Juan 21
21
Tja yuroräpȩ ëba cjiarëremȩdejȩrȩ jibëa̧ jadü ji̧ri̧ Jechu judi
1Ado ji̧dë duri oa Tiberia quȩmȩ tja yuroro cjiaji̧ri̧ oa, Jechu judi ado chjereno̧ da tänȩrëremȩdejȩrȩ jibëa̧ jadü ji̧ri̧ pio jȩaiäpȩmo̧. Jabechji̧ pio jȩaiäpȩmo̧ darea̧mi̧ dari̧ go̧düdärärëremȩde pio ji̧ri̧iäpȩ. 'Ado Jechu judi ¿yö̧ta dari̧ japea̧diji̧ri̧da’ quëna̧chea oa, jabechji̧ chjadëri̧ ütarë yo̧parequededibe. Ta̧rëchji̧vä. 2Danȩrȩ, Jechu ja̧ jadü judiro̧ orë ji̧mo̧ cjiarëreji̧ri̧dirȩ pio jiro tjaräpȩ. Aja̧, Pedro judi pio ju̧ri̧pȩrëremȩde. Ado Toma judi, peaja̧di Chjara quȩmȩ pio judi peaja̧di tjaräpȩrëremȩde. Ado Natanera judi, Garirea chiririmȩ pio judi, Cana bë ma̧ri̧rimȩ pio judi peaja̧di pio ju̧ri̧pȩrëremȩde. Ado Chebedeo ja̧ u̧ri̧ yo̧a̧ri̧borë pio ju̧ri̧pȩrëreji̧ri̧dirȩ peaja̧di. Ado ji̧ri̧ uëri ado cja̧rȩmo̧ jadü yo̧a̧ri̧rȩ cjiarëreji̧ri̧dirȩ peaja̧di. Aja̧, pio judiro̧rëreji̧ri̧dirȩ tjaräpȩji̧ri̧ judiro̧ 3Ado Chimo̧ Pedro judi yo̧a̧dejȩrȩ o ji̧ri̧iäpȩmo̧:
—Cho̧ mu̧i̧pea̧ oa jäparequede.
Ado dëbë yo̧a̧diro̧jo̧ȩ:
—Pio mȩadi jäparea̧rȩ.
Ado pio ju̧i̧iä charara̧ bua ëte järëreji̧ri̧dirȩ. Gȩnȩ yoa mu̧i̧tarëreji̧ri̧dirȩ, jabo cjäri̧ madirȩ, cja̧rȩmȩ cho̧ mu̧i̧dëa̧dirȩ. 4Ado do üdë pea cjitëa̧rä, Jechu judi ui yuroro cjiarëremȩde. Jabo pio ju̧i̧ daea̧ ji̧, 'Aja̧, Jechu pio judidida’ quëna̧ dadëa̧diro̧jo̧ȩ. 5Ado ui yuroro cjiamȩ pio judi to̧bari̧ ëna̧diämȩrȩ iëno̧ë ta̧rëa̧dejȩrȩ:
—Danȩrȩ ca̧ oti̧, ¿eami̧ oa mu̧i̧dëa̧nȩrȩ?
Ado dëbë yo̧a̧diro̧jo̧ȩ:
—Cjäri̧ marea̧rȩ, eami̧ oa mu̧i̧dëa̧.
6Ja̧dëa ji̧ Jechu judi yo̧a̧dejȩrȩ:
—Danȩrȩ, cho̧ mu̧i̧rea̧ bäre pio ju̧i̧ cja̧ȩta̧ra̧räpȩmo̧ ano̧ mire aeno̧chji̧jo̧ȩ mu̧i̧ chjuata̧ra̧ri. Jabechji̧ ja̧di dari̧ japarä judi, mu̧i̧rea̧ dapanȩrȩ —yo̧mȩrȩ ëna̧diäa̧dejȩrȩ.
Ado pio ju̧i̧iä aeno̧a̧dirȩ judi yo̧a̧mi̧. Ado chjaodëri̧ chacha tjamo̧pe bagarëremȩde cho̧ mu̧i̧rea̧ bäre üdë, cho̧ no̧i̧dë tjamo̧ oa chia̧ oaiä. Ado pio ju̧i̧iä chjao tjamo̧pea̧de bäre oa ado chjereno̧ chara tjoräpȩmo̧ mu̧i̧ gatëpea̧ ji̧.
7Ja̧dëa ji̧ Jechurë ea̧ jadü pio judi yo̧a̧dejȩ Pedro ju̧i̧iäpȩmo̧:
—Danȩ, tja yuroropȩ cjiamȩ üdë Ano̧mȩ pio judide —yo̧a̧dejȩ.
Ado Pedro judi ‘Ano̧mȩ pio judidida’ quëna̧ ta̧rëa̧ oaiä, chjaodëri̧ ineno̧a̧de jibëa̧ chjibo oa. Jabechji̧ ëteri go̧iorea̧ maeara̧ go̧iomȩrȩ ja̧beparërea̧ ji̧, chjaodëri̧ ineno̧a̧de. Ado ja̧di dari̧ japea̧ ëte, uiräpȩmo̧ choa̧de Jechu pio ju̧i̧iäpȩmo̧ tuapea̧ oa. 8Jabo jadü judiro̧ orë chararä cjiadiäa̧ji̧ri̧rȩ jaerira̧ baäa̧dirȩ yuroräpȩmo̧, cho̧ ji̧ra̧ri̧ chiamȩ bäre chacha oa chara chirirä mu̧i̧ji̧ri̧rȩ. Jabechji̧ tja yuro queri̧ pjurërëreji̧ri̧dirȩ jachidëräpȩ, jabomo̧100 metro jachi chjaräpȩ.
9Ja̧dëa ji̧ tja yuroräpȩ pjurëna̧ra̧rä, go̧dürëreji̧ri̧dirȩ charari. Ado darëreji̧ri̧diro̧jo̧ȩ cjo̧dë oa. Ado cjo̧dërä daea̧diro̧jo̧ȩ cho̧, chja̧pe peaja̧di. 10Ja̧dëa ji̧ Jechu judi yo̧a̧dejȩrȩ:
—Danȩrȩ, mȩnȩro̧ pea mu̧i̧a̧ pio ju̧i̧ goa jana̧chji̧coe jabëtari̧mi̧ oa —yo̧a̧dejȩrȩ.
11Ado pio ju̧i̧ ta̧rëa̧ oaiä, Chimo̧ Pedro judi ado chjereno̧ jäa̧de chararäpȩ. Ado chara oa buamȩrȩ mitërëremȩdejȩ cho̧ chiamȩ bäre chacha pio ju̧i̧. Ado mu̧i̧ gatëmȩrȩ go̧dü tänȩrëremȩdejȩ dairäpȩmo̧. Ado 153 cho̧ ma̧ri̧ oa chiarëremȩde bäre üdë. Jabo ji̧ra̧ tjamo̧räbo bäre üdë quiquiri chiatärea̧ ji̧, quiquiri chiadëa̧de. 12Ja̧dëa ji̧ japamitë boi̧chji̧ chjätä ëte, Jechu judi yo̧a̧dejȩrȩ:
—Jurera̧chji̧vä.
Ado jadü judiro̧, ‘Aja̧, ibëa̧ Ano̧mȩ pio judidida’ quëna̧ dabaji̧ri̧borë jabechji̧ iëno̧ë ta̧rëtämi̧ cjiarëreji̧ri̧diro̧jo̧ȩ. Jabo iëno̧ë ta̧rëtämi̧ cjiaji̧ri̧borë, jabechji̧ cjapi̧ri̧ cjiadiärëreji̧ri̧dirȩ uapaji̧ri̧rȩ. 13Ado ja̧dëa ji̧ Jechu judi cjo̧dëräpȩ jämȩrȩ mitëa̧dejȩ chja̧pe oa. Ado yürüa̧dejȩrȩ. Peaja̧di dari̧ japamȩrȩ yürüa̧dejȩrȩ cho̧.
14Ado Jechu judi ja̧di dari̧ japamȩrȩ ado chjereno̧ darea̧ yürürëremȩdejȩrȩ jibëa̧ jadü ji̧ri̧. Aja̧, judi ja̧boa̧remȩrȩ bëdüa̧ duri oa yo̧a̧ri̧ como̧ da tänȩrërea̧ ji̧, jabechji̧ ado chjereno̧ pio jȩaiäpȩmo̧ darea̧ yürürëremȩdejȩrȩ.
Jechu judi iëno̧ë ta̧rë chjaorëremȩdejȩ Pedro ju̧i̧
15Ado judiro̧ jura̧ duri oa, Jechu judi yo̧a̧dejȩ Chimo̧ Pedro ju̧i̧:
—Danȩ Chimo̧, Juan pio ju̧i̧ ja̧ joja oa iëno̧ë ta̧rërequedemȩ. ¿Pio yodëro̧je coa ea̧ pio ju̧i̧ u̧i̧ ea tjamo̧dërenȩque? —iëno̧ë ta̧rëa̧dejȩ.
Ado Pedro judi dëbë yo̧a̧dejȩ:
—Parequedemȩ Ano̧mȩ. Cüdë mȩa ea̧ pio ju̧i̧ dabarenȩ.
Ado ja̧dëa ji̧ Jechu judi yo̧a̧dejȩ:
—Ja̧dirä judi chjadëri̧ yürüjȩrȩ jurarea̧mi̧ da oa ca̧ oveja pëi̧ chjami̧ da pio ji̧ri̧.
16Ja̧dëa ji̧ Jechu judi ado iëno̧ë ta̧rëa̧dejȩ:
—Danȩ Chimo̧, Juan pio ju̧i̧ ja̧ joja oa iëno̧ë ta̧rërequedemȩ. ¿Coa tjamo̧ri̧ earenȩque?
—Aja̧ Ano̧mȩ —dëbë yo̧a̧dejȩ—. Cüdë mȩa ea tjamo̧ pio ju̧i̧ dabarenȩ.
Ado ja̧dëa ji̧ Jechu judi yo̧a̧dejȩ:
—Ja̧dirä judi ca̧ ovejami̧ da pio ji̧ri̧ chjadëri̧ jidajȩrȩ —yo̧a̧dejȩ.
17Ja̧dëa ji̧ Jechu judi Pedro pio ju̧i̧ yo̧a̧ri̧ co iëno̧ë ta̧rëremȩrȩ ado yo̧ë ta̧rëa̧dejȩ:
—Chimo̧, Juan pio ju̧i̧ ja̧ joja oa iëno̧ë ta̧rërequedemȩ. ¿Pio coa tjamo̧ri̧ earenȩque?
Ado Pedro judi pio jȩa iëno̧ë ta̧rëmȩ oa ado ta̧rëa̧ oaiä, gitori̧ jo̧rȩtamȩpea̧de tjarari̧ co iëno̧ë ta̧rëa̧ oaiä. Ado dëbë yo̧a̧dejȩ Jechu ju̧i̧:
—Danȩ Ano̧mȩ, chjö̧na̧i̧ oa dabamȩrenȩ. Cüdë mȩa ea tjamo̧ pio ju̧i̧ dabarenȩ —yo̧a̧dejȩ.
Ja̧dëa ji̧ Jechu judi ado yo̧a̧dejȩ:
—Ja̧dirä judi, chjadëri̧ jidajȩrȩ ca̧ oveja̧mi̧ da pio ji̧ri̧ —yo̧a̧dejȩ—. 18Ado danȩ Pedro, tjamo̧i̧ cjiari̧ yo̧requedemȩ. Mȩnȩ pëi̧ chjarä judirä, jabechji̧ na̧ chjibo oa ina̧ ëte eami̧räpȩ tai̧rëremȩrenȩ mȩnȩ jo̧rȩta̧mi̧. Jabo mȩnȩ ütama̧i̧pea̧rä, dëbëribo ichipë cjia tänȩpadiro̧mȩ. Ado ja̧dëa ji̧ yura̧ oa cjiamȩ oa ëba jäpadiro̧mȩ, mȩnȩ jädëri̧ cjiaräpȩ —yo̧a̧dejȩ.
19Ado Jechu judi Pedro pio ju̧i̧iäpȩmo̧ ja̧di ta̧rëri̧ yo̧a̧ oaiä, jabechji̧ judi toro ja̧bopea̧ pio ju̧i̧ chjiari jabërä yo̧rëremȩdejȩ, Ütë ja̧ chjacjiamȩrea̧ üdë Pedro pio ju̧i̧iä chjadëri̧ na̧rȩa̧ oa cjiapea̧ oa. Ja̧dëa ji̧ Jechu judi a̧de yo̧a̧dejȩ Pedro ju̧i̧:
—Ji̧dë ma cho̧rë jana̧coe, cjiadiärea̧ decjiari̧ —yo̧a̧dejȩ.
Pedro judi iëno̧ë ta̧rëtea̧dejȩ Jechu ju̧i̧ Juan pio ju̧i̧ chjiari
20Ja̧dëa ji̧ Pedro judi Jechu pio ju̧i̧ nö̧ta ni̧bä chjao ëte, mȩmȩrȩpe cjiadiäa̧mȩrȩ daea̧dejȩ ado cja̧rȩmo̧ jadü oa, Jechurë ea̧ jadü pio ju̧i̧. Aja̧, Jechu ju̧i̧ iëno̧ë ta̧rëremȩ pio ju̧i̧ daea̧dejȩ, u̧i̧pë gatë tänȩmȩ pio ju̧i̧ chjiari iëno̧ë ta̧rëremȩ ju̧i̧. Tjamo̧ davä. Jadü judiro̧ ütëborë jabërä a̧dopea̧rä, Jechu judi jabë ja̧bodëa̧rä ji̧mo̧ a̧dopea̧rä, jadü üdë cja̧rȩmȩrȩ iëno̧ë ta̧rëremȩde Jechu pio ju̧i̧iä u̧i̧pë gatë tänȩpamȩ pio ju̧i̧ chjiari. Jabechji̧ Jechu ja̧ yuroro chamȩrȩ, Jechu ja̧ ca̧toro ja̧ȩ china̧mȩrȩ iëno̧ë ta̧rëremȩdejȩ. Ado pio jiro jadü pio ju̧i̧ damȩrȩ daea̧dejȩ Pedro judi mȩmȩrȩpe cjiadiäa̧mȩrȩ. 21Ado pio ju̧i̧ daea̧ ji̧, iëno̧ë ta̧rëa̧dejȩ Jechu ju̧i̧:
—Ado pio üdëje Ano̧mȩ, ¿yö̧ta dari̧ ja̧bopade judi?
22Jabo Jechu judi dëbë yo̧a̧dejȩ:
—Danȩ, cüdë Juan judi cjo̧ro̧tä earä judi, cüdë ado ma̧na̧rä yuro cjo̧ro̧tä earä judi, peaja̧di dari̧ cjo̧ro̧ tänȩpai̧ dareconȩ. Jabo na̧ea̧ maea oa jo̧rȩtavä. Jabechji̧ ji̧dë ma cho̧rë jana̧coe, cjiadiärea̧ decjiari̧ —dëbë yo̧a̧dejȩ.
23Ado Jechu judi ja̧di ta̧rëri̧ yo̧a̧ oaiä, chjaodëri̧ baärëremȩde ma̧ȩ üdë quëna̧ji̧ri̧ pio ji̧ri̧iä. “Aja̧, Juan judi ja̧bodëpade” yo̧mȩ ma̧ȩ pio judi oëra̧ti̧ oa chjuchjupechärëremȩde. Jabo cjäri̧ made, ja̧di ta̧rëri̧ yo̧dëa̧de Jechu judi. “Juan judi ja̧bodëpade” yo̧dëa̧de, jabo ja̧di ta̧rëri̧ tjamo̧ yo̧rëremȩde: “Cüdë, Juan judi cjo̧ro̧tä earä judi, cüdë ado ma̧na̧rä yuro cjo̧ro̧tä earä judi, peaja̧di dari̧ cjo̧ro̧ tänȩpai̧ dareconȩ” yo̧mȩ ma̧ȩ pio ju̧i̧mo̧i̧ yo̧rëremȩde. Jabo “Cüdë ma̧na̧rä yuro tjamo̧ri̧ cjo̧ro̧pade” yo̧dëa̧de. Pio ju̧i̧iä teracabari̧ chjuchjupechärëremȩde pio jiro ma̧ȩ üdë pearä judi.
Cjiadiärea̧ Ma̧ȩ
24Aja̧, Juan quȩmȩ pio judirequede cüdë. Jechu ja̧ jadü pio judirequede. Ado Jechu pio ju̧i̧ chjiari chjö̧na̧i̧ oa irä darëremȩrequede. Ado pio ju̧i̧ chjiari go̧ȩpea̧requede pio yoa ma̧ȩ chjö̧na̧i̧ oa. Judi japea̧ pio ju̧i̧ irä damȩrȩ, judi ni̧bäa̧ pio ju̧i̧ irä ta̧rëmȩrȩ go̧ȩpea̧requede, pio ju̧i̧ chjiari dabamȩrȩ. Ado cüdë go̧ȩpea̧ üdë, ‘jabechji̧ coëma cjia maeadida’ quëna̧ daba marea̧ro̧jo̧ȩ. Ado pio ju̧i̧ ja̧ jadümȩrȩ pio yoa ma̧ȩ chjö̧na̧i̧ oa ni̧bämȩrȩ cjo̧ro̧requede cüdë. Peaja̧di chjö̧na̧i̧ oa go̧ȩpea̧requede. 'Jabechji̧ Jechurë yo̧rërea̧ üdë, coëma cjiari̧ cjia maeadida’ quëna̧ dabarea̧rȩ.
25Aja̧, ja̧di dari̧ go̧ȩpea̧requede Jechu judi japea̧ pio ju̧i̧ chjiari. ‘Jabo pio ju̧i̧mo̧i̧ japea̧ jirodida’ quëna̧rea̧mi̧dëde. Jabechji̧ a̧dë chjate ji̧ra̧ tjamo̧ oa japarëremȩde, jabo chjö̧na̧i̧ oa go̧ȩparea̧ dadëa̧requede. O oamo̧i̧ oa go̧ȩpea̧requede. O oa go̧ȩpadëa̧.
Jabo dëdë, judi jape chjaoa̧ chjö̧na̧i̧rȩ chjadëri̧ ütara̧mi̧ go̧ȩpadäräa̧ oa cjiarä judi, a̧dë chjäte ji̧ra̧ tjamo̧täremȩde jo̧ë üdë. Ado jo̧ë ji̧ra̧ tjamo̧ oaiä, pio yoa chiri üdë tjamo̧ri̧ nö̧tadëtäremȩde chjö̧na̧i̧ oa chjadëri̧ boeapea̧ ji̧.
©2021 Global Partners, All Rights Reserved