1 Korɛntɛ̀n anmàn-bɔ̀ 11
11
1Nyɛ́n bɩ́ mɛ́n sɛnpò lɔ, hán ɔmu le me bɩ́ Krisì tɛn lɔ nɔn.
Ke ji le ɛnnyɔnwrɔn kɛ̀ vá eci ɛnkru Ɔwɔ-sɛ̀n ci-hán mɛ̀n
2Mɛ mrɛ́n nyɛ̀n: m'ankà ke bru nyɛ̀n eci lɔ fɛn hán mɛ̀n kɩ nyɛ ẅɛn m'ankà-yé hɔ̀n lɔ nyɛ hɛ́n. 3Tɛ́n, me ji le nyɛ́n nyri ankà ndɔ lɔ: Krisì dú Ɔwrɔn totɔtɔ̀n lɔ fɛn n'ɛfra-wrɔn, ɛnnyɔnwrɔn-nɛ́n-cüì dú ɛnnyɔnwrɔn fra-wrɔn, kɩ Ɔwɔ dú Krisì fra-wrɔn. 4Kɩ ke dú kɛ, Ɔwɔ-sɛ̀n ci-hán mɛ̀n lɔ, ɔwrɔn tɔ̀n kɛ vá eci ɛnkru ɛnvra léyi nɛ sɛ́n Ɔwɔ mán ɛnvra léyi nɛ dɔ́ ɛmɛẅi ankà léyi nɛ̀n cɔ́ Ɔwɔ yri nɔn, ne wore Krisì. 5Tɛ́n ke dú kɛ ɛnnyɔnwrɔn ke teze ɛnkru woro ɛnvra léyi ne dú Ɔwɔ-sɛ́n mɛ̀n mán Ɔwɔ mɛẅi ankà-dɔ́ mɛ̀n, ne wore nɛ́n cüì; nɛ́n dù nɛ̀n hán ɛnnyɔnwrɔn léyi yɛ kua ɛnkru-kpata nɔn. 6Ke dú kɛ ɛnnyɔnwrɔn tɔ̀n ke sɩ́ vá eci ɛnkru, ɛkɔrɛ̀-levri dù nɛ lɛ kua ɛnkru! Tɛ́n dú anvɛvrà tán ɛnnyɔnwrɔn ke dú kɛ nɛ kua ɛnkru kɩ nɛ wán ɛnkru, zɛtɛn ke ji le nɛ̀n vá eci ɛnkru. 7Ɛncɔnwrɔn kè sɩ̀ ẅɛ̀n eci ɛnkru vá, ɔmuhi nɛ̀n dú Ɔwɔ picɛ̀ mán n'eci-zrɔ nɔn. Tɛ́n ɛnnyɔnwrɔn ke yé ɛncɔnwrɔn ci-zrɔ; 8annanwɔrɛ mɛ̀n lɔ, ye sɩ̀ bɩ ɛnnyɔnwrɔn ci zriɛmɛ́n yɛ hàn ɛncɔnwrɔn, tɛ́n ɛnnyɔnwrɔn de ye bɩ́ ɛncɔnwrɔn domɛ̀n ci yɛ hán nɔn. 9Kɩ ye sɩ̀ hàn ɛncɔnwrɔn ɛnnyɔnwrɔn kruhú, tɛ́n ɛnnyɔnwrɔn de yɛ hán ɛncɔnwrɔn kruhú nɔn. 10Hɩ le kruhú de, Ɔwɔ-kùyüre-bɔ̀ kruhú ke ji le ɛnnyɔnwrɔn kɛ̀ vá eci ɛnkru, ndɔ lɔ ke yé tán le nɛ lɛ cɔ́ Ɔwɔ-sɛ̀n ci-hán kɔrɛ̀levri. 11Tɛ́n, bɔ́ mán Ɛẅɛnwrɔn mɛhi bɔ́ ɛwúvà lɔ mɛ̀n, ɛnnyɔnwrɔn kè sɩ̀ dù ɔhɔnán kɩ ɛncɔnwrɔn mán kè sɩ̀ dù ɔhɔnán kɛ̀ tán y'edomɛ̀n. 12Ɔmuhi, ɔmu zri léyi ye bɩ́ ɛncɔnwrɔn domɛ̀n ci yɛ hán ɛnnyɔnwrɔn nɔn, ɔmu zri lɔ de ɛnnyɔnwrɔn ke bî ɛncɔnwrɔn, kɩ eci lɔ fɛn dú Ɔwɔ yri nvà. 13Nyɛ́n dùku nyɛ́n nyan: zrɔ tán le ɛnnyɔnwrɔn kè teze ɛnkru woro Ɔwɔ-sɛ̀n ci-hán mɛ̀n hàn? 14Ɛwúvà dùku ke yé le kè sɩ̀ zrɔ̀ tàn ɛncɔnwrɔn kɛ̀ hɛ́n ɛnkruẅie she, 15tɛ́n dú ɛmrɛ́n tán ɛnnyɔnwrɔn kɛ̀ ẅɛn ɛnkruẅie she ɔmu lɔ. Annanwɔrɛ mɛ̀n lɔ, yɛ tán ɛnnyɔnwrɔn ɛnkruẅie she, ô kè dú n'ezì-vá ci. 16Tɛ́n ke dú kɛ, ɔwrɔn tɔ̀n ke ji ecüìwrɔn ankà ndɔ lɔ mɛ̀n hô, nɛ̀n nyri ndɔ lɔ tɛ̀kɩ: Ɔwɔ-fɛcüe-bɔ̀ dùku mán, bɔ́ dùku mán, bɔ̀ sɩ̀ ẅɛ̀n edù-ci nyàntɛn Ɔwɔ-sɛ̀n ci-hán mɛ̀n.
Ɛẅɛnwrɔn ci-zî
17Ankà nyàntɛn hɔ̀n dɔ́ mɛ̀n lɔ, mɛ́n sɩ̀ mrɛ́n nyɛ̀n rɔ́, ɔmuhi ny'ɛkrubɔrɛ hɔ̀n lɔ kɛ tán nyɛ̀n ɛgbàn kɛ vrán anvrɛn. 18Ɛnvrakpà ci, yɛ dɔ́ mɛ̀n le ɛnvra léyi nyɛ ẅɛn ɛkrubɔrɛ nɔn, ny'ɛmɛ̀n lɔ egbrì kpɔsɔ ndù, kɩ me bú tán ankaẅì cá. 19(Ke ji le ɛsɔ̀nvoyan kè dú nyɛ̀n ɛmɛ̀n, ô ye nyri ny'ɛmɛ̀n lɔ ɔmùan-zri-di-bɔ̀ annanwɔrɛ.) 20Ɛnvra léyi nyɛ bɔrɛ ny'edomɛ̀n ɛkru nɔn, kè sɩ̀ dù Ɛẅɛnwrɔn ci-zî de nyɛ́n bɩɛ nɔn: 21annanwɔrɛ mɛ̀n lɔ, ɛnvra léyi nyɛ yɛ́ tɛbrɛ̀ wú nɔn, ɔwrɔnwrɔn ke cüi-edù ke zî nɛ́n dùku n'ɛci, kɛ hán tán kɩ anwrɔn ndɔ hɔ̀n ɔmùanwù kɛ ẅɛ̀n, tɛ́n ndɔ hɔ̀n kɛ kɔ́n ɛntàn. 22Nyɛ́n sɩ̀ ẅɛ̀n ny'ebɩ́, nyɛ́n zî ɛci, nyɛ́n mi ɛnshi ɛmɛ̀n hàn? Kale nye gbri Ɔwɔ-fɛcüè kɩ nye ji nyɛ́n trɔ anwrɔn hɔ̀n léyi kè sɩ̀ ẅɛn eci zriɛmɛ́n nɔn ezìɛ? Ankà tán de nyɛ vrá, ô mɛ̀n dɔ́ nyɛ̀n nɛ́n? Ke ji le mɛ̀n mrɛ́n nyɛ̀n hàn? Hɔ̂, annanwɔrɛ mɛ̀n lɔ, mɛ́n sɩ̀ mrɛ́n nyɛ̀n rɔ́!
23Annanwɔrɛ mɛ̀n lɔ, nyàn ankà-yé léyi mɛ̀n cɔ́ Ɛẅɛnwrɔn yri hɩ mɛ̀n tán nyɛ̀n nɔn: Ɛẅɛnwrɔn Zhezü, ɛnnyran léyi yɛ lɛ ẅɛn nɛ̀n nɔn, bɩ́ abùtùkumɛ́n 24kɩ, ɛnvra léyi nɛ̀n tán Ɔwɔ ɔkùɛn trɔ nɔn, nɛ̀n voyan abùtùkumɛ́n lɔ kɩ nɛ dɔ̀ le: “Ndɔ lɔ dú m'edùwrú léyi dú nyɛ tɛn nɔn. Nyɛ́n hán ndɔ lɔ m'ankà-tro mɛ̀n.” 25Ɔmu zri lɔ, ɛci-zî trɔ mɛ̀n lɔ, nɛ̀n bɩ́ ɛntàn grashɛ̀n lɔ kɩ nɛ dɔ̀ le: “Grashɛ̀n ndɔ lɔ dú Ɔwɔ mìrɛ̀n wrù léyi m'ɛnkrɛ̀ di nɛ́n dalɛfuɛ nɔn. Ɛnvra totɔtɔ̀n léyi nye le mi nɛ̀n nɔn, nyɛ́n hán nɛ̀n m'ankà-tro mɛ̀n.” 26Annanwɔrɛ mɛ̀n lɔ, hàn kɩ kɛ lɛ cɔ́ ɛnvra léyi Ɛẅɛnwrɔn kɛ lɛ và nɔn, nyɛ dɔ́ n'ɔwú ankà, ɛnvra lɔ fɛn léyi nyɛ rá abùtùkumɛ́n ndɔ lɔ kɩ nye mi ɛntàn grashɛ̀n ndɔ lɔ nɔn. 27Hɩ le kruhú de, ɔwrɔn léyi kɛ rá Ɛẅɛnwrɔn abùtùkumɛ́n lɔ kɩ ke mi n'ɛntàn grashɛ̀n lɔ ɛnbrá mɛ̀n nɔn, nɛ hán ɛgbàn ku Ɛẅɛnwrɔn dùwrú mán n'ɛnkrɛ̀ lɔ ɛwú. 28Ke ji le ɔwrɔnwrɔn kɛ̀ crɛn nɛ́n dùku n'edomɛ̀n, ô zɛtɛn nɛ̀n rá abùtùkumɛ́n ndɔ lɔ, ô nɛ̀n mi ɛntàn grashɛ̀n ndɔ lɔ; 29ɔmuhi ke dú kɛ ɔwrɔn tɔ̀n kɛ rá abùtùkumɛ́n kɩ ke mi ɛntàn grashɛ̀n lɔ, kɩ kè sɩ̀ nyrì Ɛẅɛnwrɔn domɛ̀n ankà léyi dú nɛ̀n ɛmɛ̀n nɔn, ɔmu lɔ, ne bi Ɛẅɛnwrɔn mrɛ̀ncì sɩ́ nɛ́n dùku n'ɛwú. 30Ankà ndɔ lɔ kruhú de bobrebe ny'ɛmɛ̀n lɔ cɔ́ ɛnlɔẅiɛ mán ɛjɛ̀ kɩ bobrebe ndɔ hɔ̀n nwù. 31Ke dú kɛ bɔ́ bukru bɔ́ crɛ́n bɔ́ dùku bɔ́ edomɛ̀n, bɔ́ lɛ mrɛ́n bɔ́ edomɛ̀n Ɔwɔ mrɛ̀nci mɛ̀n bɔ̀ sɔhɔ́. 32Tɛ́n Ɛẅɛnwrɔn ke ci bɔ̀ ɛmrɛ̀n kɩ kɛ ẅɛn bɔ̀ nukù, ô ye bɩ́ bɔ́ bɔ̀ nwù bɔ́ mán ɛnhibù mɛhi.
33Ɔmu lɔ, anwrɔn-nɛ́n-muan-ẅì hɔ̀n, ɛnvra léyi nyɛ bɔrɛ ny'edomɛ̀n ɛkru, ô nyɛ́n bɩ́ Ɛẅɛnwrɔn ci-zî lɔ nɔn, nyɛ́n yá ny'edomɛ̀n. 34Ke dú kɛ ɔwrɔn tɔ̀n ɔmùanwù kɛ ẅɛ̀n, ke ji le nɛ̀n zî ɛci n'eyri ɛbemɛ̀n, ô nyɛ́n bɩ́ sɩ́ Ɔwɔ mrɛ̀ncì nyɛ́n tán ny'edomɛ̀n ny'ɛkrubɔrɛ hɔ̀n lɔ mɛ̀n. Tɛ́n ankà nyàntɛn ndɔ hɔ̀n léyi ndù nɔn, mɛ lɛ dɔ́ y'ankà ɛnvra léyi me le dú nyɛ̀n ɛmɛ̀n nɔn.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.
1 Korɛntɛ̀n anmàn-bɔ̀ 11
11
1Nyɛ́n bɩ́ mɛ́n sɛnpò lɔ, hán ɔmu le me bɩ́ Krisì tɛn lɔ nɔn.
Ke ji le ɛnnyɔnwrɔn kɛ̀ vá eci ɛnkru Ɔwɔ-sɛ̀n ci-hán mɛ̀n
2Mɛ mrɛ́n nyɛ̀n: m'ankà ke bru nyɛ̀n eci lɔ fɛn hán mɛ̀n kɩ nyɛ ẅɛn m'ankà-yé hɔ̀n lɔ nyɛ hɛ́n. 3Tɛ́n, me ji le nyɛ́n nyri ankà ndɔ lɔ: Krisì dú Ɔwrɔn totɔtɔ̀n lɔ fɛn n'ɛfra-wrɔn, ɛnnyɔnwrɔn-nɛ́n-cüì dú ɛnnyɔnwrɔn fra-wrɔn, kɩ Ɔwɔ dú Krisì fra-wrɔn. 4Kɩ ke dú kɛ, Ɔwɔ-sɛ̀n ci-hán mɛ̀n lɔ, ɔwrɔn tɔ̀n kɛ vá eci ɛnkru ɛnvra léyi nɛ sɛ́n Ɔwɔ mán ɛnvra léyi nɛ dɔ́ ɛmɛẅi ankà léyi nɛ̀n cɔ́ Ɔwɔ yri nɔn, ne wore Krisì. 5Tɛ́n ke dú kɛ ɛnnyɔnwrɔn ke teze ɛnkru woro ɛnvra léyi ne dú Ɔwɔ-sɛ́n mɛ̀n mán Ɔwɔ mɛẅi ankà-dɔ́ mɛ̀n, ne wore nɛ́n cüì; nɛ́n dù nɛ̀n hán ɛnnyɔnwrɔn léyi yɛ kua ɛnkru-kpata nɔn. 6Ke dú kɛ ɛnnyɔnwrɔn tɔ̀n ke sɩ́ vá eci ɛnkru, ɛkɔrɛ̀-levri dù nɛ lɛ kua ɛnkru! Tɛ́n dú anvɛvrà tán ɛnnyɔnwrɔn ke dú kɛ nɛ kua ɛnkru kɩ nɛ wán ɛnkru, zɛtɛn ke ji le nɛ̀n vá eci ɛnkru. 7Ɛncɔnwrɔn kè sɩ̀ ẅɛ̀n eci ɛnkru vá, ɔmuhi nɛ̀n dú Ɔwɔ picɛ̀ mán n'eci-zrɔ nɔn. Tɛ́n ɛnnyɔnwrɔn ke yé ɛncɔnwrɔn ci-zrɔ; 8annanwɔrɛ mɛ̀n lɔ, ye sɩ̀ bɩ ɛnnyɔnwrɔn ci zriɛmɛ́n yɛ hàn ɛncɔnwrɔn, tɛ́n ɛnnyɔnwrɔn de ye bɩ́ ɛncɔnwrɔn domɛ̀n ci yɛ hán nɔn. 9Kɩ ye sɩ̀ hàn ɛncɔnwrɔn ɛnnyɔnwrɔn kruhú, tɛ́n ɛnnyɔnwrɔn de yɛ hán ɛncɔnwrɔn kruhú nɔn. 10Hɩ le kruhú de, Ɔwɔ-kùyüre-bɔ̀ kruhú ke ji le ɛnnyɔnwrɔn kɛ̀ vá eci ɛnkru, ndɔ lɔ ke yé tán le nɛ lɛ cɔ́ Ɔwɔ-sɛ̀n ci-hán kɔrɛ̀levri. 11Tɛ́n, bɔ́ mán Ɛẅɛnwrɔn mɛhi bɔ́ ɛwúvà lɔ mɛ̀n, ɛnnyɔnwrɔn kè sɩ̀ dù ɔhɔnán kɩ ɛncɔnwrɔn mán kè sɩ̀ dù ɔhɔnán kɛ̀ tán y'edomɛ̀n. 12Ɔmuhi, ɔmu zri léyi ye bɩ́ ɛncɔnwrɔn domɛ̀n ci yɛ hán ɛnnyɔnwrɔn nɔn, ɔmu zri lɔ de ɛnnyɔnwrɔn ke bî ɛncɔnwrɔn, kɩ eci lɔ fɛn dú Ɔwɔ yri nvà. 13Nyɛ́n dùku nyɛ́n nyan: zrɔ tán le ɛnnyɔnwrɔn kè teze ɛnkru woro Ɔwɔ-sɛ̀n ci-hán mɛ̀n hàn? 14Ɛwúvà dùku ke yé le kè sɩ̀ zrɔ̀ tàn ɛncɔnwrɔn kɛ̀ hɛ́n ɛnkruẅie she, 15tɛ́n dú ɛmrɛ́n tán ɛnnyɔnwrɔn kɛ̀ ẅɛn ɛnkruẅie she ɔmu lɔ. Annanwɔrɛ mɛ̀n lɔ, yɛ tán ɛnnyɔnwrɔn ɛnkruẅie she, ô kè dú n'ezì-vá ci. 16Tɛ́n ke dú kɛ, ɔwrɔn tɔ̀n ke ji ecüìwrɔn ankà ndɔ lɔ mɛ̀n hô, nɛ̀n nyri ndɔ lɔ tɛ̀kɩ: Ɔwɔ-fɛcüe-bɔ̀ dùku mán, bɔ́ dùku mán, bɔ̀ sɩ̀ ẅɛ̀n edù-ci nyàntɛn Ɔwɔ-sɛ̀n ci-hán mɛ̀n.
Ɛẅɛnwrɔn ci-zî
17Ankà nyàntɛn hɔ̀n dɔ́ mɛ̀n lɔ, mɛ́n sɩ̀ mrɛ́n nyɛ̀n rɔ́, ɔmuhi ny'ɛkrubɔrɛ hɔ̀n lɔ kɛ tán nyɛ̀n ɛgbàn kɛ vrán anvrɛn. 18Ɛnvrakpà ci, yɛ dɔ́ mɛ̀n le ɛnvra léyi nyɛ ẅɛn ɛkrubɔrɛ nɔn, ny'ɛmɛ̀n lɔ egbrì kpɔsɔ ndù, kɩ me bú tán ankaẅì cá. 19(Ke ji le ɛsɔ̀nvoyan kè dú nyɛ̀n ɛmɛ̀n, ô ye nyri ny'ɛmɛ̀n lɔ ɔmùan-zri-di-bɔ̀ annanwɔrɛ.) 20Ɛnvra léyi nyɛ bɔrɛ ny'edomɛ̀n ɛkru nɔn, kè sɩ̀ dù Ɛẅɛnwrɔn ci-zî de nyɛ́n bɩɛ nɔn: 21annanwɔrɛ mɛ̀n lɔ, ɛnvra léyi nyɛ yɛ́ tɛbrɛ̀ wú nɔn, ɔwrɔnwrɔn ke cüi-edù ke zî nɛ́n dùku n'ɛci, kɛ hán tán kɩ anwrɔn ndɔ hɔ̀n ɔmùanwù kɛ ẅɛ̀n, tɛ́n ndɔ hɔ̀n kɛ kɔ́n ɛntàn. 22Nyɛ́n sɩ̀ ẅɛ̀n ny'ebɩ́, nyɛ́n zî ɛci, nyɛ́n mi ɛnshi ɛmɛ̀n hàn? Kale nye gbri Ɔwɔ-fɛcüè kɩ nye ji nyɛ́n trɔ anwrɔn hɔ̀n léyi kè sɩ̀ ẅɛn eci zriɛmɛ́n nɔn ezìɛ? Ankà tán de nyɛ vrá, ô mɛ̀n dɔ́ nyɛ̀n nɛ́n? Ke ji le mɛ̀n mrɛ́n nyɛ̀n hàn? Hɔ̂, annanwɔrɛ mɛ̀n lɔ, mɛ́n sɩ̀ mrɛ́n nyɛ̀n rɔ́!
23Annanwɔrɛ mɛ̀n lɔ, nyàn ankà-yé léyi mɛ̀n cɔ́ Ɛẅɛnwrɔn yri hɩ mɛ̀n tán nyɛ̀n nɔn: Ɛẅɛnwrɔn Zhezü, ɛnnyran léyi yɛ lɛ ẅɛn nɛ̀n nɔn, bɩ́ abùtùkumɛ́n 24kɩ, ɛnvra léyi nɛ̀n tán Ɔwɔ ɔkùɛn trɔ nɔn, nɛ̀n voyan abùtùkumɛ́n lɔ kɩ nɛ dɔ̀ le: “Ndɔ lɔ dú m'edùwrú léyi dú nyɛ tɛn nɔn. Nyɛ́n hán ndɔ lɔ m'ankà-tro mɛ̀n.” 25Ɔmu zri lɔ, ɛci-zî trɔ mɛ̀n lɔ, nɛ̀n bɩ́ ɛntàn grashɛ̀n lɔ kɩ nɛ dɔ̀ le: “Grashɛ̀n ndɔ lɔ dú Ɔwɔ mìrɛ̀n wrù léyi m'ɛnkrɛ̀ di nɛ́n dalɛfuɛ nɔn. Ɛnvra totɔtɔ̀n léyi nye le mi nɛ̀n nɔn, nyɛ́n hán nɛ̀n m'ankà-tro mɛ̀n.” 26Annanwɔrɛ mɛ̀n lɔ, hàn kɩ kɛ lɛ cɔ́ ɛnvra léyi Ɛẅɛnwrɔn kɛ lɛ và nɔn, nyɛ dɔ́ n'ɔwú ankà, ɛnvra lɔ fɛn léyi nyɛ rá abùtùkumɛ́n ndɔ lɔ kɩ nye mi ɛntàn grashɛ̀n ndɔ lɔ nɔn. 27Hɩ le kruhú de, ɔwrɔn léyi kɛ rá Ɛẅɛnwrɔn abùtùkumɛ́n lɔ kɩ ke mi n'ɛntàn grashɛ̀n lɔ ɛnbrá mɛ̀n nɔn, nɛ hán ɛgbàn ku Ɛẅɛnwrɔn dùwrú mán n'ɛnkrɛ̀ lɔ ɛwú. 28Ke ji le ɔwrɔnwrɔn kɛ̀ crɛn nɛ́n dùku n'edomɛ̀n, ô zɛtɛn nɛ̀n rá abùtùkumɛ́n ndɔ lɔ, ô nɛ̀n mi ɛntàn grashɛ̀n ndɔ lɔ; 29ɔmuhi ke dú kɛ ɔwrɔn tɔ̀n kɛ rá abùtùkumɛ́n kɩ ke mi ɛntàn grashɛ̀n lɔ, kɩ kè sɩ̀ nyrì Ɛẅɛnwrɔn domɛ̀n ankà léyi dú nɛ̀n ɛmɛ̀n nɔn, ɔmu lɔ, ne bi Ɛẅɛnwrɔn mrɛ̀ncì sɩ́ nɛ́n dùku n'ɛwú. 30Ankà ndɔ lɔ kruhú de bobrebe ny'ɛmɛ̀n lɔ cɔ́ ɛnlɔẅiɛ mán ɛjɛ̀ kɩ bobrebe ndɔ hɔ̀n nwù. 31Ke dú kɛ bɔ́ bukru bɔ́ crɛ́n bɔ́ dùku bɔ́ edomɛ̀n, bɔ́ lɛ mrɛ́n bɔ́ edomɛ̀n Ɔwɔ mrɛ̀nci mɛ̀n bɔ̀ sɔhɔ́. 32Tɛ́n Ɛẅɛnwrɔn ke ci bɔ̀ ɛmrɛ̀n kɩ kɛ ẅɛn bɔ̀ nukù, ô ye bɩ́ bɔ́ bɔ̀ nwù bɔ́ mán ɛnhibù mɛhi.
33Ɔmu lɔ, anwrɔn-nɛ́n-muan-ẅì hɔ̀n, ɛnvra léyi nyɛ bɔrɛ ny'edomɛ̀n ɛkru, ô nyɛ́n bɩ́ Ɛẅɛnwrɔn ci-zî lɔ nɔn, nyɛ́n yá ny'edomɛ̀n. 34Ke dú kɛ ɔwrɔn tɔ̀n ɔmùanwù kɛ ẅɛ̀n, ke ji le nɛ̀n zî ɛci n'eyri ɛbemɛ̀n, ô nyɛ́n bɩ́ sɩ́ Ɔwɔ mrɛ̀ncì nyɛ́n tán ny'edomɛ̀n ny'ɛkrubɔrɛ hɔ̀n lɔ mɛ̀n. Tɛ́n ankà nyàntɛn ndɔ hɔ̀n léyi ndù nɔn, mɛ lɛ dɔ́ y'ankà ɛnvra léyi me le dú nyɛ̀n ɛmɛ̀n nɔn.
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.