Mateo 21
21
Jerusalénman Jesús yaykunqan
Marcos 11.1-11; Lucas 19.28-38; Juan 12.12-19
1Jerusalénman Jesús aywarmi Olivos jirkanchö Betfagé markaman chäyarqan. Tsaypitam ishkay discïpulunkunata mandar 2nirqan: <<Taqay markaman aywayay. Chaykurmi malta wawayuq ashnu wataraykaqta tariyanki. Tsay ashnuta paskaskir apayämuy. 3Pipis tapuyäshuptikiqa niyanki: <Señor Jesúsmi nisitan. Rasllam kutitsiyämunqa> >>.
4Tsaynöpam Tayta Diospa profëtan qellqanqanta cumplirqan. Tsay qellqanqanchömi nin:
5<<Sión runakunata willay:
<Rikayay mandaqniki rey shamuykaqta.
Humildi karmi ashnun muntashqa shamuykan.
Malta ashnun muntashqam shamuykan> >>.#Zac. 9.9.
6Discïpulunkuna aywarmi Jesús ninqannölla rurayarqan. 7Mamantinta apaykur punchunkunata karunarkuyaptinmi malta ashnun muntashqa Jesús aywarqan. 8Tsaynö aywaptinmi atskaq runakuna kushikur punchunkunata näniman mashtayarqan. Tsaynöllam wakinkunapis palmakunapa rämankunata pakiskir näniman mashtayarqan. 9Tsaymi puntanta y qepanta aywaqkuna kushikur niyarqan: <<¡Hosana!#21.9 Israel runakuna Hosana niyaq Tayta Diosta alabarmi. ¡Davidpa Tsurin alabashqa kaykullätsun! ¡Tayta Diospa jutinchö shamuq runa alabashqa kaykullätsun! ¡Ciëluchöpis alabashqa kaykullätsun!>>#Sal. 118.25-26.
10Jerusalénman Jesús yaykuptinmi tsaychö kaykaq llapan runakuna juknin jukninpis tapunakuyarqan: <<¿Pirä kay runa?>>
11Jesúswan aywaq runakunanam niyarqan: <<Payqa Galileachö kaykaq Nazaretpita shamuq profëta Jesúsmi>>.
Templuchö rantikuqkunata qarqunqan
Marcos 11.15-19; Lucas 19.45-48; Juan 2.13-22
12Templupa patiunman yaykuskirnam rantikuqkunata y rantipakuqkunatapis Jesús qarqurqan. Tsaynöllam qellay trocatsiqkunapa mësankunatapis#21.12 Jesús kawanqan witsanmi Roma runakunapa qellayninta Israel runakuna manijayaq imatapis rantipakuyänanpä. Tayta Diospä ofrendata apayänanpämi sïqa templuman apayänanpä kaq qellaytarä rantiyaq. y paluma rantikuqkunapa sïllankunatapis jitar usharqan. 13Qarqurmi nirqan: <<Tayta Diospa palabranmi nin: <Wayïqa runakuna mañakayämänanpämi kanqa>.#Isa. 56.7. Tsaynö nikaptinpis qamkunaqa suwakunapa machayninmanmi tikratsiyarquyki>>.#Jer. 7.11.
14Templupa patiunchö kaykaptinmi qaprakuna y weqrukunapis Jesúsman witiyarqan. Paykunataqa llapantam allïtsirqan. 15Tsaychömi wamrakunapis payta alabar niyarqan: <<¡Hosana! ¡Davidpa Tsurinta alabashun!>>
Runakunata Jesús allïtsiqta rikaykur y wamrakuna alabaykaqta wiyarmi mandaq sacerdötikuna y ley yachatsikuqkunapis pasaypa ajäyarqan. 16Tsaynam Jesústa niyarqan: <<¿Wiyankiku kay wamrakuna niyanqanta?>>
Jesúsnam nirqan: <<Awmi. ¿Manaku liyiyarquyki Diospa palabranchö qellqashqa kanqanta? Tsaychömi nin: <Pishi wamrakuna y chuchuykaq wamrakunapis alabayäshunkim> >>.#Sal. 8.2.
17Tsaynö niskirmi paykunata jaqiskir Betania markaman kutirqan tsaychö patsakunanpä.
Hïgus planta tsakinanpä Jesús ninqan
Marcos 11.12-14, 20-24
18Waraynin wäray Jerusalénman Jesús kutiykarmi mallaqaskirqan. 19Tsaymi näni lädunchö hïgus plantata rikaykur wayuyninta ashiq aywarqan. Raprallanta tariykurmi nirqan: <<¡Kananpitaqa manam imaypis wayunkinatsu!>>
Tsaynö niptinmi jinan höra hïgus planta tsakiskirqan.#21.19 Tsaynöpam Jesús tantiyatsirqan runakunapis Tayta Dios munanqannö mana kawar wayuyniynaq hïgusnö kayanqanta. Tsaymi tsay hïgusta Jesús tsakitsinqannö Tayta Dios runakunatapis juzganqa. 20Tsayta rikaykurmi discïpulunkuna mantsakashqa parlar niyarqan: <<¿Imanöpatä hïgus planta jinan höra tsakiskishqa?>>
21Jesúsnam nirqan: <<Rasunpam nï: Llapan shonquykikunawan Tayta Diosman yärakurqa manam kay hïgus plantata tsakitsinqänöllatsu rurayanki, sinöqa taqay jirkata: <Kaypita lamarman ayway> niyaptikipis aywanqam.#Mat. 17.20; 1Cor. 13.2. 22Llapan shonquykiwan yärakur imatapis Tayta Diosta mañakurqa chaskiyankim>>.
Jesústa sacerdötikuna tapuyanqan
Marcos 11.27-33; Lucas 20.1-8
23Tsaypita templupa patiunman yaykuskir yachaykätsiptinnam mandaq sacerdötikuna y Israel mayor runakunapis Jesústa tapuyarqan: <<Qamqa ¿pipa poderninwantä rantikuqkunata qarqurquyki? ¿Pitä tsaynö qarqunaykipä nishurquyki?>>
24Jesúsnam nirqan: <<Qamkunatapis mä tapushayki. Tapunqäta niyämaptikiqa noqapis willayäshaykim pipa poderninwan qarqunqäta. 25¿Pitä Juanta mandamushqa bautizananpä? ¿Tayta Diosku o runakunallaku?>>
Tsaynö tapuptinmi kikinkunapura niyarqan: <<Tayta Dios mandamunqanta nishqaqa: <¿Imanirtä criyiyarquykitsu?> nimäshunmi. 26Runakuna mandayämunqanta nishqaqa contrantsikmi runakuna shäriyanqa. Juan profëta kanqantam llapan yarpäyan>>.
27Tsaymi Jesústa niyarqan: <<Manam musyayätsu pï mandamunqantapis>>.
Jesúsnam nirqan: <<Noqapis manam willashaykitsu pipa poderninwan rantikuqkunata qarqunqäta>>.
Juk runapa ishkay tsurinkunaman Jesús iwalatsinqan
28<<¿Ima niyankitä? Juk runapash ishkay tsurinkuna kanä. Mayor kaq tsurintash ninä: <Hïju, kanan junaq üva chakrächö arur yanapaykamay>. 29Tsaynö rugakuptinpis manash awninätsu. Peru mana awniykarpis yarpachakuskirqa aywanäshi. 30Mayor tsurinta minkakunqannöllash qepa kaq tsurintapis minkakunä. Tsayshi tsurin ninä: <Papä, arupäshaykim>. Tsaynö awnirkurpis manash aywanätsu.
31<<Kanan mä niyämay. ¿Mayqantä papänin munanqanta rurashqa?>>
Tsaynö niptinmi niyarqan: <<Mayor kaq tsurinmi>>.
Tsaymi Jesús nirqan: <<Rasunpam nï: Tsay mayor kaq tsurin kanqannömi Romapä impuestu cobraqkuna y prostitüta warmikunapis kaykäyan. Paykunaqa qamkunapita mas puntatam Tayta Diospa mandakuyninman yaykuykäyan. 32Tayta Dios munanqannö kawayänaykipä Bautizaq Juan yachatsiyäshuptikipis qamkunaqa manam cäsuyarquykitsu. Impuestu cobraqkuna y prostitüta warmikunam sïqa willakunqanta cäsuyashqa.#Luc. 3.12; 7.29-30. Tsayta rikaykarpis qamkunaqa willakunqanta manam cäsuyarquykitsu ni jutsaykikunata dëjayarquykitsu>>.
Chakra arrendaq runakunaman iwalatsiypa Jesús yachatsinqan
Marcos 12.1-12; Lucas 20.9-19
33<<Mas juktam iwalatsiypa yachatsiyäshayki: Juk runash chakranman üvata plantaykatsir#Isa. 5.1-2. entëru kuchunpa pirqatsinä. Üvata jaruyänanpäshi pözuta ruratsinä. Chakranta täpananpäshi törritapis shäritsinä. Llapanta ruraskatsirnash chakranta arrendakuskir juklä markapa aywakunä.
34<<Cosëcha qallaykuptinnash üva chakra arriendunpita cobrayämunanpä sirviqninkunata mandanä. 35Chäriptinnash chakra arrendaqkunaqa tsay sirviqkunata jukta maqayänä, jukta wanutsiyänä y juktanash saqmar ushayänä. 36Tsayshi chakrayuq runaqa ñöpata mandanqanpita mas atskaqtana sirviqninkunata mandanä. Paykunatapis tsaynöllash rurayänä.
37<<Tsaypitanash kikinpa tsurintana mandanä <tsurïtaqa respitayanqam> nir. 38Tsayshi tsurin aywaykaqta rikaykur chakra arrendaqkuna willanakur niyänä: <Taqaymi kay chakrawan quëdanqa. Chakranwan quëdanantsikpä wanuratsishun>. 39Chaykuptinnash willanakuyanqannölla üva chakrapita jukläman apaykur wanuratsiyänä>>.
40Tsaynö willakuskirnam Jesús nirqan: <<Tsay üva chakrayuq kutiykur ¿imatatä tsay runakunata ruranqa?>>
41Tsaymi niyarqan: <<Tsay mana alli runakunataqa mana kuyapaypam wanutsinqa. Tsaypitanam cada cosëchachö pägaq kaqtana chakranta arrendakunqa>>.
42Jesúsnam nirqan: <<¿Manaku liyiyarquyki Tayta Diospa palabranta? Tsaychömi nin:
<< <Wayi shäritsiqkuna <<kay rumiqa manam allitsu>> nir jitariyanqanmi maestra rumiman tikrashqa kaykan.
Tsaynö kananpä Tayta Diosmi permitishqa.
Tsaypitam pasaypa espantashqa kaykantsik>.#21.42 Tsay rumimanmi Jesucristo iwalatsikurqan. Tsaynö nirmi tantiyatsirqan chikiyaptinpis Tayta Dios llapanpitapis mas poderyuq kananpä churanqanta.#Sal. 118.22-23.
43<<Tsaymi qamkunata nï: Mandakuyninta qechuskiyäshurnikim cäsukuq runakunatana Tayta Dios entreganqa. 44Pipis tsay rumiman ishkirqa ushakanqam. Tsaynöllam pipa jananmanpis tsay rumi charqa ushakätsinqa>>.
45Tsaynö iwalatsiypa yachatsiptinmi mandaq sacerdötikuna y fariseukuna tantiyayarqan paykunapa contran parlaykanqanta.#21.45 Tsay iwalatsikuyqa kaynömi: Chakrayuqqa Tayta Diosmi. Chakrayuq mandanqan sirviqninkunanam Tayta Diospa profëtankuna. Chakrayuqpa tsurinnam Jesucristo. Chakra arrendaq mana alli runakunanam Jesucristupa contrankuna. 46Tsaymi prësu tsaritsiyta munarpis profëta kanqanta runakuna parlayaptin paykunata mantsar tsaritsiyarqantsu.
© 2002, 2008, Wycliffe Bible Translators, Inc. All rights reserved.