Filemɔn 1
1
Ebinyan
1Ebinyan ndɔ lɔ dú Pɔlɛ̀n yri và, nɛ́n léyi yɛ wá nɛ̀n anwɔn-mɛ̀n, ɔmuhi nɛ̀n srɔ Zhezü Krisì ci-bɩ̀tan-wrɔn nɔn, ebinyan zri lɔ dú bɔ́ muanẅì Timote yri và.
Vɛ́n Filemɔn, bɔ́ nyran anvrɛn mán b'ɔkɔ̀hɔ̀n hán kɔrɛ̀-wá-wrɔn, 2mán Ɔwɔ-fɛcüè léyi kɛ bɔrɛ ɛkru v'ɔwɔn lɔ mɛ̀n, mán bɔ́ muan-ẅì ɛnnyɔnwrɔn Apia, mán Arshipɛ̀n, b'anhà kɔ́n kɔrɛ̀-wá-wrɔn: 3Ɔwɔ léyi dú bo Zi mán Ɛẅɛnrɔn Zhezü Krisì kɛ̀ tán nyɛ̀n nboafɔ̀n mán anwɔwɔ.
Filemɔn cüɛ̀n mán n'ankaẅìbùtan
4Ɛnvra hɔ̀n lɔ fɛn léyi mɛ sɛ́n Ɔwɔ nɔn, me tro v'ankà, Filemɔn, kɩ mɛ tán Ɔwɔ ɔkùɛn; 5ɔmuhi mɛ yá yɛ dɔ́ ɛcüɛ̀n léyi ɛ̀ ẅɛn ankaẅìbùtan bɔ̀ wú, mán ankaẅìbùtan léyi dú mɛ́n Ɛẅɛnwrɔn Zhezü mɛ̀n nɔn. 6Mɛ dɔ́ Ɔwɔ le ankaẅìbùtan léyi bɔ́ mán vɛ́n mɛhi bɔ́ ẅɛ̀n nɔn, kè dú eci ankrankran v'ɛmɛ̀n, ô kɛ̀ hán ye nyri anvrɛnvrɛn, ɛci ankrankran hɔ̀n léyi bɔ̀ ẅɛn bɔ́ ɛwúvà lɔ mɛ̀n bɔ́ mán Krisì mɛhi nɔn. 7V'ɛcüɛn bɔrɛ lɔ, ɔwrɔn-nɛ́n-muanẅì, tán mɛ̀n pɔpüɛ̀-brà brobebe mán edùyì, ɔmuhi è bi ɛnbɔrɛ ɛ̀ wá ankàẅì-bùtan-ẅɛn-bɔ̀ nɔn.
Pɔlɛ̀n kɛ sán eci tán Onezimɛ̀n
8Ɔmu lɔ, Krisì bɔ̀sɔ̀ lɔ mɛ̀n, mɛ̀n ẅɛn ɛkɔrɛ̀levri mɛ lɛ wá tán mɛ́n eci léyi ke ji le ɛ̀ hán; 9mɛ cüɛ̀n le mɛ̀n sán mɛ́n eci ɛcüɛ̀n bɩ́mɛ̀n. Ɔmu léyi mɛ́n dù, mɛ̀n Pɔlɛ̀n, nɛ̀ngbanvri-wrɔn, kɩ zɛtɛ̀ lɔ yɛ hɛ́n mɛ̀n anwɔn-mɛ̀n-wá-wɔn mɛ̀n Zhezü Krisì kruhú, 10mɛ sán mɛ́n eci kè dú Onezimɛ̀n tɛn. Anwɔn-mɛ̀n-wá-wɔn mɛ̀n léyi mɛ́n dù nɔn, nɛ̀n srɔ m'ɛnẅì Zhezü Krisì mɛ̀n. 11Ɛnbiɛhɛ́n lɔ, Onezimɛ̀n kè sɩ̀ dù vɛ́n vɔnshɛ́-ci, tɛ́n zɛtɛ̀ lɔ, nɛ̀n srɔ vɔ̀nshɛ́ ci nɛ̀n tán vɛ́n mán mɛ̀n mɛhi.
12Me bɩ́ nɛ̀n me yüre mɛ́n, zɛtɛ̀ lɔ, nɛ́n léyi nɛ́n dù nɛ̀n hán m'ɛcá hɔ́ nɔn. 13Mɛ cüɛn ɔmu le, mɛ̀n bɩ́ nɛ̀n mɛ̀n hɛ́n m'ɛtɛ̀sɛ̀n ɛnvra ɔmu léyi mɛ̀n dú anwɔn-mɛ̀n-wá-wɔn mɛ̀n Ɛmɛẅi ankà Ankrankran lɔ kruhú, ô nɛ̀n wá mɛ̀n ɛkɔrɛ̀ léyi, vɛ́n ɛ lɛ wá mɛ̀n nɔn. 14Tɛ́n mɛ́n sɩ́ ji mɛ̀n hán eci zriɛmɛ́n v'ɛmɛẅi, ô kɛ̀ hán tán mɛ́n ɛ̀ hán anvrɛn kèkrèmɛ̀n, tɛ́n ɛnbɔrɛ ankrankran mɛ̀n.
15Me bú tán le Onezimɛ̀n cɔ́hɔ́ mɛ́n ɛtɛsɛ̀n ɛnvra bruemɛ̀n, ô è vru ɛ̀ cɔ́ nɛ̀n kè dú ɛnvra lɔ fɛn. 16Ɔmuhi zɛtɛ̀ lɔ nɛ̀n sɩ̀ vrù dù ɔwɔ̀n-wrɔn hán; tɛ́n nɛ̀n vrán ɔwɔ̀n-wrɔn tɔ̀n: nɛ̀n dú ɔwrɔn-nɛ̀n-muanẅì léyi ẅɛn anhàn nɔn. Nɛ̀n dú m'anhàn shishi ci, tɛ́n ke ji le nɛ̀n ẅɛn anhàn bobrebe nɛ̀n tán mɛ́n, kè dú n'ɔwɔ̀n-wrɔn wúvà lɔ mɛ̀n kɛ̀ hán ɔwrɔn-nɛ́n-muanẅì Krisì sɛ̀nkɛn-wrɔn hɔ́.
17Ke dú kɛ e bɩ́ mɛ̀n ɛ hán ɛnyran hɔ́, è bɩ́ nɛ̀n kɛ̀ hán mɛ́n mumù hɔ́. 18Ke dú kɛ nɛ̀n hán mɛ́n ɛgbàn, kɩ nɛ̀n ẅɛn mɛ́n ɔwɔ̀ɛn hô, è bɩ́ ndɔ lɔ kɛ̀ dú m'ɔwɔ̀ɛn. 19M'ɛkɔrɛ̀ wrú de dú ankà-dɔ̀ ndɔ hɔ̀n lɔ nɔn: Mɛ̀n Pɔlɛ̀n, mɛ lɛ wɔrɛ̀ tán mɛ́n. Mɛ́n sɩ́ ji mɛ̀n kore mɛ́n le, v'ɛwúvà lɔ, ɛ̀ ẅɛn mɛ̀n n'ɔwɔ̀ɛn. 20Hɛ̀ɛ̀, ɔwrɔn-nɛ́n-muanẅì, mɛ sɛ́n mɛ́n, ɛ̀ tán mɛ̀n eci-sán ndɔ lɔ Ɛẅɛnwrɔn cüɛ̀n lɔ mɛ̀n: ɛ̀ bi ɛnbɔrɛ ɛ̀ wá mɛ̀n, Krisì mɛhi b'ɔbɔ̀sɔ̀ lɔ, n'ebɩ́mɛ̀n.
21Mɛ̀n ẅɛn esɛ́ le, owrú léyi mɛ̀n merɛ́n mɛ́n nɔn, ɛ lɛ hán eci léyi mɛ sán mɛ́n nɔn; mɛ̀n nyri ɔmu le ɛ lɛ hán kɛ lɛ vrán ndɔ lɔ mán. 22Ɛnvra zri lɔ mɛ̀n, ɛ̀ wá m'ɛdɛ́yri tɔ̀n esùva, ɔmuhi, mɛ̀n ẅɛn esɛ́ le ny'ɔwɔ-sɛ̀n lɔ kɛ lɛ hán tán mɛ̀n và cɔ́ nyɛ̀n.
Ɛmɛẅi-trɔ binyan
23Epafrasɛ̀n léyi nɛ́n mɛhi bo dú anwɔn-mɛ̀n-wá-wɔn mɛ̀n Zhezü Krisì kruhú nɔn, ke bi nyɛ̀n nyan, 24ɔmu zri lɔ de dú Markɛ̀n, Aristarkɛ̀n, Demasɛ̀n; mán Lükɛ̀n léyi dú anyran hɔ̀n ɔkɔ̀hɔ̀n-hán mɛ̀n nɔn.
25Ɛẅɛnwrɔn Zhezü Krisì boafɔ̀n lɔ, kè dú nyɛ̀n ɛmɛ̀n.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.