Саалтыр 47
47
1Ырыа. Корей уолаттарын псалома.
2Айыы Тойон улуу, онон бар дьон айхала Киниэхэ ананар
биһиги Таҥарабыт куоратыгар, Кини сибэтиэй хайатыгар.
3Кэрэ көстүүлээх үрдэл, сир бүттүүнүн үөрүүтэ –
Сион хайата; кини хоту өттүгэр
улуу Ыраахтааҕы куората турар.
4Таҥара бу куорат кириэппэстэригэр
бигэ көмүскээччи буоларын көрдөрбүтэ.
5Ыраахтааҕылар, киксэн баран, бары бииргэ
ыга анньан кэлбиттэрэ;
6куораты көрөөт да, бэри диэн бэркиһээбиттэрэ,
уонна, уолуйа куттанан, атахха биллэрбиттэрэ;
7салыбырас буолуохтарыгар диэри онно дьулайбыттара,
талыыта киирбит дьахтардыы аймаласпыттара.
8Эн илинтэн тыалы түһэрэҥҥин,
Фарсис аалларын үлтү охсубутуҥ.
9Истибиппитин биһиги дьэ онно илэ көрбүппүт
Аанньал сэриитин Айыы Тойонун куоратыгар,
биһиги Таҥарабыт куоратыгар.
Таҥара кинини үйэлэргэ барардыы бөҕөргөтүөҕэ. Села
10Айыы Таҥара, Эн Храмҥар тураммыт,
биһиги Эн бигэ тапталгын саныыбыт.
11Эн аатыҥ сири сиксигинэн иһиллэрин курдук,
Эйиэхэ айхал эмиэ сир устун иһиллэр.
Эн уҥа ытыскар тобус-толору кырдьыгы туппуккун.
12Өрөгөйө үрдээтин Сион хайата;
Эн көнө дьүүлгүн көрөннөр,
үөрдүннэр Иуда куораттара.
13Барыҥ, Сиону эргийэн кэлиҥ,
башнятын ахсаанын ааҕан билиҥ;
14өйдөөн көрүҥ кини бөҕөргөтүнүүлэрин,
кэрийэ хаамыҥ кириэппэстэрин;
оччоҕо кэлин кэнэҕэс көлүөнэлэргэ кэпсиэххит:
15«Бу Таҥара үйэттэн үйэҕэ биһиги Таҥарабыт,
Кини биһигини өлүөхпүтүгэр диэри сирдиэҕэ».
© Институт перевода Библии, 2008-2022