ᑎᐱᑦ ᐅᓂᑭᒧᐅᓇ 28
28
1ᒋᔾ ᒋᑭ ᒧᔎᑎᑎᓐ, ᐅ ᑎᐸᔨᒋᒐᓱᐤ, ᓂᒋᔅᑕᐱᔅᑯᒻ,
ᐊᑲᐎᔾ ᒋᒺᐧᑲᑐᐎ:
ᐛᔅ ᒧᔭᒻ ᒋᒺᐧᑲᑐᐎᔨᓇ,
ᓂᑭ ᒋᔅᐱᑐᐛᐅᒡ ᑲ ᓂᓴᑐᐎᒡ ᐛᑎᑯᒡ᙮
2ᓂᑐᑕ ᓂᓂᑐᑎᒪᒐᐅᓐ ᑎᔭᑈᔭᓂ;
ᐃᔅᐱ ᐊᐅᐱᓂᔅᒐᔭᓂ ᒋᐸᔭᒋ ᐅᐎᓱᐛᒥᒋᐛᐱᒡ᙮
3ᐊᑲᐎᔭ ᒋᒡ ᐅᒥᒋᑥᐅᒡ ᐃᑲᑎᓯᓂ, ᐊᓐᒡ ᑭᔭ ᑲ ᒥᒋᑐᑕᒡ,
ᑲ ᒋᔭᒪᔨᑎᒧᐅ ᐃᔨᒪᐊᒡ ᐎᒡ ᐃᔪᐛᐛ,
ᒪᒃ ᐅᑕᐃᐛᒡ ᑎᒂᓂᔪᐤ ᐃᔭᔨᑲᓯᐅᓂᔪᐤ᙮
4ᐅᑦ ᐃᑐᓄᐛᒡ ᐃᓯ ᒥᔨᒡ, ᑭᔭ ᐊ ᐃᓯ ᒥᒋᑥᒪᑭᓂᔨᒋ ᐅᑯᒂᒋᐃᐛᐅᓄᐛᐛ:
ᒥᔨᒡ ᑲ ᐃᑎᑐᔅᒐᒡ ᐅᑎᒋᐛᒡ:
ᐱᔅᑎᓂᒧᐅᒡ ᑕᐱᔅᑯᓐ ᐊ ᐃᑕᑎᓯᒡ᙮
5ᐊᑲ ᐊ ᐱᔅᒐᔨᑎᒺᒡ ᑎᐸᔨᒋᒐᓱᐛ ᐅᑦ ᐊᑐᔅᒐᐅᓂᔪᐤ,
ᐊᑲ ᑭᔭ ᑲ ᐃᑐᑎᒧᒪᑭᓂᔨᒡ ᐅᑎᒋᔭ, ᒋᑭ ᓂᓱᐅᓇᒋᐊᐤ, ᓇᒪ ᒪᒃ ᒋᑭ ᐱᓯᑯᓇᐤ᙮
6ᒪᒥᒋᑕᑯᓱᐤ ᑎᐸᔨᒋᒐᓱᐤ,
ᐊᒋ ᓂᑐᑕᒄ ᓂᒪᐅᓂᔪᐤ᙮
7ᑎᐸᔨᒋᒐᓱᐤ ᓂᒥᔅᑯᐅᓯᐅᓐ ᑭᔭ ᓂᑦ ᐊᒂᓇᐅᓱᐛᑭᓇ;
ᓂᑕᐃᔪᐤ ᒋ ᒪᒥᓯᑐᑕᑯᐤ, ᓂ ᐎᒋᐃᑯᐅᓐ ᒪᒃ:
ᐊᐅᒄ ᐅᒋ ᓂᑕᐃ ᓇᔅᒡ ᒪᔽᔨᑎᒧᒪᑭᓐ;
ᑭᔭ ᐊ ᓂᑭᒧᔭᓐ ᓂᑭ ᒪᒥᒋᒪᐤ᙮
8ᑎᐸᔨᒋᒐᓱᐛ ᐅᒥᔅᑯᐅᓯᐅᓄᐅᒡ,
ᑭᔭ ᐅᐱᒪᒋᐃᑯᓯᐅ-ᒥᔅᑯᐅᓯᐅᒋᐛᑉ ᐅᑦ ᐊᐱᒋᐊᑭᓇ᙮
9ᐱᒪᒋᐃᒡ ᒋᑦ ᐃᔨᒥᒡ, ᑭᔭ ᒥᔽᒋᒥᒡ ᐊᓐᒡ ᑲ ᑎᐱᔨᐛᐅᓯᔨᓐ:
ᐊᓯᒥᒡ ᑭᔭ ᐅᐱᓂᒡ ᑲᒋᒡ᙮
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada