Kpàkpà timote 2
2
Ankà-yé, ɔwɔ-sɛ́n ankà wú
1Ɛnvrapkà lɔ, mɛ wá tán le yɛ sán Ɔwɔ eci, yɛ sɛ́n nɛ̀n, ye wùbi nɛ̀n, ô yɛ tán nɛ̀n ɔkùɛn kè dú ɛci kɔrɛkɔrɛ lɔ fɛn tɛn. 2Ke ji le yɛ sɛ̀n tán ɛnnɛncüì hɔ̀n mán ɛyri-ẅɛn-bɔ̀, ô bɔ̀ ẅɛn ɛwúvà wɔwɔ léyi ɛwá dú ɛmɛ̀n, b'Ɔwɔ tɛ̀sɛ̀n và anvrɛnvrɛn mɛ̀n. 3Nyàn eci léyi zrɔ, kɩ kɛ cüɛn Ɔwɔ ɛvɛ̀, bɔ́ Ebɩ̀die-wrɔn 4léyi ke ji le anwrɔnẅì lɔ fɛn kɛ̀ cɔ́ ebɩ̀die, ô yɔ nyri eci léyi dú ankà annanwɔrɛ nɔn. 5Ɔmuhi Ɔwɔ zri kɩ dù kɩ ɔwrɔn zri Zhezü Krisì dú Ɔwɔ mán anwrɔnẅì granmɛ̀n nyɔnwrɔn, ɔwrɔnẅì Zhezü Krisì 6léyi srɔ n'edomɛ̀n anwɔba-ci, ô nɛ̀n srú bɔ́ lɛ fɛn nɛ̀n die. Ɔmu lɔ de ɛnvra léyi yɛ wá nɔn, nɛ̀n yé tán le, Ɔwɔ ke ji le anwrɔnẅì lɔ fɛn kɛ̀ cɔ́ ebɩdie nɔn. 7Ndɔ lɔ kruhú de, yɛ wá mɛ̀n ɔkɔ̀hɔ̀n-wá-wrɔn léyi ke ji le kè yé anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, ankaẅì-bùtan mán annànwɔrɛ ankà. Mɛ́n sɩ́ ẅɛn ɛyɔ̀n, mɛ dɔ́ annànwɔrɛ ankà.
8Me ji le eci lɔ fɛn mɛ̀n, anwrɔnẅì kɛ̀ sɛ̀n, yɔ sɩ́ ɛmàn fifi hɔ̀n ɛwú, ɛmɛ̀nhyì mán ecüìwrɔn hɛ́n ke bɩ́ dú ɛmɛ̀n.
9Me ji le wúyɔ̀ mán kɛ ẅɛn ɛci edomɛ̀n anvrɛnvrɛn, ɔwá mán edomɛ̀n ɛnhi-sɩ́ kè dú ɛmɛ̀n; yɔ bɩ́ há ɛnkru vɛnvɛn, yɔ bɩ́ wá ansìkɛ mán ɛbrɛci brobebe edomɛ̀n, kɩ edomɛ̀n ẅɛn-ci mán ke bɩ́ dú eci-gbrɛ́n-ci, 10tɛ́n y'eci-hán kè dú anvrɛnvrɛn, kɛ̀ cá wúyɔ̀ hɔ̀n léyi ẅɛn Ɔwɔ wá nɔn. 11Ke ji le wúyɔ̀ kɛ̀ cɔ́ ankà-yé ɔmùan-kɛ̀n-hɛ́n mɛ̀n mán edomɛ̀n ɛnhi-sɩ́emɛ̀n kokroo. 12Mɛ́n sɩ́ tán ɛnnyɔnwrɔn ɛkɔrɛ̀levri kè yé ankà, ô kɛ̀ hɛ́n ɛncɔnwrɔn hán; ke ji le nɛ̀n kɛ́n ɔmùan nɛ̀n hɛ́n. 13Annanwɔrɛ mɛ̀n lɔ, Ɔwɔ gɔ́ hán Adamɛ̀n, kɩ Ɛvɛ̀n kɛ́n nɛ̀n. 14Kɩ kè sɩ̀ dù Adamɛ̀n de kè tezè n'edomɛ̀n anwawrɔn kɛ̀ frɛ́n nɛ̀n, tɛ́n Ɛvɛ̀n léyi dú ɛnnyɔnwrɔn nɔn, de bru ɛfrɛ́n ankà mɛ̀n, kɩ fɔndɔ́n Ɔwɔ nyanmàn. 15Tɛ́n ɛnnyɔnwrɔn kɛ lɛ cɔ́ ebɩdie n'ɛẅì bîemɛn, ke dú kɛ ne dú ankaẅìbùtan ẅɛn mɛ̀n, ɛcüɛ̀n mán prɔnprɔn mɛ̀n, edomɛ̀n ɛnhi-sɩemɛ̀n.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.