Hechos 1

1
Tata Do Iyyabaaha chi begüee tisa idhelhe Espíritu guee
1Lo ca sitsi ca nu primerba benia, xa tata Teófilo, nía benia iyá nu udulo Jesús benie, iyába nu beleꞌe lhe 2axta liba atti bisía sá beopie deyye iyyabaaha. Atti deobali eyye nna leni Espíritu gue Tata Do Iyyabaaha chi utixxiꞌanie ca biꞌini bedheti ca tisa beleꞌenie ca benni chi becuee bixa anca nu uncabi. 3Dequide uttie nna beleꞌeguabani loe ca biꞌiniha ixe libe qui tsia lecabi dequi gualíba beacabanie. Attu chua (40) ubisa beacaxxe len lacabi, riguixxiꞌanie cabi gaxasná rinnabia Tata Do Iyyabaaha.
4Atti sna dobe leni ca biꞌini bedheti ca tisa beleꞌenie, unnabiattebe re ca biꞌiniha:
—Bittu iríaxxile lheꞌe yiesi Jerusalén-ni. Gualcueda nu chi rá Tata quia utee len lebiꞌi nu chiguaba utixxiꞌatia le. 5Cumu Juan sunruba inda bixuuinbi begadibi ca benni inda, ttiaca lebiꞌi nna chi tte deoba gadile inda leni Espíritu gue Tata Do Iyyabaaha.
Beopi Jesús iyyabaaha
6Ca biꞌin-ni seꞌe ttu reba nía leni Jesús, unnaba tisattebacabi rácabi Benniha:
—Benni bananie ri, ¿si nnanna unlu innabia ca benni Israel-ni yies lo yu-ni attu libe?
7Lee nna becabittebe re:
—Lebiꞌi, läga dica unale nucaxa o bixa sá uni Tata Do Iyyabaaha nu sunruba lee yue nucaxa chi gaꞌananie acana. 8Ttiaca gansi chi bisía Espíritu gue Tata Do Iyyabaaha itúba cuerpu guele, lania nna utee derechu guele qui iríale tsiale quixxiꞌenle ca benni seꞌe lheꞌe yiesi Jerusalén-ni quia, itúba lo yu te láni Judea lhe anáguaba lo yu te láni Samaria lhe itútteba yies lo yu-ni lhe.
9Dequide chi utixxiꞌe iyába nua, ttu seꞌerucabi rugüiacabi nna beopitteba Benniha deyye iyyabaaha, atti biríatteba ttu bea beocun Benniha atta deyyeha. Lania nna lärga nu Benniha biláquinbi. 10Laca seꞌecabi rugüiacabi deyya Jesús iyyabaaha nna attirba chi ucaxxe chupa ca unbiyuu atta seꞌecabiha, nucu xo sitsi guecabi. 11Nianna rácabi ca benni seꞌe rugüiaha:
—Lebiꞌi, xa benni gue Galilea, ¿biaca seꞌele rugüiale iyyabaaha? ¿Läba gua yubale Jesús benni güequie len lebiꞌihaba Ben-na belhidha Tata Do Iyyabaaha? La Ben-naba Benniha, Benni esía attu sá. Attiba bilenle beopie deyye iyyabaaha, anáguaba esíe attu libe.
Bodúcabi Matías cuenta gue Judas
12Lania nna beaditteba ca biꞌini bedheti ca tisa beleꞌe lo lhilhi Atta Da Ca Yaga gue Olivu nu do gaxxaba atta re yiesi Jerusalén. Neda bedácabi besincabi Jerusalén-na tena attiba ttu kilómetro, nu gaꞌanaba lo ca ley bocaꞌana Moisés dha ca benni Israel sá redí lecaniha. 13Atti besincabi lheꞌe yiesi Jerusalén nna beopittebacabi lheꞌe yoꞌo chupa coa atta reꞌana Pedro lhe Juan lhe Jacobo lhe Andrés lhe Felipe lhe Tomás lhe Bartolomé lhe Mateo lhe Jacobo, xiꞌini Alfeo lhe Simón, biꞌini te lábi Zelote lhe Judas, xiꞌini Jacobo lhe. 14Iyába ca biꞌin-ni satíaba riseꞌecabi ttu reba nía rinnecabi leni Tata Do Iyyabaaha lencabi ca betsi Jesús lhe len nan gue Benniha lhe adírba ca benni nuila lhe.
15Ttu sá atti seꞌe ttu reba attiba ttu gayua yuꞌu galhia (120) ca benni ria lecabi ca tisa gue tata Jesús, nianna udulítteba Pedro lagüi gue ca benni seꞌe nía atti rábi cabi:
16—Xa betsito, labíaba uca nu rá ca tisa betee Espíritu gue Tata Do Iyyabaaha unne David, nu dia lo ca sitsi benbiha atti unnebi gue nu uni Judas nu uneruna lo ca nu bedaxxucana Jesús. 17Cumu Judas ucana benni baba len riꞌi, selaguabana unna sina nu gaꞌana unri-ni. 18Lana nua güiana guayoꞌona ttu lo yu leni belhiu nu utixacan na gue nu lä anca tsee bennaha. Nía nua biyinnana delo udiqui atti bisú lheꞌeni nna biría tuu yiꞌe gueniha bisílana lo yu. 19Iyába ca benni seꞌe lheꞌe yiesi Jerusalén-ni binacana nua, nianna utixxattebacana lá yuha Acéldama, leni tisa guecani dienna innána: Lo Yu Gue Reni. 20Cumu attiba rá lo sitsi atta dia ca Salmo-na rána:
Lheꞌe lisniha si si banihaba aca,
cumu nuttu nu benni tseꞌe lheꞌeni.#1:20 Salmo 69:25
Ráguaba lo sitsiha:
Attu benni subi edúna cuenta gue nua.#1:20 Salmo 69:25
21’Larcala nna de nua nna raca duelha odúri attu benni qui edúna cuenta gue Judas. Niba seꞌe ca unbiyuu ca biꞌini güequi len riꞌi itú ttuba atti güequi Jesús Benni anque Benni bananie ri len riꞌiha. 22Udulocabi bettenalhacabi attili begadi Juan biꞌini rugadi indaha Benniha indaha, axta liba beopie deyye iyyabaaha seꞌecabi len riꞌi. Larcala nuxa ttucabi iselacabi riꞌi qui quixxiꞌabi len riꞌi beacabani Jesús.
23Laniala nna beleꞌecabi chupa ca benni: José biꞌini lá Barsabás biꞌini teeguaba lábi Justo, attu biꞌini lá Matías nna. 24Nianna atti unnettebacabi len Tata Do Iyyabaaha rácabi:
—Benni bananie riꞌitu, lu yulu ttixa anca lheꞌe lastoo ttu ttuttu. Nnanna nna beleꞌe delo chupa ca unbiyuu seꞌe-ni, nuxcabi chi becueelu 25qui edúbi acabi apóstol unbi sina nu anca un Judas. Cumu unnuha nna bexxíbana leni nu lä anca tsee bennaha nuarca bennittina sina-ni. Nianna diabana atta ralhana tsiana.
26Laniala nna bencabi ttu nu beni qui beleꞌeni Tata Do Iyyabaaha cabi nuxa ca biꞌiniha saxxína. Nianna guaxxíbana Matíasba bodúcabi. Snaba lania nna bisela biꞌiniha len ca biꞌini sinía (11) bedheti ca tisa beleꞌenie.

目前选定:

Hechos 1: zaq

高亮显示

分享

复制

None

想要在所有设备上保存你的高亮显示吗? 注册或登录