Rɔmɛ̀n-anmàn-bɔ̀ 11
11
Ɔwɔ kè sɩ̀ teze Izraɛlɛ̀n
1Zɛtɛn me yrɛ le: Ɔwɔ teze nɛ́n fɛcüè lɔa nɛ̀n? Annànwɔrɛ mɛ̀n lɔ hɔ̂! Ɔmuhi mɛ́n dùku mán mɛ̀n dú Izraɛlɛ̀n ẅì, Abrahamɛ̀n mɛẅi-wrɔn, Bɛnzhamɛn mɛ̀n mɛ̀n-wrɔn nɔn. 2Ɔwɔ kè sɩ̀ teze nɛ́n fɛcüè léyi nɛ́n gɔ̀ mrɛ́n nɛ́n bɩ nɔn. Nyɛ́n nyri ankà léyi Owrú kɛ dɔ́ ɛyri léyi Eli ke bɩ́ ɛmɛ̀nhyì ku Izraɛlɛ̀n ɛwú Ɔwɔ zìwú nɔn: 3“Ɛẅɛnwrɔn, yɔ wri v'ɔmùanwú-ankà-dɔ́-bɔ̀ kɩ yɔ jrɛ́ v'ɛcice-tɛbrɛ̀ hɔ̀n lɔ: wɔrɔ mɛ́n zri, kɩ yɔ ji ɛyri ô yɔ wri mɛ̀n.” 4Tɛ́n ɔmùan tán de Ɔwɔ mrɛ́n nɛ̀n nɛ́n? “Anwrɔn tɛ̀bru kru ɔbɔ̀ɛn de mɛ́n bɩ mɛ̀n srɔ mɛ tɛn, yɔ léyi yɔ sɩ̀ shràn annankruemɛ̀n Baalɛ̀n wɔ zìwú nɔn.” 5Ɔmu zri lɔ, ɛnvra léyi bɔ̀ dú ɛmɛ̀n nɔn, anwrɔn ẅiɛ léyi worɔ dù nɔn, Ɔwɔ yɔ̀bɔ̀-nyrì lɔ mɛ̀n, mrɛ́n yɔ bɩ. 6Nɛ̀n mrɛ́n yɔ nɛ̀n bɩ́ ɛnbɔrɛ wɔwɔ mɛ̀n kɩ kè sɩ̀ dù yɔ eci-hán-ci mɛ̀n, kè sɩ̀ dù ɔmu lɔ hô, Ɔwɔ bɔrɛ-wɔ̀ lɔ ke sɩ̀ dú ɛbɔrɛ-wɔ̀ annanwɔrɛ.
7Ecitan de yɛ cɔ́ n'ɛmɛ̀n lɔ nɛ́n? Izraɛlɛ̀n fɛcüè kè sɩ̀ cɔ̀ eci léyi nɛ̀n dú ejiemɛ̀n nɔn; yɔ zri léyi Ɔwɔ mrɛ́n yɔ nbɩ nɔn kɩ yɔ cɔ́ eci lɔ. Anwrɔn ndɔ hɔ̀n tɛn, yɔ srɔ eci woro ankà-yá mɛ̀n, 8hán ɔmu le Owrú kɛ dɔ̀ nɔn: “Ɔwɔ srɔ y'ɛnhɛ́n lɔ eci kora; nɛ̀n sɩ̀ tàn y'anvɛ̀ hɔ̀n lɔ ɛyri-kàn kɩ yɔ nukù hɔ̀n lɔ ke sɩ̀ dú ankà yá mɛ̀n hàn kɩ kɛ lɛ cɔ́ ɛnbì ndɔ lɔ.” 9Davidɛ̀n mán dɔ̀ le:
“Ke ji le y'ɔkoran lɔ kɛ̀ srɔ y'antanwrɔn léyi kɛ lɛ ẅɛn yɔ nɔn,
kè dú eci léyi kɛ lɛ hán yɔ, yɔ bore, ô yɔ cɔ́ ɛgbàn-hán léyi vɛ́n yɔ nɔn.
10Ke ji le y'anvɛ̀ hɔ̀n lɔ kè dú ɛyri yɔwɔ mɛ̀n, ô ɛyri-kàn kɛ̀ zrɛ́n yɔ ɛmɛ̀n;
ɛ̀ hán yɔ ɛnvra lɔ fɛn yɔ vé.”
11Zɛtɛn me yrɛ le: ɛnvra léyi Zhüifɛ̀n-bɔ̀ bore nɔn, yɔ dú ebore lɔ mɛ̀n ɛnvra lɔ fɛn hán? Annanwɔrɛ mɛ̀n lɔ hɔ̂! Tɛ́n, y'ɛgbàn lɔ kruhú, fɛcüè ndɔ hɔ̀n cɔ́ ɛnkru-kɔrɛ̀, hán tán kɩ Zhüifɛ̀n-bɔ̀ dú ecüì-hi-kɔ́n mɛ̀n. 12Tɛ́n, ke dú kɛ Zhüifɛ̀n-bɔ̀ gbàn lɔ tán ɛnhibù ɛnhɛ́n mɛ̀n nɛ̀ncüì-dì, ke dú kɛ y'edomɛ̀n ɛnhi-sɩ́ tán fɛcüè nyantɛn hɔ̀n ɛnnɛ̀ncüì-dì, andɛ̀n ɛ̀bɛ de y'anvrɛn-hán ke le sevri kè dú y'ɛkɔrɛ̀-wá ɛnkru-kɔrɛ̀-kɔhɔ̀n-hán mɛ̀n!
Ɛnkru-kɔrɛ̀ léyi dú tán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn
13Zɛtɛ̀ lɔ nyɛ́n léyi nyɛ́n sɩ̀ dù Zhüifɛ̀n-bɔ̀ nɔn, mɛ dɔ́ nyɛ̀n le: mɛ̀n dú ɔkɔ̀hɔ̀n-wá-wrɔn léyi ye yüre fɛcüè hɔ̀n léyi kè sɩ̀ dù Zhüifɛ̀n-bɔ̀, kɩ ɔmu lɔ, mɛ̀n dú pɔpüɛ̀-brá mɛ̀n ɔkɔ̀hɔ̀n léyi dú mɛ tɛn nɔn n'ɛkruhú. 14Ɔkɔ̀hɔ̀n ndɔ lɔ n'ɛhán mɛ̀n lɔ, mɛ̀n ẅɛn esɛ́ le m'ɛmɛ̀n-bɔ̀ kɛ lɛ kɔ́n ecüì-hi, ô mɛ̀n bɩ́ ɛnjanbɔ̀ mɛ̀n die. 15Annanwɔrɛ mɛ̀n lɔ, ɛnvra léyi yɛ kɛ́n yɔ sɩ́ ɔhɔ́nan nɔn, ɛnhibù mán Ɔwɔ mɛhi angranmɛ̀n nwɔ̀. Zɛtɛn ecitan de kɛ lɛ wɔɛ̀n ɛnvra léyi Ɔwɔ ke le vru ke bɩ́ yɔ nɛ́n? Ke le dú owú-bɔ̀ mɛ̀n mɛẅi vru và annanwɔrɛ ɔkɔrɛ-bɔ̀ mɛ̀n!
16Ke dú kɛ kpàkpà abùtùkumɛ́n buri lɔ, ye bɩ́ yé Ɔwɔ hô, abùtùkumɛ́n buri léyi wɔrɔ nɔn mán dú nɛ tɛn. Ke dú kɛ ye bɩ́ ɛtɛ̀ tɔ̀n nyràn ye ce Ɔwɔ, antɛ̀-dá hɔ̀n lɔ mán dú nɛ tɛn. 17Izraɛlɛ̀n dú cá ɛẅì-shi-tɛ̀ tɔ̀n léyi ye bi olivie, hɩ Ɔwɔ voyan n'andá hɔ̀n lɔ jan nɔn; kɩ andá hɔ̀n yri lɔ, nɛ̀n bɩ́ mɛ́n nɛ̀n hɛ́n, vɛ́n léyi è sɩ̀ dù Zhüifɛ̀n-wrɔn, hán ovú-tɛ̀-dá léyi yɛ kora bá ɛtɛ̀ nyantɛn domɛ̀n nɔn: vɛ́n mán zɛtɛ̀ lɔ, ɛ cɔ́ ɛtɛ̀ nyràn shi lɔ ke ci mɛ́n anẅia mɛ̀n. 18Hɩ le kruhú de ke sɩ́ ji le è gbri antɛ̀-dá hɔ̀n léyi yɛ voyan nɔn. Anwɔntan de ɛ lɛ hán è gbú ɔmùan nɛ́n? Kè sì dù vɛ́n de ɛ tán ɛtɛ̀-nyràn ecüì nɔn, tɛ́n ɛtɛ̀-nyràn de kɛ tán mɛ́n ecüì nɔn.
19Ɛ lɛ dɔ́ mɛ̀n le: “Tɛ́n, yɛ voyan antɛ̀-dá hɔ̀n lɔ, ô mɛ̀n bɩ́ y'eyri lɔ mɛ̀n yɛ́.” 20Dú annanwɔrɛ. Yɛ voyan yɔ ɔmuhi ankaẅì-bùtan trɔ yɔ ɛmɛ̀n, kɩ è bɩ́ y'ɛyri lɔ, ankaẅì-bùtan léyi ɛ ẅɛ̀n nɔn hɩ kruhú. Tɛ́n e bɩ́ di tùtre hɩ wú lɔ! Kɩ ke ji le ɛ̀ wá esùva anvrɛnvrɛn. 21Ɔmuhi ke dú kɛ Ɔwɔ kè sɩ̀ ẅɛ̀n Zhüifɛ̀n-bɔ̀ ɛgbàn mɛ̀n kɛ̀ sɔhɔ́, yɔ léyi yɔ dú ɛtɛ̀-dá hɔ̀n annanwɔrɛ nɔn, ɛ̀ wá esùva, ô vɛ́n mán nɛ́n bɩ́ teze mɛ́n ɛgbàn mɛ̀n. 22Ɛ̀ nyan ɔmu le Ɔwɔ ke yé n'ɛnbɔrɛ wɔwɔ kɩ ne vru nɛ ẅɛn ɛmɛ̀nhyì shishi: ne bɩ́ ɛmɛ̀nhyì shishi ku anwrɔn hɔ̀n léyi bore nɔn ɛwú, kɩ ɛnbɔrɛ wɔ́ nɛ̀n v'ɛwú. Tɛ́n ke ji le ɛnvra lɔ fɛn, ɛ̀ ẅɛn esɛ́ n'ɛnbɔrɛ-wɔ̀ lɔ ɛwú, kè sɩ̀ dù ɔmu lɔ hô, vɛ́n mán yɛ lɛ vɔ́n mɛ́n kɛ lɛ hán ɛtɛ̀-dá hɔ́. 23Kɩ ke dú kɛ Zhüifɛ̀n-bɔ̀ ke teze y'ɛnkru-shishi-ci lɔ kɩ kɛ ẅɛn ankaẅì-bùtan hô, ye le sɩ́ yɔ kpàkpà yri léyi yɔ gɔ́ dù nɔn. Ɔmuhi Ɔwɔ ẅɛn ɛkɔrɛ̀srɔn ke le vru kɛ̀ kora yɔ bá ɛtɛ̀ domɛ̀n, (ô yɔ srɔ antɛ̀-dá wrù hɔ̀n nɔn). 24Vɛ́n, è dú ɛtɛ̀-dá annanwɔrɛ léyi dú ovomɛ̀n ẅì-shi-tɛ̀ tɔ̀n léyi ye bi olivie nɔn wú, kɩ Ɔwɔ vɔ́n mɛ́n bá ɛtɛ̀ zri léyi yɛ tɛ́ ɛbemɛ̀n nɔn domɛ̀n. Zhüifɛ̀n-bɔ̀ tɛn, yɔ dú antɛ̀-dá hɔ̀n annanwɔrɛ léyi yɛ tɛ̀, hɩ dú ɛẅì-shi-tɛ̀ ndɔ léyi ye bi olivie nɔn: Ɔwɔ ke le vru ke bɩ́ yɔ tɛ̀ kɛ korà bá ɛtɛ̀ léyi dú yɔ tɛn nɔn, domɛ̀n.
Izraɛlɛ̀n fɛcüè krukɔrɛ̀ krutrɔ
25Anwrɔn-nɛ́n-muan-ẅì hɔ̀n, me ji mɛ̀n hán nyɛ̀n nyɛ́n nyri Ɔwɔ ankɔ́nda-ci-hán ankà-bán-ankà lɔ, ô nyɛ́n bɩ́ bú ny'edomɛ̀n nyɛ́n hán ankà-nyri-bɔ̀: Izraɛlɛ̀n fɛcüè cá ke le dú ɔbrɔsa mɛ̀n hàn kɩ kɛ lɛ cɔ́ ɛnvra léyi ɛnhibù fɛcüè nyantɛn kɛ lɛ cɔ́ ɛnkru-kɔrɛ̀ nɔn. 26Kɩ ɔmu lɔ de Izraɛlɛ̀n fɛcüè lɔ fɛn kɛ lɛ cɔ́ ebɩ̀die, hán ɔmu le Owrú kɛ dɔ̀ nɔn hɔ́:
“Ebɩ̀die-wrɔn ke le dú Ɔwɔ bɩmɛ̀n kɛ̀ và,
nɛ lɛ jrɛ́ Zhakɔbɛ̀n mɛẅi-bɔ̀ zì-kɛ̀n lɔ fɛn.
27Nyàn mìrɛ̀n léyi ke le dú mɛ̀n mán yɔ mɛhi angranmɛ̀n,
ɛnvra léyi mɛ lɛ mrɛ́n y'ɛgbàn hɔ̀n lɔ mɛ̀n sɔhɔ́ nɔn.”
28Ke dú kɛ y'Ɛmɛẅi ankà Ankrànkràn léyi yɔ kɔrɔ nɔn, ke dú ankà mù hô, yɔ dú Ɔwɔ gbri-bɔ̀ ny'anvrɛn kruhú; tɛ́n ke dú kɛ Ɔwɔ ci léyi mrɛ́n bɩ, ke dú ankà mù hô, yɔ dú ɛnvra lɔ fɛn Ɔwɔ cüɛ̀n lɔ mɛ̀n, yɔ nancüì hɔ̀n kruhú. 29Ɔmuhi Ɔwɔ ke sɩ́ vru bɩ́ eci léyi nɛ̀n tán, kɩ nɛ́n sɩ̀ crɔn n'ankà-tro anwrɔn hɔ̀n léyi nɛ́n bi nɔn y'ɛwú. 30Ɛnbiɛhɛ́n vra lɔ nyɛ́n kɔ́n Ɔwɔ mùan-ankà nyɛ́n cüe; tɛ́n zɛtɛ̀ lɔ, nyɛ́n cɔ́ Ɔwɔ yɔ̀bɔ̀-nyrì, ɔmuhi Zhüifɛ̀n-bɔ̀ kè sɩ̀ wà Ɔwɔ nɔn. 31Ɔmu zri lɔ, zɛtɛ̀ lɔ, yɔ kɔ́n Ɔwɔ mùan-ankà ze, ô nyɛ́n cɔ́ Ɔwɔ yɔ̀bɔ̀-nyrì, tɛ́n, ô yɔ mán, yɔ cɔ́ zɛtɛ̀ lɔ Ɔwɔ-yɔ̀bɔ̀-nyrì nzri ndɔ lɔ. 32Ɔmuhi Ɔwɔ wá anwrɔnẅì lɔ fɛn mɛ̀n n'ezi-kɛ̀n-ci-hán, ô nɛ̀n yé yɔ lɔ fɛn n'ɛnhyɔ̀bɔ̀-nyrì lɔ nɔn.
Ɔwɔ vri-sì ankrànkràn lɔ
33Nyàn ɔmuhi Ɔwɔ nɛ̀ncüì-dì lɔ sevri nɔn! Nyàn ɔmuhi n'ankà-nyrì mán n'eci-nyrì vrɛn nɔn! Antɔnwrɔn de kɛ lɛ dɔ́ n'eci-hán ankà nɛ́n? Antɔnwrɔn de ke le nyri n'ankɔnda-ci-hán ankà nɛ́n? 34Hán ɔmu le Owrú kɛ dɔ̀ nɔn:
“Antɔnwrɔn nyri Ɛẅɛnwrɔn ankà-tro hɛ̀?
Antɔnwrɔn ke le dú n'ankà-woroan-yé-wrɔn nɛ́n?
35Antɔnwrɔn de dú ɛnvrakpà-wrɔn cɔ́ ɛyri tán nɛ̀n eci,
ô kɛ̀ cɔ́ ɔwɔɛ̀n-dì n'eyri nɛ́n?”
36Ɔmuhi eci lɔ fɛn dú n'eyri và, eci lɔ fɛn dú nɛ̀n ɛmɛ̀n kɩ dú nɛ tɛn. Eci-zrɔ kè dú Ɔwɔ tɛn ɛnvra lɔ fɛn! Kè dú ɔmu lɔ.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.