Mateo 19
19
Warminpita mana rakikäyänanpä Jesús yachatsinqan
Marcos 10.1-12
1Tsaynö yachaskatsirnam Galileapita Judeaman chänanpä Jordán mayu tsimpanpa Jesús tumamurqan. 2Paypa qepantam atskaq runakuna aywayarqan. Tsaychömi qeshyaqkunata allïtsirqan.
3 Fariseukunapis tsayman aywaykurmi llutanta parlatsiyänan raykur Jesústa tapuyarqan: <<¿Ima achäquillapis warminpita runa rakikanmanku o manaku?>>
4Jesúsnam nirqan: <<¿Manaku liyiyarquyki Tayta Diospa palabranta? Tsaychömi nin ollqutapis warmitapis Tayta Dios kamanqanta.#Gén. 1.27; 5.2. 5Tsaynö kamaskirmi Tayta Dios nirqan: <Mamanpita y papäninpitam runa yarqukun warminwan mana rakikaypa täkunanpä. Tsaynö täkurnam ishkanpis jukllayllanö kayanqa>.#Gén. 2.24. 6Tsaynö nikaptinqa mananam ishkaqnatsu kayan, sinöqa jukllayllanönam. Tsaymi Tayta Dios juntanqantaqa pipis rakinmantsu>>.
7Fariseukunanam tapuyarqan: <<Tsayöraqa ¿imanirtä Moisés qellqanqanchö nin warminpita rakikar divorciu papelta firmapaskir qarqunanpä kanqanta?>>#Deut. 24.1-4; Mat. 5.31.
8Jesúsnam nirqan: <<Runakuna warminpita rakikäyänanpä Moisés permitirqan chukru shonqu kayaptinmi. Peru manam tsaynö kananpätsu Tayta Dios kamarqan. 9Tsaymi noqa nï: Mayqan runapis warmin jukwan mana kaykaptin juk warmiwan täkurqa adulteriu jutsatam ruraykan. [Tsaynöllam runanpita rakikashqa warmiwan täraq runapis adulteriu jutsata ruraykan]>>.#Mat. 5.32; 1Cor. 7.10-11.
10Discïpulunkunanam niyarqan: <<Tsayöraqa mas allim kanman warmiynaqlla kakuptin>>.
11Jesúsnam nirqan: <<Manam llapantsu warmiynaq kawayta puëdiyan, sinöqa Tayta Dios permitinqan kaqllam. 12Wakinqa warmiynaq kayänanpämi yuriyan. Wakinqa capashqa karmi warmipä yarpäyantsu. Wakinnam Tayta Diospa mandakuyninchö kawar warmïkuyantsu. Pipis warmiynaq täkuyta munarqa kikillan täkutsun>>.
Wamrakunapä Tayta Diosta Jesús mañakunqan
Marcos 10.13-16; Lucas 18.15-17
13Tsaypitanam wamrakunata Jesús kaqman apayarqan umankunaman makinta churaykur Tayta Diosta mañakunanpä. Wamrakunata apaykäyaqta rikarmi discïpulunkuna michäyarqan. 14Jesúsnam discïpulunkunata nirqan: <<Wamrakunata apayämunanta ama michäyaytsu. Wamranö kaqkunapämi Tayta Diospa mandakuynin kaykan>>.
15Tsaynö nirmi wamrakunapa umanman makinta churaykur Tayta Diosta mañakurqan. Tsaypitanam aywakurqan.
Rïcu runa ajatarä salvakunanpä kanqan
Marcos 10.17-31; Lucas 18.18-30
16Juk kutichömi Jesúsman chaykur juk jövin nirqan: <<Rabí, [alli runam kanki]. ¿Ima allitatä ruräman mana ushakaq kawayta tarinäpä?>>
17Jesúsnam nirqan: <<¿Imanirtä alli ruraypä tapumanki? Jukllayllam alli ruraqqa.#19.17 Wakin qepa kaq griego copiakunachömi nin: ¿Imanirtä alli runa kanqäta nimanki? Tayta Diosllam alliqa. Tsaynöllam nin Mar. 10.18 y Luc. 18.19 versïculukunachöpis. Mana ushakaq kawayta tariyta munarqa paypa mandamientunkunata cumpliy>>.
18Tsay jövinnam yapay tapurqan: <<¿Mayqan mandamientukunatatä cumplïman?>>
Jesúsnam nirqan: <<Ama runa mayikita wanutsinkitsu.#Éxo. 20.13; Deut. 5.17. Ama adulteriu jutsata rurankitsu.#Éxo. 20.14; Deut. 5.18. Ama suwakunkitsu.#Éxo. 20.15; Deut. 5.19. Ama manakaqkunata pitapis tumpankitsu.#Éxo. 20.16; Deut. 5.20. 19Mamaykita y papänikita alli rikanki.#Éxo. 20.12; Deut. 5.16. Tsaynölla kikiki kuyakunqaykinö runa mayikita kuyanki>>.#Lev. 19.18.
20Jövinnam nirqan: <<Tsaykunataqa [wamra kanqäpitam] llapanta cumplirqü. ¿Imatä mas faltäman cumplinäpä?>>
21Jesúsnam nirqan: <<Tayta Dios munanqannö kawayta munarqa llapan imaykaykikunatapis rantikuskir tsay qellayta pobrikunata qaray. Tsaynö ruraptikiqa ciëluchömi riquëzayki kanqa. Tsaypita qatimay>>.
22Tsaynö niykuptin pasaypa rïcu karmi llakishqa aywakurqan. 23Tsaypitanam discïpulunkunata Jesús nirqan: <<Rasunpam nï: ¡Alläpa ajam rïcu runakuna Tayta Diospa mandakuyninman yaykuyänanpä! 24Yapaymi qamkunata nï: Rïcu runa Tayta Diospa mandakuyninman yaykunqanpitaqa mas fäcilmi camëllupis awjapa uchkunpa päsanman>>.
25Tsayta wiyaykurmi discïpulunkuna pasaypa mantsakashqa niyarqan: <<Tsaynö kaptinqa ¿pirä salvakunqa?>>
26Paykunata rikaykurmi Jesús nirqan: <<Runakuna salvakuyänanpäqa alläpa ajam. Peru Tayta Diospämi sïqa imapis ajatsu>>.
27Pedrunam nirqan: <<Taytay, noqakunaqa llapan imaykäkunatapis jaqiskirmi qamta qatiräyä. Tsaynö kaykäyaptïqa noqakunapäqa ¿imatä kanqa?>>
28Jesúsnam nirqan: <<Rasunpam nï: Mushuq patsachö Runapa Tsurin chipipiykaq trönunman jamaykuptinmi#Mat. 25.31. qamkunapis qatiyämanqaykipita chunka ishkay trönukunachö jamakuyanki. Tsaychömi chunka ishkay trïbu Israel runakunata juzgayanki.#Luc. 22.30.
29<<Pipis noqa raykur wayinta, wawqinkunata, paninkunata, mamanta, papäninta, [warminta,] tsurinkunata y chakrankunatapis jaqiq kaqmi pachak (100) kuti masta chaskinqa. Wanurpis mana ushakaq kawaytam tarinqa. 30Atskaqmi respitashqa kaykaqkuna manakaqman churashqa kayanqa. Manakaqman churashqa kaqkunanam respitashqa kayanqa>>.#Mat. 20.16; Luc. 13.30.
© 2002, 2008, Wycliffe Bible Translators, Inc. All rights reserved.