1 Korɛntɛ̀n anmàn-bɔ̀ 3
3
Ɔwɔ ci-bɩ̀tan-bɔ̀
1Annanwɔrɛ mɛ̀n lɔ, anwrɔn-nɛ́n-muan-ẅì hɔ̀n, mɛ̀n sɩ̀ cɔ̀ nyɛ̀n ankà-dɔ́ yri kɛ̀ hàn anwrɔn hɔ̀n léyi ẅɛn Ɔwɔ Hɛ́n nɔn: mɛ̀n dɔ́ nyɛ̀n ankà hán ɛnhibù ndɔ lɔ bɔ̀ hɔ́, hán ɛẅì hɔ̀n léyi dú Krisì ankaẅì-bùtan mɛ̀n nɔn. 2Ɛnyàn-shi de mɛ̀n tán nyɛ̀n nɔn, kè sɩ̀ dù ɛci-zî annanwɔrɛ, ɔmuhi ɛci-zî ndɔ lɔ ke sɩ̀ bɩ́ nyɛ̀n edù rɔ́! Kɩ zɛtɛ̀ lɔ mán, nyɛ́n sɩ̀ ẅɛn n'ɛkɔrɛ̀-levri, 3ɔmuhi ny'ɛwúvà dú cá ɛnhibù ndɔ lɔ bɔ̀ wúvà hɔ́. Hɩ le ecüì-hi-kɔ̀n mán annankran dú nyɛ̀n ɛmɛ̀n, nyɛ́n sɩ́ yé tán le nyɛ́n dú ɛnhibù ndɔ lɔ n'anwrɔn, kɩ nyɛ nyrɔn ny'edomɛ̀n kɛ hán anwrɔnẅì hɔ́a? 4Ɛnvra léyi ny'ɛmɛ̀n lɔ ɔwrɔn tɔ̀n kɛ dɔ̀ le: “Mɛ̀n dú Pɔlɛ̀n tɛn” kɩ ɛnyàntɛn tɔ̀n kɛ dɔ̀ le: “Mɛ̀n dú Apolɔsɛ̀n tɛn”, ɔmu lɔ, nyɛ́n sɩ́ hán ɔwrɔn totɔtɔn ci-hán-ciɛ?
5Annanwɔrɛ mɛ̀n lɔ, antɔnwrɔn dú Apolɔsɛ̀n hàn? Kɩ antɔnwrɔn dú Pɔlɛ̀n hàn? Bɔ́ dú Ɔwɔ ci-bɩ̀tan-bɔ̀ kora-sà hɔ̀n léyi y'ɛwú lɔ nyɛ́n cɔ́ ankaẅì-bùtan nɔn. Bɔ́ ɛmɛ̀n lɔ ɔwrɔnwrɔn kɛ hán ɔkɔhɔ̀n léyi Ɛẅɛnwrɔn wá tán nɛ̀n nɔn: 6Mɛ̀n wá ɛtɛ̀-ẅì ɛnhibɩ́, Apolɔsɛ̀n ku nɛ̀n ɛnshi, tɛ́n Ɔwɔ de hán nɛ̀n nɛ̀n sɔ́ nɔn. 7Ɔmu lɔ, ɔwrɔn léyi kɛ tɛ́ ɛtɛ̀-ẅì mán ɔwrɔn léyi ke ku nɛ̀n ɛnshi nɔn, yɔ sɩ̀ ẅɛ̀n vɔ̀nshɛ́: Ɔwɔ zri kɩ yɛ krɛ̀, nɛ́n léyi nɛ̀n hán ɛtɛ̀-ẅì lɔ sɔ́ nɔn. 8Ɔwrɔn léyi kɛ tɛ̀, mán ɔwrɔn léyi ke ku ɛnshi, yɔ, anwrɔn anhyrɛ̀ lɔ yɔ krɔn; Ɔwɔ kɛ lɛ tán ɔwrɔnwrɔn n'anjakpà n'ɔkɔ̀hɔ̀n-hán mɛ̀n. 9Ɔmuhi bɔ̀ dú Ɔwɔ kɔrɛ̀-wá-bɔ̀, kɩ nyɛ́n dú Ɔwɔ kɛ̀tɛ̀ nɔn.
Nyɛ́n vru nyɛ́n dú ɔwɔn léyi Ɔwɔ kù nɔn. 10M'ankà-nyrì léyi Ɔwɔ tán mɛ̀n nɔn, mɛ́n bɩ mɛ̀n hán ɔkɔhɔ̀n hán ɔwɔn-kú-wrɔn anvrɛnvrɛn tɔ̀n hɔ́, kɩ mɛ̀n wá ɔwɔn-bù ɛnhibɩ́. Zɛtɛ̀ lɔ, ɔwrɔn tɔ̀n ke ku ɔwɔn ɔwɔn-hi-nan lɔ ɛwú. Tɛ́n ke ji le ɔwrɔnwrɔn kɛ̀ wá esùva n'ɔwɔnkuemɛ̀n. 11Ɔmuhi Zhezü Krisì mɛ̀n de ɔwɔn-hinan-bù kɛ cɔ́ n'ɛhɛ́n-yri, kɩ ɔwrɔn zriɛmɛ́n ke sɩ̀ hɛ́n obù nyàntɛn nanvrɛn lɔ nɔn. 12Anwrɔn ndɔ hɔ̀n ke le bɩ́ ansɩ̀kɛ, ɔkùa, ɛnvra tɔ̀n hô, ɛbùẅì ankrankran kè ku ɔwɔn lɔ; anwrɔn janbɔ̀ ke le bɩ́ ɔbɔ̀hɔ́, ɛfi-sè, ɛnvra tɔ̀n hô, ɛfi-cüì. 13Tɛ́n ɔwrɔnwrɔn kɔ̀hɔ̀n léyi hán nɔn de ke le yé n'edomɛ̀n kpetehe ɛmrɛ̀nci-bì lɔ nɔn. Annanwɔrɛ mɛ̀n lɔ, ɛnbì ndɔ lɔ ke le yé n'edomɛ̀n ɛnhyà mɛ̀n, kɩ ɛnhyà kɛ lɛ nyan ɔwrɔnwrɔn kɔ̀hɔ̀n, ô kè yé eci léyi dú nɛ̀n nɔn. 14Ke dú kɛ ɔwrɔn tɔ̀n wɔn léyi kù nɔn, edù kɛ sɔ́ ɛnhyà mɛ̀n hô, nɛ lɛ cɔ́ anjapkà tɔ̀n. 15Zɛtɛn, ke dú kɛ ɔwɔn lɔ kɛ biɛ ɛnhyà mɛ̀n hô, ɔwɔn-ku-nɛ́n-zi lɔ ke sɩ̀ cɔ́ anjakpà; tɛ́n nɛ́n mumù nɛ lɛ cɔ́ ɛbɩdie, kɩ ke le dù kɛ lɛ hán le nɛ̀n ci ɛnhyà-ẅì wanzi hɔ́.
16Annanwɔrɛ mɛ̀n lɔ nyɛ́n nyri ɔmu le nyɛ́n dú Ɔwɔ wɔn, kɩ Ɔwɔ Hɛ́n dú nyɛ̀n ɛmɛ̀n. 17Zɛtɛn, ke dú kɛ ɔwrɔn tɔ̀n kɛ jrɛ́ Ɔwɔ wɔn lɔ, Ɔwɔ kɛ lɛ jrɛ́ ɔwrɔn lɔ. Ɔmuhi Ɔwɔ wɔn lɔ dú prɔnprɔn, kɩ nyɛ́n de nyɛ́n dú n'ɔwɔn lɔ nɔn.
18Ɔwrɔn zriɛmɛ́n ke bɩ́ frɛ́n n'edomɛ̀n: ke dú kɛ ɔwrɔn tɔ̀n ny'ɛmɛ̀n lɔ ke tro le nɛ̀n ẅɛn ankà-nyrì, ɛnhibù ndɔ lɔ zìwú hô, ke ji le nɛ̀n srɔ nmù-wrɔn, ô nɛ̀n dú ankà-nyri-wrɔn annanwɔrɛ mɛ̀n. 19Ɔmuhi ɛnhibù ndɔ lɔ ankà-nyrì dú nmù-ci-hán Ɔwɔ zìwú nɔn. Annanwɔrɛ mɛ̀n lɔ, Owrú Prɔnprɔn kɛ dɔ̀ le: “Ɔwɔ kɛ ẅɛn ankà-nyri-bɔ̀, yɔ dùku y'ɛfrɛ́n tanwrɔn lɔ mɛ̀n.” 20Ne vru nɛ dɔ̀ le: “Ɛẅɛnwrɔn nyri ankà-nyri-bɔ̀ ankà-tro hɔ̀n lɔ, nɛ̀n nyri ɔmu le y'ankà-tro lɔ kè sɩ̀ ẅɛ̀n vɔ̀nshɛ́.” 21Ɔmu lɔ, ke sɩ́ ji le ɔwrɔn zriɛmɛ́n kɛ̀ ẅɛn ɔmùan-gbù anwrɔnẅì wú. Ɔmuhi eci lɔ fɛn dú nyɛ tɛn nɔn: 22Pɔlɛ̀n, Apolɔsɛ̀n, Piɛrɛ̀n, ɛnhibù, ɛwúvà, owù, zɛtɛ̀ vrá mán ɛnvra léyi dú ezì kɛ và nɔn, fɛn lɔ dú nyɛ tɛn; 23tɛ́n nyɛ́n, nyɛ́n dú Krisì tɛn kɩ Krisì dú Ɔwɔ tɛn.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.
1 Korɛntɛ̀n anmàn-bɔ̀ 3
3
Ɔwɔ ci-bɩ̀tan-bɔ̀
1Annanwɔrɛ mɛ̀n lɔ, anwrɔn-nɛ́n-muan-ẅì hɔ̀n, mɛ̀n sɩ̀ cɔ̀ nyɛ̀n ankà-dɔ́ yri kɛ̀ hàn anwrɔn hɔ̀n léyi ẅɛn Ɔwɔ Hɛ́n nɔn: mɛ̀n dɔ́ nyɛ̀n ankà hán ɛnhibù ndɔ lɔ bɔ̀ hɔ́, hán ɛẅì hɔ̀n léyi dú Krisì ankaẅì-bùtan mɛ̀n nɔn. 2Ɛnyàn-shi de mɛ̀n tán nyɛ̀n nɔn, kè sɩ̀ dù ɛci-zî annanwɔrɛ, ɔmuhi ɛci-zî ndɔ lɔ ke sɩ̀ bɩ́ nyɛ̀n edù rɔ́! Kɩ zɛtɛ̀ lɔ mán, nyɛ́n sɩ̀ ẅɛn n'ɛkɔrɛ̀-levri, 3ɔmuhi ny'ɛwúvà dú cá ɛnhibù ndɔ lɔ bɔ̀ wúvà hɔ́. Hɩ le ecüì-hi-kɔ̀n mán annankran dú nyɛ̀n ɛmɛ̀n, nyɛ́n sɩ́ yé tán le nyɛ́n dú ɛnhibù ndɔ lɔ n'anwrɔn, kɩ nyɛ nyrɔn ny'edomɛ̀n kɛ hán anwrɔnẅì hɔ́a? 4Ɛnvra léyi ny'ɛmɛ̀n lɔ ɔwrɔn tɔ̀n kɛ dɔ̀ le: “Mɛ̀n dú Pɔlɛ̀n tɛn” kɩ ɛnyàntɛn tɔ̀n kɛ dɔ̀ le: “Mɛ̀n dú Apolɔsɛ̀n tɛn”, ɔmu lɔ, nyɛ́n sɩ́ hán ɔwrɔn totɔtɔn ci-hán-ciɛ?
5Annanwɔrɛ mɛ̀n lɔ, antɔnwrɔn dú Apolɔsɛ̀n hàn? Kɩ antɔnwrɔn dú Pɔlɛ̀n hàn? Bɔ́ dú Ɔwɔ ci-bɩ̀tan-bɔ̀ kora-sà hɔ̀n léyi y'ɛwú lɔ nyɛ́n cɔ́ ankaẅì-bùtan nɔn. Bɔ́ ɛmɛ̀n lɔ ɔwrɔnwrɔn kɛ hán ɔkɔhɔ̀n léyi Ɛẅɛnwrɔn wá tán nɛ̀n nɔn: 6Mɛ̀n wá ɛtɛ̀-ẅì ɛnhibɩ́, Apolɔsɛ̀n ku nɛ̀n ɛnshi, tɛ́n Ɔwɔ de hán nɛ̀n nɛ̀n sɔ́ nɔn. 7Ɔmu lɔ, ɔwrɔn léyi kɛ tɛ́ ɛtɛ̀-ẅì mán ɔwrɔn léyi ke ku nɛ̀n ɛnshi nɔn, yɔ sɩ̀ ẅɛ̀n vɔ̀nshɛ́: Ɔwɔ zri kɩ yɛ krɛ̀, nɛ́n léyi nɛ̀n hán ɛtɛ̀-ẅì lɔ sɔ́ nɔn. 8Ɔwrɔn léyi kɛ tɛ̀, mán ɔwrɔn léyi ke ku ɛnshi, yɔ, anwrɔn anhyrɛ̀ lɔ yɔ krɔn; Ɔwɔ kɛ lɛ tán ɔwrɔnwrɔn n'anjakpà n'ɔkɔ̀hɔ̀n-hán mɛ̀n. 9Ɔmuhi bɔ̀ dú Ɔwɔ kɔrɛ̀-wá-bɔ̀, kɩ nyɛ́n dú Ɔwɔ kɛ̀tɛ̀ nɔn.
Nyɛ́n vru nyɛ́n dú ɔwɔn léyi Ɔwɔ kù nɔn. 10M'ankà-nyrì léyi Ɔwɔ tán mɛ̀n nɔn, mɛ́n bɩ mɛ̀n hán ɔkɔhɔ̀n hán ɔwɔn-kú-wrɔn anvrɛnvrɛn tɔ̀n hɔ́, kɩ mɛ̀n wá ɔwɔn-bù ɛnhibɩ́. Zɛtɛ̀ lɔ, ɔwrɔn tɔ̀n ke ku ɔwɔn ɔwɔn-hi-nan lɔ ɛwú. Tɛ́n ke ji le ɔwrɔnwrɔn kɛ̀ wá esùva n'ɔwɔnkuemɛ̀n. 11Ɔmuhi Zhezü Krisì mɛ̀n de ɔwɔn-hinan-bù kɛ cɔ́ n'ɛhɛ́n-yri, kɩ ɔwrɔn zriɛmɛ́n ke sɩ̀ hɛ́n obù nyàntɛn nanvrɛn lɔ nɔn. 12Anwrɔn ndɔ hɔ̀n ke le bɩ́ ansɩ̀kɛ, ɔkùa, ɛnvra tɔ̀n hô, ɛbùẅì ankrankran kè ku ɔwɔn lɔ; anwrɔn janbɔ̀ ke le bɩ́ ɔbɔ̀hɔ́, ɛfi-sè, ɛnvra tɔ̀n hô, ɛfi-cüì. 13Tɛ́n ɔwrɔnwrɔn kɔ̀hɔ̀n léyi hán nɔn de ke le yé n'edomɛ̀n kpetehe ɛmrɛ̀nci-bì lɔ nɔn. Annanwɔrɛ mɛ̀n lɔ, ɛnbì ndɔ lɔ ke le yé n'edomɛ̀n ɛnhyà mɛ̀n, kɩ ɛnhyà kɛ lɛ nyan ɔwrɔnwrɔn kɔ̀hɔ̀n, ô kè yé eci léyi dú nɛ̀n nɔn. 14Ke dú kɛ ɔwrɔn tɔ̀n wɔn léyi kù nɔn, edù kɛ sɔ́ ɛnhyà mɛ̀n hô, nɛ lɛ cɔ́ anjapkà tɔ̀n. 15Zɛtɛn, ke dú kɛ ɔwɔn lɔ kɛ biɛ ɛnhyà mɛ̀n hô, ɔwɔn-ku-nɛ́n-zi lɔ ke sɩ̀ cɔ́ anjakpà; tɛ́n nɛ́n mumù nɛ lɛ cɔ́ ɛbɩdie, kɩ ke le dù kɛ lɛ hán le nɛ̀n ci ɛnhyà-ẅì wanzi hɔ́.
16Annanwɔrɛ mɛ̀n lɔ nyɛ́n nyri ɔmu le nyɛ́n dú Ɔwɔ wɔn, kɩ Ɔwɔ Hɛ́n dú nyɛ̀n ɛmɛ̀n. 17Zɛtɛn, ke dú kɛ ɔwrɔn tɔ̀n kɛ jrɛ́ Ɔwɔ wɔn lɔ, Ɔwɔ kɛ lɛ jrɛ́ ɔwrɔn lɔ. Ɔmuhi Ɔwɔ wɔn lɔ dú prɔnprɔn, kɩ nyɛ́n de nyɛ́n dú n'ɔwɔn lɔ nɔn.
18Ɔwrɔn zriɛmɛ́n ke bɩ́ frɛ́n n'edomɛ̀n: ke dú kɛ ɔwrɔn tɔ̀n ny'ɛmɛ̀n lɔ ke tro le nɛ̀n ẅɛn ankà-nyrì, ɛnhibù ndɔ lɔ zìwú hô, ke ji le nɛ̀n srɔ nmù-wrɔn, ô nɛ̀n dú ankà-nyri-wrɔn annanwɔrɛ mɛ̀n. 19Ɔmuhi ɛnhibù ndɔ lɔ ankà-nyrì dú nmù-ci-hán Ɔwɔ zìwú nɔn. Annanwɔrɛ mɛ̀n lɔ, Owrú Prɔnprɔn kɛ dɔ̀ le: “Ɔwɔ kɛ ẅɛn ankà-nyri-bɔ̀, yɔ dùku y'ɛfrɛ́n tanwrɔn lɔ mɛ̀n.” 20Ne vru nɛ dɔ̀ le: “Ɛẅɛnwrɔn nyri ankà-nyri-bɔ̀ ankà-tro hɔ̀n lɔ, nɛ̀n nyri ɔmu le y'ankà-tro lɔ kè sɩ̀ ẅɛ̀n vɔ̀nshɛ́.” 21Ɔmu lɔ, ke sɩ́ ji le ɔwrɔn zriɛmɛ́n kɛ̀ ẅɛn ɔmùan-gbù anwrɔnẅì wú. Ɔmuhi eci lɔ fɛn dú nyɛ tɛn nɔn: 22Pɔlɛ̀n, Apolɔsɛ̀n, Piɛrɛ̀n, ɛnhibù, ɛwúvà, owù, zɛtɛ̀ vrá mán ɛnvra léyi dú ezì kɛ và nɔn, fɛn lɔ dú nyɛ tɛn; 23tɛ́n nyɛ́n, nyɛ́n dú Krisì tɛn kɩ Krisì dú Ɔwɔ tɛn.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.