Паччагьлугъар-2 11
11
Давуд ва Батшева
1Хьадукра, вари паччгьар дявдиз гъягъруган, Давудди Юав, кьушмин вари аьхюдар ва вари израил кьушум хъади, дявдиз гьау, ва дурари аммунар дагъитмиш гъапӀу ва дурарин кӀулин шагьур Равва кьялаъ тӀапӀу. Хъа Давуд Ерусалимдиъ гъузнайи.
2Саб ражну хябяхъган, ахниккан гъудужвну, Давуд чан гъалайин гъваин лицури шулу. Гъваълан дугъаз чан жан жибкӀурайи дишагьли рякъюру. Дишагьли гизаф уччвур вуйи, 3ва Давудди, думу фуж вуш, аьгъю апӀуз гьаънийи. Гьаури кӀуру:
– Думу Батшева, Элиамдин риш ва хеттжви Урияйин хпир, ву.
4Думуган Давудди Батшева хъади гъюз адмийир гьау. Думу дугъахьна хъади гъафнийи, ва Давуд думу дишагьлийихъди дахънийи. (Думу палтарикан хьубхъан гьаци марцц духьну имийи.) Хъасин дишагьли чпин хулаз кьяляхъ хътаркнийи. 5Думу дишагьли гъагъдиъ шулу, ва дугъу Давуддиз пуз гьаънийи:
– Узу гъагъдиъ аза.
6Думуган Давудди Юавдиз амур хътапӀнийи:
– Узухьна хеттжви Урия гьаъ.
Юавди думу Давуддихьна гьаънийи. 7Урия чахьна гъафиган, Давудди Юавдикан, эскрарикан ва дявдин гидишатдикан гьерхбар гъапӀнийи. 8Хъасин Давудди Урияйиз гъапнийи:
– Ичв хулаз гъарах ва рягьятвал гъадабгъ.
Урия паччагьдин гъалайиан удучӀвуру, хъа дугъан кьяляхъди гъаравашди паччагьдин пешкеш хуру. 9Амма Урия чан агъайин вари гъаравашарихъди сатӀиди гъалайиъ учӀврушвахь ахуз дахънийи ва чан хулаз гъушундайи. 10Давуддиз «Урия хулаз гъушундар» гъапиган, дугъу Урияйиз кӀуру:
– Уву рякъюъди дуфнайир дарнахъа? Гьаз хулаз гъушундарва?
11Урияйи Давуддиз кӀуру:
– РАББИЙИН сундух, Израил ва Ягьуда чадрарикк кка, хъа йиз агъа Юав ва йиз агъайин вари адмийир ачухъ хутӀлиъ а. Узхьан ипӀбан, убхъбан ва йиз хпирихъди дахъбан бадали хулаз гъягъюз фици шулухъа? Яв уьмриинди ху апӀурза: узу дициб апӀидарза!
12Думуган Давудди дугъаз кӀуру:
– Гъира гьамушвахь гъуз, хъа закур уву кьяляхъ гьаъдиза.
Урия думу йигъанра ва хъайигъанра Ерусалимдиъ гъузнийи.
13Давуддин теклифниинди дугъу паччагьдихъди ипӀури ва убхъури гъахьну, ва Давудди думу бегьемди пиян апӀуру. Амма хябяхъган, чан агъайин гъаравашарихъди чан ахникк дахъбан бадали, Урия удучӀвуру; амма думу хулаз гъушундайи.
14ГвачӀнинган Давудди Юавдиз кагъаз гъибикӀнийи ва думу Урияйихьди хътапӀнийи. 15Кагъзиъ дибикӀнади гъабхьну: «Наан варитӀан гъизгъин женг шулуш, гьадушвахь Урия деркк ва, думу йикӀбан бадали, дугъхьан кьяляхъ зигай».
16Юавди шагьур кьялаъ апӀиган, дугъу Урия наан, чаз аьгъюбдиинди, шагьур уьбхюрайи гужлидарсдар эскрар хьаш, гьадушвахь дерккру. 17Шагьристнар шагьриан удучӀвиган ва Юавдихъди дявдиъ учӀвиган, Давуддин кьушмиан бязи эскрар женгнаъ йикӀуру; хеттжви Урияра йивну йикӀуру. 18Юавди, Давуддиз дявдикан хъайи-хъайибси хабар дебккбан бадали, 19фу дупну ккундуш, чархачийиз улупуру:
– Уву паччагьдиз дявдикан гьаму хабрар ктитувал ккудубкӀиган, 20паччагьдик хъял кубчӀвуз, ва дугъу увхьан гьерхуз мумкин ву: «Дяви апӀуз учву шагьриз думукьан багахь гьаз гъахьунчва? Цаларилан дурари чӀимрар йивруб учвуз аьгъдайинчвузхъа? 21Авимелех, Ерубаалин бай, шли йивну гъакӀнийи? Цаллан дугъʼинди рягъярин швур ипур дишагьли дайин, ва думу Тевецдиъ гъакӀундайин? Учву цализ дицикьан багахь гьаз гъахьунчва?» Эгер увхьан гьаци гьерхиш, дугъаз йип: «Хъа гьацира яв гъараваш хеттжви Урияра гъакӀну».
22Чархачи рякъюъ учӀву, ва дугъу, хъуркьиган, Юавди гъапиб вари Давуддикна кӀуру. 23Чархачийи Давуддиз гъапнийи:
– Думу адмийир учʼин алархьнийи ва ачухъ хутӀлиз удучӀвнийи, амма учу дурар шагьрин урнарихъна кьяляхъ хъуржнийча. 24ЧӀимрар хьайидари яв гъаравашариз цаллан йивуйи, ва паччагьдин гъаравашарикан бязидар гъакӀнийи. Яв гъараваш Урияра гъакӀну.
25Давудди чархачийиз кӀуру:
– Юавдиз гьамци йип: «Гъит му ляхни уву пашман дарапӀри; тури гагь сариз, гагь тмунуриз йивуру. Шагьриз къаршуди кьувватар уч апӀин ва думу рабгъ». Юавдик рюгь капӀбан бадали, гьаци йип.
26Урияйин хпириз чан жилир йикӀуваликан гъеебхьиган, дугъу жилирихъ ишлар гъапӀнийи. 27Яс уьбхбан вахт улдубчӀвиган, Давудди Батшева чаз хпирди хуз гьаънийи, думу дугъан хпир гъахьнийи, ва Батшевайи паччагьдиз бай гъахнийи. Амма Давудди гъапӀу ляхин РАББИЙИЗ кьабул шлуб дайи.
© Институт перевода Библии, 2010, 2013, 2016, 2018, 2023