Romnima 9
9
Naawuni min’ o ninvuɣ’ gahinda Izraɛlnima
1Masia zuɣu n yɛrila yɛlimaŋli, m bi ŋmarila ʒiri. Ka n suhu ni tɛha diri ma shɛhira Naawuni Shia Kasi sani 2ni m mali suhugarigu pam, ka nandahima din bi naari kul mali ma. 3N yuya ni Naawuni noli di ma ka m mini Masia woligi tab’ gba mmaŋmaŋ’ zuliya bɛn nyɛ m mabihi la zuɣu. 4#Yibu 4.22 Bɛna n-nyɛ Izraɛl zuliya. Naawuni daa zaŋ ba leeg’ o bihi ka chɛ ka bɛ mal’ omaŋmaŋ’ jilima; ka daa lo ba alikauli ka zaŋ o fukumsi zaligunima ti ba; ka daa wuhi ba o jɛmbu soli ka lo ba alikaulinima. 5Bɛna n-nyɛ bɛn daa yi ti dɔɣirikpamba bɛn nyɛ ti yaannim’ la zuliya ni na. Ka Masia gba yila bɛ zuliya maa ni na o daadamtali puuni.
Naawuni ŋun nyɛ ŋun gari sokam zaa ŋɔ simdi paɣibu hal ni saha din ka bahigu. Ami!
6Dimbɔŋɔ bi wuhiri ni Naawuni yɛligu kɔŋla palibu, dama pa bɛn zaa yi Izraɛl zuliya ni na n-nyɛ Izraɛl yaan’ maŋa. 7#Pil 21.12 Ka di mi pala bɛn zaa yi ti yab’ Ibrahimma zuliya ni na n-nyɛ Ibrahimma yaan’ maŋa. Naawuni daa yɛli Ibrahimma, “Yisahaku zuliya n-yɛn nyɛ a yaan’ maŋa.” 8Dimbɔŋɔ wuhiri ni pa bɛ ni dɔɣi bi’ shɛb’ Naawuni daalikauli lɔbu puuni n-naɣ’ nyɛ o bi’ maŋa; 9#Pil 18.10 dama ŋ-ŋɔ ka alikauli maa daa yɛli, “Zaŋ chaŋ yuuni na ŋ-ŋɔ tasaha, n ni lab’ a sanna, ka a paɣ’ Zara ni ti dɔɣi bidibiga.”
10Ka pa dimbɔŋɔ kɔŋko. Ribɛka ni daa zaŋ jahi pua ti yab’ Yisahaku sani 11-12#Pil 25.23 hal ka na bi dɔɣi ba, ka bihi maa mi na bi tum zaɣ’ suŋ bee zaɣ’ biɛɣu la, Naawuni daa yɛl’ o ni bikpɛm’ ni ti jɛm biasani. Naawuni daa niŋla lala ni di chɛ ka o ni piir’ o ninvuɣ’ gahinda shɛm zani, ka di nyɛla o bolibu zuɣu, ka pa ni bɛ tuma zuɣu. 13#Mal 1.2-3 Ka dimbɔŋɔ doli Naawuni ni daa yɛli shɛm la: “Yaakubu ka n yura, ka je Iso.”
14Ka dindina wula ka ti lee ni yɛli? Ti ni yɛli ni Naawuni bi niŋ din tuhi? Naawuni di wuhi gba! 15#Yibu 33.19 Dama Naawuni daa yɛli Anabi Musa, “N ni niŋ ninvuɣ’ so n ni bɔri nirilim, ka zo ninvuɣ’ so n ni bɔri nambɔɣu.” 16Dinzuɣu di pala ninsal’ yubu bee o ni niŋ shɛm zuɣu, amaa di nyɛla Naawuni nambɔzɔbo zuɣu. 17#Yibu 9.16 Dama Naawuni Kundi puuni, Naawuni daa yɛli Firawuna, “N ni zal’ a daliri shɛli zuɣu nyɛla ni n wuhi n yiko tuma a ni, ka di chɛ ka n yuli moli gili dunia zaa.” 18Lala zuɣu ka o zɔri ninvuɣ’ so o ni bɔri nambɔɣu, ka chɛ ka o ni bɔri ninvuɣ’ so mi suhu kul kpɛma.
Naawuni suhuyiɣisili min’ o nambɔzɔbo
19Dindina yi ni shɛb’ ni bɔhi ma, “Ka di yi nyɛ lala, di chaŋ wula ka Naawuni na kul nyari ninsalinim’ taali? Dama ŋuni n-lee ni tooi gu Naawuni yubu soli ka di ku niŋ?” 20#Aiz 29.16; 45.9 Ŋuni n-lee nyɛ a, nyin’ ninsala, ni a ŋme Naawuni naŋgbankpeeni? Duɣu ni tooi bɔhi yaɣimɛra, “Bɔ n-niŋ ka a me ma lala?” 21Yaɣimɛr’ ka yiko ni o zaŋ yaɣ’ kpil’ yini me duɣ’ shɛli din ni ku buchi zama ni, ka lan zaŋ li me duɣ’ shɛli din ku yi zama ni?
22Lala ka Naawuni gba daa niŋ. O daa bɔri ni o wuhila o suhuyiɣisili ni nyɛ shɛm ka chɛ ka o yiko yi palɔni; dinzuɣu ka o daa di ninvuɣ’ shɛb’ bɛn daa tumdi din kur’ o suli ka simdi ni o bahi ba yol’ la suɣilo. 23O daa lan bɔri ni o kahigila o jilima din galisi n-wuhi o ni daa zaŋ li niŋ tinim’ ninvuɣ’ shɛb’ bɛn nya o nambɔzɔbo la ni, ka mali ti zali ni ti ti nya o jilima. 24Tinima n-nyɛ o ni boli ninvuɣ’ shɛba, ka di pala Yɛhudianim’ kɔŋko, amaa bɛn pa Yɛhudianim’ gba. 25#Hoz 2.23 Dama ŋ-ŋɔ ka Naawuni daa ysɛli Anabi Hosea litaafi ni:
“Ninvuɣ’ shɛb’ bɛn pa n niriba,
n ni boli ba, ‘N niriba.’
Ka zuliya shɛb’ n ni bi yura,
n ni boli ba, ‘N ninvuɣ’ yurisi.’
26 #
Hoz 1.10
Ka luɣ’ shɛli n ni daa yɛli ba ni bɛ pala n niriba la,
nimaani ka niriba ni boli ba, Naawuni ŋun be ŋɔ bihi.”
27Ka Anabi Aizaia gba daa yɛli Izraɛl zuliya yɛla: “Hal Izraɛl yaansi ni galisi kaman mɔɣ’ bihigu maa zaa yoli, bɛ ni niriba bɛn kpalim biɛla kɔŋko n-ni tiligi; 28#Aiz 10.22-23 dama ti Duuma ni niŋ kaman o ni zali ni o ni niŋ shɛm o sariakaribo puuni dunianim’ zaa sani ŋ-ŋmaai li jia.” 29#Aiz 1.9 Anabi Aizaia daa lan yɛli:
“Zallakudura Naa yi di daa bi chɛ ti shɛba,
ti naan kpi zaa kaman Sɔdomnim’ mini Gomɔranim’ la.”
Izraɛlnim’ mini Yisa Masia lahibal’ suŋ
30Ka dindina wula ka ti lee ni yɛli? Ti ni yɛli ni bɛn pa Yɛhudianima ka nyɛ bɛn daa bi lihiri bɔri wuntitali Naawuni san’ la nya li bɛ yɛda niŋbu zuɣu. 31Amaa Izraɛlnim’ bɛn daa bɔri taali ni yibu din ni yi zaligu dolibu ni Naawuni san’ la daa bi nya li zaligu maa dolibu puuni. 32Bɔ n-daa chɛ ka bɛ bi nya li? Bɛ daa bi bo li la yɛda niŋbu puuni, amaa ka daa bo li la bɛmaŋmaŋ’ tuma puuni. Bɛ daa tuui kuɣ’ tuurili shɛli 33din yɛla sab’ Naawuni Kundi ni la:
“Nyama, n zaŋ kuɣ’ shɛli sɔŋ Ziɔn
ni di chɛ ka niriba tuui li;
di nyɛla kuɣ’ shɛli din ni chɛ ka bɛ tuui lu.
Amaa ŋunkam niŋ o yɛda ku di vi.
Dagbani Bible with Deuterocanonical Books © Bible Society of Ghana, 2011.