Bapaizi 4
4
Zipaizyo zyakukombelezezya zinyonyoono zicitwa cakutaziba
1Lino Mwami Leza wakaambila Mozesi kuti, 2“Ambila Baisilayeli kuti naa muntu wacita cinyonyoono akusotoka nuuba umwi wamilawo ya Leza katazi, uleelede kucita zeezi.
3“Kuti naa Mupaizi Mupati wacita cinyonyoono akweetela bantu mulandu, uyooleta mupoho uutakwe kampenda akumupaizya kuli Leza akaambo kacinyonyoono cakwe. 4Uyooleta mupoho kumulyango watente lyakuswaanganina, akabikke janza lyakwe amutwe wapoho akuujaila mpoonya aawo kumbele lya Leza, nkaambo kacinyonyoono cakwe. 5Eelyo Mupaizi Mupati ooyo uyootola bumwi bulowa bwapoho mukati katente lyakuswaanganina. 6Akanjizye munwe mubulowa kwaziindi zili ciloba akabusansaile kumbele lyacisitilizyo cisalala. 7Uyoozila bulowa bumwi kumeja aacipaililo catununkilizyo mutente lyakuswaanganina. Wamana akatile bulowa bwasyaala atako lyacipaililo cazipaizyo zyakutenta, cili kumulyango watente lyakuswaanganina. 8Uleelede kugwisya mafuta oonse aapoho ooyu, nkokuti mafuta aazyamukati, 9ansa amafuta aazyo, amafuta oonse aali amuni, 10mbubonya mbuli bucitwa mafuta aapoho wacipaizyo calumvwano. Eelyo mupaizi lwakwe mwini nguyoogwisya mafuta aaya akuyooatenta acipaililo. 11Pele uleelede kuyootola cikutu, nyama, mutwe, amaulu azyamukati zyoonse kubikkilizya abufumba, 12akazibweze zyoonse kuzitola kunze lyazivuka kubusena busowelwa twe, nkabela akazitentele nkukonya ooko amulilo wankuni.
13“Kuti naa bantu boonse ba Isilayeli babisya akujaninwa mulandu wakusotoka milawo ya Leza kabatazi, 14lino cinyonyoono eeco cazibwa, eelyo buleya boonse, buyooleta kapoho kabe kacipaizyo cakugwisya zinyonyoono. Bayookatola kutente lyakuswaanganina, 15nkabela basololi bayoobikka maanza amutwe wakapoho akukajaila mpoonya aawo kumbele lya Mwami Leza. 16Ndendilyo mupaizi mupati nayoogwisya bulowa bumwi kuzwa kukapoho akubutola mutente lyakuswaanganina, 17akanjizye munwe wakwe kwaziindi zili ciloba akusansaila kumbele lyacisitilizyo. 18Eelyo akazile bulowa bumwi kumeja aacipaililo catununkilizyo mukati katente lyakuswaanganina, wamana buyoosyaala akatile kutako lyacipaililo cazipaizyo zyakutenta cili kumbele lyatente lyakuswaanganina. 19Lino akagwisye mafuta oonse akwaatenta acipaililo. 20Uleelede kucita kukapoho aaka mbuli bucitwa ku mupoho wacipaizyo cakugwisya zinyonyoono. Mbombuboobu mupaizi mbwayoocita cipaizyo cakusalazya bantu, eelyo bayoolekelelwa. 21Kwamana boobu uyootola kapoho kunze lyazivuka akukatenta, mbubonya mbuli butentwa mupoho wakugwisya zinyonyoono zyamupaizi. Eeci ncakukombelezezya cinyonyoono cabuleya.
22“Kuti naa musololi wacita cinyonyoono akujaninwa mulandu wakusotoka umwi wamilawo ya Mwami Leza katazi, 23wamana kuzibisigwa cinyonyoono cakwe, uleelede kuleta sijembwe uutakwe kampenda kuti cibe cipaizyo cakwe. 24Akabikke janza amutwe wakwe akumujaila kunyika lyacipaililo cazipaizyo zitentwa. Eeci ciyooba ncecipaizyo cazinyonyoono. 25Mupaizi uyoonjizya munwe wakwe mubulowa, akubuzila kumeja aacipaililo. Kwamana buyoosyaala akatile kutako lyacipaililo. 26Eelyo akatente mafuta oonse acipaililo mbubonya mbuli bucitwa mafuta aacipaizyo calumvwano. Mbombuboobu mupaizi mbwayoomukombelezezya cinyonyoono, nkabela uyoolekelelwa ncobeni.
27“Kuti naa muntu buyo wacita cinyonyoono akujaninwa mulandu wakusotoka umwi wamilawo ya Mwami Leza katazi, 28wamana wazibisigwa cinyonyoono cakwe, uleelede kuleta mpongo mpwizi iitakwe kampenda yakupaizya. 29Weelede kubikka janza lyakwe amutwe wayo, akwiijaila kunyika lyacipaililo cazipaizyo zyakutenta. 30Mupaizi uyoonjizya munwe wakwe mubulowa bwamunyama akubuzila kumeja aacipaililo. Kwamana buyoosyaala akatile kutako lyacipaililo. 31Eelyo akagwisye mafuta aayo oonse mbubonya mbuli bucitwa mafuta aacipaizyo calumvwano akwaatentela acipaililo, bube bweema bubotelezya ku Mwami Leza. Mbombuboobu mupaizi mbwayoomukombelezezya cinyonyoono, nkabela uyoolekelelwa ncobeni.
32“Kuti naa muntu waleta mbelele kuti ibe cipaizyo cacinyonyoono, ileelede kuba mpwizi iitakwe kampenda. 33Akabikke janza lyakwe amutwe wayo akwiijaila kunyika lyacipaililo cazipaizyo zyakutenta. 34Mupaizi uyoonjizya munwe mubulowa akubuzila kumeja aacipaililo. Wamana bwasyaala akatile kutako lyacipaililo. 35Eelyo akagwisye mafuta aayo oonse mbubonya mbuli bucitwa aacipaizyo calumvwano, akwaatentela acipaililo antoomwe acipaizyo cazyakulya. Mbombuboobu mupaizi mbwayoomukombelezezya cinyonyoono, nkabela uyoolekelelwa ncobeni.”
Tonga Bible © United Bible Societies, 1994.