Rɔmɛ̀n-anmàn-bɔ̀ 15
15
Bɔ̀ hán bɔ́ nyran-wrɔnẅì kɛ̀ ẅɛn bɔ́ ɛcüɛ̀n, tɛ́n ke sɩ́ ji le bɔ́ dùku bɔ̀ cüɛn bɔ́ edomɛ̀n
1Bɔ́ léyi ankaẅì-bùtan ẅɛn bɔ̀ ecüì nɔn, ke ji le bɔ̀ bɩ́ ɛnbɔrɛ wɔwɔ mɛ̀n, anwrɔn hɔ̀n léyi ankaẅì-bùtan kè sɩ̀ ẅɛ̀n ecüì nɔn, y'ɛzɛ̀n-ci-hán lɔ. Ke sɩ́ ji le bɔ́ ji eci léyi dú bɔ́ ɛcüɛn-ci nɔn. 2Ke ji le ɔwrɔnwrɔn ke ji ɛyri, ô kɛ̀ cɔ́ nɛ́n nyran cüɛ̀n, kè dú n'anvrɛn, ô kɛ̀ hán nɛ̀n, nɛ̀n hɔ́n ezì ankaẅì-bùtan mɛ̀n. 3Annanwɔrɛ mɛ̀n lɔ, Krisì kè sɩ̀ jì eci léyi dú n'ɛcüɛn-ci nɔn. Tɛ́n hán ɔmu le Owrú kɛ dɔ̀ nɔn: “Ɔwrá ankà hɔ̀n lɔ fɛn léyi yɛ dɔ́ ku mɛ́n ɛwú nɔn, vá ku mɛ̀n ɛwú.” 4Eci lɔ fɛn léyi bɔ́ cɔ́ Ɛwrú hɔ̀n lɔ mɛ̀n nɔn, ye merɛ́n yɔ, ɛnvra sheshe mɛ̀n, ô kè yé bɔ̀ ankà, ô ɛnbɔrɛ-ẅɛ̀n-hɛ́n, mán ɛnbɔrɛ-bi-wá léyi yɔ vá sɩ́ bɔ̀ nɔn, n'ɛwú lɔ bɔ̀ cɔ́ esɛ́. 5Ke ji le, Ɔwɔ léyi dú ɛnbɔrɛ-ẅɛ̀n-hɛ́n mán ɛnbɔrɛ-bi-wá shi-bɛ́ nɔn kɛ tán nyɛ̀n ɛwúvà-mùan-krɔn nyɛ́n mán nyɛ́n nyran hɔ̀n mɛhi, ô nyɛ́n bɩ́ Zhezü Krisì sɛnpò lɔ nyɛ́n nán esù ɛwú. 6Zɛtɛn, nyɛ lɛ fɛn lɔ, esùva zriemɛ̀n, nyɛ lɛ mrɛ́n Ɔwɔ, bɔ́ Ɛẅɛnwrɔn Zhezü Krisì nɛ̀n Zi.
Ɛmɛẅi ankà Ankrànkràn léyi dú fɛcüè hɔ̀n lɔ fɛn tɛn nɔn
7Ɔmu lɔ, nyɛ́n bɩ́ ny'edomɛ̀n, hán ɔmu le Krisì mán bɩ́ nyɛ̀n Ɔwɔ ci-zrɔ mɛ̀n nɔn. 8Ananwɔrɛ mɛ̀n lɔ, mɛ dɔ́ nyɛ̀n ankaẅì-bùtan mɛ̀n le, Krisì srɔ Zhüifɛ̀n-bɔ̀ ci-bɩ̀tan-wrɔn, ô ɔmùan léyi Ɔwɔ wá yɔ nancüì hɔ̀n nɔn kɛ̀ sá nmù, ô ɔmu lɔ, kè yé Ɔwɔ-mùan-zri-dì lɔ. 9Nɛ̀n vru nɛ́n và, ô anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn kɛ̀ mrɛ́n Ɔwɔ n'ɛnbɔrɛ-wɔ̀ lɔ kruhú, hán ɔmu le Owrú kɛ dɔ̀ nɔn:
“Hɩ le kruhú de mɛ lɛ mrɛ́n mɛ́n ɛnhi wú anmàn hɔ̀n lɔ fɛn wú,
kɩ mɛ lɛ krɛ́ v'ɛmrɛ́n cɔ̀.”
10Owrú ke vru kɛ dɔ̀ le:
“Ɛnhi wú anmàn hɔ̀n, pɔpüɛ̀ kɛ̀ brá nyɛ̀n, nyɛ́n mán Ɛẅɛnwrɔn fɛcüè mɛhi!”
11Kɩ nɛ̀n vru nɛ́n dɔ̀ le:
“Nyɛ́n zrɔ Ɛẅɛnwrɔn eci nyɛ́n ɛnhi wú anmàn hɔ̀n lɔ fɛn,
nyɛ́n krɛ́ n'ɛmrɛ́n cɔ̀, nyɛ́n fɛcüè hɔ̀n lɔ fɛn!”
12Ezahi mán kɛ dɔ̀ le:
“Zhese mɛẅi-wrɔn kɛ lɛ và,
ne le tɔhú, ô nɛ̀n nyrɔn ɛnhi-wú anmàn hɔ̀n,
kɩ fɛcüè hɔ̀n ke bɩ́ y'esɛ́ lɔ kɛ wá nɛ̀n ɛmɛ̀n.”
13Ke ji le Ɔwɔ léyi dú esɛ́ shi-bɛ́ nɔn ke hán pɔpüɛ̀ mán anwɔwɔ ke dú nyɛ̀n ɛmɛ̀n, ny'ankaẅì-bùtan léyi nyɛ́n ẅɛn n'ɛwú nɔn, ô nyɛ́n di ɛnnɛ̀ncüì esɛ́ mɛ̀n, Ɛhɛ́n Prɔnprɔn kɔrɛ̀-srɔn mɛ̀n.
Pɔlɛ̀n ẅɛn ɛkɔrɛ̀levri ke le merɛ́n Owrú hán ɔmu le nɛ̀n hán nɔn
14Nmàn-ẅì hɔ̀n, mɛ́n dùku mɛ́n nyrì le, eci-hán ankrankran yɩ́ nyɛ̀n edomɛ̀n, nyɛ́n cɔ̀ nyɛ́n yá eci léyi ke ji le nyɛ́n nyrì, kɩ nyɛ́n krɔn kpehɛ́n nyɛ́n woro ankà nyɛ́n yé ny'edomɛ̀n. 15Ɔmu tɛ̀kɩ, mɛ̀n merɛ́n nyɛ̀n owrú ɛkɔrɛ̀levriemɛ̀n, ô owrú lɔ mɛ̀n, mɛ̀n kore nyɛ̀n ankà léyi nyɛ́n gɔ́ nyrì nyɛ́n hɛ́n nɔn. Mɛ̀n merɛ́n owrú ɔmu lɔ ɛkɔrɛ̀-wá léyi Ɔwɔ tán mɛ̀n nɔn hɩ wú, 16ô mɛ̀n dú Zhezü Krisì ci-bɩ̀tan-wrɔn kè dú fɛcüè hɔ̀n léyi kè sɩ̀ dù Zhüifɛ̀n-bɔ̀ nɔn tɛn. Mɛ hán eci-bɩ̀tan kɔ̀hɔ̀n prɔnprɔn m'Ɔwɔ mɛẅi ankà ankrànkràn dɔ́ mɛ̀n, ô fɛcüè hɔ̀n léyi kè sɩ̀ dù Zhüifɛ̀n-bɔ̀ nɔn, kɛ srɔ ecice-ci léyi kɛ cüɛn Ɔwɔ ɛvɛ̀, ô kè dú eci léyi vɛ́n nɛ̀n, Ɛnhɛ́n Prɔnprɔn mɛ̀n nɔn. 17Zhezü Krisì mɛhi b'ɔbɔ̀sɔ̀ lɔ mɛ̀n, mɛ lɛ mrɛ́n m'edomɛ̀n Ɔwɔ-kɔ̀hɔ̀n-hán mɛ̀n. 18Annanwɔrɛ mɛ̀n lɔ, ke dú kɛ mɛ dɔ́ eci tɔ̀n ankà hô, dú eci tɔ̀n léyi Krisì hán tán mɛ̀n, ô mɛ̀n hán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, kɛ̀ ẅɛn Ɔwɔ wá. Nɛ̀n hán eci lɔ ankà-dɔ́ mɛ̀n mán eci-hán mɛ̀n, 19anvɛmɛ̀n-frɛ́n-ci mán eci-woroan-ci kɔrɛ̀-srɔn mɛ̀n, mán Ɔwɔ Hɛ́n kɔrɛ̀-srɔn mɛ̀n. Ɔmu lɔ de mɛ̀n dɔ́ anvrɛnvrɛn mɛ̀n Krisì mɛẅi ankà ankrànkràn lɔ, me ci ɛyri lɔ fɛn bukru Zherüzalɛmɛ̀n anmàn, hàn kɩ cɔ́ Iliri kpɔsɔ wú. 20Tɛ́n mɛ̀n wá le, mɛ lɛ dɔ́ Ɛmɛẅi ankà Ankrankran lɔ, ɛyri hɔ̀n léyi yɛ vá yá yɛ dɔ́ Krisì ankà, ô ke bɩ́ hán tán ankà-dɔ̀ hɔ̀n lɔ, ke dú anhyrɛ̀, ke dú kɛ ɔwrɔn gɔ́ ci nanvrɛn. 21Ɔmu lɔ de mɛ̀n hán eci léyi Owrú dɔ̀ nɔn:
“Anwrɔn hɔ̀n léyi ye sɩ̀ gɔ̀ dɔ̀ n'ankà nɔn, kɛ lɛ kán nɛ̀n,
kɩ anwrɔn hɔ̀n léyi kɛ vá gɔ̀ yá yɛ dɔ́ n'ankà nɔn, kɛ lɛ yá.”
Pɔlɛ̀n kɛ dɔ́ nɛ́n nɛ̀nnyànmàn-hɔ̀n Rɔmɛ̀n anmàn ankà
22Ndɔ lɔ de kè sɩ̀ tàn mɛ̀n ɛkɔrɛ̀levri ɛnvra bobrebe mɛ̀n, ô mɛ̀n và kán nyɛ̀n nɔn. 23Tɛ́n zɛtɛ̀ lɔ, mɛ̀n hán m'ɔkɔ̀hɔ̀n trɔ ɛyri ndɔ hɔ̀n lɔ wú. Ɛnnànwàn bobrebe mɛ̀n de mɛ̀n wá, ô mɛ̀n và kán nyɛ̀n 24kɩ me ji mɛ̀n hán hɩ ci lɔ ɛnvra léyi mɛ lɛ hɔ́n Ɛspanyɛ̀n hi wú nɔn. Ɔmuhi mɛ̀n ẅɛn esɛ́ le mɛ lɛ kán nyɛ̀n m'eciemɛ̀n kɩ mɛ lɛ cɔ́ ny'ɛkɔrɛ̀-wá ô mɛ̀n hɔ́n ɛnhi wú anmàn ndɔ lɔ wú, ɛnvra léyi nyɛ́n mɛhi bɔ́ lɛ kán bɔ́ edomɛ̀n ɛnvra cá mɛ̀n nɔn. 25Tɛ́n ɛnvra lɔ mɛ̀n, mɛ hɔ́n Zherüzalɛmɛ̀n anmàn, ô mɛ̀n dú ankaẅì-bùtan-ẅɛn-bɔ̀ léyi dú nanvrɛn nɔn, y'eci-bɩ̀tan-kɔ̀hɔ́n mɛ̀n. 26Annanwɔrɛ mɛ̀n lɔ, Maseduhanɛ̀n mán Akahi Krisì-sɛ̀nkɛn-bɔ̀ wá le, yɔ lɛ fɔ́n eci yɔ tán ɛmian-bɔ̀ fɛcüè léyi dú Zherüzalɛmɛ̀n anmàn nɔn. 27Yɔ dùku yɔ wá ɔmùan, tɛ́n annanwɔrɛmɛ̀n lɔ yɔ ẅɛn yɔ ɔwɔ̀ɛn. Ɔmuhi Zhüifɛ̀n-bɔ̀ léyi dú Krisì-sɛ̀nkɛn-bɔ̀ nɔn, dɛ́ y'ɛnhɛ́n mɛ̀n ci-ẅɛ̀n ankrankran lɔ tán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn; kɩ yɔ léyi yɔ sɩ̀ dù Zhüifɛ̀n-bɔ̀ nɔn, yɔ mán ke ji le yɔ wá anwrɔn hɔ̀n léyi ẅɛn y'ankà-tro ankrankran nɔn ɛkɔrɛ̀. 28Ɛnvra léyi mɛ lɛ trɔ ɔkɔ̀hɔ̀n ndɔ lɔ n'ɛhán, hɩ me le bɩ́ ɛkɔrɛ̀-wá ci lɔ mɛ̀n tán yɔ nɔn, me le bɩ́ Ɛspanyɛ̀n levri kɩ me le ci ny'anmàn. 29Kɩ mɛ̀n nyri ɔmu le, ɛnvra léyi mɛ lɛ cɔ́ ny'anmàn nɔn, mɛ lɛ vá Krisì shifúemɛ̀n.
30Tɛ́n nyàn eci léyi mɛ sán nyɛ̀n, anwrɔn-nɛ́n-muan-ẅì hɔ̀n, bɔ́ Ɛẅɛnwrɔn Zhezü Krisì mán ɛcüɛ̀n léyi Ɛnhɛ́n Prɔnprɔn kɛ tán bɔ̀ nɔn bɩmɛ̀n: nyɛ́n cɔ́ mɛ̀n mɛhi bɔ̀ kɔ́n anhà, ny'Ɔwɔ-sɛ̀n tán mɛ̀n. 31Nyɛ́n sɛ́n Ɔwɔ, ô anwrɔn hɔ̀n léyi kè sɩ̀ ẅɛ̀n ankaẅì-bùtan Zhüde kpɔsɔ wú nɔn, mɛ̀n di yɔ antá, ô ɛkɔrɛ̀-wá léyi me sɩ́ Zherüzalɛmɛ̀n anmàn nɔn, kè dú eci léyi ankaẅì-bùtan-ẅɛn-bɔ̀ kɛ lɛ cüɛ̀n nɔn. 32Ɔmu lɔ de mɛ lɛ cɔ́ ny'anmàn, pɔpüɛ̀ kè yɩ́ m'ɛnbɔrɛ lɔ mɛ̀n, ke dú kɛ Ɔwɔ ke ji ɔmu lɔ, kɩ me le bɩ́ ɔwrɔncüe jan ny'anwanzi. 33Ɔwɔ léyi dú anwɔwɔ shi-bɛ́ nɔn, kɛ và dú nyɛ̀n ɛmɛ̀n. Kè dú ɔmu lɔ.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.