Паччагьлугъар-1 19
19
Саул Давуддин кьяляхъ хъахъру
1Саули чан бай Юнатандихъди ва багахь везирарихъди, Давуд фици йивну йикӀуруш, гьял апӀури шулу. Хъа Юнатандиз, Саулин бализ, Давуд гизаф ккунди гъахьну, 2ва дугъу думу хабардар апӀуру:
– Йиз адаш Саулиз уву йивну йикӀуз ккунда. Гьаддиз закур гвачӀнинган ихтият йихь, халват йишв абг ва душвахь гьитӀикӀ. 3Хъа узу хутӀлиз, уву жин духьнайишвахьна, удучӀвидиза ва адашдин багахь дийигъидиза ва яв гьякьнаан адашдихъди гафар апӀидиза. Эгер узуз фукӀа аьгъю гъабхьиш, увуз аьгъю шлубси апӀидиза.
4Юнатанди Саулихъди, чан адашдихъди, думу Давуддин хайирназ илтӀикӀуз чалишмиш шули, гаф-чӀал ккебгъу. Дугъу гъапи:
– Гъит паччагьди чан лукӀ Давуддиз писвал дарапӀри, дугъу увуз саб жюрейинра писвал гъапӀундар аьхир, хъа дугъу апӀруб вари яв хайирназ ву. 5Чан уьмур хатӀайикк ккипну, дугъу филистим йивну гъакӀну, ва РАББИЙИ Израилиз аьхю гъалибвал пешкеш гъапӀну. Увуз гьаму гъябкъюнвуз ва шад гъахьнийва. Тахсир ктру ифи удубзури ва саб себебра адарди Давуд йивну йикӀну, писвал дапӀну гьаз вуяв?
6Саул Юнатандин гафарихъ хъпехъу, ва дугъу ху гъапӀу:
– РАББИЙИИНДИ ху апӀураза, думу жазайиинди йивну йикӀидар.
7Давуддиз дих дапӀну, Юнатанди гьаму вари дугъаз ктибту. Хъасин Юнатанди Давуд Саулихьна хъади гъафи, ва думу мугагьназси паччагьдиз гъуллугъ апӀуз хъюгъю.
8Хъана дяви ккебгъу. Давуд филистимариз къаршуди удучӀву, ва дугъу дурариина зурба магълубвал гъабхи, дурар кьяляхъ гьергу.
9Саулиин РАББИЙИН амриинди пис жин хъана алабхъу. Паччагь, хлиъ жида ади, хулаъ деънайи, хъа Давудди, мукьмар йивури, думу сикин апӀурайи. 10Саулиз жидайихъди Давуд цалик карсуз ккун гъабхьнийи, амма Давуд ккутӀурчӀвнийи, гьаддиз жида цалиъ абснийи. Давуд гьергнийи ва гьадму йишван къутармиш гъахьнийи.
11Саули Давуддин хуларихьна дугъаз ккеуз ва гвачӀниндиз думу йивну йикӀуз адмийир гьаънийи. Хъа Михали, Давуддин хпири, дугъаз гъапнийи:
– Эгер ахъли уву жин дархьиш, закур гвачӀнинган уву йивну йикӀиди.
12Михали Давуддиз унчӀвʼан удучӀвуз кюмек гъапӀу, ва думу гьергну гъушу ва къутармиш гъахьи. 13Хъа Михали хулан бут гъадабгъу ва думу ахьникк киву, кӀулихъ цӀигьран чӀарар диву ва бут леъфихъди элебку. 14Ва Саули Давуд дисуз адмийир гьаиган, дугъу гъапи:
– Думу иццура.
15Думуган Саули, гьамциб буйругъ тувну, Давуддиин улукьуз адмийир гьау:
– Думу узухьна аьхникк ккимиди аькъинай, ва узу думу йивну йикӀидиза.
16Хъа гьаънайидар гъафиган, дурариз аьхникк анжагъ хулан бут, хъа кӀулихъ цӀигьран чӀарар гъидихъу.
17Саули Михализ гъапи:
– Уву узуз кучӀлар гьаз гъапӀунва ва йиз душман, дугъаз гьергуз мумкинвал тувну, гьаз деетунва?
Михали Саулиз жаваб туву:
– Дугъу узуз гъапнийи: «Узу деет, дарш узу уву йивну йикӀидиза!»
18Хъа Давуд, гьергувалиинди къутармиш духьну, Шамуилихьна Рамайиз гъюру, ва дугъу, Саул чахьна фици янашмиш шули гъахьнуш, ктибтуру. Шамуилна думу Рамайин Нают мягьялиз гъягъюру ва душваъ яшамиш хьуз хъюгъру. 19Саулихьна хабар хуру: «Давуд Наютдиъ, Рамайиъ а». 20Саули Давуд дисуз адмийир гьаъру. Гъафиган, дурариз пайгъамбарвалин ицлиъ айи пайгъамбрарин мажлис гъябкъю. Дурарин кӀули Шамуил айи. Саулин адмийириин Заанурин Рюгь алабхъу, ва дурарира пайгъамбарвал апӀуз хъюгъю. 21Дидин гьякьнаан Саулиз гъапи, ва дугъу жара адмийир гьау, ва дурарира пайгъамбарвал апӀуз хъюгъю. Саули шубубпи ражну адмийир гьау, амма дурарихъдира гьациб ляхин гъабхьи. 22Думуган думу учв Рамайиз гъушу. Секуйиъ айи шид уьбхру аьхю гъуйдихъна хъуркьиган, дугъу гьерху:
– Шамуил ва Давуд наан а?
Шли-вуш дугъаз жаваб туву:
– Наютдиъ, Рамайиъ.
23Думу Наютдиз, Рамайиз рякъюъ учӀву, ва дугъʼиннара Заанурин рюгь алабхъу. Наютдиз, Рамайиз гъяйизкьан вари рякъди думу пайгъамбарвалин ицлиъ ахъну гъахьи. 24Душваъ дугъу палтар илдитну дирчу ва Шамуилин улихь алдакайизкьан пайгъамбарвал гъапӀу. Думу гъяцӀалди вари йигъ ва вари йишв дахъу. Ари гьаддиз кӀури шулу: «Яраб Саулра пайгъамбар гъахьнийкӀан?»
© Институт перевода Библии, 2010, 2013, 2016, 2018, 2023