Mateo 13
13
Murukuq runaman Jesús iwalatsinqan
Marcos 4.1-9; Lucas 8.4-8
1Tsay junaqllam wayipita yarquskir Galilea qocha kuchunman Jesús aywarqan. Chaykurmi yachatsinanpä jamakurqan. 2Jesús yachatsinqanta wiyayta munarmi atskaq runakuna tsayman qorikäyarqan. Alläpa kichkïyaptinnam qocha kuchunchö kaykaq büquiman yarkurkur Jesús jamakurqan.#Luc. 5.1-3.
3Tsaypitanam imamanpis iwalatsiypa atska yachatsikuykunata yachatsir nirqan: <<Juk runash trïgu muruq aywanä. 4Muruta mashtaptinshi näniman wakin chänä. Tsayshi pishqukuna shamur upshaskiyänä. 5Wakin murunash shaqaman chänä. Tsaychö allpa mana kaptinshi ras jeqamurpis 6matsükuyta mana puëdir achaywan tsakiskinä. 7Wakin kaq murush kashakuna rurinman chänä. Jeqamurpis kashakuna ñitiptinshi qarwashtaykällar ushakänä. 8Peru wakin murunash alli allpaman chänä. Tsaychö alli wiñamurshi alli espïgayuq kayänä. Wakin espïgash pachak (100) trïguta wayunä, wakin espïgash joqta chunka (60) trïguta wayunä y wakinnash kimsa chunka (30) trïguta wayunä. 9Rinriyuq kaqkunaqa ninqäkunata wiyakuyätsun>>.
Iwalatsiypa imanir Jesús yachatsinqanpis
Marcos 4.10-12; Lucas 8.9-10
10Tsaypitanam discïpulunkuna Jesústa tapuyarqan: <<Taytay, iwalatsiypa imanir yachatsinqaykitapis tantiyaykatsiyällämay>>.
11Jesúsnam nirqan: <<Qamkunataqa Tayta Diospa mandakuynin imanö kanqantapis shumaqmi tantiyatsiyäshayki. Peru wakinkunataqa manam tantiyatsishätsu. 12Yachatsinqäta cäsukuqkunaqa masmi tantiyayanqa. Peru mana cäsukuqkunam sïqa ichik tantiyayanqallantapis qonqaskiyanqa.#Mat. 25.29; Mar. 4.25; Luc. 8.18; 19.26. 13Tsaymi imamanpis iwalatsiypa willä. Paykunaqa rikarpis manam cuentata qokuyantsu y wiyaykarpis manam tantiyayantsu. 14Tsaynö kananpä kanqanta musyarmi profëta Isaías qellqar nirqan:
<<Mayjina wiyarpis manam tantiyayankitsu.
Mayjina rikarpis manam cuentata qokuyankitsu.
15Tsay runakunapa shonqunkunam chukruyashqa.
Rinrinkunapis upayashqam.
Ñawinkunapis qaprayashqam.
Tsaynö karmi rikayantsu, wiyayantsu, tantiyayantsu ni jutsankunata dëjayantsu.
Tsaynö kayaptinmi noqapis allïtsishätsu.#13.15 Manam qeshyallapita allïtsinanpätsu nin, sinöqa ñakaykunapita, llakikuykunapita y jutsa ruraykunapita salvananpämi nin.#Isa. 6.9-10.
16<<Peru qamkunatam sïqa Tayta Dios yanapaykäyäshunki rikayanqaykita y wiyayanqaykita tantiyayänaykipä. 17Rasunpam nï: Unay profëtakunapis y Tayta Dios munanqannö kawaq runakunapis rikayanqaykita rikayta munarpis manam rikayashqatsu. Wiyayanqaykita wiyayta munarpis manam wiyayashqatsu.#Luc. 10.23-24.
Murukuqman iwalatsinqanta Jesús tantiyatsinqan
Marcos 4.13-20; Lucas 8.11-15
18<<Kanan tantiyatsiyäshayki murukuq runaman iwalatsiypa yachatsinqäta. 19Trïgu muruqa Tayta Diospa mandakuyninpa willakuyninmi. Wakin runakunaqa chukru näninömi kayan. Tsaymi Tayta Diospa willakuyninta wiyarpis mana chaskikuyaptin Satanás shamur wiyayanqallantapis qonqaskatsin.
20<<Wakin runakunaqa shaqa chakranömi kayan. Paykunaqa Diospa willakuyninta wiyar kushishqam chaskiyan. 21Kushishqa chaskirpis matsükuyta mana puëdiq trïgunömi kayan. Tsaymi Diospa palabranta chaskiyanqanpita runakuna chikiyaptin criyikuyninta jaqiskiyan.
22<<Wakin runakunaqa kasha chakranömi kayan. Paykunaqa Diospa willakuyninta wiyarpis kay vïdachö imaykapä llakikur y rïcu kayllapä yarpachakurmi Diospa willakuyninta qonqaskir mana wayuq trïgunö kayan.
23<<Peru wakin runakunam sïqa alli allpanö kayan. Paykunaqa Tayta Diospa willakuyninta cäsurmi Tayta Dios munanqannö kawayan. Tsaymi alli allpachö juk murullapita pachak (100) trïgu o joqta chunka (60) trïgu o kimsa chunka (30) trïgu wayunqannö kayan>>.
Trïguwan ballïcu wiñamunqanpita Jesús yachatsinqan
24Tsaypitanam iwalatsiypa yapay yachatsir Jesús nirqan: <<Tayta Diospa mandakuynin imanö kanqantapis iwalatsiypa yachatsiyäshayki. Juk runash chakranchö trïguta murunä. 25Peru murur ushaskiptinnash chikiqnin runa tsakaypa aywaykur trïgu murunqanman ballïcuta mashtaskinä. 26Trïgu wiñamur espigar qallaykuptinshi ballïcupis wiñamunä.
27<<Tsayshi sirviqninkuna aywaykur patronninta niyänä: <Taytay, akraykur muruykaptikiqa ¿maypitarä ballïcu jeqamushqa?>
28<<Tsaynö willayaptinnash ninä: <Mayqanpis chikimaqnïmi mashtashqa kanqa>.
<<Sirviqninkunanash tapur niyänä: <¿Munankiku tsay ballïcuta llukiriyänäta?>
29<<Niyaptinnash ninä: <Ama llukiyaytsu. Ballïcuta llukirqa trïgutapis llukiyankim. 30Segayaq tsayllachö dëjaykuyay. Segaqkunatanam nishä: <<Puntata ballïcuta qoriskir kayanantsikpä wankuyay. Peru trïguta sïqa qoriskir trïgu churakunäman churayay>> > >>.
Ñäbus muruman Jesús iwalatsinqan
Marcos 4.30-32; Lucas 13.18-19
31Mastapis iwalatsiypa yachatsirmi Jesús nirqan: <<Tayta Diospa mandakuyninqa ñäbus muruta juk runa chakranman murunqannömi. 32Llapan murupita mas ichiklla karpis wiñamurqa wakin qewakunapitapis mas jatunmi wiñan. Tsaymi rämankunachö pishqukunapis qeshunkuna rurayan>>.#13.32 Tsaynö willanqanpämi Jesús nirqan: Ichiklla murupita ñäbus jeqamur wiñanqannömi Tayta Diospa mandakuyninpis maytsayman chanqa.
Levadüraman Jesús iwalatsinqan
Lucas 13.20-21
33Iwalatsiypa yapay yachatsirmi Jesús nirqan: <<Tayta Diospa mandakuyninqa imayka levadüranömi. Tantata rurananpä ishkay arröbanö jarinaman levadürata wiñaptinmi mäsa atskaman jakan>>.#13.33 Tsay willanqanpämi Jesús nirqan: Ichiklla levadüra mäsata jakatsinqannömi Tayta Diospa mandakuyninpis maytsayman chanqa.
Imanir iwalatsiypa Jesús yachatsinqan
Marcos 4.33-34
34Tsaynömi Jesús imamanpis iwalatsiypa runakunata yachatsirqan. Imamanpis mana iwalatsiypaqa manam imaypis yachatsirqantsu. 35Tsaynö yachatsirqan Tayta Diospa profëtan ninqanta cumplinanpämi. Tsay qellqanqanchömi nin:
<<Imamanpis iwalatsiypam yachatsishayki.#Sal. 78.2.
Kay patsata kamanqanpita pipis mana tantiyanqankunatam willakushä>>.
Ballïcuman iwalatsiypa yachatsinqanta Jesús tantiyatsinqan
36Tsaypitanam runakuna aywakuyänanpä niskir Jesús juk wayiman yaykurqan. Tsaychömi discïpulunkuna rugakuyarqan ballïcuman iwalatsiypa yachatsinqanta tantiyatsinanpä.
37Tsaymi Jesús nirqan: <<Trïguta muruq runaqa Runapa Tsurinmi. 38Chakranam entëru patsa. Trïgunam Tayta Diospa mandakuyninchö kawaq runakuna. Ballïcunam Satanás munanqannö kawaq runakuna. 39Ballïcuta muruq kaqnam diablu. Cosëchanam juiciu final. Cosëchata qoriqkunanam angelkuna.
40<<Ballïcuta qoriskir ninaman qaykunqannömi juiciu finalchöpis kanqa. 41Juiciu finalchömi angelninkunata Runapa Tsurin mandamunqa jutsa ruratsiqkunata y jutsa ruraqkunatapis mandakuyninpita qoriskir 42lunyaypa lunyaykaq ninaman qaykuyänanpä. Tsaychö pasaypa waqarmi kirunkunatapis uchuyanqarä. 43Peru Tayta Dios munanqannö kawaqkunam sïqa Tayta Diospa mandakuyninchö rupaynörä atsikyäyanqa.#Dan. 12.3. Rinriyuq kaqkunaqa ninqäkunata wiyakuyätsun.
Pamparaq qellayman Jesús iwalatsinqan
44<<Tayta Diospa mandakuyninqa chakrachö qellay pamparaqmanmi iwalan. Juk runash chakrachö atska qellay pamparaykaqta tarinä. Tsay qellayta tariykurshi kanqallanman pampaykunä. Tsaypitanash llapan imaykankunatapis rantikuskir tsay qellay pamparaq chakrata kushishqa rantinä.#13.44 Tsay willanqanpämi Jesús nirqan: Tsay chakrachö tarinqan qellay llapan imaykanpitapis mas alli kanqannömi Diospa mandakuyninman yaykunapä kanqanpis llapan imaykantsikpitapis mas alli kaykan.
Perlaskunaman Jesús iwalatsinqan
45<<Tsaynöllam Tayta Diospa mandakuyninqa kuyayllapä perlasman iwalan. Juk negociantish allin kaq perlasta rantinanpä ashinä. 46Mas allinnin kaqta tariykurnash llapan imaykantapis rantikuykur tsay perlasta rantinä>>.#13.46 Tsay willanqanpämi Jesús nirqan: Tsay rantinqan perlas llapan imaykanpitapis mas alli kanqannömi Diospa mandakuyninman yaykunapä kanqanpis llapan imaykantsikpitapis mas alli kaykan.
Atarräyaman Jesús iwalatsinqan
47<<Tsaynöllam Tayta Diospa mandakuyninqa mällaman iwalan. Lamarman mällata jitarmi imaykaläya pescäduta tsariyan. 48Atarräya juntatam lamar kuchunman jipiyan. Tsaychömi alli kaq pescäduta canastaman wiñayan y mana alli kaqtana jitariyan. 49Tsaynöllam juiciu finalchö angelkuna shamur alli runakunapita jutsa ruraq runakunata rakiyanqa. 50Jutsa ruraq runakunatam lunyaypa lunyaykaq ninaman qaykuyanqa. Tsaychö pasaypa waqarmi kirunkunatapis uchuyanqarä>>.
Maran kaq y mushuq kaq mikuyman Jesús iwalatsinqan
51Tsaynö yachaskatsirnam discïpulunkunata Jesús tapurqan: <<¿Kay yachatsinqäkunata tantiyayankiku?>>
Paykunanam niyarqan: <<Awmi, taytay>>.
52Jesúsnam nirqan: <<Tayta Diospa mandakuyninpita yachatsiq runaqa maran kaq mikuykunata y tsayrä churanqan kaqkunata jipiskamur qaraqnömi kaykan>>.#13.52 Maran kaq mikuykunatam iwalatsin Moisés qellqanqanman y profëtakuna willakuyanqanman. Tsayrä churanqan kaqkunatam iwalatsin Jesucristo yachatsinqanman.
Nazaretchö Jesús willakunqan
Marcos 6.1-6; Lucas 4.16-30
53Imamanpis iwalatsiypa yachaskatsirnam Jesús tsaypita aywakurqan. 54Markanman chaykur sinagögachö yachatsiptinmi marka mayinkuna espantakur niyarqan: <<Tsaynö yachatsinanpä ¿maychörä yachakamushqa? Tsaynölla ¿imanöparä milagrukunata ruran? 55Payqa ¿manaku carpintëru Josépa tsurin? Mamanpis ¿manaku María? Wawqinkunapis ¿manaku Santiago, José, Simón y Judas? 56Llapan paninkunapis ¿manaku kaychö täyan? Tsayläya yachatsikunanpäqa ¿maychörä yachakamushqa?>>
57Tsaynö nirmi Jesús yachatsinqankunata criyiyarqantsu. Tsaymi Jesús nirqan: <<Wakin markakunachö profëtata chaskiyaptinpis castankuna y marka mayinkunaqa manam chaskiyantsu>>.#Juan 4.44.
58Tsaynö mana chaskiyaptinmi juk ishkay milagrukunallata tsaychö rurarqan.
© 2002, 2008, Wycliffe Bible Translators, Inc. All rights reserved.