Саалтыр 63
63
1Хуор салайааччытыгар. Давид псалома.
2Айыы Таҥара, иһит мин муҥатыйар саҥабын,
суостаах өстөөхтөн өрүһүй дууһабын.
3Саһыар оҕуруктаахтар куомуннарыттан,
хара дьайдаахтар өрө турууларыттан,
4тылларын кылыстыы сытыыланааччылартан,
сүлүһүннээх тыл оҕунан кыҥааччылартан.
5Буруйа суох киһини ытаары тоһуурга сыталлар,
туохтан да куттаммакка соһуччу ыталлар.
6Хара дьайдаахтык быһыыланарга бигэтик туруммуттар;
биллибэтинэн угаайы оҥорордуу киксэллэр,
«Ким биһигини көрүөҕэй?» – дэһэллэр.
7Уодаһыннаах суолга куомуннаһаллар,
«Барытын бэркэ аттардыбыт, бэлэм буолла», – диэн үөрэллэр.
Оо, киһи сүрэҕэ, өйө-санаата хараҥа даҕаны!
8Ол эрээри Таҥара кинилэри оҕунан ытыаҕа,
оччоҕо эмискэ бааһырыахтара.
9Тылларын иһин кинилэри сууһартыаҕа;
көрбүт эрэ барыта, дьулайан, баһын быһа илгистиэҕэ.
10Оччоҕо ким барыта саллыаҕа;
бары Таҥара дьайыытын кэпсиэхтэрэ,
Кини тугу оҥорбутун анаарыахтара.
11Оттон көнө киһи Айыы Тойонтон үөрүөҕэ,
Кинини дурда-хахха туттуоҕа;
көнө сүрэхтээх эрэ барыта өрөгөйө үрдүөҕэ.
© Институт перевода Библии, 2008-2022