Yela 56
56
Korowii yaradae wesoŋa
Kooro Devid yel
1N Naa Korowii, na n sum,
n dɔma dɛ ti mɛ sibeɡra ne
tɔpere bɛlbwa, dɛ́ yoo mɛ.#1Sa 21:12
2Tɔpere bɛlbwaa
ba teŋɛ dɛɛ ɡaaɡe n bɔr,
ba warɔ kohona dɛɛ yoo
mɛ.
3Nemenɛ Korowii,
ɔmee laɡ mɛ naa,
mɛɛ kpɔ n tenee dawɛ he
nɛ.#Yel 118:6
4Hen Korowii nɛɛ n kpɔ
n te dawɛ, maa ɔmɛ,
henee mɛɛ ba kpɛɛra,
he nyoa haa baɡ mɛ la wa.
Bɔkwaa nɛwɛnyini
waa won sewa ɛɛ ba
wona ɛɛ mɛ nɔ?
5N dɔma nyin waa
dɛɛ dawɛ n nɛɛ tɔpere
bɛlbwa,
saŋ bɛlbwaa baa vɔrɔwe
n vɔrɔwa dɛ́ kpo mɛ.
6Ba pɛ nyoa ka sɔh,
dɛɛ nyiŋi wobɛlbwa
maa dɛ ɛ,
ba siwi beɡre n kpoe wa.
7N Naa Korowii,
tɛr ba deŋne ba wechɔɡa
wa, yoo ba,
dɛ́ pɔ ba nɛɛ he
bandia ne.
8He na ɡɛ n bwara aa dɛ nyɛɡ,
he ɡbabir jemɛ n suna
maa dɛ di.
A toole he tɔn bini ɡɛ naa?#Kaa 32:32-33; Yel 69:28; 139:16; Mal 3:16
9Awola maa wi yerɛ la,
n dɔma ɛɛ berɛ habɔɔ,
waa maa jema laanee
kɛŋɔ hen Korowii ja n nɛ.
10Hen Korowiirii mɛɛ kpɛɛ,
he waa laanee mɛɛ duu.
11He nɛɛ n kpɔ n te dawɛ,
maa wola ɔmɛ,
bɔkwaa nɛwɛnyini waa
won sewa ɛɛ ba
wona ɛɛ mɛ nɔ?#Rom 8:31
12N Naa Korowii,
henee n baɡɛ nyoa,
mɛɛ kpɔ n jam kwaa ba
tɛɛ.
13He lɛɛ mɛ le seo ta,
he ta ɡelɛ n dɔma pɔ n nɛ.
Anomanta, mɛɛ wono
dɛɛ valɛ he sie,
he nii waa dɛ chaah
dɛɛ tɛ nɛra mkpa la bini.
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.