Attus 16
16
Pol wiyha Timotyu atak gihapti
1Ayteke igkis danuh avitit paytwempu Derbi, avitit paytwempu Listra. Ayge pahavwi awayg Jesus gihiyega kewye Timotyu ig kavinene ayge. Ig Timotyu ginag eg judeyano. Eg hawata Jesus gihiyega. Igme Timotyu gig ig gresiyene. Ig ka judeyenema.
2Madikte ukebyuvwiy ayge Listra ayge Ikôniyu, igkis kabayha Timotyu.
3Ig Pol hiyapni hene, ig wiyhekere Timotyu atak gihapti. Heneme madikte judeyenevwi ayge igkis hiyakni ku Timotyu gig ig ka judeyenema. Nikwe igkis hiyakni ku ig ka hiwhkis gikamkayh givit. Ayge nikwe ig Pol awna git:
— Timotyu, nah muwaka pis atak nuhapti, heneme amawka pis hiwhkisnete pivit kahadbe igkis hiyeg judeyenevwi kiyathap igkis ataybiswa arit piwn.
— Ka sam nikwe, ig kaytwa.
Ayge nikwe ig Pol hiwhkise Timotyu givit.
4Ayteke pisenwa, igkis Polkis tivikwiyes. Ku kit paytwempu igkis danuh, igkis ekkenes gitkis madikte Jesus gihiyegavu ayge amin ku samah Kiyavwiye Jesus giwatnivwi gikakkis Jesus gihiyegavu giwewkistenkis igkis ahegbete ginetnikis aynte Jerusalém adahan hiyeg ku pariye kane judeyenevwima ka muwaka ihpa hiyeg ku pariye judeyenevwi gikumadukankis.
5 Ayteke igkis ikenes gihiyekemnikis adahan ignes ihpa inakni giwnkis. Neras Jesus gihiyegavu ayge igkis timapni hene, igkis awayghaw igkis ka aynsima kamaxwate givitit Kiyavwiye Jesus akiw. Ayteke nikwe mpuse hewkevye igkis kibihwevye.
Uhokri Gitip huwitha Polkis
6Igkisme Pol tivik danuhpenes muwapuw avitiw Firijiyamnaw avitiw Galasiyamnaw. Metakwa igkis danuh atere Asiyamnaw. Heneme Kiyavwiye Uhokri Gitip ka isaksigkis adahan igkis akki Kiyavwiye Uhokri giwn atere.
7 Igkis hiyapni hene, igkis tivik, igkis danuh avitit Misiyamnaw. Aytontak igkis givewkankis igkis tivik avitit Bitiniyamnaw heneme Jesus Gitip ka isaksigkis adahan igkis atere.
8Ayteke nikwe igkis mpiye avitiw Misiyamnaw. Igkis danuh avitit paytwempu Trôadi. Ayge igkis patiptak nukakuh nah Luwcas.
9Avim ini tiyegem ig Pol hiyap pahavwi awayg giwtyakveynen. Ig awayg masedôniyene. Ig tabirnene ayge, ig awna git Pol:
— Ba ayta atan avitit Masedôniyamnaw. Uya amnih usuh.
10Ig Pol hiyapni hene, aynewa usuh ahegbetew adahan usuh tivikwiye avitit Masedôniyamnaw. Usuh hiyakni ku Kiyavwiye Uhokri inyewa ig muwaka usuh akki ginetni gitkis hiyeg ayge.
Lidiya wages guhiyekemni
11Ayteke nikwe usuh tarekwe ayteke Trôadi. Usuh manuke parahwokwa wadit tahan avitit kewgihri Samotrasiyamnaw. Hewke akiw usuh danuh atere avit paytwempu Neapolis.
12Ayteke usuh tivik avitit paytwempu Filivus. Ini paha paytwempu nopsadnene ayge Masedôniyamnaw. Ka aynsima hiyeg romanyenevwi misakwa ayge. Usuh danuh atere, usuh mpiyase kibite hawkri ayge.
13Samdi abet usuh pes avititak ini paytwempu tahan akigbimnat warik, mmanawa usuh uvewkan ku kadahan hiyeg judeyenevwi pahadguhwa ayge adahan piriyepkawka. Usuh danuh atere, usuh batahkiswe. Ayge usuh kinetihwene gukakkis tinogben ku pariye pahadguvu ayge.
14Usuh ute pahavu tino ayge guw Lidiya. Eg tiyatirayano. Eg gannivwi adahan piyukno kamis wagageboye kibeynewa. Eg kiyatha Kiyavwiye Uhokri. Eg ayge eg timapno wownuh. Avim ini ig Kiyavwiye Uhokri woke guhiyekemni adahan eg pukuhpa Pol giwn. Eg wagese guhiyekemni.
15Ayteke nikwe eg kewvi ahakwat un payak akak gumunyavu. Eg kewvi, eg awnase usuh guvinwat. Eg awna:
— Ku yis ikanuh ku nah inyewa kamaxwa givitit Kiyavwiye Jesus, ba yi ayta misakwa numunuh adahan yis nukannuhten.
Usuh timapni hene ku samah eg kiniste usuh akak inakni iwit usuh ihe guwn.
Pol pekkis wavitye guvititak pahavu ihamru hiyavwano
16Pahay hawkri akiw usuh atere arit ini iwetrit adahan usuh piriyepkewne. Ayge avigku ahin usuh patiptak gukak pahavu himano bukitwiyo. Eg ihamru hiyavwano. Wavitye ay guvit ku pariye akki gut ku pariye nehmnikuhpiye. Gukivaravu dax ka aynsima karukri awaku ku samah eg akki gitkis hiyeg ku pariye nehmnikuhpiye gitkis, ignesme katiwnih gukivaravu.
17Eg himano kavusa makekehwe uhavuh butte. Eg awni akak guhawna. Guwn:
— Nerasbaki awaykemni igkis Kiyavwiye Uhokri inurikyene gihiyegavu. Igkis ekkenes wotwiy pahatra ahin adahan wixwiy danuhne git Kiyavwiye Uhokri.
18Mpuse hawkri eg kehno hene adahan kibite hawkri. Ig Pol hiyapni hene, ig ka batek. Ayge nikwe ig wagestaw ig awna git ner wavitye ku pariye aynene guvit. Giwn:
— Nah awna pit giwavrik Kiyavwiye Jesus. Asa pes ayteke guvititak nor tino.
Aynewa ig wavitye pese guvititak.
19Igkisme gukivaravu hiyapni hene, igkis awna:
— Kuri wis ka dax karukri akiw.
Ayteke nikwe igkis kamaxe Pol gikak Sílas. Igkis kehpigkis waxwevgikis tahan gimkanitkis hiyaptigivyene amadgat higiw.
20Igkis danuh atere, igkis iwevgikis givetunatkis hiyaptigivyene romanyenevwi. Igkis awna gitkis:
— Neras hiyeg igkis judeyenevwi. Takunipti igkis sigimwihne madikte paytwempuyenevwi ay.
21Igkis kannuhnes hiyeg adahan igkis wew akak mbeyevye hiyakemniki ku pariye ukivarawiy ka muwaka wixwiy wew nikak. Wixwiy hiyeg ku pariye romanyenevwi ka hiya wixwiyma amavin, ka hiya wixwiyma wew nikak.
Pol gikak Sílas sarayhpika arikut parakseket
22Madikte hiyeg ayge timapni hene, igkis awna:
— Uyay pisenwa gihawkankis.
Igkis kuruwkehe gitivutkis. Ayteke nikwe neras hiyaptigi wiwhkise gisimsakis. Igkis biptasevgikis akak ah.
23Igkisme gisuwtatavukis biptevgikis ka aynsima he igkis migatpite. Pisenwa gibiwhkakkis igkis sarayhpigkis arikut parakseket. Ayteke nikwe neras hiyaptigiviyene awna git ner avuriwkevutne parakseket. Igkis awna:
— Avuriwnigkis kabayntiwa.
24Ig ner avuriwkevutne parakseket timapni hene, ig iwevgikis, ig paraksevgikis arikut pakwa ayaknisep parakseket. Ayteke ig deheke gikugkukis arikut ah turuhka. Pisenwa ig tivik.
25Ayteke pakwa tiyegem ig Pol gikak Sílas igkis ayge piriyepkewnes. Igkis peknes avat adahan kibeyhenes Kiyavwiye Uhokri. Igkisme nawenyevwi kamaxkarempu igkis ayge timepnes gavankis.
26Pahaye adahan wayk segke akak ahawna. In keh parakseket segke pahatte. Avim ini madikte alapota wokhew. Madikte xen matisbet, in tuguhe givititakis neras kamaxkarempu.
Avuriwkevutne parakseket wages gihiyekemni
27Ig ner avuriwkevutne parakseket timapni hene, ig wadise. Ig hiyap parakseket alapota wok. Ig hiyapni hene, ig awna:
— Wo! Madikte neras kamaxkarempu bisike kuwis. Kuri nukivara umahkiswen givatrakis.
Ayteke nikwe ig wiwhe giwana adahan ig umehwevye pisenwate.
28Igme Pol hiyapni hene, ig kabiman git. Giwn:
— Ka ba umahwa. Iveg ayta. Madikte usuh ayvekuye ay.
29Igme ner avuriwkevutne parakseket ig timapni hene, ig uguhkiswa git gihiyega. Ig parak atere kibehtenwa. Ig danuh atere git Pol gikak Sílas. Ig segege gimin ig paberetusaw gitivutkis.
30Ayteke ig iwevgikis arikutak ini parakseket. Ig awna gitkis:
— Kiyavwiyegben, pariyeki nah keh kuri adahan nah isahptaw?
31Igkisme kaytwa giwn:
— Kamaxwa givitit Kiyavwiye Jesus. Inneki keh pis isahptaw payak gikakkis neras pivinekuya.
32Ayteke igkis ekkenes Kiyavwiye Uhokri giwn git payak gikakkis madikte givinekuya ayge.
33Nikwenewa tiyegem ner avuriwkevutne parakseket ig iwevgikis ig hiyak gikakkis, ig sukuhete gibuskanakis. Pisenwa ig kewvi ahakwat un nikwenewa tiyegem madikte akak givinekuya.
34Ayteke ig parakse Pol gikak Sílas givinekut. Ig ike gimanakis. Ayge ig gikakkis givinekuya igkis bateke giminkis ku samah igkis kamaxwa givitit Kiyavwiye Uhokri.
Pol gikak silas isahkiska
35Hewke akiw neras hiyaptigiviyene awahkise sandagma gimin ner avuriwkevutne parakseket. Igkisme danuh atere, igkis awna git:
— Isahkise neras awaykemni adahan igkis tivik.
36Igme ner avuriwkevutne parakseket awna git Pol:
— Igkis hiyaptigiviyene wasavanew adahan yis isahkiswika. Kuri hiyawa yis tivik mownye.
37Igme Pol awna gitkis neras sandagma. Giwn:
— Igkis hiyaptigiviyene ka keh wadit ukakuh. Igkis biptase usuh giwtrikkis hiyeg yuma arik kavatra. Igkis sarayhe usuh arikut parakseket. Usuh hiyeg judeyenevwi heneme usuh hawata hiyeg romanyenevwi. Ka hiya igkisma keh hene ukakuh usuh hiyeg ku pariye romanyenevwi. Kuri hiyaksa igkis muwaka pekkis usuh mownye. Kawa. Ka hiya igkisma. Wani igkiswa ayta isahkis usuh. Wake usuh tivikbe mownye, nikwekam madikte hiyeg ikiykam ku usuh bisike awaku usuh inyewa kakehniye.
38Neras sandagma timapni hene, igkis tivik gitkis gikivarakis hiyaptigiviyene. Igkis danuh atere, igkis awna inakni gitkis. Igkisme timapni hene ku Pol gikak Sílas ku igkis hiyeg romanyenevwi igkis avisasew.
39Ayteke nikwe igkis atere gitkis Pol gikak Sílas. Igkis danuh atere, igkis awna gitkis:
— Bayahminanay usuh. Hiyawa yis pese aytaki arikutak parakseket. Peswinay paytwemputak hawata.
40Igme Pol gikak Sílas igkis pekkiswika arikutak parakseket, igkis wadite atere guvinwat kiyavuno Lidiya. Igkis danuh atere, igkis ute gikebyuvwikis Jesus gihiyegavu aygnenevwi. Igkis hiyapni hene, igkis kinetihwa gikakkis ayge igkis ikenes gawaygikis. Ayteke pisenwa igkis tivik.
© 2018, Wycliffe Bible Translators, Inc. All rights reserved.
Attus 16
16
Pol wiyha Timotyu atak gihapti
1Ayteke igkis danuh avitit paytwempu Derbi, avitit paytwempu Listra. Ayge pahavwi awayg Jesus gihiyega kewye Timotyu ig kavinene ayge. Ig Timotyu ginag eg judeyano. Eg hawata Jesus gihiyega. Igme Timotyu gig ig gresiyene. Ig ka judeyenema.
2Madikte ukebyuvwiy ayge Listra ayge Ikôniyu, igkis kabayha Timotyu.
3Ig Pol hiyapni hene, ig wiyhekere Timotyu atak gihapti. Heneme madikte judeyenevwi ayge igkis hiyakni ku Timotyu gig ig ka judeyenema. Nikwe igkis hiyakni ku ig ka hiwhkis gikamkayh givit. Ayge nikwe ig Pol awna git:
— Timotyu, nah muwaka pis atak nuhapti, heneme amawka pis hiwhkisnete pivit kahadbe igkis hiyeg judeyenevwi kiyathap igkis ataybiswa arit piwn.
— Ka sam nikwe, ig kaytwa.
Ayge nikwe ig Pol hiwhkise Timotyu givit.
4Ayteke pisenwa, igkis Polkis tivikwiyes. Ku kit paytwempu igkis danuh, igkis ekkenes gitkis madikte Jesus gihiyegavu ayge amin ku samah Kiyavwiye Jesus giwatnivwi gikakkis Jesus gihiyegavu giwewkistenkis igkis ahegbete ginetnikis aynte Jerusalém adahan hiyeg ku pariye kane judeyenevwima ka muwaka ihpa hiyeg ku pariye judeyenevwi gikumadukankis.
5 Ayteke igkis ikenes gihiyekemnikis adahan ignes ihpa inakni giwnkis. Neras Jesus gihiyegavu ayge igkis timapni hene, igkis awayghaw igkis ka aynsima kamaxwate givitit Kiyavwiye Jesus akiw. Ayteke nikwe mpuse hewkevye igkis kibihwevye.
Uhokri Gitip huwitha Polkis
6Igkisme Pol tivik danuhpenes muwapuw avitiw Firijiyamnaw avitiw Galasiyamnaw. Metakwa igkis danuh atere Asiyamnaw. Heneme Kiyavwiye Uhokri Gitip ka isaksigkis adahan igkis akki Kiyavwiye Uhokri giwn atere.
7 Igkis hiyapni hene, igkis tivik, igkis danuh avitit Misiyamnaw. Aytontak igkis givewkankis igkis tivik avitit Bitiniyamnaw heneme Jesus Gitip ka isaksigkis adahan igkis atere.
8Ayteke nikwe igkis mpiye avitiw Misiyamnaw. Igkis danuh avitit paytwempu Trôadi. Ayge igkis patiptak nukakuh nah Luwcas.
9Avim ini tiyegem ig Pol hiyap pahavwi awayg giwtyakveynen. Ig awayg masedôniyene. Ig tabirnene ayge, ig awna git Pol:
— Ba ayta atan avitit Masedôniyamnaw. Uya amnih usuh.
10Ig Pol hiyapni hene, aynewa usuh ahegbetew adahan usuh tivikwiye avitit Masedôniyamnaw. Usuh hiyakni ku Kiyavwiye Uhokri inyewa ig muwaka usuh akki ginetni gitkis hiyeg ayge.
Lidiya wages guhiyekemni
11Ayteke nikwe usuh tarekwe ayteke Trôadi. Usuh manuke parahwokwa wadit tahan avitit kewgihri Samotrasiyamnaw. Hewke akiw usuh danuh atere avit paytwempu Neapolis.
12Ayteke usuh tivik avitit paytwempu Filivus. Ini paha paytwempu nopsadnene ayge Masedôniyamnaw. Ka aynsima hiyeg romanyenevwi misakwa ayge. Usuh danuh atere, usuh mpiyase kibite hawkri ayge.
13Samdi abet usuh pes avititak ini paytwempu tahan akigbimnat warik, mmanawa usuh uvewkan ku kadahan hiyeg judeyenevwi pahadguhwa ayge adahan piriyepkawka. Usuh danuh atere, usuh batahkiswe. Ayge usuh kinetihwene gukakkis tinogben ku pariye pahadguvu ayge.
14Usuh ute pahavu tino ayge guw Lidiya. Eg tiyatirayano. Eg gannivwi adahan piyukno kamis wagageboye kibeynewa. Eg kiyatha Kiyavwiye Uhokri. Eg ayge eg timapno wownuh. Avim ini ig Kiyavwiye Uhokri woke guhiyekemni adahan eg pukuhpa Pol giwn. Eg wagese guhiyekemni.
15Ayteke nikwe eg kewvi ahakwat un payak akak gumunyavu. Eg kewvi, eg awnase usuh guvinwat. Eg awna:
— Ku yis ikanuh ku nah inyewa kamaxwa givitit Kiyavwiye Jesus, ba yi ayta misakwa numunuh adahan yis nukannuhten.
Usuh timapni hene ku samah eg kiniste usuh akak inakni iwit usuh ihe guwn.
Pol pekkis wavitye guvititak pahavu ihamru hiyavwano
16Pahay hawkri akiw usuh atere arit ini iwetrit adahan usuh piriyepkewne. Ayge avigku ahin usuh patiptak gukak pahavu himano bukitwiyo. Eg ihamru hiyavwano. Wavitye ay guvit ku pariye akki gut ku pariye nehmnikuhpiye. Gukivaravu dax ka aynsima karukri awaku ku samah eg akki gitkis hiyeg ku pariye nehmnikuhpiye gitkis, ignesme katiwnih gukivaravu.
17Eg himano kavusa makekehwe uhavuh butte. Eg awni akak guhawna. Guwn:
— Nerasbaki awaykemni igkis Kiyavwiye Uhokri inurikyene gihiyegavu. Igkis ekkenes wotwiy pahatra ahin adahan wixwiy danuhne git Kiyavwiye Uhokri.
18Mpuse hawkri eg kehno hene adahan kibite hawkri. Ig Pol hiyapni hene, ig ka batek. Ayge nikwe ig wagestaw ig awna git ner wavitye ku pariye aynene guvit. Giwn:
— Nah awna pit giwavrik Kiyavwiye Jesus. Asa pes ayteke guvititak nor tino.
Aynewa ig wavitye pese guvititak.
19Igkisme gukivaravu hiyapni hene, igkis awna:
— Kuri wis ka dax karukri akiw.
Ayteke nikwe igkis kamaxe Pol gikak Sílas. Igkis kehpigkis waxwevgikis tahan gimkanitkis hiyaptigivyene amadgat higiw.
20Igkis danuh atere, igkis iwevgikis givetunatkis hiyaptigivyene romanyenevwi. Igkis awna gitkis:
— Neras hiyeg igkis judeyenevwi. Takunipti igkis sigimwihne madikte paytwempuyenevwi ay.
21Igkis kannuhnes hiyeg adahan igkis wew akak mbeyevye hiyakemniki ku pariye ukivarawiy ka muwaka wixwiy wew nikak. Wixwiy hiyeg ku pariye romanyenevwi ka hiya wixwiyma amavin, ka hiya wixwiyma wew nikak.
Pol gikak Sílas sarayhpika arikut parakseket
22Madikte hiyeg ayge timapni hene, igkis awna:
— Uyay pisenwa gihawkankis.
Igkis kuruwkehe gitivutkis. Ayteke nikwe neras hiyaptigi wiwhkise gisimsakis. Igkis biptasevgikis akak ah.
23Igkisme gisuwtatavukis biptevgikis ka aynsima he igkis migatpite. Pisenwa gibiwhkakkis igkis sarayhpigkis arikut parakseket. Ayteke nikwe neras hiyaptigiviyene awna git ner avuriwkevutne parakseket. Igkis awna:
— Avuriwnigkis kabayntiwa.
24Ig ner avuriwkevutne parakseket timapni hene, ig iwevgikis, ig paraksevgikis arikut pakwa ayaknisep parakseket. Ayteke ig deheke gikugkukis arikut ah turuhka. Pisenwa ig tivik.
25Ayteke pakwa tiyegem ig Pol gikak Sílas igkis ayge piriyepkewnes. Igkis peknes avat adahan kibeyhenes Kiyavwiye Uhokri. Igkisme nawenyevwi kamaxkarempu igkis ayge timepnes gavankis.
26Pahaye adahan wayk segke akak ahawna. In keh parakseket segke pahatte. Avim ini madikte alapota wokhew. Madikte xen matisbet, in tuguhe givititakis neras kamaxkarempu.
Avuriwkevutne parakseket wages gihiyekemni
27Ig ner avuriwkevutne parakseket timapni hene, ig wadise. Ig hiyap parakseket alapota wok. Ig hiyapni hene, ig awna:
— Wo! Madikte neras kamaxkarempu bisike kuwis. Kuri nukivara umahkiswen givatrakis.
Ayteke nikwe ig wiwhe giwana adahan ig umehwevye pisenwate.
28Igme Pol hiyapni hene, ig kabiman git. Giwn:
— Ka ba umahwa. Iveg ayta. Madikte usuh ayvekuye ay.
29Igme ner avuriwkevutne parakseket ig timapni hene, ig uguhkiswa git gihiyega. Ig parak atere kibehtenwa. Ig danuh atere git Pol gikak Sílas. Ig segege gimin ig paberetusaw gitivutkis.
30Ayteke ig iwevgikis arikutak ini parakseket. Ig awna gitkis:
— Kiyavwiyegben, pariyeki nah keh kuri adahan nah isahptaw?
31Igkisme kaytwa giwn:
— Kamaxwa givitit Kiyavwiye Jesus. Inneki keh pis isahptaw payak gikakkis neras pivinekuya.
32Ayteke igkis ekkenes Kiyavwiye Uhokri giwn git payak gikakkis madikte givinekuya ayge.
33Nikwenewa tiyegem ner avuriwkevutne parakseket ig iwevgikis ig hiyak gikakkis, ig sukuhete gibuskanakis. Pisenwa ig kewvi ahakwat un nikwenewa tiyegem madikte akak givinekuya.
34Ayteke ig parakse Pol gikak Sílas givinekut. Ig ike gimanakis. Ayge ig gikakkis givinekuya igkis bateke giminkis ku samah igkis kamaxwa givitit Kiyavwiye Uhokri.
Pol gikak silas isahkiska
35Hewke akiw neras hiyaptigiviyene awahkise sandagma gimin ner avuriwkevutne parakseket. Igkisme danuh atere, igkis awna git:
— Isahkise neras awaykemni adahan igkis tivik.
36Igme ner avuriwkevutne parakseket awna git Pol:
— Igkis hiyaptigiviyene wasavanew adahan yis isahkiswika. Kuri hiyawa yis tivik mownye.
37Igme Pol awna gitkis neras sandagma. Giwn:
— Igkis hiyaptigiviyene ka keh wadit ukakuh. Igkis biptase usuh giwtrikkis hiyeg yuma arik kavatra. Igkis sarayhe usuh arikut parakseket. Usuh hiyeg judeyenevwi heneme usuh hawata hiyeg romanyenevwi. Ka hiya igkisma keh hene ukakuh usuh hiyeg ku pariye romanyenevwi. Kuri hiyaksa igkis muwaka pekkis usuh mownye. Kawa. Ka hiya igkisma. Wani igkiswa ayta isahkis usuh. Wake usuh tivikbe mownye, nikwekam madikte hiyeg ikiykam ku usuh bisike awaku usuh inyewa kakehniye.
38Neras sandagma timapni hene, igkis tivik gitkis gikivarakis hiyaptigiviyene. Igkis danuh atere, igkis awna inakni gitkis. Igkisme timapni hene ku Pol gikak Sílas ku igkis hiyeg romanyenevwi igkis avisasew.
39Ayteke nikwe igkis atere gitkis Pol gikak Sílas. Igkis danuh atere, igkis awna gitkis:
— Bayahminanay usuh. Hiyawa yis pese aytaki arikutak parakseket. Peswinay paytwemputak hawata.
40Igme Pol gikak Sílas igkis pekkiswika arikutak parakseket, igkis wadite atere guvinwat kiyavuno Lidiya. Igkis danuh atere, igkis ute gikebyuvwikis Jesus gihiyegavu aygnenevwi. Igkis hiyapni hene, igkis kinetihwa gikakkis ayge igkis ikenes gawaygikis. Ayteke pisenwa igkis tivik.
© 2018, Wycliffe Bible Translators, Inc. All rights reserved.