Паччагьлугъар-1 26
26
Давудди кьюбпи ражну Саулин уьмур уьбхюру
1Саулихьна Гивайиз Зиф ичӀи чюлин агьалйир гъюру, ва дурари кӀуру:
– Хъа увуз Давуд Ешимо ичӀи чюлин гъирагъдихъ хъайи Хахила тепейиин жин духьнайиваликан аьгъявуз?
2Саул, шубуд агъзур израиларикан ибарат вуйи ужубсиб десте хъади, Давуд агуз Зиф ичӀи чюлиз гъушу. 3Саули Ешимон ичӀи чюлин гъирагъдихъ хъайи Хахила тепейиин, рякъюн багахь бина йивуру. ИчӀи чюлиъ айи Давуддиз учв агуз дина Саул дуфнайивал аьгъю шулу. 4Ахтармиш апӀрудар гьаъну, Саул дугъридан багахь хьайивалиин Давуд инанмиш гъахьи.
5Думуган Давуд Саули бина йивнайи йишвахьна гъафи, ва дугъу Саул учв дахърушв ва дугъан кьушмин аьхюр Авнер, Нердин бай, дахърушв аьгъю гъапӀу. Саулин бинайилан гергми цӀарнаъди дивнайи аьрабйир илтӀикӀнайи, Саулин багахь гургутум дугъан адмийир ерлешмиш духьнайи. 6Давудди хеттжви Ахимелехдиз ва Церуяйин#26:6 Церуя: Давуд паччагьдин багахьлу дишагьли. бай, Юавдин чве Авишайиз гъапи:
– Узухъди бинайиина Саулихьна фуж гъюрчва?
– Узу гъидиза увухъди, – жаваб туву Авишайи.
7Йишвну Давудна Авишай израил кьушмин бинайиз жиниди гъушу, ва дурариз Саул гъидихъу. Саул даахнайи, дугъан кӀулихъ жилиъ жида убччвнайи. Авнер ва эскрар дугъан багахь гургутум дахънайи. 8Авишайи Давуддиз гъапи:
– Гъи Заанури яв душман яв хилариз тувра. Узхьан думу саб йивбиинди жидайихъди жилик карсуз шулзухьан. Кьюбпи йивуб лазим хьибдар!
9Хъа Давудди Авишайиз жаваб туву:
– Ваъ, мукучан дугъак! РАББИЙИ ччим кадатуриина хил за дапӀну, фуж жазайиккан ккудучӀвур? 10РАББИЙИИНДИ ху апӀурза, – давам гъапӀу Давудди, – РАББИЙИ чав думу уьмрихъ мягьрум апӀиди, думу чан аьжлиинди йикӀурушра вая женгнаъ алдакурушра! 11Чав ччим кадатуриина хил за апӀбахьан узу РАББИЙИ уьрхри! Дугъан кӀулихъ хъайи жида ва шид айи гажин гъадагъ, гьамушвхьан гъягъидихьа.
12Давудди Саулин кӀулихъ хъайи жида ва шид айи гажин гъадагъу, ва дурар чпин бинайиз кьяляхъ гъафи. Дурар гъювал саризра гъябкъюндайи, саризра аьгъю гъабхьундайи, фужкӀа нивкӀʼан хъиргундайи: РАББИЙИ варидиин ижми нивкӀ алапӀнийи.
13Давуд гъаншариъ айи ямажнакна кудучӀву, ва, Саулин бинайихьан хайлинси ярхла айи дагъдин кӀакӀниин дийигъну, 14эскрарихьна ва Нердин бай Авнерихьна илтӀикӀури, чӀигъ гъапӀу:
– Авнер! Узуз жаваб тув!
– Уву фуж вува? Паччагь гьаз инжик апӀурава? – гьерху Авнери.
15Давудди Авнериз гъапи:
– Уву гьякьикьи жилижви вува аьхир, ва увуз барабар вуйир израиларин арайиъ адар! Уву паччагь, яв жанаби гьаз уьрхюрадарва? Фуж-вуш яв жанаби йивну йикӀуз бинайиз гъафну! 16Ужуб ляхин апӀурадарва! РАББИЙИИНДИ ху апӀурза, ичв жанаби, РАББИЙИ ччим кадатнайир уьрхюри адрувализ лигну, учву жаза тувбиинди йивну йикӀну ккунду! Паччагьдин кӀулихъ хъади гъахьи жида ва шид айи гажин наан аш, лиг ари!
17Саулиз Давуддин сес аьгъю гъабхьи ва гъапи:
– Давуд, йиз бай, узуз ебхьурайиб яв сес вуйин?
– Ав, паччагь ва йиз жанаби, – жаваб туву Давудди. 18– Фтин кӀуллан йиз жанаби чан лукӀрахъ хъчӀарккура? Узу фу гъапӀну, ва яв улихь узук фу тахсир ка? 19Гъит паччагь ва йиз жанаби чан лукӀрахъ хъебехъри! Эгер уву узуз къаршуди РАББИЙИ гъизмиш гъапӀнуш, гъит Думу гъурбнан ниъру рягьимлу апӀри. Хъа адмийири гъизмиш гъапӀнуш, гъит дурар РАББИЙИН улихь нянайикк ишри: узу утӀурккури, дурари узу Дугъан халкьдин жилилан ултӀуккура ва гьаддиинди узуз кӀура: «Гъарах ва бутариз гъуллугъ апӀин!» 20Узу РАББИЙИХЬАН ярхла йивну йикӀрубси дарибшри! ЧӀуд бисбан бадали, Израилин паччагь дагълариъ гъюдрахъ хюрчазси удучӀвна!
21Саули гъапи:
– Узук тахсир казук. Кьяляхъ гъач, Давуд, йиз бай! Узу увуз писвал апӀидарза, гьаз гъапиш гъи уву йиз уьмур гъюбхюнва. Узу яманди улдугнайза ва ахмакь ляхнар апӀури гъахьунза.
22– Магьа паччагьдин жида, – жаваб туву Давудди, – гъит эскрарикан фуж-вуш гъюри ва думу гъайибхри. 23Ва гъит РАББИЙИ гьарсариз дугъан дугъривализ ва вафалувализ лигну туври; гъи Дугъу уву йиз гьюкмиз тувну, амма узуз РАББИЙИ ччим кадатнайириина хил за апӀуз ккун гъабхьундарзуз. 24Гъи узу яв уьмур гъюбхганси, гъит гьаци РАББИЙИ узу уьрхри ва фунуб-вушра хатӀайикканра ккадаъри!
25Саули Давуддиз гъапи:
– Гъит Заанури уву ужувлакк ккаъри, йиз бай Давуд! Фтихъ хъюгъиш, думу аьхирихъна хъапӀдива ва, фу ккун гъабхьиш, думу чарасуз гъазанмиш апӀидива!
Давудди рякъ давам гъапӀу, хъа Саул хулаз кьяляхъ хътарку.
© Институт перевода Библии, 2010, 2013, 2016, 2018, 2023
Паччагьлугъар-1 26
26
Давудди кьюбпи ражну Саулин уьмур уьбхюру
1Саулихьна Гивайиз Зиф ичӀи чюлин агьалйир гъюру, ва дурари кӀуру:
– Хъа увуз Давуд Ешимо ичӀи чюлин гъирагъдихъ хъайи Хахила тепейиин жин духьнайиваликан аьгъявуз?
2Саул, шубуд агъзур израиларикан ибарат вуйи ужубсиб десте хъади, Давуд агуз Зиф ичӀи чюлиз гъушу. 3Саули Ешимон ичӀи чюлин гъирагъдихъ хъайи Хахила тепейиин, рякъюн багахь бина йивуру. ИчӀи чюлиъ айи Давуддиз учв агуз дина Саул дуфнайивал аьгъю шулу. 4Ахтармиш апӀрудар гьаъну, Саул дугъридан багахь хьайивалиин Давуд инанмиш гъахьи.
5Думуган Давуд Саули бина йивнайи йишвахьна гъафи, ва дугъу Саул учв дахърушв ва дугъан кьушмин аьхюр Авнер, Нердин бай, дахърушв аьгъю гъапӀу. Саулин бинайилан гергми цӀарнаъди дивнайи аьрабйир илтӀикӀнайи, Саулин багахь гургутум дугъан адмийир ерлешмиш духьнайи. 6Давудди хеттжви Ахимелехдиз ва Церуяйин#26:6 Церуя: Давуд паччагьдин багахьлу дишагьли. бай, Юавдин чве Авишайиз гъапи:
– Узухъди бинайиина Саулихьна фуж гъюрчва?
– Узу гъидиза увухъди, – жаваб туву Авишайи.
7Йишвну Давудна Авишай израил кьушмин бинайиз жиниди гъушу, ва дурариз Саул гъидихъу. Саул даахнайи, дугъан кӀулихъ жилиъ жида убччвнайи. Авнер ва эскрар дугъан багахь гургутум дахънайи. 8Авишайи Давуддиз гъапи:
– Гъи Заанури яв душман яв хилариз тувра. Узхьан думу саб йивбиинди жидайихъди жилик карсуз шулзухьан. Кьюбпи йивуб лазим хьибдар!
9Хъа Давудди Авишайиз жаваб туву:
– Ваъ, мукучан дугъак! РАББИЙИ ччим кадатуриина хил за дапӀну, фуж жазайиккан ккудучӀвур? 10РАББИЙИИНДИ ху апӀурза, – давам гъапӀу Давудди, – РАББИЙИ чав думу уьмрихъ мягьрум апӀиди, думу чан аьжлиинди йикӀурушра вая женгнаъ алдакурушра! 11Чав ччим кадатуриина хил за апӀбахьан узу РАББИЙИ уьрхри! Дугъан кӀулихъ хъайи жида ва шид айи гажин гъадагъ, гьамушвхьан гъягъидихьа.
12Давудди Саулин кӀулихъ хъайи жида ва шид айи гажин гъадагъу, ва дурар чпин бинайиз кьяляхъ гъафи. Дурар гъювал саризра гъябкъюндайи, саризра аьгъю гъабхьундайи, фужкӀа нивкӀʼан хъиргундайи: РАББИЙИ варидиин ижми нивкӀ алапӀнийи.
13Давуд гъаншариъ айи ямажнакна кудучӀву, ва, Саулин бинайихьан хайлинси ярхла айи дагъдин кӀакӀниин дийигъну, 14эскрарихьна ва Нердин бай Авнерихьна илтӀикӀури, чӀигъ гъапӀу:
– Авнер! Узуз жаваб тув!
– Уву фуж вува? Паччагь гьаз инжик апӀурава? – гьерху Авнери.
15Давудди Авнериз гъапи:
– Уву гьякьикьи жилижви вува аьхир, ва увуз барабар вуйир израиларин арайиъ адар! Уву паччагь, яв жанаби гьаз уьрхюрадарва? Фуж-вуш яв жанаби йивну йикӀуз бинайиз гъафну! 16Ужуб ляхин апӀурадарва! РАББИЙИИНДИ ху апӀурза, ичв жанаби, РАББИЙИ ччим кадатнайир уьрхюри адрувализ лигну, учву жаза тувбиинди йивну йикӀну ккунду! Паччагьдин кӀулихъ хъади гъахьи жида ва шид айи гажин наан аш, лиг ари!
17Саулиз Давуддин сес аьгъю гъабхьи ва гъапи:
– Давуд, йиз бай, узуз ебхьурайиб яв сес вуйин?
– Ав, паччагь ва йиз жанаби, – жаваб туву Давудди. 18– Фтин кӀуллан йиз жанаби чан лукӀрахъ хъчӀарккура? Узу фу гъапӀну, ва яв улихь узук фу тахсир ка? 19Гъит паччагь ва йиз жанаби чан лукӀрахъ хъебехъри! Эгер уву узуз къаршуди РАББИЙИ гъизмиш гъапӀнуш, гъит Думу гъурбнан ниъру рягьимлу апӀри. Хъа адмийири гъизмиш гъапӀнуш, гъит дурар РАББИЙИН улихь нянайикк ишри: узу утӀурккури, дурари узу Дугъан халкьдин жилилан ултӀуккура ва гьаддиинди узуз кӀура: «Гъарах ва бутариз гъуллугъ апӀин!» 20Узу РАББИЙИХЬАН ярхла йивну йикӀрубси дарибшри! ЧӀуд бисбан бадали, Израилин паччагь дагълариъ гъюдрахъ хюрчазси удучӀвна!
21Саули гъапи:
– Узук тахсир казук. Кьяляхъ гъач, Давуд, йиз бай! Узу увуз писвал апӀидарза, гьаз гъапиш гъи уву йиз уьмур гъюбхюнва. Узу яманди улдугнайза ва ахмакь ляхнар апӀури гъахьунза.
22– Магьа паччагьдин жида, – жаваб туву Давудди, – гъит эскрарикан фуж-вуш гъюри ва думу гъайибхри. 23Ва гъит РАББИЙИ гьарсариз дугъан дугъривализ ва вафалувализ лигну туври; гъи Дугъу уву йиз гьюкмиз тувну, амма узуз РАББИЙИ ччим кадатнайириина хил за апӀуз ккун гъабхьундарзуз. 24Гъи узу яв уьмур гъюбхганси, гъит гьаци РАББИЙИ узу уьрхри ва фунуб-вушра хатӀайикканра ккадаъри!
25Саули Давуддиз гъапи:
– Гъит Заанури уву ужувлакк ккаъри, йиз бай Давуд! Фтихъ хъюгъиш, думу аьхирихъна хъапӀдива ва, фу ккун гъабхьиш, думу чарасуз гъазанмиш апӀидива!
Давудди рякъ давам гъапӀу, хъа Саул хулаз кьяляхъ хътарку.
© Институт перевода Библии, 2010, 2013, 2016, 2018, 2023