Паччагьлугъар-2 2
2
Давуддикан Ягьудайин паччагь хьуз ччим ктатуру
1Саб вахтналан Давудди РАББИЙИХЬАН гьерхнийи:
– Ягьудайин шагьрарикан саб фунубдиз-вушра гъягъюза?
РАББИЙИ гъапнийи:
– Гъарах.
Давудди гьерхнийи:
– Наанди гъягъюза?
– Хеврундиз, – жаваб тувнийи Дугъу.
2Давуд дина гъушу ва дугъахъди – чан кьюрид хпарра: Изреелиан вуйи Ахиноам ва Кармилиан вуйи Навалин ачӀни хпир Авигаил#2:2 Кармилиан вуйи Навалин ачӀни хпир Авигаил: Наваликан ва дугъан аьяндар хпирикан ихтилат 1 Пачч 25-пи кӀулиъ а.. 3Давуд чан адмийирра хъади гъафнийи, гьарсар чан хизанра хъади, ва дурар Хеврундиъ ва дидин багарихь ерлешмиш гъахьнийи. 4Ягьудайин наслин адмийир Хеврундиз гъафнийи ва дурари Давуддикан Ягьудайин наслин паччагь хьуз ччим ктатнийи.
Галааддин Явешдин агьалйири Саул накьвдик кивуваликан Давуддиз гъапиган, 5дугъу дурарихьна гьамцдар гафар пуз юлчйир гьаънийи:
– Саулиз, ичв агъайиз, учв накьвдик кивбиинди гьациб рягьим улупуб себеб вуди, учву РАББИЙИН ужʼваликк ккачва. 6Гъит РАББИЙИ учвуз рягьим ва дугъривал гьаъри, ва узура дици апӀбан учвуз буржлуди гъузидарза. 7Гьаци, гужлидар ва лайикьлудар йихьай, гьаз гъапиш Саул, ичв агъа, гъакӀну, хъа Ягьудайин насли узкан чпин паччагь хьуз ччим ктатну.
Иш-Бошет Израилин паччагь шулу
8Гьадму вахтна Авнери#2:8 Авнер: Саулин эмдин бай (лиг 1 Пачч. 14:50-51)., Нердин бали, Саулин кьушмин аьхюри, Саулин бай Иш-Бошет Маханаимдиз хъади гъюру. 9Авнери дугъкан Галааддин, ашуритарин ва Изреелин, хъа гьацира Ефраимдин, Вениаминдин – вари Израилин паччагь апӀуру.
10Иш-Бошетдин, Саулин балин, учв Израилин паччагь гъахьиган, ягъчӀвур йис яш вуйи, ва дугъу кьюд йисан паччагьвал гъапӀнийи. Амма Ягьудайин насил Давуддихъанди гъабхьнийи. 11Давуд Хеврундиъ ургуд йисна йирхьуб вазли Ягьудайин тухумдин паччагь гъахьнийи.
Давуддин ва Саулин тухмарин арайиъ дяви ккебгъувал
12Авнер, Нердин бай, Иш-Бошетдин, Саулин балин, адмийирра хъади, Маханаимдиан дявдиз удучӀвну, Гивон шагьрихьинди гъушнийи. 13Юавди, Церуяйин#2:13 Церуя: Давуд паччагьдин багахьлу дишагьли. бали, ва Давуддин адмийири, дявдиз удучӀвну, дурар Гивондин дагрихь къаршуламиш гъапӀнийи. Тмундар дагрин саб гъирагъдихъ дугъужвнийи, хъа мурар – тмунубдихъ. 14Авнери Юавдиз гъапнийи:
– Гъит гужлидарстар жигьилар гъудужври ва ихь улихь кичӀихри.
– Гъит гъудужври, – жаваб тувнийи Юавди.
15Жигьилар гъудужвнийи, ва Вениаминдин наслиан йицӀикьюр Иш-Бошетдихъан, Саулин балхъан, вуйидар ва йицӀикьюр адми Давуддихъан вуйидар ктухнийи. 16Дурарикан гьарсари чаз гъаншарди айир кӀулхъан гъидиснийи, дугъан гъвалаъ чан тур убччвнийи ва дугъахъди сатӀиди дукӀну дахънийи. Ари гьаддиз Гивондиъ думу йишваз Турарин ХутӀил гъапну.
17Думу йигъан гизаф гъизгъин дяви гъабхьнийи, ва Авнерна Израилин эскрар Давуддин адмийири дагъитмиш гъапӀнийи.
18Душваъ Церуяйин шубур байра ади гъахьну – Юав, Авишай ва Асаил. Асаил чюлиъ айи жейранси зарб кайир вуйи. 19Думу Авнерихъ, я гагвлахъинди, я арччлахъинди дугъан шилариан улдудучӀвури, хъергнийи. 20Авнери, кьяляхъ илтӀикӀну, гьерхнийи:
– Му уву вува, Асаил?
– Ав, узу вуза, – жаваб тувнийи дугъу.
21Думуган Авнери дугъаз гъапнийи:
– Арччлахъинди ясана гагвлахъинди илтӀикӀ; эскрарикан сарихъди кичӀих, думу яв хюрч ишри.
Амма Асаил дийийигъди дугъахъ хъергнайи. 22Авнери цӀийикӀултӀан Асаилиз чан гафар текрар гъапӀнийи:
– Узухъ хъергувал дебкк! Уву йивну йикӀуб йиз гьаз ву? Дици гъабшиш, узхьан яв чве Юавдин улариз лигуз фици хьибди?
23Амма Асаили хъергувал дебккрадайи. Думуган Авнери чан жидайин кьаб дугъан фуниъ гьаци абсу, жидайин кьаб дугъан кьялʼан чӀатинди итӀибгъу. Асаил алдаку ва гьадушвʼин гъакӀи. Асаил гъакӀи йишван багахьна хъуркьу гьарсар адми дийигъуйи. 24Амма Юав ва Авишай Авнерихъ хъергнайи, ва ригъ алабхъру вахтна дурар Гиахдин багахь, гивондин буш чюлизди гъябгъру рякъюхъ хъайи Аммах кӀуру тепейихъна хъуркьнийи. 25Вениаминдин наслиан вуйидар Авнерилан илтӀикӀнийи, саб дестейиз уч гъахьнийи, ва дурари жара тепейин кӀакӀниин йишв гъибиснийи.
26Авнери Юавдиз чӀигъ гъапӀнийи:
– Тури гьаргандиз гьадабтӀидин? Аьхир кьутӀкьлиб шлувалин уву гъавриъ ахъурдарва дарш? Яв адмийириз чпин чвйирихъ хъергувал дебккуз уву амур апӀайиз хъана фукьан вахт гъябгъиди?
27Юавди жаваб тувнийи:
– Заануриинди ху апӀурза, эгер уву гьаци гъапундайиш, эскрари чпин чвйирихъ хъергувал гвачӀиндиз давам апӀидийи.
28Юавди кӀарчнаан гъивнийи, ва вари эскрар дийигънийи. Дурар сарун израиларихъ хъергундайи ва дяви гъапӀундайи. 29Вари гьадму йишван Авнер ва дугъан адмийир ярдан дерейиъди гъушнийи. Дурар Ярдан ниркан ктучӀвнийи, гьацӀ йигъандин рякъ ккадапӀнийи ва Маханаимдиз гъафнийи. 30Юав Авнерихъ хъергбахъан кьяляхъ гъафнийи, ва дугъу вари чан адмийир уч гъапӀнийи. Асаилилан савайи, Давуддин йицӀурчӀвурсан эскер гьуркӀрадайи.
31Давуддин гъаравашари Авнерихъди хъайи шубуд варжна йирхьцӀур адми йивну гъакӀнийи. 32Дурари Асаил гъурхнийи ва Вифлеемдиъ чан адашдин гюмбетдиъ кивнийи. Хъа Юав чан адмийирихъди ярхи йишвди рякъюъ гъахьнийи ва акв улубхьру вахтна Хеврундиз хъуркьнийи.
© Институт перевода Библии, 2010, 2013, 2016, 2018, 2023