Kpàkpà timote 5
5
Eci-hán ɔmùan-zri-di-bɔ̀ tɛ̀sɛ̀n
1E bɩ́ dɔ́ ebrè-di ankà ɛ tán nɛ̀ngbànvri-wrɔn, tɛ́n ɛ̀ yɩ́ nɛ̀n edù ankà-dɔ́ mɛ̀n kɛ̀ hán le e zi hɔ́. È hán sùgban-bɔ̀ hɔ̀n eci kɛ̀ hán le ɔmuan-ẅì hɔ̀n hɔ́, 2wúyɔ̀ cüìcüì hɔ̀n kɛ̀ hán le ɔmuan hɔ̀n hɔ́, mán sùgban wúyɔ̀ hɔ̀n kɛ̀ hán le ɔmuan-ẅì hɔ̀n wúyɔ̀ hɔ́, eci-hán fifiemɛ̀n.
3Ɛ̀ wá ɛngrɔn wúyɔ̀ hɔ̀n esùva ɛwá mɛ̀n, yɔ hɔ̀n léyi annànwɔrɛ mɛ̀n kè sɩ̀ ẅɛn anwrɔn nɔn. 4Tɛ́n ke dú kɛ ɛngrɔn-hi tɔ̀n ẅɛn ɛẅì hɔ̀n mán nɛ́n nán-ẅì hɔ̀n, ke ji le ɛẅì hɔ̀n lɔ kɛ̀ ván y'ankaẅìbùtan ẅɛ̀n hɛ́n kɛ̀ tán yɔ dùku y'ɛmɛ̀n-bɔ̀, kè dú ɛnvrakpà ci-hán, yakɛ yɔ tán yɔ eci léyi dú y'ɛkɔrɛ̀-wá ci nɔn. Nyàn eci léyi kɛ cüɛn Ɔwɔ ɛvɛ̀ nɔn. 5Ɛngrɔn-hi léyi annanwɔrɛ mɛ̀n lɔ, dú nɛ́n zri, kè sɩ̀ ẅɛ̀n ɔwrɔn zriɛmɛ́n hɩ ká wá nɛ̀n esùva nɔn, bɩ́ n'esɛ́ wá Ɔwɔ mɛ̀n; ɛnnyran mán ɛcɛ̀n nɛ sɛ́n Ɔwɔ, ô kɛ̀ wá nɛ̀n ɛkɔrɛ̀. 6Tɛ́n ɛngrɔn-hi léyi n'ankàtro dú ɔkoran wú nɔn, nɛ́n wù kɩ nɛ̀n yɛ́, ke dú kɛ nɛ́n kɔrɛ̀ nɛ̀n yɛ́ mán. 7Nyàn ankà léyi ke ji le è kore yɔ, ô ye bɩ́ cɔ́ eci-gbàngbàn zriɛmɛ́n y'ɔwú. 8Ke dú kɛ ɔwrɔn tɔ̀n, ke sɩ́ wá n'ɛmɛ̀n-wrɔn esùva, annànnàn le nɛ́n dùku n'ɛmɛ̀n-bɔ̀, nɛ frɛ́n n'ankaẅì-bùtan kɩ, nɛ̀n krɛfɔn nɛ̀n vrán ɔwrɔn tɔ̀n léyi kè sɩ̀ ẅɛ̀n ankaẅì-bùtan nɔn.
9Ke dú kɛ ɛngrɔn-hi ke ji kɛ wá n'ebi owrúemɛ̀n, ô kɛ̀ hán Ɔwɔ kɔ̀hɔ̀n, ke ji le ke sɩ̀ zrɔ̀a mán nɛ̀n ẅɛn ɛnnànwàn kru ɛkoẅi anhɔ̀n. Zɛtɛn ke ji le nɛ̀n di ɛngrɔn ɛdɛ̀n zri, 10ô ye nyri n'ɛci ankrànkràn hɔ̀n léyi nɛ̀n hán nɔn, mán ɔmu le nɛ̀n hán nɛ̀n wɔrɔ n'ɛẅì hɔ̀n, nɛ̀n nyrì ẅɛn nɛ̀nnyàn-bɔ̀, nɛ̀n jru ankaẅì-bùtan-ẅɛn-bɔ̀ annan, nɛ̀n wá ɛmian bɔ̀ ɛkɔrɛ̀, ô nɛ̀n hán ɛci anvrɛnvrɛn mɛ̀ntɛ mɛ̀ntɛ hɔ̀n.
11Ɛngrɔn-wúyɔ̀ hɔ̀n léyi dú sùgban wúyɔ̀ nɔn, ke sɩ́ ji le ɛ wá yɔ ebi owrúemɛ̀n; ɔmuhi ɛnvra léyi yɔ wúcɔ̀-yirì ankàtro kɛ vá yɔ ɛnkruemɛ̀n nɔn, yɔ sɩ̀ vru nyan Krisì ezì hɛ̀, 12kɩ ɔmu lɔ de yɔ bru ɛgbàn mɛ̀n ɛnvra léyi yɔ teze yɔ kpàkpà mùan-wá Ɔwɔ tɛ̀sɛ̀n nɔn. 13Kɩ ɛnvra léyi yɔ sɩ̀ vrù ẅɛ̀n eci zriɛmɛ́n hán nɔn, yɔ ẅɛn eci-hán wrù kɩ yɔ ci ebɩ́-bɩ́; tɛ́n eci léyi zeze krɛgbàn nɔn, yɔ srɔ ɛdrɛ́ wúyɔ̀ kɩ yɔ dɔ́ ankà lɔ fɛn, yɔ dɔ́ ankà léyi ke sɩ́ crɛ nyan yɔ nɔn. 14Hɩ le kruhú de me ji le ɛngrɔn-wúyɔ̀ léyi dú sùgban wúyɔ̀ nɔn, kè vru kè yiri wúcɔ̀, yɔ bî ɛẅì, ô yɔ nyrì ẅɛn y'eyiri-bɩ́, ô yɔ bɩ́ tán bɔ́ ɛgbri-bɔ̀ ɛkɔrɛ̀levri kɛ dɔ́ ankà-gbàn ke kú bɔ̀ ɛwú. 15Ɔmuhi ɛngrɔn-wúyɔ̀ janbɔ̀ cɔhɔ́ Ɔwɔ levri ô kɛ kɛ́n Anwa-wrɔn ɛsɛ̀n. 16Tɛ́n ke dú kɛ ankaẅìbùtan-hi tɔ̀n ẅɛn ɛngrɔn-wúyɔ̀ dú n'ɛmɛ̀n lɔ mɛ̀n, ke ji le nɛ̀n wá yɔ esùva, ô yɔ bɩ́ srɔ Ɔwɔ-fɛcüè lowru, ô Ɔwɔ-fɛcüè mán kɛ̀ cɔ́ ɛyri kɛ̀ wá ɛngrɔn-wúyɔ̀ hɔ̀n léyi kè sɩ̀ ẅɛ̀n anwrɔn annànwɔrɛ mɛ̀n nɔn, ɛkɔrɛ̀.
17Ɛcüìcüì-bɔ̀ léyi kɛ nyrɔn Ɔwɔ-fɛcüè lɔ nɔn, zrɔ tán le y'ɔwɔ̀ɛn-dì lɔ kɛ̀ hɔ́n ɛwú, anannan le yɔ hɔ̀n léyi kɛ dɔ̀, kɩ ke yé Ɔwɔ ankà nɔn. 18Annanwɔrɛ mɛ̀n lɔ, Owrú kɛ dɔ̀ le: “Ɛnnànman léyi kɛ hán ɔkɔhɔ̀n ankɛ̀tɛ mɛ̀n nɔn, ye bɩ́ kora nɛ̀n ɔmùan”, kɩ: “Ɔkɔhɔ̀n hán-wrɔn ẅɛn ɔwɔ̀ɛn-di kɔrɛ̀levri.” 19E bɩ́ shri ankà-gbàn tɔ̀n léyi yɛ lɛ dɔ̀ ku ecüìcüì-wrɔn tɔ̀n ɛwú, ke dú kɛ ankà lɔ kè sɩ̀ ẅɛ̀n dalɛfuɛdi-bɔ̀ anhyrɛ̀ mán anhɔ̀n. 20Ke dú kɛ ɔwrɔn tɔ̀n kɛ hán eci-gbàngbàn tɔ̀n, ɛ dɔ́ nɛ̀n ankà anwrɔn mɛ̀n, ô anwrɔn ndɔ lɔ mán kɛ ẅɛn ɛnjansù.
21Mɛ sán mɛ́n eci-hán ndɔ lɔ Ɔwɔ zìwú ɔmùan-ɛwú-sɩ́emɛ̀n, Zhezü Krisì zìwú mán Ɔwɔ-kùyüre-bɔ̀ prɔnprɔn hɔ̀n zìwú: ɛ̀ wá eci-hán ndɔ léyi mɛ́n wá tán mɛ́n nɔn, ɛnyrɔnnan mɛ̀n, e bɩ́ hán eci kɛ vɛ́n ɔwrɔnwrɔn tɛ̀sɛ̀n. 22E bɩ́ cüi edù, e di ɔwrɔn tɔ̀n ankɔrɛ̀ ɛwú, ô ɛ wá nɛ̀n ecüìcüì, Ɔwɔ-fɛcüè mɛ̀n. E bɩ́ bru anwrɔn nyantɛn hɔ̀n gbàn-hán lɔ mɛ̀n: è dú ɛfifiemɛ̀n.
23Ɛ̀ kɛ́n v'ɛnshi zri mì lɔ ɛ̀ hɛ́n, tɛ́n è bɩ́ ɛntàn wɔnsɛn ẅiɛ, ô kɛ̀ wá mɛ́n ɛkɔrɛ̀ ɛcizîemɛ̀n, ɔmuhi ɛnlɔẅiɛ kɛ dá mɛ́n frɛfrɛ nɔn.
24Anwrɔn janbɔ̀ gbàn, yɛ kán kpetee yakɛ ye ci yɔ ɛmrɛ̀n; tɛ́n anwrɔn nyantɛn hɔ̀n yri tɛn, ɛnvra kɛ vacì yakɛ yɔ kɔnbru. 25Ɛci ankrankran hán lɔ mán, yɔ mán yɛ kán yɔ kpetee, kɩ yɔ hɔ̀n léyi ye sɩ̀ gɔ̀ kàn mán nɔn, ke sɩ́ dú ɛban mɛ̀n.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.