Паччагьлугъар-2 16
16
Цивайин кучӀал
1Давуд дагъдин кӀакӀналан цӀиб исина ктучӀвнийи, дугъаз хабарсузди Цива, Мефи-Бошетдин гъараваш, раст гъахьнийи. Дугъахь кьюд варж уьл, варж багълама кишмиш, варж багълама инжилар ва чяхир айи эрж юкламиш дапӀнайи жут дажйир хьайи.
2Паччагьди Цивайихьан гьерху:
– Мурар фтиз вуяв?
Цивайи жаваб туву:
– Дажйир – паччагьдин хуландар элеъбан бадали; уьл ва йимишар – эскрари итӀуз, хъа чяхир – буш чюлиъ зяиф гъахьидари убхъуз.
3Думуган паччагьди гьерху:
– Хъа яв агъа Саулин худул наан айкӀан?
Цивайи дугъаз жаваб туву:
– Думу гьамусяаьтна Ерусалимдиъ а, гьаз гъапиш дугъу гьамци фикир апӀура: «Гъи Израилин насли узуз йиз аьхю абайин паччагьлугъ кьяляхъ апӀиди».
4Думуган паччагьди Цивайиз гъапи:
– Муганайиз Мефи-Бошетдин вуйи мал-мутму вари гьамус явуб ву.
– Исди икрам апӀурза увуз, йиз агъа вуйи паччагь, – гъапи Цивайи. – Гъит узуз яв улариъ майилвал бихъри.
Шимейи Давуддиз агьрар апӀуру
5Давуд Бахуримдиз багахь гъахьиган, шагьриан Саулин хизандин тухумдиан вуйи адми удучӀвнийи. Дугъаз Шимей, Герайин бай, кӀуйи; думу гъягъюрайи ва агьрар апӀурайи. 6Дугъу Давуддиз ва дугъан гъуллугънаъ айидариз, Давуддихьан гагвлахъандира, арччлахъандира дугъан эскрар ва гъаравлар хьайивализ дилигди, гъванар йивуйи. 7Агьрар апӀури, Шимейи кӀуйи:
– Дург! Дург! Адмийир йивну гъакӀи кас! Алчагъ! 8Чан йишвʼин уву паччагь гъахьи Саулин тухумдиъ уву удубзу вари ифдихъанди увуз РАББИЙИ тувну. РАББИЙИ паччагьлугъ яв бай Авессаломдиз тувну. Хъа уву бедбахтвалиъ ахъунва, гьаз гъапиш уву адмийир йивну гъакӀир вува!
9Авишайи, Церуяйин бали, паччагьдиз гъапи:
– Гьаму мурдал хуйи йиз агъайиз, паччагьдиз гьаз агьрар апӀура? Узуз гъягъюз ва дугъан кӀул алдабтӀуз ихтияр тув.
10Амма паччагьди гъапи:
– Учвкан фу апӀуза, Церуяйин баяр? Эгер дугъу агьрар апӀураш, дугъаз РАББИЙИ гъапну «Давуддиз агьрар апӀин», хъа Шимейиз шилхьан пуз шулу: «Уву мици гьаз апӀурава?»
11Давудди Авишайиз ва чан багахь дапӀнайидариз варидиз гъапи:
– Йиз ифдикан гъахьи йиз бай йиз уьмур тадабгъуз чалашмиш шула. Дици гъабхьиган, Вениаминдин наслиан вуйирикан фу пуз шулу! Гъитай думу; гъит агьрар апӀри, гьаз гъапиш РАББИЙИ дугъаз гьаци гъапну. 12Белки, РАББИЙИЗ йиз дерд рябкъюр, ва узуз гъи ерхьурайи агьрарианди узуз ужʼвал тувур.
13Ва чан адмийирра хъади Давуд цӀийикӀултӀан рякъюъ учӀвнийи, хъа Шимей, дугъаз агьрар апӀури ва гъванар, бишируг йивури, дагъдин дугъаз гъаншар ямаждикди гъягъюрайи.
14Паччагь ва дугъахъди хъайи чан вари адмийир Ярдандихъна бизар духьну хъуркьнийи ва душвахь рягьятвал йивуз дийигънийи.
Авессалом Ерусалимдиъ
15Хъа гьадму вахтна Авессалом ва вари израилар Ерусалимдиъ учӀвнийи, ва Ахитофелра дурарихъди хъайи. 16Аркижви Хушай, Давуддин дуст, Авессаломдихьна гъафиган, дугъу паччагьдиз гъапи:
– Яшамиш ишри паччагь! Яшамиш ишри паччагь!
17Авессаломди Хушайихьан гьерху:
– Яв дустраз яв вафалувал магьа гьамциб вуйин? Уву дугъахъди гьаз гъушундарва?
18Хушайи Авессаломдиз гъапи:
– Ваъ, фуж РАББИЙИ, гьаму халкьди ва вари израилари ктагънуш, узу гьадгъван терефнаъ аза ва гьадгъвахъди гъуздиза.
19Хъа узу шлиз гъуллугъ апӀиди? Дугъан бализ даринхъа? Яв адашдиз узу гъуллугъ гъапӀганси, дюм-дюзди гьаци увузра гъуллугъ апӀидиза.
20Авессаломди Ахитофелиз гъапну:
– Учуз насигьят тув. Фу апӀуча?
21Ахитофели жаваб тувну:
– Гъалайиз лигуз дугъу гъитнайи яв адашдин ашнийирихъди дахъ. Думуган уву яв адашдиз дяркънукьан даккнир хьувал вари Израилиз ебхьиди, ва яв терефнаъ айидарин варидин хилар мюгькам хьиди.
22Авессаломдиз гъалайин гъваин чадур дивнийи, ва думу чан адашдин ашнийирихъди вари Израилин уларикк гъаахнийи#16:22 Дидкан Натан пайгъамбри улихь ккимиди гъапну (лиг 2 Пачч. 12:11-12)..
23Думу йигъари Ахитофели туву насигьят Заанурихьан гъафи гафнак гьисаб апӀуйи. Ахитофелин фунубра насигьят Давуддизра, Авессаломдизра гьациб вуйи.
© Институт перевода Библии, 2010, 2013, 2016, 2018, 2023