दया जखी तेर प ह बा तनै बोळी, क्युं क कमजोरी मई मेरी सक्ति बोळी काम करै।” इ ताँई म मेरी कमजोरी म बोळो राजी होर गुमान करस्युं जिऊँ मसी की सक्ति मेर प उतरसी। 10हाँ म कमजोर होर, बेजत होर, दुख म, सताव म, परेसानी म राजी हूँ, ज बे मसी की बजेऊँ ह। क्युं क जद म कमजोर होऊँ हूँ, जणाई ताकतबर होऊँ हूँ।
कुरन्थी की बिस्वासी मंडळी ताँई पोलुस की चिंत्या
11म बावळा की ढाळ बोल्यो, पण अंय्यां करबा ताँई थेई मनै उकसाया। जदकी म तो क्युंबी कोनी हूँ, पण थानै तो मेरी बडाई करबो चाए, क्युं क म थारा बा भेजेड़ा चेला मऊँ, एक बात म बी कम कोनी हूँ। 12अर भेजेड़ा चेला क मांयनै जखी बाता होवै ह, बंय्यांई म बोळी थ्यावसऊँ सेलाणी, चमत्कार, अर ताजूब का काम कर दिखायो हूँ। 13थे कूणसी बात म दुसरी बिस्वासी मंडळ्याऊँ न्यारा हो? खाली इकै क म मेरो बोज थारै उपर कोनी लाद्यो। मनै इ काम ताँई थे माफई करो।
14इब म तीसरकै थारै कनै आबा ताँई त्यार हूँ। पण म थारूँ कोई माँग कोनी करूं। क्युं क मनै थारी धन-दोलत को लालच कोनी, पण थारो लालच ह। अर नइ टाबरानै आपका माँ-बाप ताँई पिसो जोड़बा की जुर्त होवै ह। पण माँ-बाप टाबरा ताँई पिसो जोड़ै ह। 15अर जठै ताँई मेरी बात ह, मेरै कनै जोक्यु बी ह, बिनै थारै ताँई राजी होर खरच करस्युं, अठै ताँई क म खुदनै बी थारै ताँई दे देस्युँ। अर जद म थारूँ, अत्तो प्यार-परेम करूं हूँ, जणा थे कंय्यां मेरूँ, थोड़ो प्यार-परेम कर सको हो? 16थे मानो हो क, म थार प बोज कोनी हूँ। पण दुसरै नाकै थारै मऊँ क्युंक खेवै ह क, म चलाक होर थानै मेरी चलाकी म फसा लिओ। 17थेई बताओ, म जत्ता मिनखानै थारै कनै भेज्यो हो बाऊँ थानै कोई ठग्यो हो के? 18म तितूसऊँ जाबा ताँई हाता जोड़ी करी अर बिकै सागै बिस्वासी भाईड़ानै भेज्यो हो। जणा के थे खे सको हो क, तितूस थारो फाईदो उठायो? नइ! क्युं क म्हारै कनै एकई आत्मा ह, जखी म्हारै म एक जंय्यांई काम करै ह।
19हो सकै ह! थे अंय्यां सोचो हो क, म्हें अंय्यां बोलर खुदको बचाव करर्या हां। नइ! म्हें मसी का दास होर बोल्या, अर इ बात को गुवा परमेसर ह। ओ मेरा लाडला भाईड़ो! म्हें जोक्यु बी कर्या बो थानै आत्मिक रूपऊँ मजबूत करबा ताँई कर्या। 20म डरूँ हूँ क, जद म थारै कनै आऊँ, जणा कदै अंय्यां नइ होवै क, जंय्यां म थानै देखबो चाऊँ हूँ, बिऊँ न्याराई दिखो। अर जंय्यांको थे मनै नइ देखबो चाओ हो, बिऊँ न्यारोई देखो। अर मनै ओ बी डर ह क, कदै थारै मांयनै आपसरी म राड़, एक दुसराऊँ बळबो, झाळ काडबो, मतलबीपुणो, बदनामी अर बेजती करबो, काना-फूसी अर हेकड़ोपूणो अर काम बिगाड़बो नइ देखूँ। 21अर मनै ओ बी डर ह क, जद म थारूँ मिलबा आऊँ, जणा मनै परमेसर क सामै सरमिंदा नइ होणो पड़ै। अर मनै बा ताँई रोबो नइ पड़ै जखा पेल्या पाप करता हा, बे कुकरम, सूगली बाता, अर रांडबाजी म जीवन जीता हां, इकै पाछै बी, बे आपका पापऊँ तौबा कोनी कर्या।
(c) 2010-2017, New Life Computer Institute. All rights reserved
2 कुरन्थीयो 12
12
पोलुस प परमेसर की दया
1जदकी गुमान करबा को कोई फाईदो कोनी बिकै बावजुद बी म गुमान करूं हूँ, इ ताँई म परबुऊँ मिलेड़ा दरसाव अर परकासन की चरचा करस्युं। 2बरसा पेली एक मिनखनै जखो मसी म ह, बिनै ईस्बर नगरी म तीसरी उची झघा#12:2 तीसरी उची झघा यहूदि मिनखा को मानबो ह क, ईस्बर नगरी म सात उची झघा ह, जिमै सातवी सऊँ उची ह। सातवी मई परमेसर को बास ह। म उठा लिओ गयो हो। म कोनी जाणू बिनै काया म नहिस बिना काया क, आतो परमेसरई जाणै।#12:2 उरै पोलुस खुद क बारां म बतावै ह। 3बिकी काया बठै ही नहिस बिकी आत्मा बठै ही आ म कोनी जाणू पण बस परमेसरई जाणै ह। 4म जाणू हूँ इ मिनखनै ईस्बर नगरी म उठायो गयो बठै बो अनोरी बाता सुणी जानै कोनी बोल्यो जा सकै बे अंय्यां की बाता ही जानै बोलबो मिनख क बस म कोनी। 5अंय्यां का मिनख की बजेऊँ म गुमान कर सकूँ हूँ। पण खुदकी कमजोर्यानै छोडर कोईबी बात प खुद प गुमान कोनी करस्युं। 6अर ज म गुमान करबा की सोची बी ह जणा बी म बावळो कोनी हूँ। क्युं क म सच बोलुँ हूँ क; ज कोई मनै अंय्यां करता देखै नहिस सुणै ह जणा बो मनै बिऊँ बढर नइ मानबो चाए।
7म बोळी ताजूबभरी बाता देखबा की बजेऊँ गुमान नइ करूं इ ताँई मेरी काया म रोग की एक दरदनाक पिड़ा दिनी गई ह, जखी सेतान का एक दुत की जंय्यां मनै मारबा को काम करै ह। पण आ मनै खुद प गुमान करबाऊँ बचावै ह। 8म तीन बर परमेसरऊँ अरदास कर बोल्यो क, इ पिड़ानै मेरूँ दूर कर दे, 9पण बो मनै बोल्यो, “तेरी कमजोरी म मेरी दया जखी तेर प ह बा तनै बोळी, क्युं क कमजोरी मई मेरी सक्ति बोळी काम करै।” इ ताँई म मेरी कमजोरी म बोळो राजी होर गुमान करस्युं जिऊँ मसी की सक्ति मेर प उतरसी। 10हाँ म कमजोर होर, बेजत होर, दुख म, सताव म, परेसानी म राजी हूँ, ज बे मसी की बजेऊँ ह। क्युं क जद म कमजोर होऊँ हूँ, जणाई ताकतबर होऊँ हूँ।
कुरन्थी की बिस्वासी मंडळी ताँई पोलुस की चिंत्या
11म बावळा की ढाळ बोल्यो, पण अंय्यां करबा ताँई थेई मनै उकसाया। जदकी म तो क्युंबी कोनी हूँ, पण थानै तो मेरी बडाई करबो चाए, क्युं क म थारा बा भेजेड़ा चेला मऊँ, एक बात म बी कम कोनी हूँ। 12अर भेजेड़ा चेला क मांयनै जखी बाता होवै ह, बंय्यांई म बोळी थ्यावसऊँ सेलाणी, चमत्कार, अर ताजूब का काम कर दिखायो हूँ। 13थे कूणसी बात म दुसरी बिस्वासी मंडळ्याऊँ न्यारा हो? खाली इकै क म मेरो बोज थारै उपर कोनी लाद्यो। मनै इ काम ताँई थे माफई करो।
14इब म तीसरकै थारै कनै आबा ताँई त्यार हूँ। पण म थारूँ कोई माँग कोनी करूं। क्युं क मनै थारी धन-दोलत को लालच कोनी, पण थारो लालच ह। अर नइ टाबरानै आपका माँ-बाप ताँई पिसो जोड़बा की जुर्त होवै ह। पण माँ-बाप टाबरा ताँई पिसो जोड़ै ह। 15अर जठै ताँई मेरी बात ह, मेरै कनै जोक्यु बी ह, बिनै थारै ताँई राजी होर खरच करस्युं, अठै ताँई क म खुदनै बी थारै ताँई दे देस्युँ। अर जद म थारूँ, अत्तो प्यार-परेम करूं हूँ, जणा थे कंय्यां मेरूँ, थोड़ो प्यार-परेम कर सको हो? 16थे मानो हो क, म थार प बोज कोनी हूँ। पण दुसरै नाकै थारै मऊँ क्युंक खेवै ह क, म चलाक होर थानै मेरी चलाकी म फसा लिओ। 17थेई बताओ, म जत्ता मिनखानै थारै कनै भेज्यो हो बाऊँ थानै कोई ठग्यो हो के? 18म तितूसऊँ जाबा ताँई हाता जोड़ी करी अर बिकै सागै बिस्वासी भाईड़ानै भेज्यो हो। जणा के थे खे सको हो क, तितूस थारो फाईदो उठायो? नइ! क्युं क म्हारै कनै एकई आत्मा ह, जखी म्हारै म एक जंय्यांई काम करै ह।
19हो सकै ह! थे अंय्यां सोचो हो क, म्हें अंय्यां बोलर खुदको बचाव करर्या हां। नइ! म्हें मसी का दास होर बोल्या, अर इ बात को गुवा परमेसर ह। ओ मेरा लाडला भाईड़ो! म्हें जोक्यु बी कर्या बो थानै आत्मिक रूपऊँ मजबूत करबा ताँई कर्या। 20म डरूँ हूँ क, जद म थारै कनै आऊँ, जणा कदै अंय्यां नइ होवै क, जंय्यां म थानै देखबो चाऊँ हूँ, बिऊँ न्याराई दिखो। अर जंय्यांको थे मनै नइ देखबो चाओ हो, बिऊँ न्यारोई देखो। अर मनै ओ बी डर ह क, कदै थारै मांयनै आपसरी म राड़, एक दुसराऊँ बळबो, झाळ काडबो, मतलबीपुणो, बदनामी अर बेजती करबो, काना-फूसी अर हेकड़ोपूणो अर काम बिगाड़बो नइ देखूँ। 21अर मनै ओ बी डर ह क, जद म थारूँ मिलबा आऊँ, जणा मनै परमेसर क सामै सरमिंदा नइ होणो पड़ै। अर मनै बा ताँई रोबो नइ पड़ै जखा पेल्या पाप करता हा, बे कुकरम, सूगली बाता, अर रांडबाजी म जीवन जीता हां, इकै पाछै बी, बे आपका पापऊँ तौबा कोनी कर्या।
(c) 2010-2017, New Life Computer Institute. All rights reserved