1 Korɛntɛ̀n anmàn-bɔ̀ 16
16
Anwrɔn-nɛ́n-muan-ẅì hɔ̀n ci-fɔ̀n tán
1Eci-fɔ̀n léyi ye bɩ́ wá ankaẅì-bùtan-ẅɛn-bɔ̀ léyi dú Zherüzalɛmɛ̀n anmàn ɛkɔrɛ̀ nɔn, nyàn n'ankà-dɔ̀: Nyɛ́n hán eci kè ci ankà hɔ̀n léyi mɛ̀n dɔ́ Ɔwɔ-fɛcüè hɔ̀n léyi dú Galasi anmàn nɔn hɩ wú. 2Ɛnyànman-bì lɔ fɛn ɔwrɔnwrɔn kɛ̀ hɛ́n ɔhɔ́nan n'eyri ɛbemɛ̀n eci-fɔn-ci léyi nɛ́n cɔ̀ nɔn, ô ye bɩ́ vrá m'ɛvá bì lɔ, yakɛ yɛ fɔ́n eci. 3Ɛnvra léyi mɛ lɛ và nɔn, me le sɩ́ anwrɔn hɔ̀n léyi nyɛ́n mrɛ́n nyɛ́n bɩ, mɛ lɛ tán yɔ ɔkɔ̀hɔ̀n-wá wrú, yɔ bɩ́ ny'eci-fɔ́n-ci lɔ yɔ hɔ́n Zherüzalɛmɛ̀n anmàn. 4Kɩ ke dú kɛ ke ji le mɛ̀n mán mɛ́n hɔ́n nanvrɛn lɔ hô, yɔ mɛhi bɔ́ lɛ hɔ̀n.
Pɔlɛ̀n kɔ̀hɔ̀n-ci-hán
5Mɛ lɛ vá ny'edúyri, ɛnvra léyi ɔtrɔmɛ̀n lɔ me le ci Masedùhanɛ̀n kpɔsɔ wú, ɔmuhi me le ci nanvrɛn lɔ nɔn. 6Me bú tán le mɛ lɛ yɛ́ ny'edúyri ɛnvra jan, ɛshɛ̀ mumù lɔ fɛn; zɛtɛn, nyɛ lɛ wá mɛ̀n ɛkɔrɛ̀ m'ɛyri-hɔ́n mɛ̀n lɔ, ke dú ɛyri totɔtɔ̀n léyi mɛ lɛ hɔ̀n nɔn mán. 7Ɔmuhi mɛ́n sɩ́ ji mɛ̀n kán nyɛ̀n m'eciemɛ̀n tɛ̀kɩ. Mɛ ẅɛn esɛ́ le Ɛẅɛnwrɔn kɛ lɛ tán ɛkɔrɛ̀-levri mɛ̀n yɛ́ ny'edúyri ɛnvra jan. 8Tɛ́n, mɛ wá le mɛ̀n yɛ́ Efɛzɛ̀n anmàn, hàn kɩ kɛ̀ cɔ́ Ɛnhɛ́n-Prɔnprɔn nyànmán-bì lɔ. 9Ɔmuhi ɛnvra anvrɛnvrɛn tɔ̀n kɛ wá tán mɛ̀n vɔ̀nshɛ́ ci-hán tɔ̀n, kɩ mɛ̀n nyri ɔmu le ɛgbri-bɔ̀ cüɛn. 10Ke dú kɛ Timote kɛ và hô, nyɛ́n hán tán, ô ny'edúyri ci zriɛmɛ́n ke bɩ́ wú nɛ̀n edù, ɔmuhi nɛ hán ɔkɔ̀hɔ̀n kɛ hán mɛ̀n hɔ́, Ɛẅɛnwrɔn kɔ̀hɔn lɔ mɛ̀n nɔn. 11Ke sɩ́ ji le ɔwrɔn zriɛmɛ́n kè gbri nɛ̀n. Zrɔ tán le nyɛ́n wá nɛ̀n ɛkɔrɛ̀ nɛ̀n dú anwɔwɔmɛ̀n n'ɛyri-hɔ́n lɔ mɛ̀n, ô nɛ̀n cɔ́ ɛyri nɛ̀n vru nɛ̀n vá mɛ̀n ɛtɛ̀sɛ̀n, ɔmuhi mɛ̀n mán anwrɔn-nɛ́n-muan-ẅi hɔ̀n mɛhi bɔ́ vrá nɛ̀n nɔn. 12Bɔ́ muan-ẅì Apolɔsɛ̀n tɛn, me yɩ́ nɛ̀n edù ɛnvra zrizri ô nɛ̀n vá ny'edúyri nɛ́n mán anwrɔn-nɛ́n-muan-ẅì hɔ̀n ndɔ hɔ̀n lɔ mɛhi, tɛ́n nɛ́n sɩ́ ji nɛ̀n hán yi ci lɔ zɛtɛ̀ lɔ. Tɛ́n, nɛ lɛ vá nanvrɛn ɛnvra léyi nɛ lɛ cɔ́ eci-hán kɔrɛ̀-levri nɔn.
Ɛmɛẅitrɔ ankà-kran-yé mán ebinyan
13Nyɛ́n yɛ́ ɛshishiemɛ̀n ankaẅì-bùtan-ẅɛn mɛ̀n, nyɛ́n ẅɛn edùyì, nyɛ́n ẅɛn ecüì. 14Eci lɔ fɛn hán mɛ̀n lɔ nyɛ́n ẅɛn ɛcüɛ̀n. 15Nyɛ́n nyri Stefanasɛ̀n mán n'ɛmɛ̀n mɛ̀n-bɔ̀; nyɛ́n nyrì le Akahi kpɔsɔ wú lɔ, yɔ dú ɛnvrakpà-bɔ̀ léyi crɔn ɛnkru, kɩ yɔ dú fɛcüè krubɔrɛ ci-bɩ̀tan-kɔ̀hɔ́n mɛ̀n. Anwrɔn-nɛ́n-muan-ẅì hɔ̀n, zɛtɛn mɛ sán nyɛ̀n ndɔ lɔ: 16nyɛ́n teze ny'edomɛ̀n nyɛ́n tán anwrɔn ɔmu hɔ̀n lɔ mán yɔ hɔ̀n léyi yɔ mɛhi yɔ hán ɔkɔ̀hɔ̀n edùyiemɛ̀n nɔn, kɛ̀ nyrɔn nyɛ̀n. 17Mɛ̀n dú ɛnbɔrɛ-bruemɛ̀n, ɔmuhi stefanasɛ̀n, Fortünatüsɛ̀n mán Akahiküsɛ̀n kɛ và nɔn. Yɔ tán mɛ̀n eci léyi kɛ ẅɛn mɛ̀n ɛmìan ɛnvra léyi mɛ̀n sɩ̀ cɔ́ nyɛ̀n ɛkán yri nɔn, 18kɩ yɔ tán mɛ̀n ɛnbɔrɛ-bi-wá, hán ɔmu le yɔ hán yɔ tán nyɛ̀n nɔn. Nyɛ́n nyrì mrɛ́n anwrɔn ɔmu hɔ̀n lɔ! 19Ɔwɔ-fɛcüè-bɔ̀ léyi dú Azi kpɔsɔ wú nɔn ke bi nyɛ̀n nyan. Akilasɛ̀n, Prisilɛ̀n mán Ɔwɔ-fɛcüè léyi yɔ mɛhi yɔ bɔrɛkru y'edúyri nɔn, ke yüre nyɛ̀n y'ɛnbɔrɛ ankrankran binyan Ɛẅɛnwrɔn mɛhi y'ɔbɔ̀sɔ̀ lɔ mɛ̀n. 20Anwrɔn-nɛ́n-muan-ẅì hɔ̀n lɔ fɛn léyi dú ɛnu lɔ nɔn, ke bi nyɛ̀n nyan. Nyɛ́n bí ny'edomɛ̀n nyɛ́n nyan ɔwrɔn-nɛ́n-muan-ẅì mùan-sɔ́n mɛ̀n. 21Mɛ́n dùku m'antamɛ̀n de me merɛ́n ankà-dɔ̀ ndɔ hɔ̀n lɔ nɔn: Pɔlɛ̀n binyan. 22Ke dú kɛ ɔwrɔn tɔ̀n ke sɩ́ cüɛn Ɛẅɛnwrɔn hô, muzhie kɛ̀ bó nɛ̀n! Maranata, Bɔ́ Ɛẅɛnwrɔn, và! 23Ɛẅɛnwrɔn Zhezü boafɔ̀n kè dú nyɛ̀n ɛmɛ̀n. 24Mɛ cüɛn nyɛ lɛ fɛn Zhezü Krisì mɛhi b'ɔbɔ̀sɔ̀ lɔ mɛ̀n.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.
1 Korɛntɛ̀n anmàn-bɔ̀ 16
16
Anwrɔn-nɛ́n-muan-ẅì hɔ̀n ci-fɔ̀n tán
1Eci-fɔ̀n léyi ye bɩ́ wá ankaẅì-bùtan-ẅɛn-bɔ̀ léyi dú Zherüzalɛmɛ̀n anmàn ɛkɔrɛ̀ nɔn, nyàn n'ankà-dɔ̀: Nyɛ́n hán eci kè ci ankà hɔ̀n léyi mɛ̀n dɔ́ Ɔwɔ-fɛcüè hɔ̀n léyi dú Galasi anmàn nɔn hɩ wú. 2Ɛnyànman-bì lɔ fɛn ɔwrɔnwrɔn kɛ̀ hɛ́n ɔhɔ́nan n'eyri ɛbemɛ̀n eci-fɔn-ci léyi nɛ́n cɔ̀ nɔn, ô ye bɩ́ vrá m'ɛvá bì lɔ, yakɛ yɛ fɔ́n eci. 3Ɛnvra léyi mɛ lɛ và nɔn, me le sɩ́ anwrɔn hɔ̀n léyi nyɛ́n mrɛ́n nyɛ́n bɩ, mɛ lɛ tán yɔ ɔkɔ̀hɔ̀n-wá wrú, yɔ bɩ́ ny'eci-fɔ́n-ci lɔ yɔ hɔ́n Zherüzalɛmɛ̀n anmàn. 4Kɩ ke dú kɛ ke ji le mɛ̀n mán mɛ́n hɔ́n nanvrɛn lɔ hô, yɔ mɛhi bɔ́ lɛ hɔ̀n.
Pɔlɛ̀n kɔ̀hɔ̀n-ci-hán
5Mɛ lɛ vá ny'edúyri, ɛnvra léyi ɔtrɔmɛ̀n lɔ me le ci Masedùhanɛ̀n kpɔsɔ wú, ɔmuhi me le ci nanvrɛn lɔ nɔn. 6Me bú tán le mɛ lɛ yɛ́ ny'edúyri ɛnvra jan, ɛshɛ̀ mumù lɔ fɛn; zɛtɛn, nyɛ lɛ wá mɛ̀n ɛkɔrɛ̀ m'ɛyri-hɔ́n mɛ̀n lɔ, ke dú ɛyri totɔtɔ̀n léyi mɛ lɛ hɔ̀n nɔn mán. 7Ɔmuhi mɛ́n sɩ́ ji mɛ̀n kán nyɛ̀n m'eciemɛ̀n tɛ̀kɩ. Mɛ ẅɛn esɛ́ le Ɛẅɛnwrɔn kɛ lɛ tán ɛkɔrɛ̀-levri mɛ̀n yɛ́ ny'edúyri ɛnvra jan. 8Tɛ́n, mɛ wá le mɛ̀n yɛ́ Efɛzɛ̀n anmàn, hàn kɩ kɛ̀ cɔ́ Ɛnhɛ́n-Prɔnprɔn nyànmán-bì lɔ. 9Ɔmuhi ɛnvra anvrɛnvrɛn tɔ̀n kɛ wá tán mɛ̀n vɔ̀nshɛ́ ci-hán tɔ̀n, kɩ mɛ̀n nyri ɔmu le ɛgbri-bɔ̀ cüɛn. 10Ke dú kɛ Timote kɛ và hô, nyɛ́n hán tán, ô ny'edúyri ci zriɛmɛ́n ke bɩ́ wú nɛ̀n edù, ɔmuhi nɛ hán ɔkɔ̀hɔ̀n kɛ hán mɛ̀n hɔ́, Ɛẅɛnwrɔn kɔ̀hɔn lɔ mɛ̀n nɔn. 11Ke sɩ́ ji le ɔwrɔn zriɛmɛ́n kè gbri nɛ̀n. Zrɔ tán le nyɛ́n wá nɛ̀n ɛkɔrɛ̀ nɛ̀n dú anwɔwɔmɛ̀n n'ɛyri-hɔ́n lɔ mɛ̀n, ô nɛ̀n cɔ́ ɛyri nɛ̀n vru nɛ̀n vá mɛ̀n ɛtɛ̀sɛ̀n, ɔmuhi mɛ̀n mán anwrɔn-nɛ́n-muan-ẅi hɔ̀n mɛhi bɔ́ vrá nɛ̀n nɔn. 12Bɔ́ muan-ẅì Apolɔsɛ̀n tɛn, me yɩ́ nɛ̀n edù ɛnvra zrizri ô nɛ̀n vá ny'edúyri nɛ́n mán anwrɔn-nɛ́n-muan-ẅì hɔ̀n ndɔ hɔ̀n lɔ mɛhi, tɛ́n nɛ́n sɩ́ ji nɛ̀n hán yi ci lɔ zɛtɛ̀ lɔ. Tɛ́n, nɛ lɛ vá nanvrɛn ɛnvra léyi nɛ lɛ cɔ́ eci-hán kɔrɛ̀-levri nɔn.
Ɛmɛẅitrɔ ankà-kran-yé mán ebinyan
13Nyɛ́n yɛ́ ɛshishiemɛ̀n ankaẅì-bùtan-ẅɛn mɛ̀n, nyɛ́n ẅɛn edùyì, nyɛ́n ẅɛn ecüì. 14Eci lɔ fɛn hán mɛ̀n lɔ nyɛ́n ẅɛn ɛcüɛ̀n. 15Nyɛ́n nyri Stefanasɛ̀n mán n'ɛmɛ̀n mɛ̀n-bɔ̀; nyɛ́n nyrì le Akahi kpɔsɔ wú lɔ, yɔ dú ɛnvrakpà-bɔ̀ léyi crɔn ɛnkru, kɩ yɔ dú fɛcüè krubɔrɛ ci-bɩ̀tan-kɔ̀hɔ́n mɛ̀n. Anwrɔn-nɛ́n-muan-ẅì hɔ̀n, zɛtɛn mɛ sán nyɛ̀n ndɔ lɔ: 16nyɛ́n teze ny'edomɛ̀n nyɛ́n tán anwrɔn ɔmu hɔ̀n lɔ mán yɔ hɔ̀n léyi yɔ mɛhi yɔ hán ɔkɔ̀hɔ̀n edùyiemɛ̀n nɔn, kɛ̀ nyrɔn nyɛ̀n. 17Mɛ̀n dú ɛnbɔrɛ-bruemɛ̀n, ɔmuhi stefanasɛ̀n, Fortünatüsɛ̀n mán Akahiküsɛ̀n kɛ và nɔn. Yɔ tán mɛ̀n eci léyi kɛ ẅɛn mɛ̀n ɛmìan ɛnvra léyi mɛ̀n sɩ̀ cɔ́ nyɛ̀n ɛkán yri nɔn, 18kɩ yɔ tán mɛ̀n ɛnbɔrɛ-bi-wá, hán ɔmu le yɔ hán yɔ tán nyɛ̀n nɔn. Nyɛ́n nyrì mrɛ́n anwrɔn ɔmu hɔ̀n lɔ! 19Ɔwɔ-fɛcüè-bɔ̀ léyi dú Azi kpɔsɔ wú nɔn ke bi nyɛ̀n nyan. Akilasɛ̀n, Prisilɛ̀n mán Ɔwɔ-fɛcüè léyi yɔ mɛhi yɔ bɔrɛkru y'edúyri nɔn, ke yüre nyɛ̀n y'ɛnbɔrɛ ankrankran binyan Ɛẅɛnwrɔn mɛhi y'ɔbɔ̀sɔ̀ lɔ mɛ̀n. 20Anwrɔn-nɛ́n-muan-ẅì hɔ̀n lɔ fɛn léyi dú ɛnu lɔ nɔn, ke bi nyɛ̀n nyan. Nyɛ́n bí ny'edomɛ̀n nyɛ́n nyan ɔwrɔn-nɛ́n-muan-ẅì mùan-sɔ́n mɛ̀n. 21Mɛ́n dùku m'antamɛ̀n de me merɛ́n ankà-dɔ̀ ndɔ hɔ̀n lɔ nɔn: Pɔlɛ̀n binyan. 22Ke dú kɛ ɔwrɔn tɔ̀n ke sɩ́ cüɛn Ɛẅɛnwrɔn hô, muzhie kɛ̀ bó nɛ̀n! Maranata, Bɔ́ Ɛẅɛnwrɔn, và! 23Ɛẅɛnwrɔn Zhezü boafɔ̀n kè dú nyɛ̀n ɛmɛ̀n. 24Mɛ cüɛn nyɛ lɛ fɛn Zhezü Krisì mɛhi b'ɔbɔ̀sɔ̀ lɔ mɛ̀n.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.