Tuumba Tuma 14
14
Pool be Aikɔnium
1Pool mini Baanabas ni daa be Aikɔnium maa ka bɛ daa ti doli taba chaŋ Yɛhudianim’ jɛmbu duu ti yihi waazu, ka Yɛhudianim’ mini bɛn pa Yɛhudianim’ pam daa niŋ yɛda. 2Amaa ka Yɛhudianim’ shɛb’ bɛn daa bi niŋ yɛda dim bɛn pa Yɛhudianim’ tiba ni, ka bɛ taai duŋ n-yiɣisi bɛ suhuri bahi Yisa nyaandoliba zuɣu. 3Ka Pool mini Baanabas daa ʒini nimaani yuui, ka kul tɔɣisiri ti Duuma yɛla ni suhukpeeni, ka ti Duuma daa ʒe bɛ ni tɔɣisiri ŋun’ Yisa daanfaani yɛl’ shɛŋa maa nyaaŋa, ka chɛ ka bɛ wuhiri shihira ka tumd’ alahiziba tumtumsa. 4Ka tiŋ’ maa nim’ daa pirigi ʒii buyi: Bɛ shɛb’ daa dolila Yɛhudianim’ maa; ka bɛn’ la mi doli Yisa tuumba maa.
5Ka bɛn pa Yɛhudianim’ mini Yɛhudianim’ zaŋ tabili bɛ kpamba daa lo nia ni bɛ nahim Yisa tuumba maa, hal ka bɔri ni bɛ lab’ ba kuɣa. 6Ka bɛ daa baŋ li ka yiɣisi ni n-zo n-chaŋ Listra mini Dɛɛbi din be Laikɔnia tiŋgbɔŋ ni zaŋ tabili tiŋkpansi din daa gil’ li zaa 7nti yihiri lahibal’ suŋ waazu nimaani.
Pool be Listra
8Gbaridɔɣirili so daa be Listra. Bɛ ni daa dɔɣ’ o dahin’ shɛli hal ti paag’ o ninkurilim ni o daa na ʒi n-yiɣisi zani chaŋ. 9Ka o daa ʒiya n-wumdi Pool waazu, ka Pool ti mirig’ o nina kpa o n-nya ka o mali yɛda din ni chɛ ka o kpaŋ, 10ka kuhi yɛl’ o, “Yiɣisima n-zan’ a naba zuɣu!” Ka gbarigu maa dii vaai yiɣisi zani gbaai chandi. 11Niriba ni daa nya Pool ni niŋ shɛm maa ka bɛ duhi bɛ yee kuhi yɛli pam Laikɔnia yɛligu ni, “Ti buɣa n-leei ninsalinim’ ka ti sanna ŋɔ.” 12Ka bɛ daa zaŋ bɛ buɣ’ so ŋun yuli booni Zius la yuli ti Baanabas, ka zaŋ buɣ’ so ŋun mi yuli booni Hɛrimɛs la yuli ti Pool mi, Pool ni daa nyɛ bɛ yɛtɔɣ’ tɔɣisira la zuɣu. 13Di saha ka buɣili Zius ŋun duu daa be tiŋ’ maa tooni la tindana daa bo naɣilahi mini vari n-ka tiŋ’ maa gooni dunol’ ni na ni o mini niriba maa ti kɔrigi mali ba.
14Amaa ka Baanabas mini Pool bɛn nyɛ Yisa tuumba la daa wum lala ka dari tɔhi bɛ binyɛra, ka zo nti kpe salo maa ni kuhiri yɛra, 15#Tuma 20.11; Yila 146.6 “Zɔrinima! Bɔ n-niŋ ka yi niŋdi lala? Ti nyɛla ninsalinim’ kaman yi gba, ka zaŋ lahibal’ suŋ na ni ti ti tin ya, ka yi chɛ bin’ yoya ŋɔ jɛmbu ka niŋ Naawuni ŋun be ka nam zuɣusaa mini tiŋgbani ni teeku ni binshɛɣukam din be di ni ŋɔ yɛda. 16Ʒiɛman’ shɛŋa din gari la ni, o daa chɛ ka zuliya kam doli bɛ suhu yubu, 17amaa di zaa yoli, o kul tumdi tuun’ suma din wuhiri ni o beni. O tiri ya saa ka di chɛ ka yi bindira niŋdi ka yi diri tiɣiri ka mali suhupiɛlli.” 18Bɛ ni daa tɔɣisi yɛtɔɣ’ shɛŋa ŋɔ zaa yoli, di daa muɣisi ba ni bɛ tooi gooi niriba maa ka bɛ ku mali ba maligu maa.
19Ka Yɛhudianim’ shɛb’ daa yi Antiɔk mini Aikɔnium na nti lɛbigi niriba maa suhuri, ka di zuɣu chɛ ka bɛ lab’ Pool kuɣa hal ti tɛhi ni o kpimi ka vu o yihi bɛ tiŋ’ maa tariga. 20Amaa ka Yisa nyaandoliba daa chaŋ ti zani gil’ o, ka o yiɣisi n-lan kpe tiŋ’ maa ni n-daa kaai biɛɣu ka o mini Baanabas yi nimaani chaŋ Dɛɛbi.
Pool ni lab’ Antiɔk din be Siria tiŋgbɔŋ ni shɛm
21Bɛ ni daa yihi lahibal’ suŋ waazu Dɛɛbi ka niriba pam daa niŋ yɛda, ka bɛ daa yi ni n-lab’ Listra mini Aikɔnium ni Antiɔk 22n-chani kpaŋsiri Yisa nyaandoliba suhuri ka kpamdi ba jaande ni bɛ kul gbibi yɛda, ka yɛli ba ni nir’ yi bɔri ni o kpe Naawuni nam ni, o ni bahi di wahala. 23Ka bɛ daa pii kpamba cheechi kam puuni ti ba, ka daa lo noli n-suhi ti Duuma ka zaŋ ba niŋ Naawuni so bɛ ni niŋ yɛda maa nuu ni.
24Ka bɛ daa chaŋ ti tim Pisidia tiŋgbɔŋ puuni gari chaŋ Pamfilia. 25Bɛ ni daa ti tɔɣisi Naawuni yɛligu Pɛɛga naai bɛ daa gari chaŋla Atalia 26n-daa ti yi nimaani kpe ŋariŋ kuli Antiɔk, luɣ’ shɛli bɛ ni daa zaŋ ba niŋ Naawuni Alibarikalan’ ŋɔ nuu ni ni bɛ tum bɛ ni daa tum tuun’ shɛli naai maa la.
27Bɛ ni daa paai bɛ daa laɣimla Yisa nyaandoliba zaa ha n-yɛli ba Naawuni ni daa chɛ ka bɛ tum shɛlikam zaa min’ o ni daa mali soli ti bɛn pa Yɛhudianima ka bɛ niŋ yɛda shɛm yɛla. 28Ka Pool mini Baanabas daa kpalim Yisa nyaandoliba maa sani niŋ daba ayi.
Dagbani Bible with Deuterocanonical Books © Bible Society of Ghana, 2011.