1 Tesalonikɛ̀n anmàn-bɔ̀ 1
1
Ebinyan
1Ebinyan ndɔ lɔ dú Pɔlɛ̀n, Silasɛ̀n mán Timote yri kɛ và.
Tɛsalonikɛ̀n wɔ-fɛcüè léyi dú Ɔwɔ Zi mán Ɛẅɛnwrɔn Zhezü Krisì tɛn nɔn: nboafɔ̀n mán anwɔwɔ kè dú nyɛ tɛn.
Tesalonikɛ̀n anmàn-bɔ̀ wúvà mán y'ankaẅì-bùtan
2Bɔ́ tán ɛnvra lɔ fɛn Ɔwɔ ɔkùɛn ny'ɛkruhú kɩ bɔ́ tro ny'ankà b'ɔwɔ-sɛ̀n hɔ̀n lɔ fɛn mɛ̀n. 3Annanwɔrɛ mɛ̀n lɔ, bɔ́ kro-sɩ́ bɔ́ edomɛ̀n Ɔwɔ bɔ́ Zi zìwú ny'ankaẅì-bùtan léyi ẅɛn vɔ̀nshɛ́, nyɛ cüɛ̀n léyi ẅɛn edùyì mán ny'esɛ́ annanwɔrɛ léyi nyɛ́n ẅɛn bɔ́ Ɛẅɛnwrɔn Zhezü Krisì wú nɔn. 4Awrɔn-nɛ́n-muan-ẅì hɔ̀n, bɔ̀ nyri ɔmu le Ɔwɔ cüɛn nyɛ̀n kɩ mrɛ́n nyɛ̀n nbɩ, ô nyɛ́n dú nɛ tɛn. 5Annanwɔrɛ mɛ̀n lɔ, ɛnvra léyi bɔ̀ dɔ́ nyɛ̀n Ɛmɛẅi ankà ankrankran lɔ nɔn, kè sɩ̀ dù anmùan mɛ̀n ankà-dɔ̀ tɛ̀-kɩ, tɛ́n Ɛnhɛ́n Prɔnprɔn kɔrɛ̀-srɔn, n'ɛkɔrɛ̀-wá mán n'esɛ́ annanwɔrɛ mɛ̀n mɛhi. Nyɛ́n nyri ɔmu le bɔ̀ hán bɔ̀ ẅɛn bɔ́ edomɛ̀n ny'ɛmɛ̀n, ny'anvrɛn kruhú. 6Nyɛ́n bɩ́ bɔ́ sɛnpò mán Ɛẅɛnwrɔn tɛn lɔ; nyɛ́n kán ɛgbàn bobrebe, ɔmu tɛ̀kɩ nyɛ́n bɩ́ Ɔwɔ mùan-ankà-dɔ̀ lɔ pɔpüɛ̀ mɛ̀n, pɔpüɛ̀ léyi Ɛnhɛ́n Prɔnprɔn kɛ tán nɔn. 7Ɔmu lɔ de, nyɛ́n srɔ sɛnpò nyɛ́n tán ankaẅì-bùtan-ẅɛn-bɔ̀ léyi dú Maseduhanɛ̀n mán Akahi kpɔsɔ wú nɔn. 8Annanwɔrɛ mɛ̀n lɔ, kè sɩ̀ dù Maseduhanɛ̀n mán Akahi kpɔsɔ wú tɛ̀kɩ Ɛẅɛnwrɔn ankà-dɔ̀ lɔ kè bonyì hɛ̀n, tɛ́n ɛyri lɔ fɛn de ny'Ɔwɔ mɛ̀n ankaẅì-bùtan lɔ bonyì nɔn. Bɔ́ sɩ̀ ẅɛ̀n ankà b'á dɔ́ hɩ wú lɔ. 9Yɔ lɔ fɛn, yɔ dɔ́ ɔmu le nyɛ́n ẅɛn bɔ̀ ɛnvra léyi bɔ̀ hɔ́n ny'anmàn mán ɔmu le nyɛ́n hán nyɛ́n tecüe antɛ̀-buri-Wɔ, hɩ nyɛ́n crɛ ezì nyɛ́n kɛ́n Ɔwɔ, ô nyɛ́n srɔ n'eci-bɩ̀tan-bɔ̀, nɛ́n léyi nɛ̀n dú Ɔwɔ kɔrɛkɔrɛ mán annanwɔrɛ nɔn. 10Nyɛ vrá Zhezü léyi dú n'Ɛnẅì, kè dú anhobɩ́ kɛ̀ và. Nɛ́n de Ɔwɔ bɩ́ nɛ̀n owú-bɔ̀ mɛ̀n sɩ́ ɔkɔrɛ-bɔ̀ mɛ̀n; nɛ mrɛ́n bɔ̀ nɛ̀n sɔhɔ́ Ɔwɔ mrɛ̀ncì léyi kɛ́n eburi nɔn mɛ̀n.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.