O waamulha 7 的热门经文

分享

Apwiiya Nlhuku nkayeerelha Nagidioni wiira, “Attu aarina inyu phi enchi chinene uwannyaka mii, wo waakottolha attu o Umidiani. Paahi attu o Uisraeli ahiwe yeefuna umihoolho waka, ni uhimia wiira eechoponlhe wo machiri aya ashinene.

Apwiiya Nlhuku nkayeerelha Nagidioni wiira, “Wo yayo attu imia ttaru awunrie maashi wo ulhatha thoko mwalhapwa ayo, kinowoopolha attu o Uisraeli ni waakottolha attu o Umidiani. Nansho akina onkhaye alhe ahohokolhiacheke umanupani waya.”

Vano etu, nkhuwelhacheke wa attu onkhaye wiira, ntu riyothe o woova, ama notetemelha ahokolhieke uwannyawe, ni hii ninookhalha vava vamwaakoni Ugileadi va.” Paahi Nagidioni ahaalhika attu, ni attu maelufu makhumi melhi ni maelufu melhi ahokholhia uwani, nkayaahalha ni attu maelufu khumi.

Yamalheke, Apwiiya Nlhuku nkayeerelha Nagidioni, “Yayo attu ayo arii enchi chinene. Vano mwaarweheke umaraponi ni mii kinokowaalhikacha wowo. Ntu riyoothe nohalha aka ulhelhani wiira, ‘Ulha munttukaneke, yoyo munttukaneke. Nansho ntu riyoothe kinouhimeriakani wiira nhinttukane, yoyo nhittukane.’ ”

Paahi Nagidioni nkayanrweeha attu umaraponi ni Apwiiya Nlhuku nkayeerelha wiira, “Mwaamwalhaniheke attu anolhatha maashi thoko mwalhapwa, ni alhe anokhoromacha vanowuria aya maashi wo mathatha.” Attu aawunrie maashi wo urika ni miono chaya ni ulhatha thoko mwalhapwa ari attu imia ttaru. Nansho akina onkhaye aahanlhe ayo ahokhoroma uwuria maashi.