2 Tesalonikɛ̀n anmàn-bɔ̀ 2
2
Ɛmɛẅitrɔ zìkɛ̀n
1Bɔ́ Ɛẅɛnwrɔn Zhezü Krisì vá ankà lɔ, mán bɔ́ ɛkrubɔrɛ n'ɛtɛ̀sɛ̀n, bɔ́ sán nyɛ̀n eci zri, anwrɔn-nɛ́n-muan-ẅì hɔ̀n: 2nyɛ́n bɩ́ teze ny'edomɛ̀n owule mɛ̀n, yɛ wá ny'ɛnhɛ́n lɔ gbɔ̀gbɔ̀ edù, yɛ wá nyɛ̀n ɛnjansù, ke dú kɛ ɔwrɔn kɛ dɔ̀ le Ɛẅɛnwrɔn bì lɔ ncɔ̀a. Nyɛ́n bɩ́ bú n'ankà lɔ nyɛ́n tán ankaẅì, ke dú kɛ nɛ dɔ̀ le Ɔwɔ-mùanwú-ankà-dɔ̀, kɩ nɛ dɔ̀ le owrú merɛ́n ankà-dɔ̀ de, yɛ tán nyɛ̀n nɔn. 3Eci zriɛmɛ́n mán mɛ̀n, nyɛ́n bɩ́ teze ɔwrɔn zriɛmɛ́n kɛ frɛ́n nyɛ̀n. Ɔmuhi ɛnbì ndɔ lɔ ke sɩ̀ và ke dú kɛ Ɛmɛẅitrɔ zìkɛ̀n ankà lɔ mán anbɔrɛ ci-hán-wrɔn kɛ vá srɔ, nɛ́n léyi nɛ́n dú ɛjrɛ́ tɛn nɔn. 4Anbɔrɛ-wrɔn ndɔ lɔ kɛ lɛ kɛ́n eci lɔ fɛn léyi anwrɔn kɛ̀ sɛ̀n hɩ ke bɩ̀ kɛ hán Ɔwɔ nɔn ezì. Ne le tɔhú nɛ̀n kɛ́n eci ndɔ lɔ fɛn ezì, kɩ nɛ lɛ hɔ́n Ɔwɔ-cice-wɔn mɛ̀n nɛ̀n yɛ́, ô nɛ̀n bɩ́ n'edomɛ̀n nɛ̀n srɔ Ɔwɔ. 5Ke sɩ́ bru nyɛ̀n le mɛ̀n dɔ́ nyɛ̀n ankà ndɔ lɔ ɛnvra léyi mɛ̀n vru mɛ̀n dú nyɛ̀n ɛtɛ̀sɛ̀n nɛ́n? 6Tɛ́n, nyɛ́n nyri ɔmu le zɛtɛ̀ lɔ eci tɔ̀n kɛ ẅɛn anbɔrɛ-wrɔn ndɔ lɔ hɛ́n, hán tán kɩ, ɛnvra léyi yɛ wá nɔn de nɛ lɛ srɔ nɔn. 7Anbɔrɛ-wrɔn kɔrɛ̀-srɔn lɔ dú ɔkɔ̀hɔ̀n hán mɛ̀n ɛbán mɛ̀n; tɛ́n, ne le dú ɔkɔhɔ̀n lɔ n'ɛhán mɛ̀n cehɛ́n ɛnvra léyi ɔwrɔn léyi vru ẅɛn nɛ̀n hɛ́n nɔn, ke le srú nɛ̀n ɛnlevri-sù ke die nɔn. 8Zɛtɛn, anbɔrɛ-wrɔn kɛ lɛ srɔ, kɩ Ɛẅɛnwrɔn Zhezü kɛ lɛ hán nɛ̀n, ne le wú n'ɔmùan dɔ̀nwrɔ̀n mɛ̀n, nɛ lɛ jrɛ́ yi, n'ɛvà vrisì lɔ mɛ̀n. 9Anbɔrɛ-wrɔn lɔ kɛ lɛ vá Anwa-wrɔn cüìcüì kɔrɛ̀-srɔn mɛ̀n, nɛ lɛ hán anvɛmɛ̀n-frɛ́n-ci mɛ̀ntɛ mɛ̀ntɛ mán ɛyɔ̀n ci-woroan-ci; 10ne le bɩ́ eci gbàngbàn ci-hán lɔ fɛn nɛ̀n frɛ́n anwrɔn hɔ̀n léyi kɛ hɔ́n y'ɛzrɛ́n mɛ̀n nɔn ɛnkruemɛ̀n. Yɔ lɛ zrɛ́n ɔmuhi yɔ sɩ̀ bɩ, kɩ yɔ sɩ̀ cüɛn annanwɔrɛ ankà léyi ke le bɩ́ yɔ kè die nɔn. 11Nyàn eci lɔ kruhú léyi Ɔwɔ ke yüre yɔ ɛzɛ̀n kɔrɛ̀-srɔn tɔ̀n léyi kɛ hán yɔ yɔ bú ɛyɔ̀n ankà yɔ tán ankaẅì nɔn. 12Ɔmu lɔ de anwrɔn hɔ̀n lɔ fɛn léyi kè sɩ̀ bú annanwɔrɛ ankà kɛ̀ tán ankaẅì, tɛ́n bɩ́ ɛgbàn-hán ankà srɔ yɔ pɔpüɛ̀-brà nɔn, nwù-bɔ̀ dú yɔ tɛn.
Yɛ mrɛ́n nyɛ̀n ye bɩ, ô nyɛ́n cɔ́ ebɩ̀die
13Tɛ́n bɔ́ tɛn, ke ji le ɛnvra lɔ fɛn bɔ́ tán Ɔwɔ ɔkùɛn ny'ɛkruhú, anwrɔn-nɛ́n-muan-ẅì hɔ̀n, nyɛ́n léyi Ɛẅɛnwrɔn kɛ cüɛn nyɛ̀n nɔn. Ɔmuhi Ɔwɔ mrɛ́n nyɛ̀n nbɩ̀, nyɛ́n ɛnvrakpà-bɔ̀, ô nyɛ́n cɔ́ ebɩ̀die léyi Ɛnhɛ́n Prɔnprɔn kɛ tán nyɛ̀n ny'ɛwúvà-prɔnprɔn-ẅɛ̀n lɔ mɛ̀n mán ny'annanwɔrɛ ankaẅì-bùtan-ẅɛ̀n lɔ mɛ̀n nɔn. 14Ɛmɛẅi ankà Ankrànkràn léyi bɔ̀ dɔ́ nyɛ̀n yi ankà nɔn, hɩ wú de Ɔwɔ bi nyɛ̀n nɔn; nɛ̀n ji le nyɛ́n mán nyɛ́n dú bɔ́ Ɛẅɛnwrɔn Zhezü Krisì ci-zrɔ lɔ mɛ̀n. 15Ɔmu lɔ, anwrɔn-nɛ́n-muan-ẅì hɔ̀n, nyɛ́n nyɔn ɛshishiemɛ̀n, ô ankà-yé léyi bɔ̀ tán nyɛ̀n ankà-dɔ́ mɛ̀n mán b'owrú yüre mɛ̀n nɔn, nyɛ́n ẅɛ̀n hɛ́n.
16Bɔ́ Ɛẅɛnwrɔn Zhezü Krisì dùku mán Ɔwɔ bo Zi léyi cüɛn bɔ̀ hɩ tán bɔ̀ nɛ́n nboafɔ̀n lɔ mɛ̀n, edùsɔ tɔ̀n léyi kè sɩ̀ ẅɛ̀n ɛnkrutrɔ mán esɛ́ ankrankran nɔn, 17kɛ̀ hán edùyì kè yɩ́ ny'ɛnbɔrɛ hɔ̀n lɔ, ô kɛ̀ tán nyɛ̀n ecüì nyɛ́n hán anvrɛn ɛnvra lɔ fɛn, eci-hán mɛ̀n mán ankà-dɔ́ mɛ̀n.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.