Zacarías 12
12
Jerusalénchö täraqkunata cuidananpä Tayta Dios promitinqan
1Kaychömi Tayta Diospa willakuynin qellqashqa kaykan. Kay willakuyqa Israel runakunapämi kaykan. Ciëluta kamaq, kay patsata shumaq takyatsiq y runata kawayta qaraq Tayta Diosmi nin: 2<<Machätsikuqnö kananpämi Jerusalénta tikratsishä. Tsaymi Jerusalénta y Judáta atacarqa chikiqnin nación runakuna machashqanö kar ima ruraytapis puëdiyanqatsu.
3<<Maytsay nación runakunam Jerusalén runakunata chikir contran shäriyanqa. Tsaymi jatunkaray ruminö kayänanpä Jerusalén runakunata churashä. Pipis joqariyta munaqtaqa wanuqpämi ñitinqa>>.
4 Tayta Diosmi nin: <<Tsay witsanmi soldädukunapa llapan caballunkunata mantsakätsishä. Muntaq soldädukunatapis löcuyätsishämi. Juklä nación runakunapa caballunkunatapis qaprayätsishämi. Peru Judá runakunatam sïqa alli rikashä. 5Tsaymi Judá soldädukunapa capitanninkunaqa shonqullanchö niyanqa: <Llapanta mandaq Tayta Diosmi Jerusalénchö täraq runakunata imaypis yanapan>.
6<<Tsay witsanmi permitishä Judá soldädukunapa capitanninkuna shanshanö kayänanpä. Tsaymi yantata y trïgu manöjuta nina rupar ushanqannö paykunapis vecïnun nacionkunata itsuq kaq lädumanpis derëcha kaq lädumanpis ushayanqa. Jerusalén runakunanam yapay markallanchö täyanqa. 7Jerusalénta manarä salvarmi puntataqa Judáchö kaykaq wakin marka runakunatarä salvashä. Tsaynöpam Jerusalénchö täraqkuna y Davidpita miraqkuna runa tukuyanqatsu.
8<<Tsay witsanmi Jerusalénchö täraq runakunata pipis atacaptin noqa Tayta Dios yanapashä atacaqninta vincinanpä. Tsaychö taqkuna mayqanpis pishi kallpa kaptinqa yanapashä rey Davidnö kallpayuq kananpämi. Tsaynöllam rey kananpä Davidpita miraqta yapay churashä. Pay mandakunqa puntanta aywaq ángel mandanqannömi.
9<<Tsay junaqmi mayqan nacionpis Jerusalénta atacaptin tsay atacaq nacionta chipyaq ushakätsishä. 10Davidpita miraqkunata y Jerusalénchö täraqkunatam tantiyatsishä kuyapäkuq kayänanpä y imay hörapis mañakayämänanpä. Tuksiyämanqanta#Juan 19.37; Apoc. 1.7. rikamarmi waqayanqa. Mayor tsurin wanuskiptin waqaqnörämi makintapis takayparä waqayanqa.
11<<Tsay junaqmi Meguido pampachö kaykaq Hadad-rimónpä llakikuyanqannö Jerusalénchö pasaypa llakikuyanqa. 12Judá runakunaqa pasaypa llakikurmi castanpa castanpa waqayanqa. Tsaymi waqayanqa David castapita miraqkuna warmintin, Natánpita miraqkuna warmintin, 13Leví trïbupita miraqkuna warmintin, Simeipita miraqkuna warmintin, 14y wakin kaq casta kaqkuna warmintin.
© 2002, 2008, Wycliffe Bible Translators, Inc. All rights reserved.